حتى على الموت لا أخلو من الحسد
انا من البنى ادمين اللى بيقدروا اللى بيعملوة الزوجات ....وكمان من انصار حقوق المرأة....بس اللى بيقول عليها ربنا ...مش اللى بتقول عليها ماما امريكا...دا غير انى حاسس بكل كلمة كتبتها صبرنى فى بوست المخدماتى ...وبرضة علشان انا من البنى ادمين اللى دايما يشوفوا نص الكباية المليان ..كتبت البوست دة ...تضامنا وليس تعارضا مع صبرنى وكل صبرنى على وجه الارض
أولا : الشغالة بتاخد مرتب علشان تحوش وتقدر تجهز نفسها وتستر نفسها ...لكن احنا لقينا اللى يجهزنا ويعمل لنا الفرح فى قاعة المؤتمرات ويقطع لنا التورتة ام اربع ادوار
ثانيا : الشغالة بتاخد يوم اجازة بس لما بيتروح بتعمل فى بيتها شغل الاسبوع فى يوم علشان ماعندهاش شغاله...لكن احنا عندنا اللى بيساعدنا ...وبنزعل قوى لما نعمل شغل يوم فى
الاسبوع
ثالثا : الشغالة برضة لما بتروح بتذاكر للعيال وبتودى العيان المستوصف ...وتلبسهم من العتبة ...لكن احنا زهقانين من كراسة المتابعة والحجز اللى بعد اسبوعين عند الاستاذ الدكتور ..والزحمة اللى بقت فى المول
رابعا : الشغالة لما بتشتغل شغلتين بتروح تشتغل التالتة ...وبتصرف اللى بتاخدة فى البيت....واحنا لما نشتغل الصبح بيبقى علشان نثبت ذاتنا
خامسا : الشغالة بتلاقى اللى يقول حرام لبسها ووكلها ...وماتعرفوش انها بتوفر لقمتها وهدمتها لعيالها .....واحنا بنلبس الطقم مرتين ونقول كفاية زهقنا ...وبنخرج نتعشى برة
سادسا :الشغالة بتلبس اى حاجة وشكلها مش مهم ...بس اللى ماتعرفوش انها نفسها تلبس حلو وتروح تعمل وشها عند الكوافير بدل صاحبتها اللى بتشعوط لها وشها ...ولماتروح برضة بتضحك فى وش جوزها .....لكن احنا زهقنا من لانجيرى جويا ....بقى بيئة
سابعا : الشغالة لما بتتعب بنجيب لها الدكتور والدوا ..بس لما تروح مابتقدرش ترتاح وراها بيتها وجوزها ...لكن احنا ماما بتييجى تمرضنا وبنجيب دليفرى
ثامنا : الشغالة مابيتمنش على مرتبها ...اللى هية بتصرفه على بيتها علشان تكمل العيشة ...لكن احنا بنصرفة على الموضة والمكياج
تاسعا : الشغالة ممكن فى اى وقت تسيبنا وتمشى ...بس علشان لقت شغل فى حتة تانية بمرتب اعلى يساعد على المعايش ...لكن احنا بنسيب ونمشى علشان مارضيش يحجز فى مارينا
عاشرا : الشغالة لو اتعمل معاها حاجة مش تمام هية كمان حتخش النار.... ولما تروح برضة حتبقى حاجة ببلاش كدة ...وبرضة جوزها عينة على المسلكنين والعريانين ... ويبص عليهم من الخرم كمان
هما الرجالة كدة ...يندب فى عينهم رصاصة
حادى عشر : نحمدوا ربنا بقى ان احنا مش شغالة ...ونرضى بالشقى اللى بيخلى الجنة تحت اقدامنا
ونفتكر كلام نبينا محمد :امك ثم امك ثم امك ...ونعرف جايزتنا ولا لسة برضة بصين للغلبانة فى السبوبة ونفسنا نبقى شغالة
صباح الفل يا دكتور اسلام
ردحذفالبوست حلو طبعا كالعادة
وبما ان حضرتك قلت مسبقا انه تضامنا مع صبرنى ومش رد عليها
ففعلا عندك حق الحمد لله على احنا فيه وعلى نعمة ربنا
