الجمعة، 27 نوفمبر 2009

رحلة فى دماغ خروف

رحلة فى دماغ خروف

بمناسبة العيد كل سنة وانتوا طيبين ....حادخل فى دماغ الخروف واشوفة بيفكر فى اية

اتلم الناس ورفعوا الخروف على النص نقل ....ربطوة ومشت العربية .... وقف الخروف يتفرج على الشجر وهوه بيجرى ....سأل نفسة :امال الشجر فى البلد مابيمشيش لية ....ولا يكونش الشجر دة بتاع الجنة ....ما انا عارف انى رايح اندبح .....قال وانا كنت فاكر انهم بيوكلونى الفول والدرة علشانى ....اتاريهم بيسمنونى علشان نفسهم علشان لحمى يبقى لحم كتير ولذيذ ....علىفكرة انا مش زعلان انى حأندبح ....ماكلنا حنموت ماحدش حيفضل عايش على طول ...اللى حيدبحنى حيموت ...واللى حياكلنى حيموت ...حتى الحمار زميلى فى الزريبة حيموت ...رغم انة كان بيقولى شفت ميزة انك تبقى حمار ...ماهو بيموت كل يوم ميت مرة ...لما العيال بتطنطط على ضهرة مش دة موت ....لما بيشيل فوق طاقتة ومايقدرش يتكلم مش كدة برضة بيموت ....لما صاحبة بيضربة بالعصاية عمال على بطال وميقدرش يقول آة مش دة برضة اسمه موت ....ولما بيشتموا حد من البنى ادمين علشان غبى يقولوله ياحمار مش دة برضة موت ...انا بموت مرة واحدة لكن هوه بيموت كل يوم ....انا لما بموت اللى حوالية بيكونوا فرحانين لكن هوة لما بيموت اللى حوالية بيكونواقرفانين....انا الناس بتاكلنى وتاخد فروتىوجلدى ....لكن هوة لمابيموت بيرموة فى المصرف ويسدومناخيرهم وهما معديين علية .....كلنا حنموت ....احسن حاجة ان يكون لك فايدة حتى بعد ماتموت ....وقفت العربية قدام الجزار ....نزل الخروف كتفوة مسك الجزار السكينة وراح على الخروف ...اخر حاجة فكر فيها الخروف والسكينة بتقرب من رقبتة ....جميل ان يكون لك فايدة بعد ماتموت بس برضة الموت وحش ... وحش قوى ....خصوصا لما دمك يعلم على الحيطان بالخمسة

هناك 7 تعليقات:

  1. كل سنة وانت بالف خير
    يادكتور
    وعيد سعيد عليك وعلى اسرتك

    ردحذف
  2. كل سنة وحضرتك طيب يادكتور

    عيد سعيد عليك يارب

    حتى الخروف دخلت في دماغه

    بس بجد الخروف صعب عليا اوى ليه كدا بس يادكتور تزعلنى عليه

    دايما كعادتك بتقول حاجة جديدة وبتبص للامور من وجهة نظر تانية

    ردحذف
  3. و ما اكثر من ارتضى أن يعيش كالحمار و ليس كالخروف

    كل عام و انت بخير

    ردحذف
  4. د. اسلام
    كل سنة وانت واسرتك وكل احبابك بالف خير وسعادة

    ردحذف
  5. كل سنة وانت طيب ومن العايدين ان شاء الله
    في الثقافة الشعبية المغربية نقول ان الخروف عندما يولد والدته تدعوا الله أن يجعله أضحية العيد
    تحياتي لك

    ردحذف
  6. ;كل سنة وانت طيب وينعاد عليك وانت بالف خير
    (....احسن حاجة ان يكون لك فايدة حتى بعد ماتموت ....) حلوة اوى الجملة دى بعد ما نموت قبل ما نموت المهم بس يبقي لنا فايدة
    الله يسامحك خليتني للحظة اتمنى لو كنت ابقي خروف بس الحمد لله انها جت على قد كدة وما مأمأتش

    ردحذف