الكتالوج (6)
ابو تقى ميكانيكى شاطر ….كان شغال عند الاسطى احمد كبالن فى ورشتة …ورشة عظمة …والزباين بالكوم …بس الاسطى كبالن كان بيضحك على الزباين ….كان يصلح قطع الغيار ويحاسبهم على تمن قطع غيار جديدة …ولما بيغير زيت العربية …يغير من الزيت بتاع الالف كيلو…ويحاسب على ابو تلتلاف كيلو….كانت العملية ماشية معاة نار …كل يوم يرجع لة بالفين تلتلاف جنية …كان بيدى ابوتقى مية وخمسين جنية فى اليوم ….بس ابو تقى ماكنش مبسوط …كان شايف ان الفلوس دى مش مظبوطة …ابو تقى بعد ماخلف تقى …قرر انة يسيب الشغل عند كبالن …ويضحى بالمية وخمسين جنية …قال انة عايز يوكل بتة حلال …ام تقى باعت حتيتين الدهب اللى معاها واجروا محل ايجار جديد …ابو تقى اشترى عدة وظبط المحل واتكل على الله ….عدى على ابو تقى سنة صعبة قوى …يادوب بيقدر يجيب العشا وهوة مروح كل يوم …..ابو تقى فضل صابر كان يقول فى نفسة اتقى ربنا يا واد …وبصراحة مراتة كانت دايما جنبة كانت تقولة اصبر الحلال مافيش احسن منة …وبعدين ياخى شوفتنى اشتكيت …و بعد شوية ابو تقى كان نايم على السرير بيفكر …بدأ الشيطان يلعب بدماغة …يعنى لو كنت بتعمل زى كبالن مش كان زمانها مبشبشة …وبعدين هوة بيعمل اية يعنى !! ماهى العربيات بتطلع من تحت ايدة زى الفل ومحدش اشتكى ….والبعدين الزبون من دول راكب عربية بالشىء الفلانى اية يعنى لو اتقلب فى مية ولا متين جنية …مش انت اولى ترجع بكيلو لبن للبت ….ولا تجيبلها لعبة بدل ماهى بصة لعيال الجيران …ياعم دماغك بقى …ماهوا كلة على دا الحال …ابوتقى راح تانى يوم المحل وكان مقرر انة يعمل زى كبالن …وجة اول زبون …ابو تقى مقدرش يعمل زى كبالن …وعمل اللى يرضى ربنا …الزبون طلع يجرب العربية ورجع يشكرة وقاله عمر العربية مااتظبطت كدة …ربنا يبارك لك ….ومرت الايام …وبرضة هما هما الزباين ماحدش جديد والدنيا مزنقة والمصاريف بتزيد …بس ابو تقى صابر …وفى يوم ماكنش عايز ينزل الشغل …كان زهقان وقرفان …مراتة قعدت جنبة وقالت لة قوم يابو تقى اتوضى وصلى ركعتين وانزل المحل دا ربك رب كريم وعالم بالحال ….حتفرج والنبى لا تفرج …نزل ابوتقى وفتح المحل ..ويادوب لسة بيقعد على الكرسى ولقى عربية تويوتا اخر موديل وقفت قدام باب المحل …نزل من العربية باشا كدة من ابو نضارة سودة …الراجل قالة انت ابو تقى ؟ ابو تقى اترعب وقلة ايوة يا باشا… خير …. قاله احنا توكيل تويوتا فى مصر ومش فى خطتنا نفتح مركز صيانة هنا …فقلنا نتفق مع حد هوة اللى يقوم بعملية الصيانة باسمنا …وعملنا ابحاثنا وعرفنا انك اشطر وانضف واحد فى المنطقة …فقررنا انك تكون مسئول على الصيانة لكل عربيات تويوتا …ابو تقى مضى العقد مع الباشا …نسيت اقولكوا …احمد كبالن فاكرينة …بيشتغل دلوقتى صبى عند ابو تقى …ماهو قفل الورشة …طبعا مش محتاجة اقولكوا لية ….بس حقولكوا …. علشان مابصش فى الكتالوج ….لكن ابوتقى بص ….
