الثلاثاء، 25 يناير 2011

هيه العركة مع مين بالظبط ؟

هيه العركة مع مين بالظبط ؟

اليومين دول فيه حاجات غريبة بتحصل فى مصر ...او مش غريبة لان ده العادى من اهل ايجيبت ... مابيصدقوا يشوفوا حد عمل حاجة الا وجرى يعملوا زيه ... لغاية مابقت البلد كلها محلات موبيلات وسنترالات ومحلات بيتزا وكشرى .... وحكومة ظل وحكومة موازية ... وجمعيات حقوق الانسان بقت اكتر من الجمعيات الاستهلاكية بتاعة السبعينات ...دا غير الحركات الشعبية وحركات انتفاضية وحركات تحريرية ... وحركات مع وحركات ضد وحركات بتلزق بوسترات .... ومصر كبيرة عليك ومصر عزيزة عليك ومصر بتبوس ايديك ...وثورة غضب وانتماءات حزبية وانتماءات مهلبية ...وعصيان مدنى وخيبة ميرى ....وبرادعى وقبله عمرو موسى وبعدة سيد كفته ....والخلاصة محدش عارف هية العركة مع مين بالظبط ... ولامين واقف جنب مين ... ولا مين بيساند مين ... ولامين عايز ايه ولامين رايح فين ... ولامين معاه الحق ... ولاايه هوه الحق من اصله ... ولا هوه كلام صح ولا هوه كلام بنكررة زى البغبغنات ونحلف بايمانات المسلمين ان معانا مستندات ... ولا الحكومة عامله عبيطة ولا الشعب هوه اللى عبيط ولا احنا مش لاقين حاجة نعملها ولا احنا خلاص كلنا عجبتنا لعبة الزعامة ... ولا احنا عايزين نعيش على مزاجنا ونعمل اللى احنا عايزينه ونأنتخ والحكومة هية اللى تصرف علينا زى ما احنا قاعدين بنشارك ابونا وامنا العواجيز فى معاشهم ... ونستكبر ننزل نشتغل ب400جنية علشان الحد الادنى للاجور 1200 ...ولا مصر مستهدفة بجد ولا كلام علشان قانون الطوارئ يفضل سارى ... ولا قانون الطوارئ مدايقك فى ايه ... ولا اسرائيل وجيش الاسلام ابن القاعدة الصغير ولا حزب الله ولا ايران ... ولا غباء مسؤلين ... ولا الغبا اللى عشش فى عقول اهل ايجيبت ... ولانفسنا فى جنازة علشان نشبع فيها لطم ...ولا متاجرة بالغلابة اللى مايعرفوش عنوان جمعية حقوق الانسان فين من اصله ... ولاخيبة وقله عقل واحساس مميت بالدونية بيطلع على شكل زعامة منشودة ... والحل؟

الحل مش فى جمعية ولاحركة ولاوقفة ولا قاعدة احتجاجية ولا فيس بوك ولاتويتر ولا حتى مدونه بنطلغ فيها غلنا ... الحل ان احنا نبطل نسخن بعض ونسخن نفسنا ... الحل ان احنا نساعد بعض ونقف جنب بعض ... الحل ان احنا نرضى برزقنا ونسعى علشان نزودة مش نبص فى ايد غيرنا ونغل ونحسد ... الحل ان احنا نبطل نعمل اوصيا على بعض ...ونقبل بعض ونقبل نفسنا ... الحل ان احنا نخف من تطلعاتنا وفشخرتنا وتنطيتنا والعروسة الامورة اللى فرحانه بشبابها وجايبة مفرش السرير السورى بالفين جنية تجهز جنبها عروسة شبابها بيروح علشان الجوازة واقفة على كيسين مخدة وكليمه ... الحل ان احنا نرحم بعض ونقضى حوائج بعض ... الحل انا احنا نعيش عيشتنا وناكل اكلنا ونشرب شربنا ونتكلم لغوتنا ...ونفتخر .... الحل ان احنا نجرى ونكافح ونتعب ونشقى ونرجع البيت ناخد ولادنا فى حضننا ونعلمهم ونقلهم حبوا مصر حبوا بلدكم ومتسماعوش كلام الناس الشررين اللى عايزين يخربوها ...

