الشياطين الثلاثة

الشياطين الثلاثة

منظر البنت وهية بتجرى وتلعب والفرحة ملياها .... والضفاير بترقص على راسها... وايديها وهيه بتحاول تمنع الهوا من انه يطير الفستان ....بيخلينى احس انها ملاك ....مع انى ماشوفتش ملاك قبل كدة بس اكيد مش حيكون لا اجمل ولا اكتر براءة من كدة ...بس يا خسارة مابتلحقش تكمل فرحتها ولا ضحكتها ...يادوب تشد حيلها ويتنطط حواليها شياطين الانس التلاتة ....ويفرموها ..اى والله يفرموها ....الاول شيطان المساواة ...ودة بقى بييقعد على الودن اليمين ...وهاتك يامعلم ...البنت زى الولد ماهيش كمالة عدد ...زيك زى الراجل.... ليكى نفس الحقوق...اشمعنى انت بتحملى وتولدى وهوة لأ....شوفتى اد ايه انت مظلومة...ماتسكتيش ...حقك ...راسك براسة ...يغسل زى مابتغسلى ...يكنس زى مابتكنسى ...يرضع زى مابترضعى ...ولية ماتبقيش قاضى ...ومأذون...اة وايه يعنى لما تبقى امام جامع ....هوة اجدع منك فى ايه ...ماتخافيش ...اقفى قصادة ...القانون معانا والامم المتحدة وامريكا ...وحقوق الانسان ...اوعى يتحكم فيكى ...ايه اشتراكى بالقرشين اللى دفعهم مهر ...اخلعى وارميهم له على الجزمة ...انت راجل ...انت راجل ...انت راجل ....وصدقت الغلبانة ...مابقتش ست وبرضة مابقتش راجل ....

شيطان النيو لوك ماسكتش ...نط على الودن الشمال ...اصحى يابت ادى اخرة مشيك ورا شيطان المساواة ...فوقى بقى الست اية غير جمالها ودلالها وجاذبيتها ....سيبى لى نفسك ...حننفخ الشفة اللى فوق من الاجناب ...الحكاية دى بتولع الرجالة ...ونشفط شوية من الحتتين اللى ورا علشان الجينز يبقى نار ...وشوية سيليكون نعلى بيهم حائط الصد ॥منها اغراء ومنها حماية ... ونقشر الوش ولا اقولك نخلية برونزى ...ونصبغ بلوند ...والعين تركواز ....و نشلح حتة من الرجل على حتة ستومك ...كدة الرجالة تتهبل عليكى ...صدقت الغلبانة وبقت صورة مثيرة على غلاف مجلة بورنو ...

شيطان السلف قال فى نفسة هوة انا حاسكت ...دة انا اللى على حق ... نط هوة كمان مش على الودان بقى ..لا على الدماغ عدل ...حتموتى.... حتموتى ...حتتحاسبى فى القبر قبل يوم القيامة ...نار ....لعنة ربنا ...جحيم ....ماتسيبيش البيت ....ماتتعلميش ...غطى وشك وسيبى حواجبك تتغلغل وتنتشر ...البسى النقاب والجونتى وياريت نضارة شمس بس تكون اسلامى ...ماتفكريش غير فى اخرتك ....النار ...النار ...وغضب الجبار ...ادعى يا أختى فى سبيل الله ....ربى ولادك على الجهاد ..احنا فى زمن الجاهلية ... واللى حوالينا كلهم ابو جهل وابو لهب .....انجى بنفسك واستشهدى فى سبيل الله ....وصدقت الغلبانة وماتت شهيدة وهية حية وبرضة مابقتش رابعة ....

وكانت النتيجة ....

........ باربى لابسة نقاب وطالع لها شنب ......

ضاعت الملامح ...ضاعت ملامح نص المجتمع ....النص اللى المفروض انه يربى النص التانى اللى حيحرر القدس وينصر الاسلام ....!!!!!!!!!!!!!!!!