قالى تعالى : ومن يتق الله يجعل له مخرجا (2)ويرزقة من حيث لا يحتسب ومن يتوكل على الله فهو حسبه ان الله بالغ أمرة قد جعل الله لكل شىء قدرا (3) صدق الله العظيم . الطلاق
قالى تعالى : أفوا الكيل ولا تكونوا من المخسرين . صدق الله العظيم .الشعراء 181
طيب انا اعلق اقول ايه
ردحذفالقصة دي قصة كل شريف في الدنيا
الأول ربنا يبتليه بضيق في الرزق علشان يمحص نيته
ثم يقف بجانبه زوجة عارفة فرق لحم نابت من حلال ولحم نابت من حرام
ثم تضيق تضيق تضيق حتى تستحكم حلقاتها
فيأتي فرج الله وكنت أظنها لن تفرج
وفي صورة الطلاق كلام رائع
ومن يتقي الله
ربنا يرزقه من حيث لا يحتسب
يجعل له الله من امره يسرا
يجعل له مخرجا
ربنا يكرمك على كل بوست ايدك بتكتبه لأن فعلا كلها اصلاح
السلام عليكم و رحمة الله و بركاته
ردحذفبجد يا دكتور ربنا يكرمك يارب
فعلا هو الحال كدا
" ام حسبتم أن تدخلوا الجنة و لما يعلم الله الذين جاهدوا منكم و يعلم الصابرين"
" أحسب الناس ان يتركوا ان يقولوا آمنا و هم لا يفتنون "
" و نبلوكم بالشر و الخير فتنة "
و فى الاخر تكون النتيجة زى ما حضرتك ما ذكرت
ربنا يبارك لحضرتك يارب
دمت بود
ومن يتق الله يجعل له مخرجا
ردحذفالمشكلة إن الناس مبتصبرش
لازم ربنا يبتلينا شوية
{أَحَسِبَ النَّاسُ أَن يُتْرَكُوا أَن يَقُولُوا آمَنَّا وَهُمْ لَا يُفْتَنُونَ} (2) سورة العنكبوت
حلوة فكرة الكتالوج
وحلوة القصص
وحلو الإسلوب
ربنا يجعله في ميزان حسناتك
جسمى قشعر يادكتور والله
ردحذفربنا يبارك لكل شريف ويعوضه خير
من ترك شيئا لله عوضه الله خيرا منه
ربنا يجعل الكتالوج كله فى ميزان حسناتك
يادكتور اسلام
ربنا يبارك لك يادكتور
ردحذفويجازيك كل خير
على القصص الحلوة الوااقعية اولا
وعلى استمتاعنا باسلوبك الشيق وافكارك الجميلة ثانيا
بجد كتالوج كله اصلا ويارب يارب كلنا نبص في الكتالوج كويس
وبعدين حتى لو ابو تقى مكنش اخد توكيل تويوتا دة وفضل فقير كان هيكسب فى الاخر....
ردحذفانا مبعملش الحلال عشان مستنية حاجة انا اعمله عشان هو الصح بعد كدة كله على الله
فعلا الحلال لا يقارن طعمه بالحرام ابدا.
ردحذفالحلال مع الصبر بيبقى نتيجته فى الاخر رضا نفس وراحة بال ميتقدروش بتمن.
اه ثم اه ثم اه
ردحذفلو بس الناس تعرف كده ؟؟
اصلها مش عااااااافيه والله ما عافيه
هذا الكون له رب اسمه الكريم واسمه المنتقم الجبار
رب منظمه تنظيم محكم مش سايبه
اوصيكم ونفسي بتقوى الله
ومن عندي الصبر والرضاااااااااا يا جودعان عشان الكتالوج قال كده
كمان لئن شكرتم لازيدنكم
تحياتي لك كالعاده بوست رائع