الثلاثاء، 13 أبريل 2010

عم ياقوت جاب من الاخر

عم ياقوت جاب من الآخر


افتكرت ان كان عندى حتة قماشه محترمه ....قولت هوه انا ليه مبفصلهاش ..قمت قلبت عليها البيت ...انى الاقيها ...ابدا ...وفى يوم وانا قاعد جه فى بالى انها تكون فى الشنطة اللى تحت السرير ....نزلت تحت السرير وشديت الشنطة وفتحتها ...ولقيت القماشه ...لقيتها ملفوفه فى حتة حرير ....ومحطوطه فى كيس مرسوم عليه الاهرامات من ناحيه والكعبه من الناحيه التانيه ...فرحت قوى ...وخدت القماشة وطلعت جرى على عم ياقوت الخياط ...قولت له : ياعم ياقوت انا فى عرضك ...كل يوم بيبقى عندى حفله ...كل الناس اللى فيها محترمين ...او بيبانوا انهم محترمين ...كلهم بيبقوا على سنجة عشرة ...لابسين بدل اخر شياكه واخر موديل ...وانا فى وسطهم ببقى عرة ...والنبى ياشيخ تاخد القماشه دى وتفصل لى منها بدله شيك ...نفسى مرة احضر الحفله دى وانا بنى ادم ...والله ياعم ياقوت انا كويس ...وعندى حاجات كتيره حلوه ...ويمكن كمان اكون احسن من كل الى فى الحفله بس ماحدش بيعبرنى ولابيبصلى.....ودايما بيعاملونى على انى جاى اشحت منهم ...وساعات كتير بيعاملونى على انى بهيم ....بياكل ويشرب وينطح وبس ....مع انى ياعم ياقوت غير كدة خالص ....بس ماحدش مقدرنى ...عم ياقوت بص لى بنظرة عطف ومسك القماشه وفردها على البنك ...وقعد يقلب فيها يمين وشمال وفوق وتحت ...ويحطها قدام اللمبه ...كل دة وعلى وشه تعبيرات غريبه مرة اعجاب ومرة حسرة ومرة قرف ومرة استغراب ...وفجأه قالى : شوف يابنى لو انت كنت جبت القماشه دى من خمسين سنه ....كنت عملت لك بدله كل اللى حواليك يحسدوك عليها ...بس ياخسارة ...انت اتأخرت قوى ...القماشه شاطت ونكتت والعته هرتها...مش حينفع يابنى ....عوضك على الله ...رديت عليه باستعطاف ...والنبى ياعم ياقوت شوف لى حل الله يخليك ...عم ياقوت قالى : يابنى انا مش عايز اغشك ...القماشه دى ماتنفعش ولا حتى يتعمل منها لباس ...قولت له بيأس: طاب والحل ياعم ياقوت ...قالى: الحل انك تغزل لك حته قماشه جديدة ...على نضافه...هيه اه حتاخد وقت كتير بس هوه ده الحل الوحيد ...خليك فى الجديد ...دا طبعا لو ربنا قدرك وعرفت تعمل منه حاجه ...وسابنى وقعد يولع فى السبرتايه علشان يعمل فنجان قهوة محوجه بالحبهان والمستكه .... وانا ماشى سمعته بيقول لنفسه : ربنا مابيظلمش حد..... البنى ادم هوه اللى بيظلم نفسه.!

هناك 6 تعليقات:

  1. السلام عليكم و رحمة الله و بركاته
    أخى الكريم
    مش عارف أنا فهمت صح و لا ايه
    بس كأنك بتتكلم على أجيال تاهت و شاخت و أجيال منتظرين منها كثير
    بس لو كده حتى حتة القماشة القديمة ممكن يكون لها دور حتى لو فصلناها شراب !!!!
    أرجو أن أكون قدأحسنت الفهم
    بارك الله فيك

    ردحذف
  2. طب يعنى عم ياقوت ما قلكش ان برضه انت غلطان عشان لما تيجى تخزن قماشه غاليه وعليها القيمه كان لازم تاخد بالك وتحط فيها حته صابونه وشويه فلفل اسود حصى ولا انشاله حبة نفتالين عشان ما تعتش وتبوظ

    عم ياقوت ما قالكش انك ظلمت القماشه وسبتها اكل الزمن عليها وشرب من غير ما تخط فيها خيط واحد يوحد ربنا

    كان فى قصه فى المكتبه الخضراء زمان مش فاكراها والله بس فاكره صوره لست عجوزه معلقه حته قماشه كبيره وقاعده تخيط فيها كل ما تنقطع من ناحيه


    طب ماشي بلاش نتكلم فى الفايت
    اصل الكلام فى الفايت نقصان عقل

    طب الغزل الجديد ده مش محتاج مغزال
    ولا هانزغل لسه برجل حمار
    تعبنا طيب
    طب بلاش هات رجل الحمار واحنا نغزل

    ولا ما عادش فى حمير كلناهم ؟

    طب ربما بيظلمش حد طبعا

    طب والناس الى بتظلم الناس ؟؟؟
    نسيبهم ونقول اصل الناس الى اتظلموا ولاد تيت ويستاهلوا يتظلموا ؟؟

    هى المعزه دايما غلطانه كده سلمت للديب ؟

    طب خلاص ماشي هات انت المغزل واحنا نغزلك قماشه توماتيكى توماتيكى كدهو بدله وكدهو جلابيه

    بس هاتووووووووه

    ردحذف
  3. د.على
    اولا شرفت المدونه بمرورك
    ثانيا انت فهمتنى صح جدا ...كل املى نلحق اللى جاى ....بس الخوف ان اللى بيغزل اصلا مابيعرفش يغزل

    ردحذف
  4. انا ايضا اؤمن ان الحل سيكون في غزل جديد لاعلاقة له بالقديم اطلاقا غزل ينسج على اساس متين وقتها يمكن اقولك ان البدلة حتكون عليها المقام غير كده الحال باق على ما هو عليه ان لم يسؤ اكثر لكن لن نفقد الامل ابدا

    ردحذف
  5. التخزين للأفكار مع مرور الزمن قد تتقادم ويأكل عليها الدهر .. لذا أرى أن تطوير جزء من الأفكار المخزنة أمر جيد في ترقيع المستقبل

    ردحذف
  6. أزال المؤلف هذا التعليق.

    ردحذف