السبت، 28 نوفمبر 2009

هل من يرصد كمن يعيش؟!!!!!!!

هل من يرصد كمن يعيش؟!!!!!!!

ثلاث قصص من الواقع حصلوا قدامى عينى....

الاولى:

بشير ونجيب وسعد ...منادى سيارات بالعافية ....وحارس امن بتلتميت جنية فى الشهر ....وقهوجى نصبة باتناشر جنية فى اليوم ....يوم الوقفة قرروا انهم يصلوا العيد ويستنوا الحاج انور حرب لما يدبح علشان يخدوا نصيبهم من اللحمة ويفطروا بية ....وكانوا ناويين مايناموش ويفضلوا سهرانين ....ولما ادنيا مطرت ....روحوا على انهم يتجمعوا فى صلاة العيد ...واتجمعوا بس قدام بيت الحاج انور مش فى صلاة العيد ...مع ان الصلاة ماكانتش بدأت ....صلاة العيد خلصت والناس روحت ...بشير قال لسعد :ماتعملنا كوبايتين شاى يدفونا عبال مالجزار يجى ...نجيب قال : مافيش حاجة ناكها انا جعان ...رد سعد وهوة بيعمل الشاى وقال: ياخى اصبر كلها نص ساعة ونعمل شوية شربة مكن على اللحمة ....بشير قال : انا جبت الحلة تحت السلم اول ما ناخد اللحمة نسلقها على طول ...قعدوا التلاتة عينهم على باب الحاج انور ...عدت ساعة واتنين والجزار ماجاش ... نجيب قام ومشى لأول الشارع يبص على الجزار ...وبشير راح للناصية التانية يمكن يجيى منها الجزار ...سعد بقى لم كبايات الشاى ورايح يغسلها ...وبرضة الجزار لسة ماجاش .... الدنيا كانت برد ....اتلموا التلاتة وقعدوا جنب بعض علشان يدفوا بعض ...ماحدش كان بيتكلم ...كله كان بيحلم بالشربة وحتة اللحمة ...بشير طلع من جيبة كيس وقالهم : اناجبت حبهان علشان الشوربة ....سعد قال :وانا جبت لمون علشان نعصر عليها ....نجيب قال : انا حاسس انى حاخد برد ..... وبدات صلاة الجمعة ...كل واحد فيهم بص للتانى عايز يقولة احنا حنصلى الجمعة ولا اية ....بس ماحدش نطق ....خافوا لا الجزار يجى ويخلص وهما فى الصلاة ....وتضيع حتة اللحمة ....واتفقوا من غير مايتكلموا انهم مايصلوش ...عدت ساعة واتنين وجة الجزار ...بشير ونجيب وسعد نطوا وخدوا بعض بالحضن وكأن ابو تريكة جاب جون فى الجزائر ... خدوا اللحمة حطوها فى الحلة وحطوا الحبهان ....اللحمة طابت نزلوها ......كانت العشا بتدن ساعتها....عصروا اللمون وكلوا اللحمة ومصمصوا العضم... وروحوا

الثانية :

كنت قاعد فى العربية باشرب سيجارة ....مستنى مراتى والعيال ينزلوا علشان نروح نعيد على الحاج والحاجة ....الشارع كان ضلمة ... ماكلة مقفل وبيعيد ....وشوية وشفت ست عجوزة شايلة على راسها كيس اسود شاكلة كده فية لحمة ....وماشى جنبها راجل عجوز بنضارة ...سمعتها بتقول له انا باشتغل اليومين دول فى بيت الدكتور شلبى الله يكرمة عطانى يجى كيلوا لحمة ....وبتنهيدة من القلب كملت كلامها وقالت والله انا تعبت قوى ياخويا ....رد العجوز وقالها : ربنا معاكى ياحاجة ....اهو كلة على دا الحال .

