الحياة بدون فياجرا.... ممكنه

الحياة بدون فياجرا.... ممكنه

قرفة بالجنزبيل وحليهم بمعلقة عسل نحل قطفة اولى ....ولا يهمك ... غذاء ملكات نحل على مسحوق جنسنج وخد معلقة... عادى ... اطحن شوية خلنجان على لبان دكر وسفهم على الريق ...... بتحصل ... ابشرلك بلحتين جوزة الطيب وشويه حبة البركة على ورقة لحمة ضانى ... اديها طبق سى فود مع جمبريتين جامبوا ... كدة مقدمناش غير الفياجرا ... طاب السياجرا ... طاب النياجرا ... الهندى ... التركى ... الالمانى ... الامريكانى بتاع فايزر ... طاب الميت مللى ... طاب المتين مللى ... طاب المضروب ... التقليد ... بس لقيتها يامعلم ...عليك وعلى شداد الحيل ... ايوه اسمه كدة ... شداد الحيل .. دا كوكتيل صينى عجب ... طاب انا اعمل لاهلك ايه دلوقت .... عيش بركة واسكت ... محدش حياخد باله ... على فكره دى شكوة ناس كتير ... وشباب ... يعنى خمسة وتلاتين اربعين سنة ....يعنى الدنيا لسه قدامهم ...طبعا حتقولوا اسرائيل بترش حاجات فى الهوا ... وحتقولوا المبيدات المسرطنة والرى بمية المجارى ... وكتمة النفس والارهاب ولزقة الوزير الفنان على الكرسى .. والانتخابات المتزورة ... هما السبب ... بس ماهية الحاجات دى طول عمرها موجودة ...طول عمرنا بنرش مبيدات وبنروى من المصرف ...وطول عمر الانتخابات بتتزور ... والوسيله الوحيدة لتداول السلطة هيه القضاء والقدر ... طول عمرنا بنعدى على العطار ناخد القرطاس ليله الجمعة ... بس كان مين اللى بيعدى على العطار؟ ... الراجل العجوز ابو ستين سبعين سنة ابوعين زايغة واللى متجوز بت فى سن عياله ... طاب ايه السبب يا حكيم عصرك واوانك ؟ .. استر يارب فى اللى جاى .... السبب يا جماعة حرب كسر النفس والمناخير اللى شناها ( اى تديرها ... وليس شناها بتاعة دور البرد ) الستات على الغلابة الرجالة انتقاما وتنفيسا عن قهر السنين ...وغيرة العمر من ولاد الكلب اللى بيعملوا اللى فى نفسهم واحنا قاعدين محبوسين فى البيت .. ماتخرجيش ماتضحكيش ماتناقشيش واعملى لاخوكى الشاى واكوي له القميص ....الحرب دى بتبدى بعد الجواز باسبوعين على اكثر تقدير ... ويشتد رحاها ويزداد وطيسها يوما بعد يوم ... قبل الجواز ينزل للزبون طقم حنية على طقم مشاعر جياشة على طقم رقة وانوثة ... وعليهم طقم سمعان كلام وامرك واللى تشوفة وكلمتك على رقبتى واللى تحبة اموت فيه وانت اللى كنت باتمناه هدية مجانية ...وبعد الاسبوعين نبدأ باسم الله ...ماهو مش معقول كدة ... سايب القميص على كرسى السفرة ... لوحد طب فجأة يقول علينا ايه ؟ ... ايه مش تغسل مكنة الحلاقة بعد ماتحلق ...والنبى دى طماطم تنجاب ... شكلك بتاخد اللى الراجل بيديهولك ... الواحدة ماتعتمدش عليك فى حاجة ابدا ... عمرك مانصفتنى ...ماشى ماشى اتغدى عند امك وسيبنا قاعدين جعانين ... واخد بالك من نفسك ومتشيك كدة ليه ... شاكلك شايف لك شوفة ... هه ... اللى خدته القرعة تاخدة ام الشعور ... بقولك ايه... انا طلعان عينى طول النهار ... مسح وكنس وغسيل وطبيخ ...انا مش فاضية لدلعك دة ... انا عايزة انام ... بكرة ... بكرة ... اصل الدنيا حر والعرق بيزهقنى ... اصل الدنيا سقعة والانبوبة فاضية ... الا عملت حسابك فى قسط المدارس بتاع العيال ...الصبح ماتنساش تاخد الزباله فى ايدك ... الزبال بقاله يومين مجاش ... يوووه ماقولنا الدنيا سقعة ... خلينا فى المهم ... تتغدى ايه بكرة ... ماتقوليش اى حاجة ...انا عازمة ماما واختى على الغدا يوم الخميس .... موسم كل سنة وانت طيب ...تصبح على خير .... الفطار عندك على السفرة ... انا داخله انام ... ماتنساش تقفل الباب كويس ...اهلا ... ماجبتش الفاكهة زى ما قولت لك ... بقالنا اسبوع ريقنا ناشف ... اقلع الجزمة برة انا لسة منضفة ... ارحموا بقى انت وعيالك ... تتغدى ولا حتصلى الاول ... اه العيال عايزين يروحوا النادى ... يفكوا شوية من جو المزاكرة ... العيال جم من النادى هلكانين وناموا ... عايز حاجة ؟ ... ماشى بس على طول ... خصيمكوا النبى ... ممكن بعد اللى بيشوفة الغلبان دة يقدر يمارس حياته الطبيعية عادى كدة ... بصراحة عنده حق ان ولا وصفة تنفع معاه ... على رأى المثل : فيه ناس ... زى القنفد ... لاتنحضن ولا تنباس .