ياناس ياهوه ....شغلوا مخكوا لجل جاه النبى ...احنا بنتقلب ياعالم ....ماتسمعوش كلام حد ...خلى لكوا مرجعية ...ومش حتلاقوا احسن من كتاب الله وسنة رسوله ....سيبكوا بقى من شوية الصيع اللى بيطلعوا فى التليفزيون ويكتبوا فى الجرايد ...دى سبوبة ...والله العظيم سبوبة ...والدليل شوفوهم ساكنين فين ...وراكبين عربيات شكلها اية ...ورصيدهم كام فى البنك ...البنك اللى فى سويسرا طبعا مش دفتر توفير المدخر الصغير ولا البوستة اللى بتدى احداشر فى المية؟؟؟؟؟؟!!!!!!!!

أنا بنت ناس يا ناس

أنا بنت ناس يا ناس

بنت ناس حلوه .. ونغشه .. وفايقة ...ورايقة ..... ووشها منور .. وعنيها بتلمع... كانت تمشى لابسه فستانها الاخضر ... وشعرها يهفهف على ضهرها ... سعيدة فرحانة ...الكل كان بيجرى وراها ... الكل نفسة فى نظرة ولا ابتسامه ... الكل ماقدرش غير انه يحبها من بعيد لبعيد وهوه متأكد انه مش حيقدر ياخدها لنفسه ... كان قرايبها وحبايبها واهلها وصحابها.... حامينها حارسينها حبينها خايفيين عليها .... وفى يوم فى شهر فى سنه أو فى كذا سنه ... المهم فجأه كدة ...وهيه ماشيه فى حالها طلع عليها كلاب من كلاب السكك ... مش دى المشكله ... ياما طلع عليها كلاب من كلاب السكك... بس ولا كلب منهم طال منها حاجة ... كان ديما قرايبها وحبايبها واهلها وصحابها ... يحاموا عنها... وفى اخر لحظة ينقذوها ... بس اللى حصل المرة دى ... ماحدش عارف له سبب.... ولاحد فاهم لية حصل ...كلاب السكك المرة دى ....كلاب بلدى ... مش مخلطة زى كل مرة ...هجمت على البنية ... نهشوا فيها ... بهدلوها ... سلبوا منها اعز ماتملك... والغريبة ... ان القرايب والحبايب والاهل والصحاب ... سابوها .. ماجريوش زى كل مرة ينقذوها ... قالوا واحنا مالنا ... خلينا فى همومنا...الاغرب بقى ان بت الناس بعد ما أنكسرت ... واتبهدلت ... ونشفت ... وبدل الاخضر لبست الاسود ...والوش انطفى والعين بطلت تلمع .... ورغم ان مبقاش فاضل فيها حاجة تغرى ولا تشجع .... الا ان القرايب والحبايب والاهل والصحاب .... ماسابوهاش ... بقوا بينهشوا فى اللى باقى منها .... وبالدور ... وبعد كل واحد ماياخد دورة ... يطلع فارد قلوعة ويقول ... انا راجل ... انا جدع .... راجل على مين..؟ وجدع فى ايه...؟ يابن الكلب منك ليه ...اللى يرد يقولك: ماهو علشانك ... واللى يقولك : ان الاوان .. واللى يقولك: كفايه... واللى يقولك: البس التيشيرت وتعالى خد دورك ... حسبى الله ونعم الوكيل ... حسبى الله نعم الوكيل ... حسبى الله ونعم لوكيل ...والبت بعد ماكانت بت ناس ... بقت ليلها ونهارها واقفة تحت العمود فى ايدها سيجارة مستنية اللى يولعهالها.

