الاثنين، 15 يونيو 2009

الكتالوج (8)

الكتالوج (8)

ظلم نفس

ممكن يكون الفرق فى السن هوة السبب ...ماهو الراجل عندة اربعين سنة والست عندها خمسة وعشرين سنة ...ولا يمكن علشان امة الست العجوزة قاعدة معاة فى الشقة....ولاجايز علشان الراجل موظف حكومة ومرتبة على قدة....وبيشتغل ليل ونهار ومش فاضى يفسح ....ولايكونش حماتة اللى بتدخل فى حياتة لغاية ماوصلت لجدولة مواعيد الحقوق الشرعية ......ولااحتمال يكون خالها وخالتها وعمة واخوة الكبير اللى كانو بيهدوا النفوس ....ولاربما تكون اختة اللى عندها تلاتين سنة ولسة ماتجوزتش يكون لها يد ...ولايكون ابن خالتها المحامى اللى قوى قلبها واقنعها انها حتطلع كسبانة من الجوازة والف مين يقدر جمالها ويتجوزها بعد ماتتطلق...ولا المستشار ابن عمة اللى اقنعة انه ممكن يمرمطها فى المحاكم وفى الاخر حتخلع وتسيب الجمل بما حمل ...ولاتكونش محكمة الاسرة اللى قوت المفترى وجات على الغلبان ...ولاهوة افترى الرجالة ولايكون كيد بنات حوا ...ولا قلة العقل ....ولا الموروثات المايلة بتاعة جوزك على ماتعودية وادبح لها القطة ...ولا يكونش علشان ماتفقناش من الاول ....من الاخر يولعوا الاتنين بجاز ...كل واحد يستحمل اللى بيعملة فية عقلة ....اللى مزعلنى ان كل دة حصل بعد ولادة يوسف ....واللى ماشفش ابوة رغم انة دلوقت عندة سنتين ....مع ان ابوة خد حكم رؤية ....بعد ماطلبها فى الطاعة لما هية رفعت علية قضية طلاق ولزقت فيها قضية نفقة بس هية ماسكتتش ....ورفعت علية قضية تبديد قايمة .....داغير قضية الضرب اللى ماعرفتش تجيب عليها شهود....وطبعا كل قضية قصادها قضية ...دا غير استخدام التكنولوجيا ....فى الضغط النفسى ....يعنى الرسايل اللى على الموبيل اللى بتجيب سيرة الام والاب والاخت والسمعة ....والاحلى بقى ...ورق القضايا اللى بيتصور ...ويتحط فى ملف علشان الواد لما يكبر يشوف امة كانت بتعمل اية فى ابوة ....كل دة حصل فى تسع شهور جواز!!! ...هوة السؤال هنا .... لية كدة ؟؟!! اية اللى خلاهم يعملوا كدة ؟!! اخر ماذهقت من التدوير على الاسباب رجعت للكتالوج اللى محدش بيبص فيه لقيت الموضوع ابسط مما يمكن بس المشكلة ان الكتالوج محطوط فى دولاب الصينى اللى بيسموة دلوقتى النيش .....وبعدين يا اخى لسة حاقوم وافتح النيش وابص فى الكتالوج يا اعم ارحمنا دا هوة اللى بيقول ...يارب ارحمنا دا انا بقى اللى بقول

قالى تعالى : وان خفتم شقاق بينهمافايعثوا حكما من اهلة وحكما من اهلها ان يريدا اصلاحا يوفق الله بينهماان الله كان عليما خبيرا . صدق الله العظيم. النساء 35

قالى تعالى : خذ العفو وامر بالعرف واعرض عن الجاهلين .صدق الله العظيم الاعراف 199

قالى تعالى : واذا طلقتم النساء فبلغن اجلهن فامسكوهن بمعروف او سرحوهن بمعروف ولا تمسكوهن ضرارا لتعتدوا ومن يفعل ذلك فقد ظلم نفسه ولا تتخذوا آيات الله هزوا واذكروا نعمة الله عليكم وما انزل عليكم من الكتاب والحكمة يعظكم به واتقوا الله واعلموا ان الله بكل شىء عليم. صدق الله العظيم .البقرة 231


هناك 8 تعليقات:

  1. بصراحه البوست تحفه وبيناقش قضيه مهمه جدا

    وانت عالجتها بشكل رائع

    بس يارب الناس تفهم :(

    ردحذف
  2. انا شايفه ان الغلط من البدايه
    ان مفيش توافق بينهم
    وكفايه موضوع السن
    ده لوحده مشكله
    تسلم ايدك يادكتور

    ردحذف
  3. اه ثم اه ثم اه

    بجد والله العظيم بيدمي قلبي الموقف ده

    بس انت نسيت حاجه

    يعمل كمان مدونه يلعن فيها سلسفيل اهل طليقته ويقل ادبه ويتسافل شويه

    وهى تدور وتلف على قرايبه واصحابه وتقول انا لازم افضحه

    وتمنعه انه يشوف ابنه وتربى ابنها على كرهه وهايطلع بعون الله يكرههم الاثنين

    حسبنا الله ونعم الوكيل

    الكتالوووووووووووووووووج




    حلوه الدولاب الصينى ده
    هههههههههههههههههههههههههههه

    فكرتنى بالدولاب الصينى الى كان عند تيته

    وفكرتني بجوزي الى لحد الان لازم يقولي هناك فى البتاع ده الى فيه الصينى
    هههههههههههههههههههه

    تحياتي لحضرتك

    ردحذف
  4. السلام عليكم ورحمه الله وبركاته

    المشكله انهم مش فهموا كلام ربنا ان الجواز ده موده ورحمه
    مش عفش وفلوس وقضايا واللى يعرف ياخد حاجه من التانى ياخدها ويجرى
    والطفل ده ذنبه ايه ؟؟
    هيكبر هيلاقى نفسه بيكره الاتنين
    بجد هو اللى مظلوم بينهم
    ربنا يهدى الجميع ويصلح حالنا

    ردحذف
  5. الكتالوج
    كله في الكتالوج
    بس احنا أميين يا فندم
    بنحطه في النيش علشان نتباهى ان في يوم من الأيام ورثنا كتالوج

    تحياتي

    ردحذف
  6. د.اسلام
    الحقيقة ان محكمة الاسرة اصبحت لاتكفى ما يحدث من قضايا واعتقد انه قريبا سينشا محكمة الحى..
    ولو اتبع كل زوجان تعاليم الدين فى الحياة صلحا وخصاما لانصلح حال الاسر التعيسة
    تحياتى

    ردحذف
  7. والله عندك حق
    لو كنا بصينا في الكتالوج مكناش تعبنا أوي كده
    تسلم إيدك
    وربنا يهدي

    ردحذف
  8. عندك حق
    البوست هايل وناقش مشاكل كتير بتحصل
    وسببها العند وسوء التصرف والاختيار

    ردحذف