بس بردو يا دكتور مش كل واحدة بتشتغل بتصرف فلوسها على الميك واللبس
ومش كل ست بيت اصلا عندها شغالة
لكن الشريحة اللى حضرتك اتكلمت عليها كان عندك كل الحق
وبجد النقاط اللى ذكرتها كلها صح
ميرسي اوى لكومنت حضرتك عندى
وميرسي لان حضرتك شايفنى ممكن اكتب مع انى مش شايفه كدا خالص ههههههههههههه
والله يا باشا وجودك عندى بينورنى
نسيت اقولك يادكتور ان عنوان البوست رائع بجد
ردحذفاللى حضرتك ذكرته وكأنه على لسان الشغالة
بجد تحفة
وكان لازم اسجل اعجابي باختيارك للعنوان
انا مصدقاك جدا في تضامنك مع صبصب هانم اللي ربنا يصبرها يارب
ردحذفوالله يا عزيزي د. اسلام لو واحدة عندها شغالة دائمة وبتعمل "وشها وقفاها عند الكوافير
وبتعمل ساونا وباونا
وبتروح السبا
اوعى تنسى سبا كفر الشمام
وبتنفخ لبناني وتشد سويسري وتتبضع من عند عمنا الفايد في بريطانيا العظمى
ومؤكد دي يا عزيزي لا تقبل ابدا ان تقارن بالشغالة حتى لو كانت فلبينية مش هنية بنت ام هنية اللي القمل بيهري في جتتها
لما تكون فيه مصرية من اغلبية الشعب العامل مرفهة
ساعتها يبقى قلة ادب منها قوي انها تقارن رفاهيتها بالشغالة
لكن اظن صبصب قصدها على اغلبية المصريات
اللي طالع تربانتين اهاليهم
وشغالين بالبكالوريوس برة وبالمقشة جوا وبعد الضهر مدرسات ولو فالحات قوي يكون لهن شوية وظائف تانية علشان ابو عين زايغة
ومؤكد دول اللي انت متضامن معاهم
اللي مثلهم للأسف الشديد
بره وجوا فرشتلك وانت مايل وايه يعدلك
ده غير المثل الممتاز اللي بسمعه في المترو والبوتاجاز ويدل على نهاية طريق اليأس وبداية طريق المقارنة بالشغالات
اللي خدته القارعة يا منيل تاخده ام الشعور
انا معترضه على فكره
ردحذفالاول شكرا على التضامن لكن انا معترضه على اتهامنا باننا ما بنشكرش ربنا
الارزاق دي بيد الله وربك مقسمها
انا باقارن بين الزوجه والشغاله بالنسبه للزوج مش بالنسبه للحياه عموما
مش معنى اننا معترضين على وضع فى المجتمع يبقى احنا مش راضيين عن حياتنا
وعموما البوست ده مش بيعبر عن حياتي انا تحديدا وان كان دي حياة كل الناس
انا بقى ومش بس انا لا اغلب ستات الشعب الغلبان ده
ما بيعملوش تسعين فى الميه من الكلام الى انت كاتبه ده
انا اتجوزت من غير فرح خالص يا سيدى ومن غير شقه كمان
وما باروحش مارينا وما باشتريش من مولات عشان ما عندناش مولات اصلا فى المنصوره
ههههههههههههههههه
وما عنديش خدامه اصلا كنت باجيب واحده مره فى الاسبوع وبعدين قرفوني وزهقوني ما بقيتش اجيب حد
ومش كراسات متابعه انا باذاكر لولادي كل المواد ولغات كمان
ولا باجيب دلفري ولا امي بتيجى تقعد تخدمنى لانا مش فاضيالي ولا كل الى انت قلت عليه
مش معنى كده انى مش حامده ربنا وراضيه وباعمل كل ده بمزاجي كمان
لكن من حقنا نقول احنا بنعمل
من حقنا نقول للرجاله حسوا بينا
انا وضعي احسن من حيث انى باعمل ده فعلا بهدوء ونفسي راضيه وجوزي عارف انا باعمل ايه وبيحاول يساعدنى بس ظروفه مش مساعداه
لكن فى ستات بيعملوا كل ده واجوازتهم مش حاسين به الحاجه لما بتيجى بسهوله واتوماتيك ومش قدامه ماهو فى الشارع طول النهار هو مش حاسس بحاجه