مع نفسه

مع نفسه

كان زهقان قرفان متدايق ...على رأى قرد الغناء العربى ...مش شتيمه والله ...دا مدح ...ماهو لما بيغنى بيبقى فيه مرونه وطاقه زى اللى بنحسدوا القرد عليها....المهم صاحبنا فكر بهبل انه يتصل بحد من معارفه علشان يقعد معاه يتكلم ويفضفض ...ماهو البنى آدم مننا لو ما فضفضش ينفجر ...مسك الموبيل لقى عليه ستميت اسم ...مابين اصحاب وزمايل... جيران واصدقاء ...قرايب ومعارف..المفاجأه ان ولا واحد فيهم ينفع ...ماكنش عارف هما ماينفعوش ليه ...بس اهو ماينفعوش وخلاص ...وقرر انه يخرج مع نفسه ...ماهيه الوحيدة اللى حتفهمه وتسمعه وتنصحه لله فى لله ...عزم نفسه على فنجان قهوه فى الركن البعيد الهادى ...وقعد يحكى لها اد ايه هوه مش مبسوط ...وازاى الناس مش عايزه تتقى ربنا ...وحكى لها عن الدنيا اللى مبقاش فيها حاجه حلوه ...وهوه بيحكى ..نفسه ماكانتش معاه خالص ...كانت بتسمعه من غير نفس ...ماكانتش طيقاه ولا طايقه كلامه ....وفجأه انفجرت فيه ....ياعم ارحمنا بقى ...انت بتدور على حاجه مش موجودة اصلا ...هيه دى العيشه ان كان عاجبك ...اعتقنى بقى لوجه الله ....انا كمان عايزه اعيش زى الناس ماهى عايشه ...عايزة اعمل زى الناس ما بتعمل ....وانت هارى امى ...عيب ...مايصحش .... ماينفعش ...مايجوزش ...ما الناس عايشه ومبسوطه اهيه ....رد عليها : ومين قالك ان الناس مبسوطه ....الناس تعبانه ...ردت عليه : الناس مش تعبانه انت اللى تعبان وتاعبنى معاك ....انت اللى عايز تصلح الكون ...انت مالك انت ...انت مالك باللى بيعملو فيديو كليب وبيشلحوا ...انت مالك باللى بيلبسوا نقاب ولا بيقصوا رجل البنطلون ...انت مالك بالراجل ومراته بتتدخل فى حياتهم ليه ....ماهم عايشين ومبسوطين وبيخلصوا من بعض ...ردعليها : ماهو ده بيأثر على العيال ....قالت له : وانت مالك .....العيال كده كده حيتربوا ويكبروا ...هما مرتاحين كده يا اخى ...سيب الناس فى حالها ...مش قاعد لى طول النهار تتريق على ده وتنصح ده وتشتم ده ... رد عليها : انا بقول الصح ...انا بقول الحق... قالت له : صح بالنسبه لمين ...وحق عند مين ...كل زمن وله نظامه ...وده نظام الزمن ده ...مش عارف تتعامل معاه تبقى دى مشكلتك ....مش مشكلتنا ...ماتقرفناش بقى ......رد عليها : ازاى بقى ماهو لو كل واحد شاف الغلط وسكت الدنيا حتخرب ...ردت عليه : ماتخرب يا اخى ...ماهى كده كده حاتخرب ...كده كده حتنتهى ...ماتكولش فيه وتوجع قلبك وقلبى معاك ...وعيش واتمتع بالدنيا .... قال: هوه علشان اعيش واتمتع لازم ابقى فاسد واشرب بانجو وانام للعصر وامشى مع نسوان ...هوه ده النظام اللى بتقولى عليه ؟!....وربنا ...ربنا مش فى الحسبان ولا ايه ؟!!!...ردت عليه : ربنا كبير يا اخى ...ربنا بيسامح وبيغفر ...انت اللى عايز تعيش فى الجنه ...لا يا بابا ...لا يا حبيبى احنا على الارض ...عايز تعيش معانا اهلا وسهلا ...حترتاح وتريحنى معاك ....مش عايز انت حر ...بس اعتقنى وسيبنى اعمل اللى انا عايزاه حتى لو غلط ...مش لازم كله يبقى صح ...وبعدين كفايه عليك كده ...وياريت تنسانى وماتقوليش اقعدى معايا تانى ...على فكره اوعى تفكر انك تمنعنى انى اعيش بمزاجى ...علشان لو حاولت حأنكد عليك عيشتك ...سلام ياعم الصح ...مشت نفسه وسابته قاعد لوحده ...وكمان القهوه بردت ...قال : ياه كان عندى ستميت واحد ماينفعوش يقعدوا معايا ...دلوقت بقوا ستميه وواحد ...مش مهم ..... طظ .......طظ فى الستميه .......طظ فى نفسى ....طظ فى العالم كله ....مادام ربنا معايا يبقى كله طظ .... نادى على الجرسون وطلب قهوه دوبل على الريحه بدل اللى بردت

