الاثنين، 23 نوفمبر 2009

أسبوع الشمعة

أسبوع الشمعة

كان عندنا فرصة عمرنا سنة 73 لما انتصرنا فى حرب اكتوبر ....كانت كل الناس متجمعة ...وكان ممكن نعمل حاجة جامدة وننط فى اول الصف اللى فية الناس الكويسيين

وضاعت الفرصه ....والفرص مابتجيش كتير ...مرة او مرتين فى العمر ...دا بالنسبة للبنى ادمين ...شوف بقى الدول ....وجات لنا الفرصة اللى تجمعنا تانى بعد ماتش الجزائر ...اى نعم مش بحلاوة ولا قوة ولا نشوة نصر اكتوبر ....لكن اهى فرصة ....نقدر نكبرها ونطورها ونخمرها ونورى نفسنا قبل ما نورى العالم مين هما المصريين ...كل الحكاية ان الفضائيات المصرية ...هه المصرية مش القطرية ...والصحف المصريه مش الشروق الجزائرية ...يغيروا استراتيجيتهم لمدة اسبوع ....اسبوع واحد بس.... نسمية اسبوع الشمعة ....اسبوع ينوروا فية للشعب المصرى الطريق ويدوه الامل ....كل الحكاية يقدموا الحاجات الكويسة ....والله فيه حاجات كويسة....لكن الحاجات الوحشة هية اللى بتلعلع اكتر ...وصدقونى الاعلانات مش حتقل ....ولا المداخلات ولا 0900 بالعكس حيكسبوا اكتر.... وبرهان ....حيكسبوا فلوس وحيكسبوا احترامهم لنفسهم والاهم رضا ربنا عليهم ...اسبوع واحد بس مانعملش فيه لقاءات الا مع ناس بتفهم ...ناس عندها رؤية ...ناس متفائلة ...شباب من اللى بيبنى مصر بجد...شباب من بتوع العلم والتكنولوجيا والادب الراقى والفكر المستنير ...اسبوع ندى فية الناس اجازة من نوعية الجريئة والعبيطة واللى مابيستحماش وابو شعر ملبد...اسبوع اجازة من الفبديو كليب بتاع الاخت المشلحة والاخ ابو شعر فى صدرة ..سؤال على الماشى ...هية الناس دى مش خايفة يجىلها برد ولا ايه؟! .....اسبوع ننسى فية موقعة الحجاب وملحمة النقاب وانتفاضة اللحية ...اسبوع مانستفزش الناس بالفاسدين ولا نقولهم اجر الفنان اللى ماجابتهوش ولادة كام ...ولا المغنى اللى مقاطع الليفة بياخد كام فى الحفلة ....اسبوع نديع فية اغنية ياحبيبتى يامصر ....واغنية صورة ...اسبوع نعمل فيه لقاءات مع شباب عمل دكتوراة .....شباب طلع من مدرسة الحكومة وبقى مهندس ولا دكتور ....شباب من اللى محدش بياخد باله منهم ...زى الشاب اللى خدتة وكالة ناسا وكان ضيف على قناة الحياة من حوالى شهر ....ووالله ماكانوش ملاحقين على المداخلات اللى كلها فرحه وامل وسعادة ...هاتوا ناس من اللى عندهم قيم ومبادىء بجد رغم بساطتهم وفقرهم ...هاتوا مصر بجد ....ومعلش للسادة اللى مطفحينا أكتئاب واستفزاز روحوا مارينا ولابلاش مارينا تلاقيها ساقعة دلوقت ...روحوا الغردقة ...ارتاحوا من قرفنا وغبوتنا ....مش حيحصل حاجة دا حتى علشان نشتاق لكم ...

مصر حتبقى مصر بولادها ورجالتها وستاتها اللى بيحبوها ويستحملوها وينصروها

مصر حتبقى مصر بينا ...ولو احنا حلوين حتبقى حلوة ....ولو احنا معفنين ...العالم حيشم ريحتها وهما فى الطيارة ....

ساعدونى وادعوا لاسبوع الشمعة ...قبل مانبرد حاكم احنا بنسخن بسرعة وبنبرد اسرع....ونرجع نسب ونلعن ونشتم ونرمى خيبتنا على اسرائيل وامريكا وترجع ريمة لعادتها القديمة

اللهم بلغت اللهم فاشهد ووالله والله ما انا قادر اعمل اكتر من كدة وانت يارب اعلى واعلم


هناك 5 تعليقات:

  1. بتجيب ا فكار عسل الحقيقه

    دماغك الى ا نا هاروحها رحله بتشتغل بايه يا فندم
    عشان بس نشوف ايه الموضوع

    تصور انت خلتنى اتخيل بجد الموقف

    كانت تبقى حلوه والله

    بس هيهات يا استاذنا

    ياريت

    مش هايسيبوا دماغنا ابدا

    بس طبعا انا معاك يا باشا ما نقدرش نتاخر

    نسمك الشمع ونيجى وراك

    ردحذف
  2. وانا ورا حضرنك وصبرنى بالشمع يا دكتور

    بجد افكار حضرتك ورؤيتك دايما سليمة

    وبصراحة عند حضرتك حق لما قلت لازم نعمل حاجة قبل ما نبرد

    انا ايفه كدا بردو شايفه اننا هانفضل نتكلم شويه والموضوع يموت وخلاص ويمر مرور الكرام

    يارب يا دكتور ربنا يخلف ظنى والمرة دى بجد مصر تعمل حاجة

    ردحذف
  3. لو جابوا الناس اللي انت بتتكلم عليهم دول
    لو عملوا اللي انت عاوزه
    الناس ها تفوق وتفكر
    وده مش مطلوب سياسيا ابدا يا دكتور
    علشان كده ها يفضل ابو شعر هو اللي مالي الفضائيات
    والجريئة هي المثال المضروب لنساء هذا الزمان
    وها تفضل مصر هي أمي الغلبانة
    اللي مش لاقية بني أدم يطبطب عليها ويزيل جرح واحد من جراحها المفتوحة شمال ويمين

    ردحذف
  4. مساء الخير
    كل سنه وانت طيب

    ان شاء الله معاكم في اسبوع الشمعه
    وياريت السنه كلها مش اسبوع
    تحياتي

    ردحذف