الخميس، 28 يناير 2010

حى اكلينيكيا 2

حى اكلينيكيا 2

بعد ماعرفت سبب تآكل عمود الخرسانة ...قولت بالمرة كدة ابص على بقيت العمارة ...اشوف تسيلة كدة ولا حتة محارة واقعة ...بالمرة ..قومت لقيت شروخ ...شروخ شروخ يعنى ....لقيت شقق واسعة وديكورات غالية وعفش مستورد ...بش مالقيتش فيها عيلة ...كل واحد مع نفسة ...محدش لية دعوة بحد ...لقيت نفوس محطمة ...وطلاق كتير ...وامهات بتبوس ايد ولادها علشان يزوروها ....لقيت بنات بتحط ابهاتها فى دار مسنين ...علشان مش فاضية ...بتجيب فلوس...

لقيت حاجات كتير بتسهل الدنيا وتوفر الوقت ....بس لقيت ان محدش بيلحق يعمل حاجة ....الوقت بقى علية عفريت ...والعمر بيطير ...

لقيت ماجستيرهات ودكتوراهات وام بى اية وجامعات مفتوحة ومقفولة وخاصة ..بس مالقيتش منطق ولا فكر ولا منهج ولا موضوعية فى الحكم على الامور....

لقيت استشاريين وخبراء بالعبيط ....بس استشاريين وخبراء على اليافطة بس ...لانى لقيت المشاكل اللى بالعبيط برضة مابتتحلش ...

لقيت ادوية واشعات وتحاليل ورنين مغناطيسى ومسح ذ رى ...حاجات ماكانتش موجودة زمان ...بس برضة مالقيتش لا صحة ولا عافية ....

لقيت صرف فلوس بالهبل ...وسواقة بسرعة ...وادمان نت وموبيل ...لقيت الضحك بقى فى المناسبات...والسهر بقى للفجر ...بس نوم قبل الفجر مايدن ...لقيت قوام الصبح بضرب الجزم ...لقيت ان محدش بيقرأ.... بيشيت بس ....وطول النهار والليل ماسكين ريموت الدش وقاعدين قدام التليفزيون مابيشفوش حاجة بيقلبوا فى القنوات بس.....

لقيت الكلام بقى كتير قوى ...والحب بقى قليل قوى قوى ....والكدب بقى بالهبل قوى قوى قوى ...

لقيت شهوة شراء زايدة بس مالقيتش حد بيستمتع باللى بيشترية ...

لقيت سفر الغردقة ولا شرم ولا حتى السعودية علشان نعمل عمرة ....اسهل بكتير من ان احنا نخبط على جارنا الجنب (اللى جنبنايعنى علشان ماحدش يفهم غلط)....

لقيت تخطيط وبلان وتحضير ...بس برضة مالقيتش حاجة بتتعمل ....

لقيت ماسج واى ميل وام ام اس ....بس مالاقيتش روح ولاايد فى ايد ولا طبطبة ولا مسحة ايد على راس...

لقيت شراهة وكومبو وكانز ...بس مالقيتش هضم ....

لقيت ناس طويلة لابسة نضارة سودا ونازلة من عربية غالية بس لقيت نفوسها ضعيفة ومركبات النقص بتموتها ....

كفاية ...

هناك 5 تعليقات:

  1. انت قلت كفاية انما لو حبيت تكمل حتكمل للصبح هذه هي حقيقتنا للاسف لكل عين ترى ولكل قلب يبصر

    ردحذف
  2. متقلبش علينا الاحزان :(

    ردحذف
  3. د: اسلام
    مش عارفة اعتذر على التعليق السابق اللى كله اكتئاب واضح على كلماتى والا الومك على وصف حال الناس التائهة فى أيامنا العصيبة.
    لو كنت أصغر سنا كنت حتلاقى كل اللى بتقول عليه ده فى ناسنا الطيبين ,,وبلدنا الحبيبة منذ اكتر من 30 سنة
    لكن لا الناس هى هى
    ولا البلد فضلت على براءتها
    بس انا متأكة ان هناك حلولا كثيرة
    شرط ان يكون لدينا الرغبة فى التغيير
    وان نجد من يمد يد المساعدة
    لنحافظ على روح الانسان من جديد
    تحياتى واعجابى بمهارتك فى تشريح السلبيات
    واعتقد ان التشريح الدقيق يصل بنا الى جذور العلة
    ومنها توضع الطرق المثلى للعلاج

    ردحذف
  4. والله من ناحية كفايه هى كفايه اوي علينا والله

    انما مش كفايه انت خليك انت قول والنبى يارب حد يفهم

    عايزاك تقرا عارفه يا امه بتاعة علي سلامه كده

    او اسمعه عندي على المدونه فى البوست الى فات

    واسمعه وهو بيقول انا بقيت اخااااااف

    وانا كمان بقيت اخااااااف والله

    شكرا يا دوك
    هابعتلك ميل شوفها وقولي رايك

    ردحذف
  5. القدر وانا
    صدقينى محدش حياخد بادينا ...ومحدش حيقولنا الطريق ...يا اما علشان مش عارفين ... يا اما مش عايزيين يعرفونا .... لازم انت اللى تعرفى طريقك وتعملى حياتك ... والحل بسيط بس احنا اللى مش عايزين نشوفة
    ولازم مبدأك فى الحياه ...حنعيش يعنى حنعيش ومش اكلينيكيا

    ردحذف