تخيل الاحباط لما يرجع من الشغل وهى هلكااااانه من شغل البيت والعيال
ويقولها مش كفااااااااايه انك قاعده من الصبح ولا على بالك وانا باجري فى الدنيا
طيب ما هو كل واحد له شغله
بس حااااااااسب
هى ما لهاش دعوه بشغلك
انما انت كزوج واب لك ونص وتلاث اربع فى كل كبيره وصغيره فى البيت والعيال ومسؤليتك على الاقل تتابع كل حاجه
لتاني مره يا دكتور باقولك انا مش باقارن بين الزوجه والشغاله بالنسبه للدنيا عموما
لان دي ارزاق وربك مقسمها واحد يطلع غفير وواحد يطلع وزير
انما باتكلم عن الفرق بين الزوجه والخدامه للزوج والبيت فقط
ومع انك حاسس ومتضامن وكل حاجه
الا ان زيك زي باقي الرجاله لسان حالك بيقول احمدوا ربنا على النعمه الى انتم واقفلوا بؤكوا وعيشوا
مش عارفه ليه الرجاله ما بتقولش الكلمه دي لنفسها لما يبقى عنده 40 سنه كده وتعجبه الشغاله ولا السكرتيره ولا اي كلبه لولو معديه
بتهيئلي كفايه كده كلام اصل دكتور اسلام هايطردني
ايه الرغي ده مش معقول كده الرغي بتاعكم ده
د. اسلام
ردحذفكل سنة وانت طيب
كلامك جميل ومقنع .. ولازم الزوجة تحمد ربنا على كل حاجة
بس يخيل لى ان وضع الشغالة فى بعض الاسر المحترمة احسن بكتير من وضع زوجات عاملات من اسر محترمة
فشغالة القرن 21 مختلفة ومدللة جدا
يعنى مثلا عند اخى تبدأ يومها العاشرة صباحا بافطارا شهيا وتحبسه بمج نسكافيه وسيجارة
ثم تبدأ العملمن 11حتى 2 ودائما تقسم الشقة على ثلاث مرات يوما بعد يوم .. ثم تأخذ ماتريد لغذائها واولادها معها وتنصرف ولا تنسى ان المواصلات خارج ثمت العمل
وعندى العن شوية
لو كتبت ممكن تتعجب
وحينما اقارن هذا بزوجة وام موظفة محترمة تستيقظ فى الخامسة ص لتتم اعمالها وتخرج من بيتها لتك وتكدح فى المصالح الحكومية او القطاع الخاص وتعود منهكة لتتم مسئلياتها وفى نهاية الشهر كام ملطوش يادوب ياكلوا العيال العيش بدون غموس ..
والنبى مش الشغالة ارقى منها كتير
زمن بالمقلوب والصبر من عندك يا رب
والا ايه
مااختلفناش ياجماعة اناكل للى عايزة نحلى عيشتنا ونبص دايما على الايجابى اللى فيها علشان نعرف نكمل وعلى فكرة انا علشان ارتاح عملت لى مرجعية ومرجعيتى ربنا وربنا شرع انا الست تاخد مهرها فى ايدها مش علشان تجيب بية العفش ..ويكون عنها شغالة تساعدها فى بيتها
ردحذفبس لو الظروف الاقتصادية ماتسمحش نعمل اية ننكد على نفسنا ولا نعمل زى الرسول ماقال نبص للى اقل مننا ممكن اكون غريب شوية بس هية دى مدونتى حنعيش يعنى حنعيش
ما قلناش ما نعيش يا دكتور
ردحذفما قلناش ما نرضاش
بس لما تفكرنا ان حالنا احسن من الخدامه
يبقى هاتمنوا علينا بقى بنعمة ربنا الى مالكوش ولا لنا يد فيها
هو انتم متجوزينا ايه
بنات عيله ومتعلمات ولا خدمات ؟؟
الظروف الاقتصاديه دي
لازم الست الى تدفع تمنها لواحدها ؟؟
وكمان مافيش اعتراف بالحق ؟؟
خليك حقاني يا دكتور
انا عايزه الناس تشوف الحقيقه مش اكتر
عايزه الرجاله تبص لزوجاتهم بعين تانيه