اديلة فرصة

اديلة فرصة

·       اديله فرصة لما الطائرالدكر تبيض .

·       اديله فرصة يخلص صلاة.

·       اديله فرصة لما يخلص خطبة فى جوامع مصر .

·       اديله فرصة يغرق البلد فى الديون .

·       اديله فرصة لما يفرض ضرايب على دفن الميتين .

·       اديله فرصة لما سينا تروح مننا .

·       اديله فرصة لما يفتتح مصنع الحديد والصلب وجامع عمرو بن العاص .

·       اديله فرصة لما يسجل مكالمات الشعب ويشوف مين نجس بيحب فى التليفون .

·       اديله فرصة يطهرك يا شعب يانجس ويفتح لك حسابات .

·       اديله فرصة ينيمك من المغرب علشان تقوم فايق للشغل ... ولما تسأل فين الشغل يقولك طاب هوه انت نمت الاول .

·       اديله فرصة لما يلغى الشرطة .

·       اديله فرصة لما يسرح الجيش.

·       اديله فرصة لما يهد ابو الهول والهرم ويبنى مكانهم قاعة محاضرات .

·       اديله فرصة يسوق البلد دا سواق عارف ربنا وبيصلى الفجر ... احنا اللى ولاد كلب انجاس قاعدين له على الفتيس .

·       اديله فرصة ياشعب زباله وشوفلك حته تانية عيش فيها عشرين تلاتين سنه على ماينضف زبالتك ويلم وساختك وبعدين يبقى يبعت لك تيجى او مايبعتلكش  .... المهم انك تديله فرصة .

يا أهبل يا بيستهبل يا سايق الهبل على الشيطنة

يا أهبل يا بيستهبل يا سايق الهبل على الشيطنة

الراجل ده حيجننى  حيجننى ... طير صواميل عقلى منى .... حيجننى ... دمر كل نظريات علم النفس والشخصية اللى اتحطت من ايام عم فرويد اليهودى ابن الكلب ....حير طوب الارض... حير العرب والفرس والروم .... محدش فاهم هوه بيعمل ايه ولا عايز ايه ولا ناوى على ايه بالظبط ....يقولك انا سبتهم وفى نفس الوقت يقولك انا معاهم ... يقولك انا قالع القميص وميهمنيش... ويلم حواليه البودى جاردات .... يخالف القانون ويقولك انا بحترم القضاء ... يروح للناس يشتمهم فى بيتهم وياخدهم بالحضن ... يبعت جوابات غرام  ومايجيبش سيرة حبيبة على لسانه ... يقول انا عارف انكوا جعانين ... وياخد رغيف العيش من قدامنا ويدية لجيرانا ... يطفى علينا النور ويرجع يولعه ... يقول على ناس مجرمين ويفتح لهم حساب علشان يتطهروا ... يجيب طائر ويطيره ... يعين مدير ويجيب نائب ويشغله ... يشحت علينا ويقلبنا فى رزقنا ... يشتم فى العسس ويديهم ميداليات ... يدى عياله الجنسية ويكره اللى يقول انشاالله .... بيعايرنا بحفظه للقران ويفسرة بمزاجة .... يصلى الجمعة ويخطب بعديها ... يقولك انا من طين البلد ويفرش سجادة على موكيت الجامع ... يصمم يقعد فى ايجار مؤقت ويمشى فى موكب وحراسة ... يضيع ثورة ويطالب بثورة ... ماهو يا اما انا عبيط ياهوه اهبل يا بيستهبل يا سايق الهبل على الشيطنة 

كدبتش انا (2) ؟؟؟؟؟؟؟

نص الخطاب الاول لرئيس

ايها الاخوان والاخوات :

اعاهد الله العلى العظيم على التمسك بالبرنامج والجهاد فى سبيل تحقيقة والقيام بشرائطة .. والثقة التامة فى القيادات الحديثة ... والسمع والطاعة لمطالب الاخوان والاخوات فى المنشط والمكره... واقسم بالله العظيم على ذلك وابايع عليه والله على ما اقول وكيل .

                          ( الهتيفة : الله اكبر ولله الحمد )

ايها الاخوان والاخوات :

 اننا نرسى دولة القانون ... لذلك سوف احلف اليمين امام الدستورية العليا ... ولاننى ثائر منكم سوف انزل الميدان لاطالب مع اخوانى بالغاء المكمل ... احنا فى ثورة والثورة مكمله .