الحل ان احنا نتقى ربنا ... كلنا نتقى ربنا ... من كبيرنا لصغيرنا نتقى ربنا ... ... يابويا ....تعبت

هناك 9 تعليقات:

  1. ربنا يجعلنا من المتقين

    ردحذف
  2. صدقني ومن ضمن الحلول ان احنا منتهمش نوايا الناس واذا كان فيه حد يقدر يغير سيبه اذا مكنتش عايز تساعده او خايف تساعده او بتقنع نفسك ان اللي هوه بيعملو غلط علشان ضميرك ميانبكش على الفرجة عليه ,
    ومن ضمن االحلول ان مش كل الناس وحشة ولا عملا ولا خونة حتى لو كنا مختلفين معاهم في الاصول والفروع ممكن يكونوا غلطانين لكنهم مش خونة ولا اعداء هما مفهمنوش علشان كده خدوا مواقفهم دي مننا ومن تفكيرنا والا يبقى احنا كمان كده
    كل الامور واضحة للي عايز يشوفها
    متزعلش مني بس مظنش ان احنا مختلفين كتير وعلشان كده انا رديت

    ردحذف
  3. الدكاترة مع بعض ، مالى أنا بالزمة ؟

    :)

    بصوا يا دكاترة ، أنا سمعت فى مرة لمصطفى محمود فى برنامجه العلم والايمان الحلقة اللى بتتكلم عن اليابان معجزة القرن العشرين .

    أنه فى اليابان لما بيعملوا مظاهرات ولا يكسروا ولا يحرقوا ده الشعب

    وفى المقابل الشرطة والأمن مبيعملوش حاجة غلط للشعب .

    يعنى فى اليابان الحالة أفضل من هنا بمراحل .

    كلا من الشعب والشرطة فى مصر بلطجية .

    وده اللى هيخليينى أحجم عن الذهاب بكرة .

    لكن أنا مع المظاهرات قلبا وقالبا طالما هنؤديها بطريقة سلمية تجيب لينا حقوقنا .

    واللى هيحصل بكرة مفيهوش سلم ولا فيه أخد حق .

    طيب أتعب نفسى ليه ؟

    يا دكتور واحد من الناس ( اعذرنى على عدم معرفة الاسم الحقيقى ) : -

    أنا كنت عاوز أرد على آخر مقال كتبته حضرتك بس بصراحة معرفتش أقول أيه ، أنا مش عارف الكنيسة خايفة من الأخوان ليه ؟ ومش عارف الأخوان والسلفيين هيعملوا اللى قالت عليه الكنيسة ولا لأ .

    أنا أظن أن حضرتك من الأخوان ، وفيها أيه ؟

    أنا مش عاوز أتجمل زى ما كتبت فى بوست قبل كده ، لكن عاوز أقول أن الأخوان مش بعبع وأنا مش بخاف منهم ، لسبب واحد وحيد : أنا أعز أصحابى من الأخوان وكنت ببيت عنده بمعدل ليلتين فى الاسبوع نذاكر سوا أو هو كان بيبيت عندى ، ومش عارف كنت أخاف من أيه مثلا ؟ هههههه الحياة كانت عادية خالص ، بس المشكلة دلوقتى أنه فى كلية غير كليتى ، بس لسة على علاقة محبة أخوية مع بعض .

    أتمنى أنه ميحصلش حاجة وحشة بكرة خاصة فى الموضوع الطائفى البغيض ده .

    نتايج بكرة لا يمكن اهمالها بأى شكل من الأشكال ، ويا رب يعدي على خير ، مش عارف ليه مش متفائل ؟

    ده مش هزار ، يا رب أستر .........

    عذرا للاطالة .

    ردحذف
  4. واحد من الناس
    الواضح انك قريت المكتوب باحكام مسبقة ... ولو كنت قريت دى : الحل ان احنا نبطل نعمل اوصيا على بعض ...ونقبل بعض ونقبل نفسنا . كنت عرفت انى مش (ان احنا منتهمش نوايا الناس واذا كان فيه حد يقدر يغير سيبه اذا مكنتش عايز تساعده او خايف تساعده او بتقنع نفسك ان اللي هوه بيعملو غلط علشان ضميرك ميانبكش على الفرجة عليه ,).. ((مش عارف مين فينا اللى بيعمل كده دلوقت))).... عموما انا مع اى حاجة تغير للاحسن بس بشرط منخربش ونحافظ على بلدنا ... علشان والله لو خربت حتخرب علينا كلنا .... وزمان قالو : لجموا ثورة الشباب بحكمة الشيوخ ...
    وانا مش زعلان منك

