السبت، 20 يونيو، 2009

الكتالوج (9)

الكتالوج (9)

خدعة العمر

طلعت من الباب ويادوب نزلت سلمتين ....رجلى مابقتش شيلانى ....رحت قاعد على السلم ....ماحسيتش باية اللى بيحصل حواليا ....ولا مين طالع ولا مين نازل ...كنت عامل زى اللى قاعد فى اوضة ديقة فى بدروم ....شباكها حديد باصص على الرصيف ... جدرانها متبيضة بالجير ومنشعة مية من الرطوبة ....نورها جاى من لمبة سهارى بتضلم اكتر ما بتنور ....وبابها خشب مسوس مقفول بترباس كبير ...وانا جوة الاوضة دى ونفسى مكتوم لا قادر يطلع ولا قادر يدخل ...وصوتى محبوس والعرق مغطينى من راسى لرجلية .... فوقت على صوت ست عجوزة وهية بتهزنى وبتقولى مالك يابنى فية حاجة ....بصيت لها وماردتش ...والله كنت عايز ارد بس صوتى ماكنش قادر يطلع ......سالتنى تانى فية حاجة يا ضنايا ...اتسندت على الدرابزين ووقفت ...وقولت لها لا ياأمى مافيش حاجة ....وطلعت من باب العمارة ووصلت للعربية وفتحت الباب ....اول مرة اخد بالى انى عندى عربية ....بقاللى عشرين سنة با سوق ....واول مرة اخد بالى انى عندى عربية ....طلعت الشقة ولأول مرة برضة اخد بالى ان فية يافطة على الباب عليها اسمى ....وحمدت ربنا ان البنات وامهم فى النادى علشان مايشوفنيش بالحالة دى ....اية دة وكمان عندى اشتراك فى النادى ....عملتة امتى دة ؟!....اترميت على السرير ....وعينى لزقت فى السقف ....وشفت فيلم قصة حياتى ....من ايام ما كنت بانط من على لسور المدرسة علشان اروح السيما اشوف فيلم بروسلى .....لغاية مادخلت الكلية وافتريت فى الكفتريا مش المحاضرات طبعا ...ولما عديت على الجماعات الاسلامية ولما ضحكوا علية وخلونى اوزع منشورات ....اللى لغاية دلوقت ماعرفش كان فيها اية ...بس كان دفاع عن الاسلام ....!!! وشفت ايامى فى الحزب الاشتراكى الوحدوى التقدمى .....والجيش والصحرا وبرانى اللى من ليبيا مسافة نص ساعة ....والسنتين ونص اللى دورت فيهم على الشقة علشان اتجوز ....والبنات اللى اتعمل فيهم مجهود غير طبيعى علشان يجوا ....والشغل وصراعاتة ....والترقية والمدير ومدير المنطقة ...والامانى اللى ماتحققتش والاحلام اللى اتقلبت كوابيس ......مشوار ابن كلب ...مالوش اى لازمة ....ايوة مالوش اى لازمة ...ماهو اخر المشوار ...رقم متعلم علية بالماركر .....ولستة طويلة الممنوع فيا اكتر من المسموح ...واوامر وان ماكنش اوامر تبقى نصايح وان ماكنتش نصايح تبقى مصمصة شفايف ....وحبة عين امة ....وياكبدى علية دا لسة صغير وولادة لسة لحمة حمرا ....ومبقاش غير انى اعمل صوان واجيب مقرىء واقف اخد العزا فيـّة ....وفجأة خطر على بالى الاية الكريمة اللى بتقول . قالى تعالى : كبر مقتا عند الله ان تقولوا ما لا تفعلون . صدق الله العظيم . قولت لنفسى هوة اللى على الشط عوام ولا اية اجرى ياواد على الكتالوج ..... قمت اتوضيت ومسكت المصحف وقريت ....