ايتها الزوجات انهوا هذه الحرب فالانسان يعيش مرة واحدة ... ايتها الزوجات ارحموا من فى الارض يرحمكم من فى السماء ... يا اخونا دا دى الحاجة والحيدة اللى فاضله للغلبان يلاقى فيها نفسة بعد الذل اللى بيشوفة طول النهار ... مايبقاش انتوا والحكومة علية ....

ملحوظة : مش عايز تعليقات على البوست دة غير من الرجاله ... انا عندى عيال عايز اربيها

غثاء السيل

غثاء السيل

يعنى ايه بنى ادم حضارى ... ؟ ... يعنى يكون عندى لاب توب فى شنطة معلقها على كتفى ... يعنى اقعد فى قهوة كارلوس واحط اليو اس بى وافتح النت واشرب شيشة ...يعنى اكون لابس بنطلون جينز وسطه ساقط واللباس باين ....يعنى اسيب شعرى ملبد وما اغسلوش بالسنة ... يعنى البس نضارة شمس وكاسكيته فى عز الليل ... يعنى اتفرج على الماتش فى ال سى دى وانا ماسك فى ايدى ساندوتش دليفرى من ماكدونلز... يعنى وانا ماشى فى الشارع يكون فى ايدى ازازة مية معدنية وكانز وكيس شيبسى ... وفى الايد التانية موبيل تاتش وعلبتين مارلبورو وضارب البلوتوث على ودنى ... يعنى اقعد فى الكليه تمن سنين ولما اتخرج اجيب واسطة علشان ما ادخلش الجيش ... يعنى اصاحب واحدة وانام معاها واحكى لصحابى الصبح على اللى حصل ... يعنى ما اصليش واتريق على اللى بيصلى واتفرج على عمرو خالد واقول ربنا غفور رحيم ... يعنى البس التى شيرت وامضى على عريضة البرادعى ... يعنى اتريق على اللى بيتكلم عربى واحط تلت اربع عشر كلمات بالانجليزى فى كلامى ... يعنى اقول روش واخرحاجة وحد فوق الفظيع ....يعنى اخلع من ابويا العيان وامى العجوزة واروح اتعشى بره واسهر فى الديسكو لوش الصبح واشرب بيرة وارجع انام للعصر ... يعنى اتفرج على افلام اجنبى واقعد على الفيس بوك واعمل شات وافتح الكاميرا ... يعنى ما اشتغلش ... لو اشتغلت ازوغ ...يعنى يكون معايا فيزا وماستر كارت ... يعنى اسب فى الناس واغتابهم وانا نايم على المرتبة الامراتى ومتغطى بالحاف الفيبر ... يعنى اسمع ميتلز فى الام بى ثرى ابو سمعات فى ودانى ... يعنى اروح شارم واعمل سفارى فى الشتا .. واروح مارينا فى الصيف ... يعنى ابعت رسايل علشان اصوت لابطال استار اكاديمى ... يعنى اشتم شيكابالا ... وسقف مع الالترس .. وازرغت لما جوزوية يرجع للاهلى بكام الف يورو ... يعنى اعمل نفسى فاهم فى كل حاجة واى حاجة ... كدة ابقى حاجة .. كدة ابقى بنى ادم ... كدة الناس تحترمنى وتقول علية ابن ناس ... كدة ابقى حضارى مواكب التقدم .... كدة ..................