كفاية كدة قوى

كفاية كدة قوى

علشان لحظات الهلوسة والجنون اللى احنا فيها زادت قوى ... وباخت ... ومسخت ... وعلشان بقينا كلنا ماسكين فى خناق بعض.... رغم اننا بنتكلم فى نفس الموضوع ولينا نفس الاهداف والمبادئ الحاكمة .... وعلشان اكتشفت انى بحكم على حاجات من غير ما اعرف عنها حاجة ... وكل معلوماتى باجيبها من الفضائيات والفيس بوك ... الفيس بيه بوك ...علشان محدش يزعل ....وعلشان بقت الدنيا مش اكتر من جدل وهلفطة ولت وعجن ومافيش خبيز ... قررت انى انهى مهزله الكلام .... وانهى دور المدونة السياسى .... دا طبعا على اساس انى سياسى مخضرم من ايام حزب مصر الفتاة.... ومن اللى جاى ... ستصبح المدونة انسانية ... اجتماعية .... ولعلى بذلك اكون قد ساهمت بشئ فى بناء مصر ... وهذا اقرار منى بذلك .

المايل علم الدين

المايل علم الدين

اولا باتمنى ان مصر يكون اتولد فيها واحد زى رجب طيب اوردغان .... المهم بقى ان احنا نبص على رجب اوردغان من زاوية تانية خالص غير انه بيعمل فى اسرائيل اللى احنا نفسنا نعمله ومش قادرين ..... وحنفضل مش قادرين .... الفرق .... ان طيب اودغان له رؤية ووراه شعبه ....سؤؤؤؤؤؤؤال:
الا ليه رجب طيب اوردغان مع انه ماسك يجى من عشر سنين .... ما قامش الاومة دى على اسرائيل الا دلوقت ؟ ليه هه ... ليه ؟
بسم الله الرحمن الرحيم الاجابة : لانه قبل ما يعمل فيها راجل ويقف قدام اسرائيل اللى هية امريكا .... قعد عشر سنين ... هه ... عشر سنين يبنى فيها بلدة واقتصاد بلدة وجيش بلدة .... ماجاش وهوه اقتصادة منهار واوروبا ضرباه بالجزمة .... وجبهتة الداخلية ضايعة ... وعمل فيها راجل ونزل العلم .... بسم الله الرحمن الرحيم ... خلاصة الاجابة واعدوا لهم ما استطعتم من قوة ورباط الخيل .....
ما اعتقدتش ان تنزيل العلم ده تبع القوة او حتى تبع رباط الخيل ..... دا تبع الشقق وظروف الفضائيات ....انما اللى فاهمة على قد دماغى .... ان القوة ان احنا ناكل من فاسنا ونلبس من مكنا ... ونبطل لكلكة وهلفطة ولت وعجن وتنفيس عن خبيتنا .
وده الفرق بين الناصر اوردغان الدين ... والمايل علم الدين
يارب كلامى مايتفهمش منه انى ضد الثورة وشباب الثورة الطاهر البرئ النقى ....

اتراجع عن البوست اللى قبل اللى فات + ردى على ندى الياسمين

اتراجع عن البوست اللى قبل اللى فات

انا قولت فى البوست اللى قبل اللى فات ان شعب مصر سيكو ..... اعتذر .... السيكو عندة عذرة ... مريض .... اصلح اللى قولته ... الشعب المصرى ...غببببببببببببببببببببببببببببببببببببببببببى

