الجمعة، 17 سبتمبر 2010

ثقافة الموزز بين النظريه والتطبيق

ثقافة الموزز بين النظريه والتطبيق

واحنا فى ثانوى كنا بنزوغ بدرى نص ساعة عن ميعاد الانصراف ....علشان نقف عند مدرسة البنات ونشوفهم وهما طالعين من المدرسه ... لا كان فيه احتكاكات ولا تحرشات ولا حتى كلام ... كل الحكايه بص وشويه احلام يقظه ... كل واحد فينا فاكر نفسه صلاح وبيدور فى وش البنات اللى خارجين من المدرسة على سميحة ... يحلم بصورتها على مخدته وهوه نايم ... لعب عيال يعنى ...وانا بدور على سميحة بتاعتى خدت بالى من حاجة غريبة ... لقيت البنات وهيه طالع من المدرسة وماشيين فى الشارع يا اما ضامين كتافهم ورامينهم لقدام ... يا اما حاضنين الكتب بايدهم ... الموضوع شغلنى كنت حاموت واعرف ايه السبب وطبعا ماعرفتش .. السنه اللى فاتت وانا باجيب عيالى من المدرسه شفت البنات بتوع ثانوى وهما خارجين من المدرسه ....لقيت حاجة غريبه برضه ... المشيه اتغيرت .. فاردين نفسهم ... وشدين ضهرهم ... وفهمت اللى بقالى خمسه وتلاتين سنه مش فاهمه ... زمان البنات كانا بيخبوا حاجة بدأت تظهر وهما مكسوفين منها ... فبيحاولوا يداروها ... نوع من انواع الحياء والخجل ... لكن دلوقت بعد ماوصلت ثقافة الموزز ارض المحروسة بسلام.... بقى مافيش حاجة تستخبى ... دا بالعكس لازم تظهر وبكامل ابعادها .. لان الدنيا اتغيرت ... ماعدش جمال البنت فى حياءها وخجلها ووشها اللى بيحمر من نسمه الهوا ... دلوقت فيه ثقافة جديدة اسمها ثقافة الموزز ... الجمال لازم يبقى مادى ... ملموس ... واضح للعيان... ومجسم... حتى لو استخدمنا مواد صناعيه من اللى بيلزقوا بيها الازاز .... اللى يعبط بقى.... ان البت من دول بتتباها وتقول انا موزة ... اه كده عادى يعنى ...مش عارف هيه عارفه مفهوم كلمه موزة عند الرجاله ايه ولا بتكرر اللى بيتقال وخلاص ومش عارفة ان دور الموزة فى حياة الراجل لا يتعدى نص ساعة وبقيت اليوم كائن غير مرغوب فيه ... مش عارفه ان الراجل بعد شويه بيزهق من الموزة ويدور على موزة تانيه بمواصفات احدث وسن اقل ... مش عارفة ان الموزة مش اكتر من................ اقول ايه بس ....فرغتوا حتى العلاقة المقدسة من مضمونها ....كان لازمته ايه بقى الحرب الشعواء اللى بقالها خمسين سنه بتنادى فيها بالمساواه بين الراجل والمراه ... وان البت زى الولد مش كماله عدد ... وجمعيات حقوق المرأه ... وكراسى عافيه فى المجلس ... وقاضيه ومأذونه وهدى شعراوى ونوال السعداوى وزكيه زكريا .... مدام طلعت فى الاخر موزة ... طاب ماكان من الاول وبلاش الفرم ده ... عيب ... عيب يابتى ... لما تقدمى نفسك للمجتمع على انك موزة ... قدمى نفسك على انك انسان ليه كيان ومبادىءواخلاق وانوثه فى حدودها اللى تكرمك ... وصدقينى مهما شويه الصيع اللى حواليكى من كل ناحيه دول قالولك واقنعوكى انك لما تبقى موزة حتبقى حاجة كويسة ماتصدقيش ... الصح حيفضل صح ... وعمر مافيه حد محترم حيقرب منك علشان انتى موزة ... مش حيقرب الا موز زيك ... بينزل من بيته علشان يدور على شهواته بحرص خنزير ... وغدر ذئب .. ولؤم تعلب ... وافتراس اسد .....

ياترى هوه ده اللى انت بتدورى عليه ؟؟؟؟؟؟ سؤال فكرى فيه ..... التفكير مش عيب والله

هناك 10 تعليقات:

  1. عندك حق
    المفروض ان كل بنت ليها كيان ووجود
    دا اهم حاجه لاذم ندور عليها
    علشان نفيد نفسنا اولا ومجتمعنا بعد كدا

    ردحذف
  2. لا فض فوك، أخي الكريم،

    كنت هنا..

    ردحذف
  3. يا دوك ده انا باكلم البت الصينيه لقيتها بتقولي موزه .. وحياتك عندي المترجمه بتاعة رضا لقيتها بتقولي كده .. واحد مصري ابن حلال قالها ان موزه يعنى ست جميله ههههههههههههه

    هى على فكره فعلا استعمال كلمة مزه اختلف اصلا وبعدين انت يعنى بتوجعهم وتقولهم مز اذا كان هما البنات اساسا بيقولوا عادي واد مز

    مش المهم استعمال الكلمه المهم المضمون المهم الفكر زي ما انت بتقول

    رغم انى اساسا ضد استخدام الخجل فى المطلق لان فى خجل بيوصل لحد الخجل المرضي وبيكون سلبي مش ايجابي

    لكن طبعا الحياء شعبه من شعب الايمان

    ياريت يفهموا ان القضيه مش انها تعجب الناس ولا تعجب واحد القضيه هى عاجباه من ناحية ايه وعشان ايه ولحد امته وده كفايه ولا لا

    بس ارجع واقولك يا دوك هما يعنى عندهم حاجه تانيه البنات دلوقتي يتباهوا بيها ؟؟
    لا علم ولا دماغ ولا ابداع ولا حتى شطاره فى البيت هايتباهوا بايه بقى ؟؟
    تحياتي يا فندم

    ردحذف
  4. والله معاك حق
    واذا لم تستح فاصنع ما شئت
    تحيتي ...

