الهولوكوست و أمن الدولة

الهولوكوست و أمن الدولة

اليهود اقلية ... الاخوان أقلية ...

اليهود معاهم فلوس كتير ... الاخوان معاهم فلوس كتير .....

اليهود عندهم كتاب حكماء صهيون ... الاخوان عندهم الوصايا العشربتاعة حسن البنا ...

اليهود كان عندهم بنجوريون ... الاخوان عندهم الشاطر ...

اليهود شعب الله المختار ... الاخوان فصيل الله المختار ...

اليهود عندهم الغاية تبرر الوسيلة ... الاخوان عندهم الغاية تبرر الوسيلة ...

اليهود عندهم جناح عسكرى ... الاخوان عندهم جناح عسكرى ...

اليهود عندهم نظرية الاغتيالات.. الاخوان عنهم نظرية الاغتيالات.

اليهود عندهم فزاعة الهولوكوست... الاخوان عندهم فزاعة أمن الدولة....

اليهود بيتفقوا مع امريكا ... الاخوان بيتفقوا مع امريكا ...

اليهود يعملوا فى صمت ... الاخوان يعملوا فى صمت ....

اليهود عايزين يملكوا العالم ... الاخوان عايزين يملكوا العالم ...

اليهود بيقولوا احنا صح باسم الدين .. الاخوان بيقولوا احنا صح باسم الدين .

الشعب المصرى كسر اليهود سنة 73 ... الشعب المصرى حيكسر الاخوان سنة .... ؟؟؟؟

أولا : البوست ده لجس نبض حرية الرأى فى عصر الاخوان الاشكيناز

ثانيا : الملك فاروق" ليبرالية ".... جمال عبد الناصر " اشتراكية " ... انور السادات " انفتاحية " ... حسنى مبارك " مهلبية " .... زى مانتوا شايفين مافيش واحد فيهم زى التانى ... ورغمن عن كدة ما اتفقوش غير على حاجة واحدة بس ... هيه انهم هما الاربعه كانوا ضد الاخوان ... ياترى ليه ... هه ... ليه صحيح ؟!!

ثالثا : توفيت الى رحمة الله الغالية مصر الحبيبة .... ولا عزاء للسيدات ...... ولا الرجاله .

انا انتخب نفسى محدش ينتخبنى

انا انتخب نفسى محدش ينتخبنى

الاخوان مسكوا فى المجلس العسكرى والحكومة مسكت فى الاخوان والقضاء مسك فى نفسه وعلى مسك فى حسين وجرجس مسك فى مينا والاخوان انتخبت نفسها علشان تحط الدستور والدستور عايز لجنه واللجنه عند المجلس والمجلس كله اخوان والاخوان عند المرشد والمرشد نايبه الشاطر والشاطر عايز بيضة والبيضة عند الفرخة والفرخة عايزة حبه والحبه عند الفلاح والفلاح عايز مفتاح والمفتاح ورا الشجرة وبابا مسك الشجر وشد وشد ولم يخلع ....وجاءت امى ... امى امسكت ابى وابى امسك الشجرة وشد وشد ولم يخلع ... فجاء اخى... اخى امسك امى وامى امسكت ابى وابى امسك الشجرة وشد وشد ولم يخلع ... فجاءت اختى ... اختى امسكت اخى واخى امسك امى وامى امسكت ابى وابى امسك الشجرة وشد وشد ولم يخلع ..... ياشعب ياعبييط يا اخوان يا عبيطة ... يامجلس ياعسكرى ياعبيط ... ياسلفيين ياعبطه ... هيه هيه هيه ... بكار راح ورا رشيدة ... والشاطر راح القناطر... والمشير عامل غفير ...والبرادعى بيكلم المرايا ..... شوفت ناموسة ساحبة جاموسة من تحت الباب يبقى انا كداب ؟... شوفت الفيل ماسك منديل وبيتمشى على شط النيل ... يبقى انا كداب ؟ شوفت الاخ بينتخب نفسه فى مجلس الشعب.... يبقى انا كداب ؟
وصللللللى على اللى يشفع فيك ومددددد ياسيدى ياقناوى مدد .... وهييييييه انا اتعبطت ....... انا اتعبطت..... ياحبيبتى يامصر يامصر يا حبيبتى يامصر