قالى تعالى : هو الذى خلقكم من طين ثم قضى اجلا واجل مسمى عندة ثم انتم تمترون .صدق الله العظيم .الانعام 2

قالى تعالى : ولنبلونكم بشىءمن الخوف والجوع ونقص من الاموال والانفس والثمرات وبشر الصابرين . صدق الله العظيم . البقرة 155

قالى تعالى : ام حسبتم ان تدخلوا الجنة ولما يعلم الله الذين جاهدوا منكم ويعلم الصابرين . صدق الله العظيم . ال عمران142

قالى تعالى : وعسى ان تكرهوا شيئا وهو خير لكم . صدق الله العظيم .البقرة 216

بعد ماخلصت قمت لبست الترينج ونزلت علشان العب مع العيال فى النادى ...وحاكمل مشاريعى ...وحكمل المدونة ...وحكمل حياتى ...وحنعيش يعنى حنعيش ...بس المرة دى حاخد بالى اكتر واستمتع اكتر وحاعيش الحياة اكتر واكتر ...

الخدعة بقى فين ....شوف ياسيدى ...وانا رايح النادى رن الموبايل ....دكتور المعمل اللى عملت فية التحليل ....قالى عايزينك ضرورى فى المعمل ....دخلت علية ...قام من على المكتب وسلم علية وهاتك يا اسف ويا اعتذارات ...قولت له ياعم لخص فية اية ...قالى تحليلك اتلخبط ما واحدة اسمها اسلام ...كانت جاية تعمل تحليل سكر حمل ...وبدال مالدكتورة تكتب اسمها على التقرير كتبت اسمك ....وعطانى التقرير بتاعى اللى طلع مافيهوش سكر ....وقالى دى ورقة تعمل فيها التحاليل اللى انت عايزها لمدة ست شهور ببلاش ......قطعت الورقة وقولت له المهم تشوف الست اللى طلعتوها ماعندهاش سكر دى ...انت عارف ان كدة يبقى خطر على البيبى ....شوفتوا بقى كنت حاطلع واحدة ست وحامل كمان ............ بس خلاص

هناك 14 تعليقًا:

  1. السلام عليكم

    فعلا الانسان بطبيعته ظلوم كفار

    عمره ما يشيل هم الشكر الا لما يحس بالنعمة ومش بيحس بالنعمة طول ماهى دايمة فى ايده

    ربنا يرزقنا الانتباه من غفلتنا ويعافينا ويرضى علينا

    تحياتى

    ردحذف
  2. فعلا الانسان مش بيحس بنعمه ربنا عليه الا لو اتهددت النعمه دى بانها ممكن تزول
    ربنا يديم عليك نعمة الصحة يارب يادكتور

    ردحذف
  3. ياسلام
    يادكتور انا عشت الاحساس ده بس مش سكر لا حاجه كدا من اللى ملهاش علاج مهما كتبت مش هقدر اوصف لحظه الانهيار الحياه كلها بتختلف
    التجربه دى بتخلينا ننظر نظره نختلفه للحياه
    نعرف قيمه كل ذره فيها نشكر ربنا ليل ونهار
    نعرف قيمه الصحه وقيمه عطاء ربنا
    تجربه تستحق الوقوف امامها كثيرا
    حمد الله على السلامه

    ردحذف
  4. الف سلامة من اى تعب

    احنا فعلا بنلهث ورا الدنيا
    وبننسى نعيش


    ربنا بهدينا لحسن العمل.

    ردحذف
  5. الف سلامة عليك يا دكتور
    ربنا يوفقك في حياتك ..

    أخبار البيبي إيه ؟ :)

    ردحذف
  6. لولا المرض لما علم الإنسان نعمة الصحة "حتى و ان كان مرض غير صحيح "

    عجبنى جداا اصرارك على الحياة رغم انك ماكنتش عارف انك سليم

    * ملحوظة "وأجل مسمى عنده" و ليس "عندة"

    شفاك الله وعافاك وسلمك من كل مكروه

    ^_^

    ردحذف
  7. ربنا يديم عليك الصحة يادكتور
    وعلا نعم الله كثيرة علينا
    وكثيرا مانجهلها ولانعرف قيمتها الا عند الاختبار فقط
    حفظ الله من كل سوء
    واعانك على عيشة خالية من المعاصى
    ومليئة بالطاعات
    ودمت بخير

    ردحذف
  8. السلام عليكم و رحمة الله و بركاته
    ربنا يديم عليك العافية و الصحة
    و يطيل عمرك فى طاعة الله و فى سبيله

    بس هو حضرتك رحت برانى ... زمل يعنى ...
    كانت ايام !!!

