الاثنين، 26 أبريل 2010

وبسهم مصرى مسموم

وبسهم مصرى مسموم

مشكلتى ان بحب السيما ...بس السيما اللى بجد ...بس الموضوع دة بقى بيحرق دمى اليومين دول ...يادوب لسه طالع من فترة النقاهه ...كانت فى البيت مش فى شرم ... مش حسد والله المرض مافيهوش حسد ... وبعدين برغم كل حاجه انا بحبه وشايف ان احنا حنلوص من بعدة ...القصد يادوب لسه طالع من فترة النقاهه بعد اللى حصل لى لما شفت فيلم كابتن بومه اللى احداثه بتدور فى رمضان ...واشوف فيلم الوان السما السبعه ....فيلم بيحكى حكايه مومس وزانى ....وبرضه الاحداث فى رمضان ...انا مش عارف ليه رمضان ...ماالسنه فيها احداشر شهر تانيين ...اشمعنى رمضان ياولاد الكلب ...قبل ماتزعلوا من الشتيمه شوفوا معايا لقطه من الفيلم ....

المومس راكبه عربيه من ام فلوس كتير بعد ما نزلت من شقتها الفخمه... يعنى شوفتوا يابنات..... الدعارة بتكسب ازاى !!....وهيه سايقه جالها تليفون من واحد ...بيقولها انا لسه واصل من لندن ...ايه ...تجيلى ولا اجيلك ...تقوم المومس تقوله ايه : عندى مشاوير مش حينفع دلوقت ...خلينا بعد الفطار ... طاب افهم ...المشاوير اللى منعاها ...ولا هيه فاهمه ان الزنا بيفطر ...فنخليها بعد الفطار احسن .... حكمتك يارب ....

المشهد التانى : عم الزانى طالع بعد ماصلى العيد ...وهوه بيلبس الجزمه...يجيله تليفون من ستنا المومس ...تقوله انا عايزه افطر معاك كحك بسكر ....يقوم يروح معاها عند مامتها ياكل الكحك .... والسكر كان بعد مشهدين تلاته

انا مش معترض ان الافلام تناقش قضايا المومسات والزوانى ...ماهم فئه من المجتمع ...وموجودة فى اى مجتمع ...حتى مجتمع النبى كان فيه اللى بيزنى ...بس اللى مش قادر ابلعه ...ليه رمضان ...وليه الجامع ...وليه الخلفيه دايما جامع قلعة صلاح الدين..... عارفين ليه ....علشان المعلومه توصل للجميع ...كله يفهم كله يستوعب .....احنا مش بنعترض على الدين ياجماعه ...بس الدين مكانه الجامع ...الجامع وبس ...مش اكتر من كدة ....صلى وصوم واعبد ربنا زى ما انت عايز ...بس دا مايمنعش انك تزنى ...وتشرب خمرة ...ولو عايز لواط وسحاق ...عادى ...حريه شخصيه ...حقوق الحيوان ...

ماهو لو الكلام دة بيقوله الامريكان والاوربيين ...ماشى الحال عادى ...حياتهم وافكارهم وهما أحرار فيها ...يعملوا اللى هما عايزينه ...انشاله يناموا مع كلاب السكك ... لكن لما يكون اللى بيروج للنجاسه دى مصريين ...مسلمين ...الممثلين والمؤلفين والمخرجين والمنتجين ...مصريين ومسلمين .... يبقى فيه حاجة من اتنين .... يا اما الناس دى مش عارفه انها بتقتل البلد اللى نصها جاهل والنص التانى أمى ...وعايزة حد يفهمها ان مش كل حاجه تتقلد وان مش دة الابداع ....يا اما الناس دى متعمدة انها تقتل المجتمع والاسلام بسهم مسموم ....

