الكتالوج (7)
آآآه ....يادماغى
عجيزة ....ابوة سماه كدة ... تقولش قلبة كان حاسس ....عجيزة اتخرج من كلية الآداب قسم علم نفس .... عجيزة لسة بابا وماما ربنا يديهم الصحة ويديم عليهم المعاش بيصرفوا علية ...عجيزة مافيش قهوة ولا كازينواولا سيبر فى البلد مايعرفهوش ...عجيزة يقوم من النوم كل يوم الضهر ....وعلى اول كشك سجاير يشترى العلبة الكليوبترا البوكس وعلى القهوة عدل ...ويديها فى دومينوا عادة وامريكانى لغاية العصر ...يروح يتغدى وينام ......يقوم المغرب وجرى على السيبر لغاية الفجر ..... بقالة على الحال دة خمستاشر سنة من يوم ما اتخرج ....ابوة وامة متحسرين علية ...ومش عارفين يعملوا معاه اية ....بيقول انة مستنى لما الحكومة تشغلة ....عجيزة استاذ فى الشكوى ورئيس قسم احلام اليقظة ودكتوراة رمى الجتت...قالى : ماهو لو كنت دخلت طب كان زمانى شغال من اول ما اتخرجت ...قولت : ومدخلتش طب لية يا عجيزة ...قالى : ماهو انا مابحبش العلوم ..وبعدين يعنى لو كنت دخلت علمى ...تفتكر يعنى كنت حاجيب مجموع ...انت مابتعرفش هما بيعملوا اية فى التصحيح ...دول مابينجحوش غير اللى بيعرفوهم ....مانتش سامع عن الامتحانات اللى بتبقى فى ايد العيال قبل اللجنة ..قلت : طاب ماشتغلتش لية بشهادتك ؟! ... قالى : وهيه دى شهادة ...ماهو ابويا بقى الله يسامحة هوة اللى غصب علية ادخل الكلية الهباب دى ....ماهو لو كان سابنى اختار الكلية اللى على مزاجى كان زمانى بقيت حاجة تانية ....... قولت : طيب ماتعلمتش صنعة لية ؟!... قالى : اية ...صنعة ...ميكانيكى يعنى ولا سروجى !!!.....آه ...علشان محدش يرضى يجوزنى بتة ...ماهى الناس دلوقتى مش عايزة غير الشهادات ....ماحدش بيبص للصنايعية ....وبعدين بعد التعب اللى تعبتة فى التعليم عايزنى ابقى صبى ميكانيكى ولا صبى نجار ...طبعا مستحيل ...كرامة الواحد بالدنيا ....قولت: طاب وبعدين يا عجيزة ؟!....قالى : وبعدين اية الحكومة اكيد حتشغلنا ...ماهو مش معقول حتسبنا كدة ....قولت : طاب لو الحكومة ما شغلتكش ؟ .... قالى : انت عارف اية اللى حيلخص؟... ان الواحد يجيب لة عربيتين ملاكى زيرو ....وياجرهم ...فى الافراح ...فى المشاوير ...انت عارف الساعة بكام ؟ الساعة بميت جنية ...يعنى لو العربية اشتغلت ست ساعات بس ...يعنى العربيتين يجيبوا الف ومتين جنية فى اليوم يعنى فى الشهر ستة وتلاتين الف جنية ...لخص يا عم الحاج ...سألتة : وانت معاك تمن العربيتين ؟ ...قالى لا ما انا حاجيبهم تقسيط ....سالته تانى ...انت معاك المقدمة ؟ قالى ربك كريم.... وقبل ما ارد علية لقيتة بيقولى : انا مضطر امشى علشان عندى بولة استيميشن ....عايز اعوض واخد بتارى اصلهم طلعونى الكوز امبارح ....سلام .....سالت نفسى هوة عجيزة زعلان لية انة طلع الكوز امبارح ...هوة مش عارف انة الكوز بقالة خمستاشر سنة ...بس تقول اية ماهو مابصش فى الكنالوج ..
قالى تعالى : ان الله لا يظلم الناس شيئاولكن الناس انفسهم يظلمون. صدق الله العظيم .يونس 44
قالى تعالى : وأن ليس للانسان الا ماسعى . صدق الله العظيم .النجم 39
قالى تعالى : الذين ضل سعيهم فى الحياة الدنيا وهم يحسبون انهم يحسنون صنعا.صدق الله العظيم الكهف 104
قالى تعالى : ان الله لا يغير ما بقوم حتى يغيروا ما بانفسهم .صدق الله العظيم . الرعد 11
استاذ فى الشكوى ورئيس قسم احلام اليقظة ودكتوراة رمى الجتت
ردحذفهههههههههههه الا لو كانت دي فعلا أقسام جامعة كنا بدعنا فيها
حبيت مدونتك =)
بوست رائع كالعادة,بالتوفيق دائما.
ردحذفأهو عجيزة ده بقي شفت منه كثير
ردحذفواحد دايماً عنده شماعات كثير بيعلق عليها كل حاجة
كل فشل عنده بسبب حد تاني
وكل مشكلة هوه بيعملها نتيجة تصرف حد تاني أثر فيه وهوه صغير
ودايماً يحسسك إنه خلاص هيتغير
وإنه داخل علي مشروع كبير هيطلعه لفوووووق
بس المشكلة إنه بقي بيحب التفاهة
كالعادة موضوع رائع وجميل
نسيت تقول ان جاله شغل قطاع خاص
ردحذفومرتبه 300 جنيه
وقال نعمممممممممم دول ما يكفونيش سجاير
يعنى اشتغل ليل ونهار واخد 300 جنيه ده انا باصرفهم فى اسبوع
ياخي نع
حقيقى لما بامشي فى الشارع الساعه 2 الظهر والاقي الشباب الى ماشي كله فى الشارع صاحي لسه من النوم يادوب وضاربين جل وعنيهم حمرا من السجاير
وحاجه تقرف
واقول مش دول الفئه المنتجه ؟؟ نايمين طول النهار
طب بينتجوا اممممممممممممته
تحياتي لحضرتك فعلا سلسله جميله اوي ربنا يكرمك
الغلط مش عليه
ردحذفالغلط على ابوه انه ماعلمهوش من صغره
يعنى ايه مسئوليه ويعنى ايه رجوله
انا قلت من زمان ان الرجاله ماتوا فى 73
والباقيين دول بقايا حرب
لو بصيت حلو قوي حولك ها تجد ثلاث اربع البلد عجيزة مش في الشغل بس
ردحذفلكن كل واحد همته قصرت عن نيل آماله بيجد شماعة عجيزة يعلق عليها فشله
وكم من العجايز فيكي يا بلد