راسبوتين بالسلفنيون
بما اننا فى زمن الطبيخ ... قررت ادخل مجال الطبخ والمطبخ ... واقدم لكوا طريقة عمل اكله مميزة وجديدة .. او بمعنى اصح قديمة جديدة ... حأقلكوا المقادير وطريقة العمل وازاى بناكلها بالهنا والشفا ... طبع مش محتاج اقولكوا على الاتصالات والتظبيط .. واحنا بنحبك ... واختى بقالها شهرين عايزة تطاهر الواد ومش عارفة علشان البرنامج بتاعى فى نفس ميعاد الدكتور ... واد ايه بتستنوا برنامجى على احر من الجمر ....نبدأ
النهاردة حقدم ليكوا وصفة راسبوتين بالسلفنيون ... راسبوتين دى اكله عالمية ... اصلها روسى ... والعرب عندهم اكله شبهها اسمها مسيلمة الكذاب ... وفى امريكا اسمها جيم جونز ... وفى كل حتة فى العالم حتلاقى الاكله دى وطبعا حتلاقى اللى بياكلها ..وشهرة الاكله دى جاية من اللى بياكلوها ... هما اللى بيدوها الطعم والريحة والنكهه..
المقادير :
1 واحد طويل وعريض ... او عريض بس ... حاجة كدة تخض وتملى العين ... وممكن يكون قصر ورفيع بس النوع دة مش كتير .
2 دقن اى كان طولها وكل ماطولت كان احسن .. وياسلام لو فيها كام شعرة بيضا .
3 عين كحيله ذات نظرة ثاقبة وقدرة عالية على التبريق .
4 اعراض خفيفة من جنون العظمة (بارانويا )
5 غموض فى التحركات والظهور والادعاء بالوجود الدائم فى الخلوه .
البهارات :
ودى من اساسيات الطبخة
1 عند الظهور تضاف اضاءة من نوع خاص حسب الطلعة ... يعنى اضاءة فلورسنتيه لأضفاء نكهة الملائكية ... او اضاءة حمراء لأضافة نكهة الشياطين .
2حكايات مرسلة عن معجزات راسبوين على حل المشاكل وشفاء الابرص والاكمة .
3 عدد من الاعوان من عينة الزبون بتاع احنا بنحبك ياجاسر ( فى فيلم على سبايسى ) يهللوا ويكبروا كل ماراسبوتين يكح
الاكيلة :
ودى من اهم متطلبات اكلة راسبوتين بالشمبنيون ( قصدى بالسلفنيون )
المواصفات :
1 حاصلون على قدر يسير من التعليم او لا تعليم من اصله .
2 الاعتقاد الكامل فى القدرات الخاصة والسحر والعفاريت والاعمال .
3 يعانون من القهر والذل والعيشة البائسة .
4 الكبت الجنسى وعدم القدرة او الامل فى الزواج .
5 الفشل الاجتماعى والمادى والثقافى والسياسى .
6 سهولة الاستهواء وسرعة الانقياد والايمان الكامل بالمخلص ومبعوث العناية الالهيه .
7 اليأس من الدنيا واللجوء الى احلام اليقظة .
الطريقة : لخبط المقادير على البهارات بأى طريقة تعجبك ... حيطلعلك احلى راسبوتين .. او مسيلمة الكذاب .. او جيم جونز ...كله نفس الطعم ونفس النكهة ... واخيرا ... خلى الاكيلة يزلطوا.. ويلهطوا .. ويلهلطوا .... وبعدين على مهلهم كدة ... يعيطوا ويصوطوا .. وتربت تربت تو .... او تربت تربت تى ....ياأمة ضحكت من جهلها الامم.
