الخميس، 29 أبريل 2010

هـلـفـطه

هـلـفـطه

من مأثورات البرادعى (سعد زغلول سابقا): أنّ الحق فوقَ الحكومة، وأنّ الأمة فوق الحكومة، وأنّ النظام الحاكم يحكم نيابة عن الشعب ....... لولولولولولولى ...زرغتى ياللى مانتيش غرمانه ...وطبلى ياهبله ... وسقفى يامايله ...وخلى الاحلام والامانى تاكل دماغك ...مانتى بقالك سبع تلاف سنه بتتمنى يجيلك الزعيم المخلص ... اللى حينطأك على وش الدنيا ....ومجاش ومش حيجى ...وغلاوتك عندى ماهو جاى ...علشان حدوتة الزعيم دى فى خيالك المريض ياهبله ...ماعادتش موجودة فى الحقيقه।

الصراع بعد ما كان بين الناس والحكومه ....اتحول وبقى صراع بين الناس والناس ....وبعدين اتحول تانى ...وبقى بين الناس ونفسها ...افتكرت المثل اللى بيقول ماقدرش على الحمار قدرعلى البردعه ....طبعا انت فهمت ان الحمار هوه الحكومه .... والبردعه هيه احنا ...الشعب يعنى ... انا برضه كنت فاكر كدة بس بعد مابصيت كويس ...لقيت ان البردعه هيه الحكومه ...واحنا ...الشعب يعنى.... هوه الحمار.

من يوم ماوعيت على الدنيا ...ومصر كلها بتحكى فى المحكى ...وبتقول فى المتقال ...وترغى فى المرغى ...مشكله الاميه وبوظان التعليم ....مشكله الاسكان وتنظيم النسل ...الدنيا زحمه ... اللحمه ولعت ....السكر غلى ...وانا احلى بايه ...امريكا مضطهدانا ...العرب حسدينا ....اسرائيل عملالنا عمل على شنب قرموط عايم فى خليج العقبه ... ايران مشبشبالنا ...... لكن احنا ................................... ززززززززززززززى الفل .

ربنا لما بيغضب على ناس بيرزقهم الجدل ...مش مصدق ..بص على الفضائيات ...والجرايد المستقله ....وليه تبعد ؟!!!! بص علينا واحنا قاعدين مع بعض .

ياللا باى... بينا موبيلات ......

هناك 8 تعليقات:

  1. أحسنت والله

    فعلاً إحنا المشكلة، كل واحد بيدور على مليون تبرير لتأخرنا وفشلنا في كل شيء، وقليل جداً اللي بيأدي دوره، وبيشوف شغله مضبوط، وعلشان كده ما أعتقدش إن في حاجة هتتغير في مصر، على الأقل في الجيل ده.

    ردحذف
  2. انا من موقعي هذا وقمة قرفي من الدنيا والي فيها ونفسي ربنا يخلصنى منها بقى

    طز فى الحمار وطز فى البردعه واياكش تولع خلينا نخلص بقى

    ردحذف
  3. بجد عندك حق فكل كلامك
    وأويدك بشده

    ردحذف
  4. ندى الياسمبن :
    لا ما احبكيش وانتى كده ... نزهق ...نشتم ...نسب ...ماشى ....نكتئب لا ...والف لا .... حنعيش ...وبمزاج ... وغصب عن الكل ... عايزة تطلعى من الاكتئاب دى ... اعملى حاجه جديدة ...وضبى الشقه مثلا؟!!!! ايوه يا عم كدة... اضحك ...شوفتى الدنيا سهله ازاى

    ردحذف
  5. cardiology
    شرفتنى ... والنبى خليك جنبنا علشان .. ضغطنا بيرتفع كتير اليومين دول ...

    ردحذف
  6. د. اسلام
    يا راجل حرام عليك هى ناقصة مصاريف
    علشان نجادل ونرغى فى الموبيلات
    خليها على قهوة فى الحسين
    او بما انى فى الاسكندرية يبقى يالا بينا على ابو العباس نحكى ونتفق ونختلف براحتنا فى كلام لا حيقدم ولا ياخر
    قال موبايلات قال

    ردحذف
  7. ايه دوك فينك

    بعتلك رساله على الجي ميل عبرنا يا باشا ورد عليا

    ايه ده مش ورانا اضراب والشهر ده ولا ايه

    اصحا معانا بقى

    ردحذف
  8. هههههههههههههههههههههههههه

    دي على ردك على تعليقى

    مرسي يا دوك

    بس كنت يومها على اخري بجد من الدنيا والى فيها

    وما زللللللللللت والله

    ردحذف