    ردحذف
  5. كلمة مزة حتى الاعلام جعلها دارجة بحيث تستعمل ككلمة عادية في البرامج وينطق بها نجوم المفروض هم قدوة للشباب هذه هي المعضلة دكتور اسلام
    اتفق مع ندى الياسمين جدا في قولها "مش المهم استعمال الكلمه المهم المضمون المهم الفكر"
    ربي يصلح الاحوال
    دمت بكل الود

    ردحذف
  6. زمان البنات كانوا بيمسكو الكتب مش نوع من الخجل لكن بيشوفوة ان الحاجة دية بتميزهم عن اى بنت تانية مش بتروح مدراس بس كنت تشوف الجيبات القصيرة والمفتوحة يعنى مش بيتكسفو اما اللى كانت بتخجل و اللى بتمشى منحنيا بيتحول خجلها لخجل مرضى ووبعدين انتو اللى بتصنفوا كلمة مزة على انها شىء مادى بحت لكن البنت بتشوفها على انها جميلةوالمراة او البنت عندها حتة انها تحب تشوف نفسها جميلة ودية مش سطحية لكن غريزة فى المراة علشان كدة اتخلقتلها الزينة بس فية بنات بتزودها حبتين وبتعمل حاجات اوفر من مكياج وبنطلونات ضيقة واستريتشات والمراة لما بتطلب المساواة مع الرجل مش بتطلب انها تبقا ذية فى طبيعتة اللى اتخلق عليها وقوامتة بتطلب حقوقها اللى ربنا ادهلها ذى ما اداها للرجل ذى الميراث اللى ساعات بتتحرم منة والتعليم وان الاسرة تعدل بينها وبين اخواتها الذكور فى كل شىء

    ردحذف
  7. غير معروف
    ما انكرتش على اى بنت الزينه والحفاظ على الانوثة...قدمى نفسك على انك انسان ليها كيان ومبادىءواخلاق وانوثه فى حدودها اللى تكرمك...الست كرمها ربنا ووصى عليها الرسول ليه بقى تسمح لحد يحولها لسلعة ويستخدمها فى الاعلان عن اى سلعة

    ردحذف
  8. موضوع شيق قوى الحقيقه
    بس فيه نوع من التجنى على المرأه...
    الست بطبعها بتحب تبقى حلوة...مافيش ست خلقها ربنا فيها غريزة الانوثه ...عايزة تبقى وحشه..
    وده مالووش علاقه نهاؤى بشغلها او بطموحها او بتفوقها فى عملها..او محاربتها من اجل حقوقها.
    دى نقرة ...ودى نقرة تانيه خااالص...
    بس فيه حدود..لمن التزين واين؟؟؟
    للزوج طبعا وفى البيت...
    بس ياريت توضحلى ليه الرجل دائما وابدا..بيبص
    للمزز الصاوريخ اصحاب المرتفعات والهضاب..
    وليه دائما بيقول (كاتنا نيله فى حظنا الهباب)
    وليه بيجيب مزز اخر حاجه فى الاعلانات..ودائما لابسين من غير هدووم؟؟؟ ده علشان واثق ومتأكد ان ده السبب الرئيسى فى بيع اى منتج للاسف..
    ثبت علميا ان الرجل كهربة مخه بتزيد عند رؤية اى انثى جميله..وممكن يدفع اى مبلغ فى اى مجلة لمجرد ان الغلاف فيه ست حلوة..والدليل اكتساح مبيعات play boy
    والدليل على مقتل سوزان تميم بعد مادفع هشام طلعت لها الملايين الملايين من الدولارات..
    اكيد مادفعش ربعه لمراته...لكن دفع للمزة..
    ده مش معناه انى باقول وانادى ياللا نبقىى مزز روشه زيها..
    معناه ان اللى ادخل الثقافه دى الرجاله مش الستات نهائى...
    الستات للأسف رد فعل مش فعل...
    ولو الست فهمت الراجل صح...وفهمت هو بيفكر ازاى وعايز منها ايه..هتفكر الف مرة قبل ماتتنازل عن كرامتها علشان خاطره..
    او تصدق معسوول الكلااام...
    لو احترمت نفسها هيحترمها...من الاخر..
    وسورى للاطاله
    تحياتى

    ردحذف
  9. بنت الغربه
    ماختلفناش خالص خالص خالص ,,,,والدليل السطر اللى بيقول:وصدقينى مهما شويه الصيع اللى حواليكى من كل ناحيه دول قالولك واقنعوكى انك لما تبقى موزة حتبقى حاجة كويسة ماتصدقيش ... الصح حيفضل صح

    ردحذف
  10. ربنا يهدي البنات اللي كده
    فترة الثانوي بتكون البنت في المراهقه و أحكامها على الحياه ممكن تكون ملخبطه .. محتاجه لأسرتها يكونوا جنبها و يفهموها الصح من الغلط في الحاجات دي بأسلوب يناسبها و يخليها تقتنع من غير ما تحتاج انها تسمع لناس بره يقولولها عن الغلط انه صح !

    أول مره اشوف مدونتك و كان ده اول موضوع اقراه .. كلامك جميل و ربنا يكتر من العاقلين أمثالك و يخفي الرجاله اللي بيضيعوا البنات بأفكار غلط !

    ردحذف