ملحوظة : الاحتفاظ الكامل لحقوق الملكيه الفكرية لصاحب الصورة اللى انا معجب بيها جدى

شيزوفيرينيا ( الفصام)

شيزوفيرينيا ( الفصام)

نحن لا نعلق على احكام القضاء ... لكن يعنى ايه ضباط الشرطة اللى قتلوا المتظاهرين قدام القسم ياخدوا براءة ... طبعا ماينفعش الكلام ده ... القضاء بيهزر ياجماعة .. ازاى ياخدوا براءة دول كانوا لازم يتعدموا ... طبعا احنا بنأكد فى كل مناسبة انه لا تعليق على احكام القضاء ... لأن القضاء ليه هيبتة و مستقل واجدع من ابويا .

انا بأحترم حرية الرأى ... وبأحترم حريتك فى دفاعك عن مبارك...انا باحترم رأيك جدا ... ده رأيك وانت حر فيه ... يافلول يابن الكلب يابتاع مبارك اللى زيك هوه اللى خرب البلد يا اشكال وسخة ياسفلة ... لكن عندى استعداد انى استشهد فى سبيل انك تقول رأيك .

الصور بكل اشكالها حرام ... ان كانت رسم او فوتوغرافيا ... والمسيحى اللى يسب النبى لازم يرحل .... ياد مش قولت لك بوستر الرئاسة 8 فى 8 وتعمل كلوز على الدقن .... الله يخرب بيوتكوا حتخسرونا الانتخابات ... وبعدين مين قال ان المسيحى اللى يسب النبى يرحل .... مايسب براحته ... ماهو كده كده داخل النار .

الجيش ... هوه انا خلفت غير الجيش ... هوه اللى حامينا .. ومحمينا ... وشايل بلاوينا .... هوه اللى سترنا وحمى ثورتنا .... وعلشان كدة لازم يسقط حكم العسكر ولازم المجلس العسكرى يتحاكم ومافيش حد فوق القانون ... والمشير وعنان لازم يروحوا طرة .... ماهو ياجماعة اللى عطى الامر للجيش انه يقف جنب الثورة هوه المشير وعنان ... ولا هوه الجيش بيتحرك مع نفسه كدة من غير قائد .... اتلهى اتلهى ايش فهمك انت ... الجيش حاجة والمجلس العسكرى حاجة تانية .

وعيش يامعلم .... الشيء ونقيضه .... اه ولأ ... ممكن ومستحيل ... ينفع وماينفعش ... وكل سنه وانتى .. طيبة يا مامتى ... وبعوده الايام ... وقول معايا .... ساعة تروح .. وساعه تيجى .... هييييه قول ... ساعة تروح وساعة تيجى ... ويالا نولع روما بحالها ..... مش الولاعة معاك برضة ؟.

بنهزر ... لأ بجد .. احنا بنهزر

بنهزر ... لأ بجد ... احنا بنهزر

(بجد بجد احنا بنهزر )

