الاثنين، 3 فبراير، 2014

الجلاد 2

الجلاد 2
نكمل موضوع الجلاد ونقول :
الجلاد مش بس بيحافظ على الحاجة من البهدلة ... لا ده كمان بيدى الحاجة اللى ماتساويش ... قيمة وسيما ... عندك مثلا لو جبت هدية رخيصة ... لكن لفتها بجلاد شيك وعملتلها فيونكة ... على طول قيمتها حتزيد بريق وجاذبية... جرب حط جلاد محترم مزهز تحت طقم الصينى ال999 قطعة ابو تلتميت جنية اللى من بتاع  غير مصاريف الشحن ... حيبان على طول انه طقم صينى محترم اصلى وارد تركيا وممضى من السيد اوردغان بذات نفسه .
ومن اهم وظائف الجلاد... انه بيدارى الوساخة ... يعنى لو عندك كتاب اندلق عليه شاى او كركدية وبلغة العامة كركرية  ... الجلاد يخليه جديد لنج ... لو الازاز اللى اتشرخ ... لزقت عليه جلاد ... حيبقى زوق فنى رائع وتاتشة طليانى ...
كل ده عادى ... اللى مش عادى .. او كنت فاكرة مش عادى بس طلع عادى .... ان احنا كمان كبنى ادمين بنستخدم الجلاد ... ايوه كلنا بنستخدم الجلاد علشان نحمى نفوسنا ونحلى تصرفاتنا والاهم ندارى وساخاتنا ... عندك مثلا لما يكون فيه عميل وجاسوس وخاين ... تلاقية يحط جلاد الوطنية والثورية والحرية والعداله الاجتماعية ... عندك مثلا الارهابى القاتل المجرم السيكوباتى كاره نفسه ... تلاقية حاطط جلاد نصرة الدين ورفع راية الاسلام ... عندك انصاف المثقفين وارباع المتعلمين الواحد فيهم حاطط جلاد المحلل السياسى والمحنك الاستراتيجى ...عندك الصايع الفاشل الخامورجى اللى عمره ما عمر ( بتشديد الميم ) فى شغلانه ... تلاقية حاطط جلاد الناشط السياسى والقيادى الحقوقى ...
لاحظ ان نوعية الجلاد مع الناس دى لازم يكون من الجلاد الفخم المستورد الغالى ... لكن زى اى حاجة فى الدنيا ... درجات ... عندك نوعية تانية غلبانه ... بتسترخص الجلاد ... عندك مثلا الست اللى بتشتغل علشان نفسها واثبات ذاتها وكيانها ......تحط جلاد علشان مستقبل العيال ... الست اللى نفسها تغير عفش الشقة وتشترى اللى نفسها فيه علشان تعوض ايام الفقر والجهاز اللى جالها بالتقسيط وجوزها مش راضى .... تحط جلاد البنات على وش جواز وعايزين نشرفهم قدام العرسان ( دا على اساس ... حوش حوش العرسان اللى بتقع )...الراجل اللى عايز يلحق سبنسة قطر العمر وعايز يتجوز تانى ... يحط جلاد حل مشكلة العنوسة واحياء سنة الرسول ....وعندك وعندك وعندك ... كلنا حاطين جلاد .... بس اللى مش واخدين بالنا منه ... انه جلاد شفاف ... مبين كل حاجة ... جلاد شفتشى كاشف كل عوارتنا .... اقولكوا المفاجأة ....
احنا ...مش ... مش .... واخدين بالنا ... احنا بنستعبط ... 


ليست هناك تعليقات:

إرسال تعليق