    ردحذف
  5. محب باشا
    والله يابنى انت اللى دكتور ورئيس قسم ورئيس جامعة اسيوط كمان ...انت فهمت قصدى ... واتمنى زيك بالظبط أنه ميحصلش حاجة وحشة بكرة ... وتحيا مصر لما يكون فيها شباب زيك
    عموما انا بقى متفائل ان المو ضوع حيعدى على خير لان الشعب دة مهما قال ومهما عمل لسة بيحب بلدة

    ردحذف
  6. د .اسلام , اذا كان فيه راي مسبق انا اخدته عنك فهوه انك انسان محترم مش اي حاجة تانية ولو عايز ارد عليك مش حيمنعني غير قول النبي ( خيركم من ترك المراء ولو كان محقا ) ,لان ده مش وقت ردود , لكني باختصار كنت منتظر من كل انسان مش عاجبه الحال انه يعلي صوته ويقول كفاية ظلم ويمسك على ايد اي واحد حاول يخرب بلدنا سواء كان من البلطجية الصغيريين او البلطجية الللي مشغلنيهم
    محب قالي ان اسمك زي اسمي يعني متشابهين حتى في الاسم وده شىء يشرفني زي ميضايقني اني اخسر معرفة اي انسان او سوء تفاهم مع اي حد

    ردحذف
  7. الله عليك والله كلامك تحفه انا برضه شايفه ان الحل مش فى المظاهرات وامبارح كنت بجد مش متحمسه انزل خالص النهارده وحاسه ان مافيش فايده وحتى مش رضيت اكتب بوست عشان ماحبطشى الناس وابقى ضد التيار وحاسه ان المظاهره دى مالهاش طعم بعد تونس وهنا مش زى هناك بكن الناس مش قادره تفهم ده

    ردحذف
  8. الحل مش فى المظاهرات؟؟؟؟؟؟

    يا أخى قول كلام غير ده

    امال الحل فى ايه نقعد فى بيوتنا ونقول ياا ااارب انا رجعتلك يااااا رب انا بتقيك وخايف منك يااااا رب مصر تتغير هو ده الحل عندك مش كده؟

    يبقى على الدنيا السلام بقى

    الحل فى الأخذ بالاسبااااااااااااااااااب

    الحل انك تقول فى وش الحكومه مش هخاف ومش هطاطى اصلى كرهت الصوت الواطى وتقولها من قلبك علشان على قد نيتك ربنا هيديك

    يا بخت اللى ماتوا شهداء فى الثوره

    عقبالى ياااااااااااااااااا رب

    ربنا يهديك ويهدينا

    ردحذف
  9. مدونة ماكفاية بقى
    انا ماقلتش الحل مش فى المظاهرات ... والله ماقولت كدة ... انا قولت :الحل مش فى جمعية ولاحركة ولاوقفة ولا قاعدة احتجاجية ولا فيس بوك ولاتويتر ولا حتى مدونه بنطلغ فيها غلنا... انا مش عايز ادخل فى جدل عقيم ... عموما انا حقول اللى عندى لما الهوجة تخلص ...
    ثانيا: امال الحل فى ايه نقعد فى بيوتنا ونقول ياا ااارب انا رجعتلك يااااا رب انا بتقيك وخايف منك يااااا رب مصر تتغير هو ده الحل عندك مش كده؟
    انت افترضتى ان ده قصدى ... ولو كان ده مفهومك عن التقوى ... يبقى عايز اعادة نظر
    ثالثا : ارجو اعادة قراءة البوست علشان تفهمينى مش علشان تردى علية. عموما البوست ده حيتقرا صح بس بعد اسبوعين من دلوقت ...
    رابعا :وده مش معناه انى عبقرينوا وشايف اللى محدش شايفة ... ولا عامل فيها قارئ للمستقبل
    اخيرا : قولتى : يابخت اللى ماتوا فى الثورة عقبالى يااااارب .. جمله محتاجة اعادة نظر ووقفة مع النفس ... وربنا يهديك ويهدينا للى فية الخير والمصلحة

    ردحذف