الجمعة، 14 أغسطس 2009

رحلة فى دماغ بنى ادم 2

رحلة فى دماغ بنى ادم 2

أحمـــــــــــــد

جات لأحمد سفرية القاهرة تبع الشغل .....قطع تذكرة القطر ... واشترى المصرى اليوم علشان يسلى نفسة فى السكة ....وقف على المحطة يستنى القطر ...عينة جات على الساعة اللى على المحطة .....قال فى نفسة : آه يابلد.... الساعة دى من ايام الانجليز .... المحطة كلها من ايام الانجليز ... وبعدين الساعة دى بقالها عشرين سنة واقفة على ستة الا ربع...... ياه لو الزمن يقف كده ولايرجع عشرين سنة ....كان الواحد يغيير حاجات كتير ....كان يسافر برة ...ولايعمل مشروع بدل الذل اللى الواحد شايفة فى الشركة بت الكلب دى ...وينقى بقى .....ينقى واحدة حلوة كدة ....ياسلام يا واد لو تصبح تلاقى معاك مليون جنية .....أول حاجة اعملها أروح الشركة واكتب استقالتى على اوسخ ورقة ...وارميها فى وش المدير ....وقول له :يلعن ابوك وابوشركتك وابو الايام السودة اللى اشتغلتها معاك ....واضربة ...ايوة اضربة قلم سخن على وشة يطلع القديم والجديد ....وانزل من عندة اشترى عربية اوكتافيا بالتكييف والبور ....وابيع اللادا المعفنة اللى ذلانى كل يوم الصبح للى يسوى واللى مايسواش علشان يزقنى ...ولا على اية ابيعها ....ارميها ... واجيب شالية فى الساحل الشمالى ....وآكل برة ...ماقولش اوفر الفلوس ولما ارجع ابقى آكل ...وافضل جعان طول اليوم ...والاهم بقى ياحلو تدلع نفسك وتشوف لك يومين ....وتدور لك على بت حلوة كدة زى بتوع الفيديو كليب ....بس حاشطرت عليها ...آه الشرط نور ....حاشطرت عليها انها ماتهتمش بحد غيرى ...ايوة ...لاتقول عيال ولا بيت ولاطبيخ ولا غيرة ...اناوبس ...قايمة نايمة عشانى ....وكفاية كدة على ام العيال ...خلى بقى العيال تنفعها ....ماهى اصلها افترت قوى ...ولا اكنى بنى آدم يا اخى ....بقيت كارت فيزا تحطة فى المكنة يطلع فلوس ...لية هوة انا مش بنى آدم لحم ودم ومشاعر ...وبعدين حابقى جدع معاها ...عايزه تفضل على زمتى اهلاوسهلا....عايزة تتطلق هية حرة ...وساعتها حاديها قرشين حلوين .... انا عارف من دلوقت ....حتختار الفلوس .....وبعدين العيال كدة كدة حتتربى ....افرض انى انا مت ....كانوا حيعملوا اية ...حيكبروا ويتربوا ويتجوزوا ....عادى الدنيا بتمشى الواحد بس اللى بيعرضها ....وانا مش حاسيبهم كدة انا حاحطلهم قرشين باسمهم فى البنك ....اتنطر احمد على صوت الموبيل ....ماهى دى رنة المدير ...الو ..صباح الخير ياباشا ....معلش ياباشا ....والله غصب عنى ياباشا......ماهو القطر هوة اللى اتاخر ياباشا ....انا اسف يا باشا .....والله دا اول قطر بيطلع من عندنا ياباشا

اللىتشوفة ياباشا ...اتفضل ياباشا .....حط الموبيل فى جيبة ...وفتح المصرى اليوم يقرا المانشيت

الحكم باللإعدام على هشام طلعت مصطفى فى قضية سوزان تميم

هناك تعليقان (2):

  1. ههههههههههههههههه
    حلوه جدااااااااا يادكتور
    تسلم ايدك
    انا عايزه من الافكار دى كتير
    وعجبنى قوى كمان البوست اللى فات
    بس قولى صحيح؟
    ليه الراجل اول ما ربنا يفرجها ويبقى معاه فلوس اول حاجه بيفكر يغيرها هى ام العيال
    وول ماهو مش معاه ومش لاقى يااكل هى مستحملاه على الحلوه والمره
    ليه قلة الاصل دى؟
    جاوبنى باعتبار ان اللى بيعملوا كده من بنى جنسك

    ردحذف
  2. شوووووف النداله بقى

    هههههههههههههه

    بس على فكره المليون جنيه ما يعملوش كل ده يا باشا كان زماااااان وجبر

    بس القافله جامده اووووي
    ههههههههههههههههه

    يلا عقباااااااله هو كمان يبقى فى مانشيت

    تحياتي لحضرتك

    ردحذف