                          ( الهتيفة : الله اكبر ولله الحمد )

ايها الاخوان والاخوات :

اننى رئيس لكل الشعب ... لكل الشعب... ولذلك سوف استقيل من رئاسة حزب الذل والندامة  ... ولكنى كمواطن له الحق فى ان ينتمى الى حزب ... فاننى لن استقيل من حزب الذل والندامة  .

                          ( الهتيفة : الله اكبر ولله الحمد )

ايها الاخوان والاخوات :

اننى اتعهد بالحفاظ على كافة المعاهدات التى وقعت عليها الجمهورية ... وخاصة معسكر ديفيد .... كما اتعهد بمراجعة بنود معاهدة معسكر  ديفيد.. كما اتعهد باعادة العلاقات مع تيران لاحداث توازن استراتيجى فى المنطقة. .

                          ( الهتيفة : الله اكبر ولله الحمد )

ايهاالاخوات :

انا عايز كل واحده فيكوا تطمن خالص ... كل واحدة تلبس اللى هيه عيزاه ... براحتها خالص .. تلبس بنى ... تلبس كحلى .. ازرق .. اسود ... براحتك خالص ... علشان بيقولوا ان الرئيس  حيحجب الستات ... الرئيس مابيحجبش الستات ... عمر الرئيس ماقال ان الستات تتحجب ... دا ربنا اللى بيقول ومدام ربنا اللى بيقول يبقى لازم ننفذ كلام ربنا .

                          ( الهتيفة : الله اكبر ولله الحمد )

ايها الاخوان والاخوات :

اننا دولة مدنية دينية .... جمهورية ملكية...سنية شيعية ... واقتصادها رأسمالى اشتراكى ... ومرجعيها الازهر والمقطم ... ان حرية الرأى والتعبير والابداع مكفولة للجميع بمجرد استلام التصريح ... انى معكم وعليكم ... انى بكم وبدونكم ... اننى الرئيس لا كذب ... انى الرئيس .. انى الرئيس ... انى الشاطر ... انى بلوة سودا ....انى الرئيس يالا خافوا منى ... انى بلوه سودا .. انى الشاطر

والسلاموا عيكم ورحمة الله وبركاته .

                          ( الهتيفة : الله اكبر ولله الحمد )

أي تشابه بين شخصيات وأحداث هذا العمل وأية 

شخصيات وأحداث على أرض الواقع هو مجرد صدفة 

غير مقصودة 

كدبتش انا ؟؟؟؟

صباح اليوم الاول فى قصر رئاسى

نهار داخلى :

بانوراما لحجرة نوم الرئيس ...

 يرقد الرئيس على سريرة فى وضع الجنين .... تحاول الحاجه ايقاظة بهدوء ...

ام محمد : حاج ... ياحاج ... اصحى ياحاج ... الساعة بقت حداشر ... قائد الحرس بقاله ساعة بيخبط علينا .

يستيقظ ابو محمد مفزوعا : جاى جاى .... بس والنبى بلاش ضرب على القفا .

ام محمد : استر يارب ... مالك ياحاج ... وضرب ايه اللى على القفا ؟!

ابو محمد : حضرى الشنطة بسرعة ياحاجة ... وماتنسيش الفوطة زى المرة اللى فاتت ... دا انا قعدت سنه انشف وشى فى ديل الجلابية .

ام محمد : لا اله الا الله ... انت بتحلم ولا ايه ياحاج ... شنطة ايه وفوطة ايه وديل جلابية ايه .

ابو محمد مستنكرا : مش بتقولى ظابط امن الدوله بيخبط .

ام محمد ضاحكة : الله يحظك يا حاج ... الله لا يرجعها ايام ... انا بقولك قائد الحرس الجمهورى بيخبط ... انت نسيت انك الريس ولا ايه .

يعتدل ابو محمد ويبصق عن شماله قائلا : اعوذ بالله من الشيطان الرجيم ... بينى وبينك ياحاجة ... مش عارف اخد عليها ولا اصدقها ... كوابيس فى النوم من ناحية امن الدوله ... وكوابيس فى الصحيان من المعلم والممتاز ... يالله اهو كله علشان مصر .

