الخميس، 27 فبراير، 2014

مضاد غنى(2)

مضاد غنى (2)

انك تجيب اللى انت عايزة فى الوقت اللى انت عايزة من غير ماتدور على جمعية ولا تعمل استبدال معاش... اكيد دى  تبقى حاجة جميلة .
انك لما تتعب تروح تتعالج فى مستشفى خاص تعاملك على انك بنى ادم علشان بتدفع لها ... وماتضطرش تروح مستشفى الكلب المعروفة اعلاميا بمستشفى وزارة الصحة ... اكيد دى تبقى حاجة جميلة .
لما تتجوز البت اللى بتحبها وماينكسرش قلبك وماتضطرش تكمل حياتك مع اللى وافقت على ظروفك المادية .... اكيد دى  تبقى حاجة جميلة .
لما تسكن فى شقة بتبص على مية البحر مش على مية المجارىولا شركة الصرف الصحى .... اكيد دى  تبقى حاجة جميلة .
لما تلاقى الناس بتحترمك وتبررلك افعالك وتيجى فى صفك وتقف معاك من منطلق الغنى غنوله والفقير اردحوله .. اكيد دى  تبقى حاجة جميلة .
الله ؟؟!! ... ماالغنى حاجة جميلة اهوه ... امال مبتبقاش غنى ليه ؟!!
أقولك انا :
علشان فهموك ان الرزق مكتوب ولما تعمل ايه مش حيتغير ... دا طبعا على اساس انهم قاريين كتابك من الجلدة للجلدة وعارفين انه مكتوب عليك الفقر.
علشان فهموك ان الرضا انه لما يكون معاك علبة السجاير وتمن ساندوتش مؤمن اللى طلع اخوان يبقى كفاية شغل النهارده ...بكرة ترزق بضم التاء.
علشان اقنعوك ان الطريق الوحيد للثروه هوه 0900 ولعبة الحياه والزرار الاحمر اللى قدام كاظم وشيرين .
لا يابابا لا ... اللى ماتعرفوش يا امور ان الغنى غنى علشان الفقير مقرر انه مايبقاش غنى ..مقرر انه يصدق شيخ الفضائيات اللى نازل من الهامر وقاعد قدام الكاميرا وبيقول له الفقر نعمة وبيدخل الجنه اسرع ... مصدق ان كل الاغنيا حرامية ونصابين وبيشربوا خمرة ...مقرر ان قرص الترامادول وسيجارة البانجو حتحل له مشاكله ... مقرر انه يصدق ان البرادعى يامنى وصباحى المتجرب 40سنه حيحقق له امانية .
من الاخركده مقرر انه مايشتغلش ... وانه يمارس عادته فى احلام اليقظة بسرية وهدوء .
اخى العزيز : الفقر وحش قوى ... الفقر اهانه لنفسك وذاتك وكيانك وقيمتك ... لو مش مصدقنى صدق رسولنا الكريم اللى استعاذ بالله من الفقر .
أعوذ بالله من الفقر ... فقرالعلم وفقر الافكار وفقر الصبر والاصرار ...اعوذ بالله من فقر العقل اللى بيخلينا نصدق ان الغنى حظ ونصيب وحالة ثورية مستمرة وماهواش شغل وتعب وعرق وسهر ومرمطة وشقى وتدبير وصبر وتوفيق من ربنا اللى الغنى المتقى عنده احب من الفقير ذوالمبادىء الجياشة .
اخيرا علشان انا عارف انى طولت المرة دى ... انا مصمم ان الفرق بين  الغنى و الغبى ... نقطة ... هيه نقطة ... حطيتها فوق تبقى غـنـى حطينها تحت تبقى غـبـى ...
حط النقطة فوق بقى حطها تحت انت حر بس المهم ماتجبهاليش إحياة ابوك ...


هناك 5 تعليقات:

  1. كأنك بتقرأ أفكاري..ما بين غبي وغني
    تحياتي

    ردحذف
  2. ستيتة :
    شكرا لمرورك ... بجد باكون مبسوط جدا لما بتعلقى عندى

    ردحذف
  3. السلام عليكم
    دى اول زياره ليا هنا واكيد مش هتبقى الاخيره
    انا عجبنى جدا مفهومك عن الغنى والرزق والفقر وبصراحه حصرتك تناولته بشكل موضوعى جذاب جدا
    تحياتى لك

    ردحذف
  4. قمر وليل وغيوم :
    اخجلتم تواضعنا .. ونورتم مدونتنا ... وسعدت بتعليقك ..

    ردحذف