ماتحلموش باكتر من كدة

ماتحلموش باكتر من كدة

وعلشان ماسورة مرشحين الرئاسة ضربت فى مصر وغرقت الدنيا .... وعلشان كلنا بقينا بنفهم فى الاقتصاد والعلوم السياسية ... وعلشان كلنا بنحب مصر ... او بنحب السبوبة اللى بتيجى من ورا مصر ... قررت انى ارشح نفسى رئيسا لجمهورية مصر المليونية ... اينعم انا مش حأنزل الانتخابات ولا اعلق يفط بالبروفيل ... ولا حأطلع مع يسرى فودة وريم ماجد فى الاون تى فى .... لكن حأرشح نفسى مع نفسى ...... واحلف اليمين قدامى ... وأول يوم رئاسة الصبح ... ادخل مكتبى واخد اول قرار ... قرار جمهورى رقم (1) لسنة 2011 ... الغاء معاهدة السلام مع اسرائيل ... واعلان الحرب عليها .... تتتا تا ... هيييه ... تصفيق حاد ... الموضوع سهل ياجماعة خالص ... دا احنا جامدين جدا ... ومافيش تماسك احسن من كدة فى الجبهة الداخلية ... لا اخوان ماسكين فى دقون السلفيين ... ولا صوفيين عايزين يكتفوا الجماعة بشريط الستان الاخضر .... ولا عندنا ليبراليين بيشدوا فى شعر الاشتراكيين ....ولافية فلول ولا بلطجية بسيوف ولا بلطجية فضائيات ...ولا كل عشرتنفار عاملين اختلاف .... ومدارسنا اخر نظام وعلام وتربية ...ومستشفياتنا مافيهاش صراصير ولا عيانين نايمين فى الطرقة وعمالنا شغالين الاربعة وعشرين ساعة ( على باب المصنع ..مش على المكن لتفهمنى صح ولا حاجة )... ومعندناش عشوائيات ولا ناس بتبيع عيالها قبل ماتبيع كلاويها علشان تاكل ... ولا بنستورد فوانيس رمضان ولاحجارتها ...ولا بنشحت رغيف العيش ... ولا بنشحت حباية الدوا وحقنة الانسولين.... ولا بنشحت حتة السلاح ... ولا حد بيعايرنا بمعونة ... ولا الكلام دة خالص ...كله تمام .. ايه بقى مايخليناش نحارب اسرائيل ونديها بالجزمة ونحرر فلسطين ... طبعا حتقولوا لى النظام السابق هوة السبب ... ماشى هوه ابن ستين كلب جزمة .... بس ايه علاقتة بالممرضة اللى قاعدة فى الطرقة تحب فى التليفون ... وسايبة العيان لغاية ما ازازة المحلول خلصت ودخل له هوا ... ايه علاقة النظام السابق ( اللى هوة ابن ستين كلب ) باننا نرمى الزبالة من البلكونة .... ايه علاقة النظام السابق ( ابن ستين كلب ) بان الموظف يعطل حال المواطن ...

مفارقة غريبة قوى : اللى نزل العلم من على سفارة اسرائيل اسمه ( الشحات) .... رمز دة ولا ايه ؟.... ماهو طول مالشحات بيشحت ... ويفضل طول عمرة شحات ... يبقى اخرة حينزل العلم... ومتحلموش باكتر من كدة

قريبا .... حصريا .... الجماهرية المصرية

قريبا .... حصريا .... الجماهرية المصرية

لما النخبة تكون سيكو ... لما الساسة يكونوا سيكو ... لما الاعلاميين يكونوا سيكو .. لما الوزراء يكونو سيكو .. لما موظفين الحكومة يكونوا سيكو .. لما البلطجية يكونوا سيكو.. لما الفنانين والمثقفين والمفكرين يكونوا سيكو .... لما اساتذة الجامعة والعلماء المحليين يكونوا سيكو... لما ستات البيوت يكونوا سيكوا.... لما شباب 6 ابريل و3 مارس و14 اغسطس ز30 فبراير يكونوا سيكو ....لما كل دول يكونوا سيكوا ......وكمان كدابين ... يبقى قريبا جدا ... كومنج سون ... حصريا على شاشه مصر ..... اسم بلدنا الجديد حيبقى : الجماهرية المصرية الاشتراكية الليبراليه الاخوانية السلفية المسيحية المليونية ....