ام محمد : قوم بس يا حاج وصلى على النبى ... تبات نار تصبح رماد ... ومحدش عارف الخير فين ... بس انا عايزاك المرة دى تتناصح بقى وتلم الشعب حواليك ... اه ... يعنى كل يوم الصبح كدة تطلع عليهم فى التليفزيون ... وتصبح عليهم ... محافظة محافظة ومركز مركز ولو عرفت تجيب من الرقم القومى اساميهم وتصبح عليهم واحد واحد يبقى خير وبركة.. اه والنبى ياحاج اوعى وانت بتصبح على المحافظات تنسى البحيرة المره دى ... حاكم زعلانين منك قوى انك نسيتهم فى الخطاب اللى قولته بعد النتيجة... بيقولوا ماكنش العشم ينسانا بعد ما وقفنا معاه .

ابو محمد : ايه .. هما حيزاولونى من اولها ... ولا علشان عطونى صوتهم يعنى ... لااااااا ... انا الرئيس ... ولو مش عارفين اعرفهم ... ايوه ... انا الرئيس .

يرن جرس التليفون الخصوصى .. ترفع ام محمد السماعة وتقول ... اهلا اهلا ... صباح الخير ياسيدنا المعلم .

يقع ابو محمد من على السرير ... ويجرى زاحفا ويأخذ التليفون من الحاجة .

ابو محمد بصوت مرتعش : السلام عليكم ورحمة الله وبركاته يا مولانا المعلم ..ابدا والله يامولانا المعلم دا انا صاحى من بدرى ....عفوك يا مولانا ... والله ماحتتكرر تانى يا مولانا .. حاضر يامولانا ... من النهاردة ... البلان حتبقى عندك شهرى واسبوعى .... حاضر يامولانا  ويومى ... حاضر يامولانا ... لا طبعا فاهم ... كل اللى حيقول عليه الممتاز  ... كله يامولانا ... والله العظيم كله يامولانا ... اتفضل يامولانا ... اتفضل يامولانا .

بعد ان يغلق ابو محمد التليفون ينظر الى الحاجه بعتاب قائلا : كده ياحاجة ... كدة قاعدة تتسايرى معايا وضيعتى الوقت ... انا نازل على المكتب ... المعلم حيكلمنى على تليفون المكتب بعد عشر دقايق .

ام محمد وهى تجرى وراءة : استنى ياحاج ... استنى بس .. حتنزل المكتب بالجلابية  ياراجل ؟! وكمان حافى ...... الهى يخرب بيت الرياسة اللى حتضيع منى الراجل .... بس معلش اهو كله علشان مصر .

أي تشابه بين شخصيات وأحداث هذا العمل وأية 

شخصيات وأحداث على أرض الواقع هو مجرد صدفة 

غير مقصودة 

جمعية طز فيكى يا حكومة (البيان رقم 1 )

جمعية طز فيكى يا حكومة

(البيان رقم 1 )

1-  انه فى يوم الخميس 1 نوفمبر سنة 2012 ميلادية  الموافق 16 من ذى الحجة سنة 1433 تم بحمد الله وتوفيقة انشاء جمعية طز فيكى يا حكومة ...وتبدأ الجمعية عملها فى اليوم التالى لنشر البيان الاول .

2-  اعضاء الجمعية المؤسسين 4 اطباء ومهندس .

3-  يتم فتح باب الانضمام للجمعية لأى مصرى عايز يعيش حر

4-  يمنع من الانضمام اى كائنات اخوانية او اسرائيلية او سلفيه او ليبرالية وينظر فى حالة الاشتراكيين كل على حدة.

5-  تسعد الجمعية بان تعلن انه ليس لها حقوق محفوظة ... حتى الاسم اللى عايزة ياخده فاللى عايز يعمل مع نفسه جمعية مشابهه ومش عايز ينضم اهلا وسهلا.

6-  شعار الجمعيه : يانحله لا تقرصينى ... ولا عايز عسل منك .

7-  رؤية الجمعية :من النهاردة مافيش حكومة وابقوا احكموا نفسكوا بقى ياعالم يازباله .

8-  رسالة الجمعية : الاستغناء التام عن الحكومة ومؤسسة الرئاسة ومجلس الشعب والشورى ومكتب الارشاد بزيته وسكرة ورزة وسمنته .

9-  يتم شرح طريقة عمل الجمعية فى بيانات تنشر تباعا .

10-                   والله الموفق والمستعان .