لكل شعب من الشعوب صفة او ميزة بينفرد بيها .... وصفة الشعب المصرى وميزته ان دمه خفيف ... فطلع علية انه ابن نكته ... هوه اللى بدع القافيه .... الافشه عنده عاليه قوى ... بيسخر من كل حاجة حتى من نفسه ... بيحب الهزار وبيهزر ... طبعا دى حاجة جميلة ان شعب يكون عندة روح الدعابة ... ماهو اصل روح الدعابة هيه اللى بتخلينا نستحمل مشاكل الحياة ومصايب الدهر .... لكن لما توصل ان احنا نهزر ونقفش ونقول افيهات على مستقبلنا ومستقبل عيالنا ومستقبل بلدنا .... يبقى كدة بقينا شعب عبيط واهبل وبيزن على خراب عشة .... لما تلاقى المجلس العسكرى بيطبطب ويعمل مجلس استشارى علشان مايزعلش حد ... يبقى بيهزر.... ولما المجلس الاستشارى اعضاءة بتستقيل واحد ورا التانى.... يبقى بيهزر ... ولما مجلس الشعب ليل نهار بيعمل لجان تقصى حقائق وسايب شغلة الاساسى فى التشريع يبقى بيهزر ... ولما اللجان تيجى من بور سعيد وتقول لسه الموضوع فى ايد النيابة ... تبقى بتهزر .... ولما النيابة بعد كل الوقت ده تطلع تقول ان الالترس الاهلاوى هوه السبب ... تبقى بتهزر ... ولما الترس الاهلى يقول زمن السكوت انتهى ... يبقى بيهزر ... ولما بور سعيد ترفع علم اسرائيل تبقى بتهزر ...ولما الاخوان كل شغلها انها تخلى الحكومة تروح فى التوقيت دة ... تبقى بتهزر ...لما السلفيين يرفعوا الادان فى المجلس ويعملوا عمليات تجميل ... يبقى بيهزروا ...لما الليبرالين ينزلوا يلموا الخراطيش من الشارع ويقولوا الشرعية من الميدان وهما جوه المجلس ... يبقوا بيهزروا ...ولما الوفد يقوم الصبح يدعم مرشح رئاسى وبعد الضهر يدعم واحد تانى ... يبقى بيهزر ... ولما الطب البيطرى يقول ان مافيش حمى قلاعية لغاية ماتهرس مصر كلها ... يبقى بيهزر... لما شباب الثورة يقول على المشير حمار وحسان ضارب دقن ... يبقى بيهزروا .... لما شاعر الثورة يطلع يسب الدين على الفضائيات ... يبقى بيهزر ...لما الباردعى ياخد قرار ترشيحة لرئاسة مصر من المرايا ... يبقى بيهزر ....لما واحد يروح يسحب اوراق الترشيح لرئاسة مصر بالشبشب والبانجو فى جيبه يبقى بيهزر ... ولما حد يطلع يدافع عنه ويقول حقة كمواطن ... يبقى بيهزر...لما شباب الفيس بوك يقول يعنى ايه كوكاكولا زيرو ... يعنى البلد تخرب وانت قاعد تلعب المزرعة السعيدة ... يبقوا بيهزروا ...لما الفلاحين تبنى على الارض الزراعية ... يبقوا بيهزروا ...ولما بقيت الشعب يضرب ويقطع سكك حديد وطرق ... يبقى بيهزر ...لما الزغلول الكبير .... الاعلام يجيب اطفال .. يعنى جيل جديد ... يعنى مستقبل مصر ... يعنى تحرير القدس ... ويخليهم يهتفوا يسقط الجيش المصرى ... يبقى هوه كمان بيهزر .

مش مهم البلد تخرب ... مش مهم المستقبل يضيع ... مش مهم نشحت ... مش مهم حتى اسرائيل تحتلنا ... كل دة مش مهم ... المهم نهزر ونطلع قدام نفسنا والعالم ... شعب لذوذ ... شعب شرباته ... شعب بيعرف يهزر ... حتى لو فى مستقبله .

حسبى الله ونعم الوكيل .

ملحوظه :(بهدووووووء): ياترى حسنى مبارك بكل موبقاته وسفالاته وتجاوزاته ...كان فاهمنا اكتر ما احنا فاهمين نفسنا ولا انا مكبرها ... ولا هيه كبيرة ... والله ماعدت فاهم حاجة

من وحى انتخابات الرئاسة فى مصر

من وحى انتخابات الرئاسة فى مصر

يا أمة ضحكت من جهلها الامم

من وحى انتخابات الرئاسة فى مصر

كم فيك يا مصر من مضحكات ولكن ضحك كالبكاء

من وحى انتخابات الرئاسة فى مصر

ياخارجة من باب الحمام وكل خد عليه خوخة ... مشيتى حافية وخدتى زكام ورابطة راسك من الدوخة

من وحى انتخابات الرئاسة فى مصر

كتاكيت .... فين الكتاكيت .... عايز كتاكيت ... كمان كتاكيت

من وحى انتخابات الرئاسة فى مصر

بابا جاى امتى ... جاى الساعة ستة... راكب ولا ماشى .. راكب بسكلته... بيضة ولا حمرة ... بيضة زى الاشطة