كد ة ابقى ماليش اى تلاتين لازمة ... كدة ابقى عاله على المجتمع والناس والدنيا كلها ... كدة ابقى كغثاء السيل واستاهل اللى بيحصل لى ... كدة ابقى ما اساويش تلاته تعريفة فى سوق الرجاله ... كدة ابقى مسخ ....كدة يبقى صح انى انضرب بالجزمة من برة ومن جوة .... كدة عمر ربنا ما حينصرنى ... كدة عمرى ما حأشوف عز ... مش حشوف غير احمد عز ....

سؤال : هوه لازم حد يعدلنا ؟ ... طاب لواللى ممكن يعدلنا مايل ... ماينفعش نعدل نفسنا ؟... ولا هوه عيب ان احنا نتعدل اصلا ؟

ملحوظة : معنى تلاتة تعريفة :

التعريفة هى نصف الصاغ ... والصاغ هوه القرش ... وميت قرش يعملوا جنية ... والجنية مبقاش يساوى حاجة ...فتلاتة تعريفة يعنى صاغ ونصف .... على فكرة انا كنت باخد مصروفى تعريفة وانا فى الابتدائى .... ياااااااه دا انا قديم قوى ....

فوق الفظيع

فوق الفظيع

كان ياما كان فى سالف العصر والاوان ملك مجنون بالملابس الجديدة ... كل يوم يلبس حاجة ملبسهاش قبل كدة ... وفى يوم من الايام جاله اتنين خياطين نصابين اقنعوه انهم بيخيطوا لبس سحرى ... وانهم ممكن يعملوا له بدله سحرية ماتعملتش قبل كدة ولا حتتعمل بعد كدة ... بدله اللى مايشوفهاش يبقى يا خاين ياحرامى يا نصاب يامجرم ... وبكدة يعرف كل اعداءه ويقتلهم ... الملك العبيط وافق .. والخياطبن طلبوا خيوط دهب وفضة وماس واحجار كريمة علشان يبدأوا فى نسج القماش وتفصيل البدله ... وبعد اسبوع بعت الملك الوزير علشان يشوف هما عملوا ايه ... راح الوزير لقاهم بيعملوا حركات فى الهوا وكانهم بيغزلوا القماش ... فاستغرب ...قاله واحد منهم ايه رايك فى القماش ... الوزير خاف يقول انه مش شايف حاجة ...لاحسن يقولوا عليه خاين ونصاب والملك يطير رقبته .... رجع للملك وقال القماش اللى اتغزل روعة يا مولاى ... واكيد البدله حتبقى روعة ... وبعد اسبوع بعت الملك كبير الياوران علشان يتطمن على البدله .. رجع له وقال : روعة يا مولاى وحيخلصوها بكرة ... تانى يوم دخل الخياطين ... وقلعوا الملك هدومة وعملوا انهم بيلبسوه البدله ... الملك ماقدرش يقول انه مش شايف حاجة لاحسن يطلع خاين للبلاد والعباد والشعب ينقلب علية .... ركب الملك العربية بتعته وهوه عريان ملط قدام الجماهير وقال لا عوانه خدوا بالكوا اللى مش حيشوف البدله امسكوه لا نه كدة حيبقى يا حرامى يانصاب يامجرم ....الناس كانت عرافه الحكاية فكان كل مايمر على مجموعة تهتف وتعلى صوتها وتقول يا جمال البدله ياحلاوتها ...وفى شارع من الشوارع كانت واقفة واحدة ست وشايله ابنها الصغير ... اول ما عدى عليهم الملك الولد الصغير صرخ وهوه بيضحك ... الملك عريان .. الملك عريان ...

ما اعرفش ايه اللى خلانى افتكر الحدوته دى وانا باتفرج على فيلم رسايل البحر ... اللى روتانا سينما عملت معانا واجب جامد جدا وجابتهولنا هدية فى راس السنة ... دا طبعا علشان انه فيلم فوق الفظيع ولامم جوايز ومشارك فى مهرجانات وكل الجرايد والمجلات بتشكر فيه وفى المبدعين اللى اشتركوا فى تاليفة وتمثيله وطبعا اخراجة .

وبعدين لقيت نفسى باظلم الفيلم ... اشمعنى هوه يعنى اللى مش عايز اصدق انه فيلم كويس ... ما احنا مصدقين كل اللى بيتقال حوالينا ... مش علشان هوه حقيقة او هوه صح ... لا ...خالص .. احنا مصدقين علشان مانبانش جهله ومتخلفين .

ما احنا مصديقن ان اقتصادنا فوق الفظيع وان احنا احسن من امريكا ودبى اللى باظوا ياولداه فى الازمة الاقتصادية ... مع ان تلتين الشعب مش عارف يكمل الشهر .