يارب ...ياقوى ...يامنتقم ...ياجبار ...أرنا فيهم عجائب قدرتك

هناك 5 تعليقات:

  1. يااااااااااارب
    اللهم امين

    ردحذف
  2. انت عارف حضرتك انا من كام يوم كده لمحت لقطه كده من الفيلم ده وبرضه اتنقط منها

    وافتكرت المغفور لها ناهد شريف فى افلام السبعينات لما كانت تيجى منحرفه باي شكل ان كان وتروح فجأه قاعده كده وممثله الحزن وتقول ابويا مات وانا صغيره .... الى اخر القصه المأساويه الى تخليك تتعاطف مع المومس وتديها عذرها فى الانحراف

    الظروف جزء من حياة الانسان وبتاثر عليه فعلا وقد تدفعه الى الانحراف

    انما فى النهايه الانسان مخير فى افعاله وهتنحاسب عليها
    والانحراف مالوش اعذار

    وبالنسبه لسؤالك
    طبعا عارفين كويس هما بيعملوا ايه
    وعارفين ان خلفية الجامع دي رسالتها ايه
    وعارفين هما عايزين يحولوا الناس لايه

    دور كده فى كل الافلام على شخصية المومس وانت تلاقيها فى تسعين فى الميه من الاحوال مظلومه وغلبانه وخيره وصاحبة قلب كبير كبير كبير كبير

    انت عارف ليه ؟؟؟

    طيب لو عارف اتصل على 0900خمس سبعات واشتمهوملي والنبى


    تعقيب بس
    انا مؤمنه تمامااااا بان السينما هى رسالتنا للعالم كله وعنوانا

    مؤمنه ان كل وسائل الاعلام هى الحاكم الحقيقى للشعوب

    تحياتي يا فندم

    ردحذف
  3. على فكره انا لن انسى لك اطلاقا انك بتحبه وشايف اننا هانلوص من بعده

    هو فى لوصه اكتر من اللوصه دي يا دوك

    حتى لو في اكتر من كده مش مشكله خليها تتطربق عشان نفوق

    ردحذف
  4. السلام عليكم و رحمة الله و بركاته
    ازيك يا باشا
    أنا أيام ما كنت متابع السينما كنت بأقول ان ده فنان محترم و ده مش محترم و ده فيلم مؤدب و التانىقليل الأدب ...مع انى كنت بشوف كله يعنى ...
    بس لما ربنا كرمنى و قريت (شوية) فى الدين لاقيت ان الحقيقة انه فيه فنان قليل الأدب و آخر أكثر قلة أدب و فيلم حرام و آخر أشد حرمانية ... و الله أعلم
    المهم انى شايف ان من غير أفلام خالص ( و من غير أغانى خالص ) أحسن كتييييييير
    بارك الله فيك أخى الكريم
    تحياتى

    ردحذف
  5. د. اسلام
    والله المفروض ان السينما فن جميل بتعبر عن قصص ادبية لكتاب ومبدعين
    بس ده كان زماااااااااااااااااان
    ايام دعاء الكروان ورد فلبى وذهب مع الريح اللى اتحول لفيلم عربى ليحيى شاهين لا اتذكر اسمه
    وامبراطورية م - اريد حلا- الارض -انتبهوا ايها السادة-العار
    افلم كثيرة عظيمة تناقش قضايا العصر بلا عرى او اسفاف وترتقى بالفن والناس .
    اما افلام المقاولات للاراجوزات من بوبس لكركر وافلام الاباحة والبجاحة لساقطات امثال ايناس الدغيدى او منحلين امثال خالد يوسف دى افلام للمكسب السريع فقط وللاسف انحدرت بالفن والبلد اكثر
    وللاسف اى فيلم محترم سيتوه وسط هذه الموجة العاتية من الاسفاف والانحلال
    سعيدة جدا انك عامل دولة داخل بيتك تعلم فيها اطفالك ان يعيشوا بالصح رغم كل المحيط بهم
    ربنا يبارك لك فيهم ويقدرنى اعمل زيك مع صغيرى اليتيم
    نحياتى يا دكتور

    ردحذف