صواريخ تورتة ...... مرطبة

صواريخ تورتة ...... مرطبة

احنا الشعب الوحيد اللى عنده قدرة الهيه فى انه يعرف ايه اللى حيحصل الشهر الجاى... ويتعامل معاه النهاردة ... ويتنصل منه بكرة .... ويدور على حد يشيله الليله بعد بكره .... وينساااااااااه بعد بعده .

احنا الشعب الوحيد اللى براه غير اللى جواه .... اللى بيلبس طرحة واسترتش ... اللى بيلبس جلابية قصيرة ودقن ويمسك سكينة علشان يقتل اخوه وبعد مايقتله ... يقف يصلى ويقول ساووا الصف اثابكم الله .

احنا الشعب الوحيد اللى بيعمل ديكتاتورة من العجوة ... يعبده ويسجد له وبعدين ياكله ... ويتعامل مع النوى على انه لبوس .

احنا الشعب الوحيد اللى مش عارف هوه عايز ايه ... ولما يعرف يزن على خراب عشه .

احنا الشعب الوحيد اللى بيعمل كل حاجة فى الدنيا غير انه يشتغل ... حق الله بيشتغل نفسه ويحب موت..... اللى يشتغله.

احنا الشعب الوحيد اللى مش مقدر قيمة بلده اللى عايش فيها ... لا ويحرقها بايدة ويدور على اى حد يشيله المسؤلية .

اوعى تصدق ...زى ماكنت انا عبيط ومصدق... ان هوه اللى حارب التتار والصليبين ... علشان اللى مش واخد بالك منه زى انا ماكنت مش واخد بالى منه ... ان اللى حارب التتار قطز وبيبرس اللى هما مش مصريين ....واللى حارب الصليبيين صلاح الدين اللى هوه مش مصرى ... واللى عمل فى مصر نهضة ... كان محمد على اللى برضه مش مصرى .
اوعى تصدق ان مصر منورة بأهلها ... الحقيقة ان مصر احسن واحلى واعظم واكبر من غير اهلها وان كان على النور ... فمش اكتر من نور صاروخ تورته بينطفى قبل حتى ماتولع اللى بعده.

سؤال :

يمكن ياجماعة اكون حمار حصاوى ومابفهمش ... بس الليله بتقول المجلس العسكرى يسلم السلطة و يمشى فى الميعاد .... طيب ماشى ... هوه الميعاد جه وهوه ممشاش ؟!!؟!!