                                                        امضاء

                                               الاعضاء المؤسسين

                                         جمعية طز فيكى يا ياحكومة 

إختفاء عم عشم فى ظروف غامضة

إختفاء عم عشم فى ظروف غامضة

عم عشم اختفى من كام يوم ومحدش عارف هوه راح فين ... ناس بتقول ان عبده موته غزه بسكينه جاب اجله .... وناس بتقول دا اتحرق فى العمارة بتاعة الارهابيين اللى فى مدينة نصر ... وناس بتقول كان مهاجر لليونان والسفينة غرقت بيه ...فى الحقيقة محدش عارف الحقيقة ...اهو كله كلام ...المهم عندى ان عم عشم غار فى ستين داهية الهى لايرجعة قادر يا كريم ...

الجميل بقى ان من ساعة ما عم عشم اختفى والدنيا بدأت تزهزه ...وبدأت حلول للمشاكل اليومية تظهر فى الافق ...وبدأنا رحلة طز ذات الالف ميل ... ايوه طز .. طز فى الاخوان والسلفيين ... طز فى العيوطة ومرشدى ... طز فى الاشتراكيين والليبراليين ... طز فى 6ابريل والبرادعى ... طز فى الفضائيات وميدان التحرير .... وحنعيش يعنى حنعيش ومش حنسلم ونطاطى ونجرى ونتعشم فى ولاد الكلب مشتهيين السلطة .... وعليه تقرر ماهوه اّت :

                          

                        انشاء جمعية طز فيكى ياحكومة

عم عشم ومتلازمة استنى

عم عشم ومتلازمة استنى

عم عشم كائن هلامى لزج ... يعيش فى الاتموسفير المصرى منذ قديم الأزل ... يوجد فى طين مصر ونيل مصر وهوا مصر ومجارى مصر ...ولأن عم عشم كائن هلامى لزج فالكثيرون لا يشعرون به .... وان كان يصيب الاغلبية المصرية بما يسمى متلازمة استنى.

وفى دراسة منأنية للفترة من نهاية السبعينات الى الان .... وجد ان عم عشم لايفنى ولايستحدث من عدم ...كما ان له قدرة عالية على اعادة تصنيع ذاته (ريسيكلنج).... فنجد ان احمد زى الاسطى احمد ...زى الحاج احمد ...زى المقدس احمد .... وابو دقن... زى ابو من غير دقن.. زى ابو كانيش وحظاظة ... كله لوك لوك ... لوك لوك ...ومصلحة شعب مافيش ... ناس نفسها تعيش بكرامة ... مافيش .

فى نهاية السبعينات قال عم عشم  ان سنه 81 سنه الخروج من عنق الزجاجة والرخاء ...وفى التسعينات قال : اصبروا فالارهاب سبب الوباء ...والان قال : الربا والهام شاهين سبب البلاء ... وينتشرعم عشم.. ويستنى الشعب... ويستنى ويستنى .

اما عن اعراض متلازمة استنى فهى ظاهرة لمن فى وجهة بصر ومن فى قلبه بصيرة ومنها :

·       ضياع براءة الاطفال

·       يأس الشباب

·       عنوسة البنات

·       ضياع السيكو سيكو عند الرجال

·       بهدلة ومرمطة العواجيز

·       ظهور عائلة السبكى للانتاج الفنى

·       ظهور ثقافة التوكتوك .. وعيش نمله تاكل سكر

·       ظهور دعاة اسلاميين يسبون ويشخرون ويقولون أحا .

سيناريو صلاة العيد الكبير

سيناريو صلاة العيد الكبير

الاول كل سنة وانتوا طيبين وعيد اضحى سعيد عليكوا .

نبدأ بقى السيناريو:

·      60تشكيل امن مركزى بشراباتهم الجديدة علشان الريحة... لتأمين الفسحاية ... عربية مكشوفة عليها بلالين اسلامى يركبها عمدة العياط ...

·      بانوراما على العمدة وهو يرتدى الجلابية البيضة صنع فى الصين اللى جاياله هدية من السعودية .

·      يصل العمدة الى الفسحاية... يفرشوله السجادة الخضرا المصنوعة فى الصين وجاياله هدية من تركيا ... علشان يصلى عليها ... اصله من النوع اللى بيقرف.

·      تركز الكاميرا على العمدة وهوه بيكبر ويهلل.