ما احنا مصدقين ان جامعاتنا فوق الفظيع واننا مركز اشعاع العلم واحنا اللى علمنا العالم القراية والكتابة ... مع اننا ماطلعناش من الخمسميت جامعة الكويسة على مستوى العالم .

ما احنا مصدقين ان القرد ابو صديرى اللى بيتنطط على المسرح وصوت الموسيقى اللى وراه مغطية على صوته ... انه العندليب بلبل زمانه ... مع اننا عمرنا ماسمعنا صوت عندليب ولا بلبل .

ماحنا مصدقين ان النادى الاهلى نادى القرن واحسن فريق بيقدم كورة ... مع انه بيجيب لعيبه جاهزة ديليفرى من النوادى اللى جنبه .. مع ان الاهلى لوماطلعش مواهب مين يطلع ؟.

ما احنا مصدقين ان الازهر فوق الفظيع وانه منارة الاسلام من الف سنه مع ان علمائه بيطلعوا يقولولنا .. اشربوا بول النبى ..والمكوجى اللى يكوى فستان ولا جيبة لازم يتوضى بعدها .

ما احنا مصدقين ان دبلوماسيتنا فوق الفظيع واننا رمانة الميزان ... مع ان العالم كله مش شايفنا اصلا ... وضاربنا بالجزمة ومتدخل فى كل كبيرة وصغيرة عندنا .

ما احنا مصدقين ان جو مصر لسه فوق الفظيع وانه حار جاف صيفا دافئ ممطر شتاءا ... مع ان المناخ اتغير فى لعالم كله .. وان الشتا عندنا واخد اجازة السنة دى .

احنا بجد فوق الفظيع علشان مصدقين .. او عاملين مصدقين .. او مش فاهمين.. او عاملبن مش فاهمين ... او عبط او بنستعبط ... او ان مافيش فايدة من اللى باعمله دة ...بس برضة حاعمله لان ماحلتيش غير لسانى وكى بوردى ... وشوية ناس صغيرين بيقولوا ساعات بيبقى عندك حق .

هوه ده اللى عندى

هوه ده اللى عندى

كل سنة وانتم طيبين

كل سنة وانتم طيبين

كل سنة وانت طيبين وفرحانين ومبسوطين ... ولاى انتخابات مش رايحين ... ولكل اللى يزعلكوا مطنشين ...
ايه رأيكوا نعمل حاجة جديدة السنة دى :
كل واحد يكتب اهدافه اللى عايز يحققها السنة دى .... خمس اهداف :
* على المستوى الدينى
* على المستوى الاجتماعى
* على المستوى الوظيفى
* على المستوى الصحى
* على المستوى الشخصى
بس بشرط يكون الهدف واضح ... وليه ميعاد يكون متنفذ فيه ... ونكتبه على ورقة ... ونعلقة على التلاجة ... علشان اللى رايح واللى جاى يشوفة ... ويبقى شكلنا وحش قوى قدامه لو مانفذناهوش ... فكرة جديدة ممكن تدى للايام اللى جاية معنى ... علشان نعرف نعيش غصب عن اى حد مش طايقنا ومش عايزنا

الجواز التانى حكاية ملهاش نهاية

الجواز التانى حكاية ملهاش نهاية

كنا ماشين فى المعدل الطبيعى ... كل كام شهر كدة يطلع واحد من الشلة يقول انا عايز اتجوز تانى ... وشوية ويهبط ... ياعلشان متردد .. ياعلشان خايف من اللى حيحصل له .. ياعلشان مابيعرفش ... قصدى مايعرفش من قلة الموارد المالية .. ماهو اصل الجواز مكلف .... اليومين دول بقى العملية ذادت حبتين .. بقى المعدل اتنين تلاتةكل اسبوع يقولوا عايزين تنجوز تانى ... وبرضة شوية ويهبطوا .

وعلشان اى ظاهرة فى الدنيا لازم يكون ليها اسباب ... وانا كنت مقتنع ان سبب الحالة دى هيه ازمة منتصف العمر ... يعنى الراجل من دول ...فجأة بيكتشف ان عمرة جرى منه وهوه بيدور على لقمة العيش ... فيبقى عايز يلحق اللى فاضل من شبابه ... ورغم ان دى حقيقة لايمكن اغفالها ... الا ان الموضوع اتضح انه ليه ابعاد تانية .