    بارك الله فيك
    تقبل تحياتى

    ردحذف
  9. سبحان الله ولا حول ولا قوة الا بالله

    الف سلامه عليك

    معلش اصل هما مش بيعاملونا على اننا بشر يا فندم

    حسبنا الله ونعم الوكيل


    سبحان الله حضرتك رضيت وده لوحده لك عليه ثواب

    تعرف يا فندم انا فى موضوع المرض اخدت درس كان قاسي بس الحمد لله عدى بسلام

    ابني الصغير لما ولدته وبعد شوية مشاكل فى الولاده
    اكتشفت بعد 3 ايام انه عنده ملخ ولاده فى ايده وقعدت اعيط لما الدكتور اكدلي ان شكي فى محله رغم انى عارفه انه العلاج الطبيعى بيجيب نتيجه
    لكن صعب عليا الولد انه هياخد جلسات كهربا لشهور قد تمتد حسب التساهيل
    وفى نفسي ما كنتش راضيه كنت باحمد ربنا اه بس وانا مخنوقه

    بعد كده بكام يوم اكتشفت كمان ان عنده بؤره صديديه فى مفصل الحوض الايمن نتيجه لميكروب فى الدم اتنقله من الحضانه الىقعدت فيها 24 ساعه

    ودخلنافى دوامه اكبر وعمليه جراحيه وموال تاني خالص

    ساعتها حسيت ان ده بجد درس يعملنى بالصبر على امر الله والقضاء والقدر والاحتساب بكل الرضا من قلبي مش كلام بس

    حقيقى كان درس قاسي عانيت منه شهور طويله علينا وعلى الولد لكن الحمد لله عدت بسلام والواد بقى زي الفل

    عندك عروسه ؟؟

    هههههههههههه

    مش عارفه فهمت قصدي ولا لا

    لكن الحمد لله انك ما طلعتش عندك سكر حمل
    هههههههههههه

    حمد الله على سلامتك يا فندم

    ردحذف
  10. تصدق نفس الاحساس ده حسيته والله العظيم ، كنت باعمل تحليل طلبه منى الدكتور باصرار ( تحليل كبد وبائى ) قعدت يومين زى وصفك بالظبط ، وما كنتش فى دماغى غير الآية الكريمة " قل لن يصيبنا إلا ما كتبه الله لنا " ولما طلعت النتيجة سلبية حسيت إن ده مرحلة جديدة فى حياتى ، وزاد قربى من المولى عز وجل
    ربنا يديك الصحة ويحسن ختامنا اللهم آمين
    شكرا ... شرفنى مرورك بالمدونة ...يارب دايما

    ردحذف
  11. انتهينا من اختيار الفائزين في مجالي الشعر والقصة القصيرة وذلك لعددنا الأول ولكن مازلنا نرحب بكل الأعمال لأن المسابقة دورية , من يريد أن تصل أعماله من مدّونته الى جمهور القراء فى مصر والوطن العربي , ارسل لنا أعمالك من قصة وشعر وخواطر الى البريد الألكتروني التالي
    arabicsabah@yahoo.com
    كما نرحب بمقالاتكم التي ستنشر فور ارسالها على جروب الجريدة وستصبح مفتوحة لمناقشتها بين القراء ... تابعونا على جروب الجريدة
    http://www.facebook.com/group.php?gid=78080770039
    انتظرونا قريباً في الاسواق
    تحياتي
    الصباح العربي

    ردحذف
  12. والله موش عارفة اضحك ولاابكى

    حقيقى موقف صعب اوى بس الحمد لله انها جت سليمة

    ودة يخلى حضرتك تحمد ربنا عالطول على النعمة الى انت فيها

    جوزيت خيرا و تقبــــــــ مرورى ـــــــل

    ردحذف
  13. اي نقلق عليك ولا ايه بقى

    ابقى طمنا عليك يا فندم

    ردحذف
  14. ايه الحكاية يادكتور
    ليك فترة غايب
    وبدات اقلق عليك
    ارجوك حاول تطمنا ولعل الغياب خير
    تحياتى

    ردحذف