قال ويطلع يقولك انا متفاءل بان مصر حتبقى احسن من ابويا .... يا اخى العزيز دا مش تفاؤل ... دى امنيات ... لان التفاؤل لازم له مقدمات .... لكن الامنيات ... براحتك يا معلم اتخيل زى ما انت عايز ....سيكو بقى

العيب انك تبقى غلطان وتكابر

العيب انك تبقى غلطان وتكابر

شعار اسلامية اسلامية ... شعار خان الامانة.... وشق الصف.... وفتت الامه ... واثار الفتنة وجرح مشاعر الاخوة المسيحين ... واضاع مصر ... واعطى الذريعة للامريكان انا يجهزوا مندوبا ساميا للشرق الاوسط لحماية شئون الاقليات فى مصر .... واشتغلت الاله الاعلامية يامعلم .... حكومية من اللى واخدة على بوس ايدين ورجلين اى حاكم او اشباة حاكم ... وبين القنوات الخاصة اللى اصحابها يقولوا الصبح عيب ياجماعة احترموا الشهر الكريم وخلوا الوطن ياخد نفسة ... وباليل قناته تسخن الناس وتجيب ما هو اسوأ من الاسوأيانى ... وازاى تقول اسلامية ... والاسلام دة مش حاجة كويسة لانه مابيوافقش على المواطنة ... ومدنية الدوله هية اللى حتطورنا وتخلينا نرجع نبنى الاهرامات زى زمان ... وحتخلينا نعمل مشروع هرم على كل ناصية ....

وقعدت شغلت نظرية المؤامرة وسألت هوة ليه الاسلاميين بيتحاربوا كدة ... ومين اللى بيحارب بالشراسة دى ؟ وتوصلت الى الاجابة ....انها السبوبة ياولدى .... اللقمة الطرية اللى من غير تعب .... حتة البقلاوة اللى متغمسة بشهد الشهرة وعسل الاضواء ... الاسلاميين والاسلام بيتحاربوا :

علشان مخرج الوضاعة والجنس والعرى ... لو جة التيار الاسلامى مش حيسمح له يعمل السفالة دى.... وهوه ياولداه مابيعرفش يعمل غير كدة .

علشان الممثلة اللى لاتملك سوى المقعدة حتقعد فى البيت .

علشان مافيا النيو لوك وفرد الكرياتين ووشم الحواجب ونفخ المفسى ... مش حيلاقى زبون .

علشان كتاب الشواذ وسب الرسول مش حيلاقوا حد يطبع لهم ويوزع لهم .

علشان توتو الكوافير وميمى الاستايلست حيرجعوا تانى حلاق رجالى .. ورفا .

علشان كباريهات شارع الهرم والخمس نجوم مش حتلاقى حد يدخلها .

علشان الرقصات مش حتقدر تطلع فى التليقزيون وتقول دا شرف لابنى ان امه رقاصة .

علشان ينى مش حيقدر يجدد رخصة الخمارة .

علشان شاهى وشادى مش حيطلعوا المقطم بعد التراويح ويرجعوا كرسى العربية لورا وهاتك يا تسبيح.

طاب اللى بيعمل الحاجات اللى فاتت دى ... ماشى حقة انه يعارض ويشتم الاسلاميين .. بيدافع عن سبوبته ... حقة محدش يقدر يلومة ... ماهو عض قلبى ولا تعض رغيفى ....

السؤال بقى : اللى مابيعملش الحاجات اللى فاتت دى ... وعندة اخت وبنت وزوجة وام بيراعى حرمتهم ... بيعارض ليه ؟

فكر وجاوب ... وعلى فكرة .. مش عيب ان الواحد يغلط ... العيب على رأى الحاج الله يديلة الصحة ...انك تعرف انك غلطان وتكابر .

ملحوظة :

بلاش خيابة .... وسذاجة ... محدش يقدر يقف قدام الحق... محدش يقدر يقف قدام ربنا ... ومن لم يكن له من اشهار افلاس امريكا واعظ... فلن تنفعة المواعظ .