الراجل من دول بيقول فى اسباب طلبة للجوازة التانية ... ان مراتة ماعدتش زى الاول ... بقت مفترية ..دا غير انها مش واخدة بالها منه ...وان هية ماكنتش عايزاه علشان ذاته .. لكن كانت عايزاة طمعا فى حيواناته المنوية اللى حتخليها تخلف وتعيش امومتها ... وبعد ماخلفت اتحولت لمرابى يهودى محتال ...كل همه انه يستنزف فلوسه ويخليه على الحديدة .. وورغم ان دى حقيقة لايمكن اغفالها ... الا ان الاهم هوة ايه اللى خلى المراة كدة ... ايه اللى خلاها اتوحشت وأوحشت من وجهة نظر الراجل .

من وجهة نظرى ... ان اللى خلى المرأة بالفكر ده والاسلوب ده والتصرفات دى ... هوه الراجل ... الراجل اللى عايز يتجوز تانى وفاكر ان الجديدة حتكون مختلفة وتعوضة وتديى له اللى عايزة ... مايعرفش ان القصة كلها شهرين وتتحول الجديدة الى صورة طبق الاصل من القديمة ... امومتها وفلوسه هما اللى ليهم الاولوية القصوى ... نرجع تانى بعد الاستطراد اللى حيهيج العالم عليه ونقول ايه اللى خلى المرأة بتفكر كدة وتتصرف كدة ؟ ... انا راى انه الراجل هوه السبب ... هوه اللى جة يكحلها فعماها ... هوه اللى لخبط مشاعر ووجدان وافكار المرأة ..

هوه اللى حولها لملكية خاصة اذا كان اب ولا اخ ولا زوج ... ملكيه خاصة يطلع عليها الذل والقهر والاهانه اللى بيشربهم طول النهار من اللى حواليه ومن رئيسه فى الشغل وفى البلد ... هوه اللى خلاها ملكية خاصة يسقط عليها خيبتة وضعفة وقلة حيلته وجهله .. علشان يبان قدام نفسة انه دكر ماحصلش ... هوه اللى اقنعها انها مجر جسد ... وسيلة للمتعة والترفية اللى بيمارسة برضة بوجهة نظر الدكر القوى المفترى ... وفى نفس ذات نفس الوقت اقنعها انها عورة وان لازم تتستر وماتعبرش عن اى مشاعر او احاسيس وتتنقب حتى لو مالبستش النقاب ... وفى نفس ذات النفس قالها انها رمز العطاء ... ينبوع الحنان ...الامومة الطاغية ... اللى ممنوع عليها انها تعمل اى حاجة او تفكر فى اى حاجة ...غير انها تربى العيال وتاخد بالها منهم ... لما اقنع المرأة بكل اللى فات وخلاها تحفظ الدرس من من ايام ستى وستك ... وتورثة ... لغاية مابقى فى عقلها وفكرها وكيانها ... جاى يشتكى .. ويعاقب ويقول أنا عايز اتجوز ... طاب ما انت السبب .. انت اللى لخبطها ... انت اللى خليتها تشوف نفسها ملكية خاصة ... تحت امرك يا سيدى ...خلتها شايفة نفسها عورة .. شايفها نفسها مجرد جسد للمتعة ... ... صراع بين اللى فارض عليها انها تشوفه ... وبين ادميتها كأنسان له مشاعر واحاسيس ورأى وكيان وعقل ورغبات وتطلعات ... نتيجة هذا الصراع .. كان التوحش الناعم اللى حضرتة بيشتكى منه .. النتيجة .. لف ودوران ومكر ... سلاح بتدافع بيه عن نفسها لانها عارفة انها لو جات فى العدل حيحصل لها ايه ... النتيجة ان الجسد اللى الدكر عايزة بقى أداة تعذيب ... تعذب بية الدكر ونفسها فى نفس الوقت .. النتيجة انها ماقدمهاش غير انها تمسك فى امومتها اللى بتلاقى فيها نفسها ... لما تلاقى حد محتاجها ومايقدرش يستغنى عنها ... حد تحس انها ملكاه ... ماهى طول عمرها ممكلوكة ... النتيجة استنزاف فلوس الدكر عقابا ليه وأمان ليها

انت السب ياعم الدكر ... اشرب ياحلو ... انا لو مكان المراة ... اخليك تتجوز تانى ... علشان تشرب من كاس غباءك حتى الثماله .

ملحوظة :

انا مش متأكد قوى ان وجة نظرى صح ... بس اللى متأكد منه قوى ... ان الرجالة والستات حيرفضوا هذا التحليل ... الرجاله علشان تبان دكورة ... والستات علشان تبان انها زى الولد ماهياش كلة عدد ... براحتهم ... وجهة نظرى وتلزمنى ...