·      يصلى العمدة العيد ويجلس ليسمع الخطبة الاولى ... ايوة الاولى ماهوه حيلقى الخطبة التانية .... ماهو اللى ماتعرفهوش ان الخطبة فى الجمعة والعيد بقت خطبتين دلوقت ... الاولى يقولها الامام والتانية يقولها العمدة ... دين جديد بقى .

·      تبدأ الخطبة بالترغيب ... عن الحب والاحضان... والجيش اجدع من ابويا ...ومش حيغمض له عين الا لما يحقق اهداف الثورة ... ثم يختم بالترهيب ... اتقوا شر الحليم اذا غضب ... والناس الوحشة اللى بتحاول تدمر مصر حنديها بالجزمة .

·      بعد الخطبه ... يجيبوله العجل والسكينه .. يمسك السكينه ويرفعها لاعلى ويوريها للجمهور (يقلد الاخ بوحه )..والجمهور يهلل ويكبر

·        يسمى ويدبح العجل ... صوت المذيع يصف خطوات الدبح بالتفصيل ... ويشرح مهارة العمدة فى استخدام السكينه والسيطرة على  العجل ... انه عمدة من طين مصر .

·      بعد الدبح والسلخ ... يوزع العمدة الزمامير والنضارات اللى بمناخير وشنب على الجالية المصرية فى مصر .... اما لحمة العجل فيوزعها تلت على اخوانا فى غزة وسوريا ... وتلت لاصدقائنا فى قطر وتركيا ... وتلت لاعضاء الخيبة والندامة .

·      العمدة يركب العربية المكشوفة ويروح بيته علشان يحضر لخطبة الجمعة الجاية ... يانهار اسود ... دا العيد دة يوم جمعة ... يعنى حنسمع اربع خطب ... يانهار اسود ... يعنى طقمين شربات لعساكر الامن المركزى ... لطفك يارب .

·      تبدا برامج التوك شو والصحف الخاصة والتويتر والفيس فى اللطم والولوله ولا حياة لمن تنادى .

·      كل سنه وانت طيبة يامصر وبعوده الايام ... والهى وانت جاهى فى دى الايام المفترجة يجيله البعيد التهاب فى احباله الصوتية قادر يا كريم .

كل شيله يشبهله (بعد رساله الغرام )

الهولوكوست و أمن الدولة

اليهود اقلية ... الاخوان أقلية ...

اليهود يكذبون .... الاخوان يكذبون ...

اليهود معاهم فلوس كتير ... الاخوان معاهم فلوس كتير .....

اليهود عندهم كتاب حكماء صهيون ... الاخوان عندهم الوصايا العشربتاعة حسن البنا ...

اليهود كان عندهم بنجوريون ... الاخوان كان عندهم سيد قطب ...

اليهود شعب الله المختار ... الاخوان فصيل الله المختار ...

اليهود عندهم الغاية تبرر الوسيلة ... الاخوان عندهم الغاية تبرر الوسيلة ...

اليهود عندهم جناح عسكرى ... الاخوان عندهم جناح عسكرى ...

اليهود عندهم نظرية الاغتيالات.. الاخوان عنهم نظرية الاغتيالات.

اليهود عندهم فزاعة الهولوكوست... الاخوان عندهم فزاعة أمن الدولة....

اليهود يبكون على حائط المبكى ... الاخوان يبكون على حائط امن الدوله ..

اليهود بيتفقوا مع امريكا ... الاخوان بيتفقوا مع امريكا ...

اليهود يعملوا فى صمت ... الاخوان يعملوا فى صمت ....

اليهود عايزين يملكوا العالم ... الاخوان عايزين يملكوا العالم ...

اليهود بيقولوا احنا صح باسم الدين .. الاخوان بيقولوا احنا صح باسم الدين .

الشعب المصرى كسر اليهود سنة 73 ... الشعب المصرى حيكسر الاخوان سنة .... ؟؟؟؟

ملحوظة : الملك فاروق" ليبرالية ".... جمال عبد الناصر " اشتراكية " ... انور السادات " انفتاحية " ... حسنى مبارك " مهلبية " .... زى مانتوا شايفين مافيش واحد فيهم زى التانى ... ورغمن عن كدة ما اتفقوش غير على حاجة واحدة بس ... هيه انهم هما الاربعه كانوا ضد الاخوان ... ياترى ليه ... هه ... ليه صحيح ؟!!