من وحى انتخابات الرئاسة فى مصر

ياشعب يا عبيط .... ياعبيييييط .... يابن العبيطة

عيلاء عبد الفتاح رئيسا للجمهورية

عيلاء عبد الفتاح رئيسا للجمهورية

ماحضرتش نكسة 67 ... وعلى ايه بقى ... نسمى كل حاجة بأسمها الحقيقى احسن .... ما حضرتش هزيمة 67 ... بس سمعت عن حاله الذل والمهانه وكسرة النفس ... والأهرة اللى كان فيها المصريين بعد النكسة ... ماهو احساس الهزيمة مر علقم ... خصوصا لما تكون معشم نفسك انك موقع تسعميت طيارة ومدمر الف دبابه وفى الاخر تطلع انك منسحب من الجبهه وراجع ماشى وبيغنولك ... قولوا لعين الشمس ماتحماشى .... الجيش المصرى راجع ماشى ..... شوفتوا أهرة وكسرة نفس زى كدة قبل كدة؟

وعلشان ليس من سمع كمن رأى .... احساس الأهرة حسه قوى وعلى ما عتقد ان كل المصريين حاسين بيه قوى وتاعبهم قوىوواجعهم قوى بعد سفر الممنوعين من السفر ... وايه ... على طيارة عسكرية ... مش حنسى احساس الذل والمهانة ده ولا انسى المه ووجعه الا بانتصار زى بتاع 73 ....

غير كدة المفروض ان احنا نلبس طرح ... طرح ايه بس؟ ... المفروض ان احنا نتنقب نتنقب ايه بس؟ ... المفروض نلبس الشورت الاحمر اللى ابو سوسته من ورا ... ونعمل مليونيه نطالب فيها عيلاء عبد الفتاح انه يكون رئيس للجمهوريه او الخرابه او المواسير على رأى توشكى... لانه بصراحة كده عيلاء ... خير من يمثلنا واحنا فى الوضع الفرنساوى المهين ده

اشمعنى انتوا يعنى ؟ !

اشمعنى انتوا يعنى ؟ !

من حق اى حد يقول اللى هوه عايزة .... من حق اى حد يشتم اى حد ويقول عليه حمار ..... من حق اى حد انه يمارس الجنس المثلى.... من حق اى حد يتتريق على رساله سيدنا محمد ... من حق اى حد يقلع ملط ويحط الصورة على الفيس... من حق اى حد يلم الخرطوش من الشوارع... من حق اى حد انه يقطع طريق او سكة حديد ... من حق اى حد يحرق ويدمر ويكسر ... من حق اى حد يكون معاه ملوتوف او كلاشينكوف او جرينوف ... من حق اى حد يتتريق على الحجاب والدقن ... من حق اى حد لما عجلة عربيتة تفسى يقول محاولة اغتيال ... من حق اى حد يقول انا حنغطى الاثار بالشمع ( طاب وحتعمل ايه لو الشمس طلعت يامعلم ) من حق اى حد يقول ان تدريس الانجليزى لازم يتمنع ...من حق اى حد يصدر احكام قضائية وهوه قاعد على الكوفى شوب بيشرب تفاحة ... من حق اى حد يترشح لرئاسة جمهورية مصر الغلبانة العربيه .... من حق اى حد ياخد قراراته من المرايه ... من حق اى حد يحرض على وقف حال البلد ... من حق اى حد يعمل اى حاجة ومن حق اى حد يقول اى حاجة ....

ومادام العمليه حقى وانا حر فيه.... اغيرة ولا اخليه ..اقصه ولا ارفيه ... فانا حقى بقى انى اقول لكل اللى بيقولوا حقى دول :

جاك كسر حوقك منك ليه لها له ..... حقى اشمعنى انتوا يعنى... واللى مش عاجبه يروح ينده لى امه من على القهوه .... والله مش قله ادب منى .... ماكل رموز الثورة لما بتتزنق بتروح تجيب الحاجة من على القوة تدافع عنهم .... الله مش مصدقين ليه .... عيلاء جاب ماما ن على القهوه ... الجهيلى جاب ماما من على القهوة ... والزغلول الكبير ... البارد عى جاب ماما من على القهوة ... اه بس الشهادة لله.... البارد عى ماجبهاش غير بعد ما استأذن المرايه.......

ارحمونا زهقتونا نفختونا بضنتونا طلعتولنا الكالو فى ضوافرنا