الجمعة، 21 أغسطس 2009

رحلة فى دماغ بنى آدم 5

رحلة فى دماغ بنى آدم 5

حماة امانى

الحاجة لولا لبست العباية ولفت الطرحة ونزلت علشان تقبض المعاش .....وبالمرة تجيب حاجات رمضان ....كانت خايفة علشان دى اول مرة تستخدم فيها كارت الفيزا...هية ماكانتش عايزة لافيزا ولا ميزا ...بس البنك اللى صمم....كانت خايفة لامتعرفش تستخدمة ...وخايفة من الحرامى اللى حياخد الفلوس اول ما تطلع ...لما وصلت للمكنة كان عليها زحمة ....اتطمنت شوية ...كدة مافيش حرامى ...وكدة ممكن تسأل حد لو ماعرفتش تستخدم الكارت ....وقفت الحاجة لولا فى الطابور وسرحت مع نفسها ....انا مش حأكتر من حاجات رمضان ....الواد وابوة مابيكلوهاش ...وفى الاخر بيترمى نصها .....هية مصاريف على الارض ؟؟ داحتى يبقى حرام ....هوة كيلو تمر مافيش غيرة ...على شوية زبيب على ربع جوز هند علشان الكنافة والقطايف ....وكفاية على كدة ...لازم امسك على ايدى ...انا لسة عايزة اجوز الواد الصغير ....وبعدين محدش عارف بكرة فية اية ....لازم اعمل حساب الزمن واسيب قرشين للعيال يستروهم فى الغلا دة ...خصوصا الواد احمد علشان حتى يساعدوة فى المعايش ....ماهو معاة واحدة خروبية ومتدلعة ...عاملة فيها بت ناس .....مابتكلش العيش ابو شلن بتاعنا ...قال اية ؟ مابعرفش ابلعة ياطنط .....طاب ماتشربى وراة حبة مية ياروح طنط ...دلع ومياصة ...ولا العفريت اللى عليها اللى اسمة بيتزا ...ماتطبخى يافالحة هوة الواد حيكفى منين فواتير التليفرى....ولا الهدوم اللى مابتجيش الا من المول ...مالها بس محلات القماش ..ماتنزل تشترى حتتين قماش وتفصلهم وتوفر لجوزها الشقيان اللى بيطلع من صباحية ربنا ...مابيرجعش الا نص الليل ....علشان يكفيها ويكفى العيال بتوع كى جى وان وكى جى تو ...مالها بس مدارس الحكومة ....الا ترد علية العيال فىمدارس الحكومة بيئة يا طنط ...وانا عايزة عيالى يطلعوا استيل ..وكل ما قول لها على حاجة تقولى مش واخدة على كدة يا طنط ..مش متعودة على الحاجات دى يا طنط ....والختمة الشريفة ما كنت عايزة الجوازة دى ...انا كنت عايزالة شيرين بت اختى ...ادب وجمال وكمال ...ومدرسة بالحصة عارفة قيمة القرش ...دا غير انها من دمة يعنى حتشيل همة ...بس هوة كدة طول عمرة عايز يعيش عيشة المعوجيين دول ...كان دايما يقولى ياما انا عايز اخد واحدة من ولاد الذوات ....عايز اناسب ناس هاى ...انا فاكرة لما جة من عندهم اول مرة ...كان فرحان قوى بكلمة مامى ودادى ...كان فرحان بالشقة الى فى الزمالك والامن اللى فى العمارة من تحت ... قالىوهوة مبسوط قوى: يامة دول قدمولى الشاى فى فناجيل ومعاة جاتوة على عربية تحفة ...دا غير السكر كان مكعبات يامة ...اهو بيشرب الفالح؟!

انا فاكرة لما جات لى فى عيد الام وجايبالى اسورة طلعت بخمس تلاف جنية ...كان باين عليها انها غالية بسانا كمان نزلت وزنتها تانى يوم .....اية جاى تقولى يعنى انك غنية ولما بتهادى بتهادى قيمتك ...بس انا ماقولتلهاش شكرا ولاحتى مرسى زى مابتقول ...ايوة خليت وشها يجيب الوان ...قولت لها اصل انا ماليش فى الدهب ...ماشى يا امانى يابت عديلة ...النهاردة ...حاجيب ممبار وسقط ...وابعت لك تيجى تفرشى جنبى على الارض وتحشى الممبار وتنضفى الكرشة ....واياك تقولى مش واخدة على كدة ياطنط ..ونشوف حدايق القبة ولاالزمالك ....فاقت لولا على صوت الست اللى وراها بتقولها دورك ياحاجة ....الحاجة لولا حطت الكارت فى المكنة وبصت للست اللى وراها وقالت والنبى يا اختى اعمل اية بعد كدة ؟؟؟!!

هناك 3 تعليقات:

  1. هههههههههههههههههههههه

    والله انت زى العسل يا دكتور

    فهمت دلوقتى ليه البوست مشاركة وجدانية ليا

    ههههههههههههههههه

    طيب والله العظيم يادكتور انا فعلا مش بعمل الممبار دا ولا كنت بعرف بيتعمل ازاى غير لما اتجوزت
    بس السقط دا مش عارفاه يادكتور


    هو شبه الممبار ؟

    بس يادكتور ماشاء الله عليك حتى دماغ الحموات قدرت تدخل فيها

    بجد الحاجات خسارة انها مش تتنشر

    وميرسي للمشاركة الوجدانية الجميلة دى

    كل سنة وانت واسرتك بالف خير وصحة وسعادة

    ردحذف
  2. انا بعترض

    انت مطلع الحما ست بسيطة وكول ومش سماوية خالص

    شخصية لولا كان مفروض تبينها صح ونسيت انت خالص تطلع المؤامرات المستخبية
    كل المؤامرات شوية ممبار ها تحاول تدبس اماني فيهم؟
    دي حما طيبة جدا وغير واقعية
    والله ياأماني يابنت عديلة لأفوت رمضان واطب عليك بعد العيد اكتم على نفسك شهر ويانا ياانتي
    ههههههههههههههههههههههههههه
    كل سنة وانت طيب
    وها اعمل الرجيم الحلو واقول لك

    ردحذف
  3. هههههههههههههههههههه

    كل سنه وانت طيب يا د اسلام

    كده يعنى لولا دي ابسط الحالات فى حاجات اعقد من ذلك كثيرا

    واهى طلعت البت ريم مش عارفه يعنى ايه سقط اصلا وبتقول شبه المنبار
    ههههههههههههههههههههههه

    طيب يا ريم هاعزمك عندي فى العيد الكبير اعذبك كيفما اعذب انا الان

    كنت ابص لماما وهى بتقطع الكبده واقولها يعععععع

    دلوقتي بابا بينده عليا امسك معاه القصبه الهوائيه للجاموسه عشان يغسل الفشه كويس

    اه ياني يا مامايا


    اهو انا ضد عدم التكافوء الاجتماعي عشان كده

    تسلم اديك يا فندم

    بادور على بانر حلو مش نااااسيه

    ردحذف