البداية من جديد حاجه حلوه ....... أو وحشة (1)
بقالى 25 سنه وانا باطلع سلالم عم ماسلو .... درجه درجه ... دور دور ....
وطبعا ماكانش فيه أى اسانسير ممكن اركبه.. او حتى كرسى بين كل دور والتانى علشان اريح علية واخد نفسى ... طلعت دور الاكل والشرب
.. وعديت على دور السكن والامان ... وتعبت جدا على ماوصلت لدور الجواز والعيال ...
ونفسى اتقطع لغاية ماوصلت لدور المدير والهيلمان و عبدة سيطرة ... مع انى والله
مدير طيب ... او انا شايف كدة ... واخيرا وصلت للدور الاخير .... دور الدماغ
العاليه والبحث عن الذات وعبدة نصايح... عملت مدونات وقولت اراء ... وشاركت فى
محاضرات ... قال ايه لرفع مستوى الشعب الفكرى والثقافى ..
وفجأه..... وبدون اى مقدمات .... وبدون سابق انذار ...وصل الى محل اقامه
المدعو ... خطاب من مجلس المدينه يخبره فيه بضرورة اخلاء العقار المذكور ... لحين
البت فى الترميم او الازاله وذلك حفاظا على الارواح والممتلكات.
وزى اسماعيل ياسين فى الطيران .... نزلت كر على سلالم عم ماسلو من السطح....
لبير السلم يامعلم .
طبعا خدت يومين استوعب فيهم القرار ... واتلقى سيول التعازى والدعوات
بالستر .. وكله نصيب وربنا شايلك الاحسن ...وماتعملش فى نفسك كدة .. دا ربنا كبير ..
وده مكتوب والمكتوب مامنوش هروب .... حسيت
ساعتها ....انى كافر وانى لازم اروح الازهر علشان اقول الشهادة .
بعد التعازى وجرعات الايمان والرضا بالمكتوب ... بدأت سيول الفتاوى .... ماتسمعش الكلام ... او
تسيب الشقة ... اعمل تظلم ... صاحب العمارة عامل كدة علشان يهدها ويطلع ببرج ...
دا كلام فارغ ما ياما بيوت مشرّخة وبقالها سنين وعدت من الزلزال.
جبت الميزان بتاع الاخوان المسلمين ... طبعا صلحته الاول علشان انتوا
عارفين انه مايل ... وخايب واهبل كمان ... غسلته كويس ... علشان انتوا سيد العارفين
ان مكانه زيت وسمنه ورز .... ورحت حاطط العيال وامهم فى كفه.... ووقوع العمارة ولو
بنسبة نص فى الميه فى الكفة التانية .... طبع مش عايزة كلام ..... كفة العيال
وامهم هيه اللى طبت ..ماهى امهم لسه بدأه تعمل رجيم من يومين .
....وقررت البحث عن شقة....
ليست هناك تعليقات:
إرسال تعليق