الثالثة :

شوية وانا قاعد برضة مستنى مراتى والعيال ...شفت راجل لافف على راسة كوفية ...عينة زايغة وبيبص على الارض كأنة بيدور على حاجة ...مافهمتش هوة مركز على الارض لية غير بعدين....ابوكوفية قابل راجل راكب عجلة وعليها كيس اسود ...وقفة وسألة ماحدش هنا بيوزع لحمة ....الراجل ابو عجلة شاور له على بيت وقالة : الحاج علاء دابح ....روح بس استنا لما امشى لاحسن يقول انى انا اللى قولت لك ....ابو كوفية راح لبيت الحاج علاء وقعد يخبط ...وشوية وبدأ ينادى ...وبعدين راح فاتح باب العمارة ودخل ...مافيش دقيقة وكان خارج ...مركز على الارض وايدة فاضية ....عارفين كان مركز على الارض لية ...علشان يشوف اثار الدم ...ماهو لوفية دم يبقى كان فية دبح ....ولو فية دبح يبقى فية لحمة .....

اد كدة اللحمة بقت حلم سنوى ممكن حتى انه مايتحققش ؟!

اد كدة انا وعيالى مفتريين ...دا انا بابوس ايد البت علشان تاكل اللحمة

اد كدة انا عامل فيها مرصد حلوان وباتابع وبارصد وبحلل ...وانا مش حاسس بالناس دى ...

طاب حأحس ازاى ...ما أنا مش عارف اجاوب على السؤال ...هل من يرصد كمن يعيش الواقع؟

ملحوظة1 :

مع العلم ان العربية اللى راكبها عربية الشركة يعنى لما اسيب الشركة حيخدوها ...والسيجارة اللى كنت باشربها سيجارة كليوبترا ....دا علشان مافيش ارخص منها

ملحوظة 2

ماحدش عند حل لحالة البندول اللى انا عايشها دى ...خلوا بالكوا لومالقيتوش حل حغير اسم المدونة واخليها حنموت يعنى حنموت

هناك 7 تعليقات:

  1. صباح الخير
    اكيد طبعا ان اللي بيرصد الحاله غير اللي بيعشها
    يعني ماحدش بيحس بوجع حد
    ومابيحس بالنار الا اللي ماسكها

    ولسه البلد والناس رايحه لأكتر من كده

    غير اسم المدونه علشان تأهل الناس شويه

    كل سنه وانت طيب

    ردحذف
  2. ما هى كتر خيرها الحكومة عايزة تعمل معروف فى الشعب و تحوله لنباتي علشان الأمراض اللى فى الحيوانات
    الحل اننا نحاول نساعد بعض على قد مانقدر و ده حل مؤقت لحد ما فعلا نلقى حل طويل المدى

    اما عن تغيير المدونة فأنت كده عايز تعلنها صريحة ان الأمل فى الحياة مات .. و بكده هنقبل أننا نعيش أحياء أموات

    ردحذف
  3. اولا عيد سعيد عليك وعلى أفراد اسرتك ان شاء الله
    بالنسبة لموضوع التدوينة اقول لك لايحس بالوجع الا اللي عايش فيه ومايعرفش طعم الحرمان الا اللي مش طايل الحاجة غير كده بيبقى بس تنظير
    لكن مع ذلك يحب على الاقل ان نحاول الاحساس بالمحروم حتى لا تتبلد مشاعرنا ونصبح ذوي قلوب جامدة لايؤثر فينا شئ
    تحياتي لك

    ردحذف
  4. يا وجع القلب يانا

    عارف يا دكتور اسلام والله العظيم انا فعلا فعلا باشوف بلاوي فى العيد ده وبانب نفسي ايما تانيب

    بس هانعمل ايه حتى لو بطلنا احنا ناكل لحمه مش هانكفي الغلابه

    كان الاستاذ فشكول بيقول مره كلمه عجبتنى اوي
    بيقول لحد امته الشعب ده هايفضل غلبان كده
    يتوحم على حته لحمه ويشتغل ويشقى ومافيش حاجه تبل ريقه
    وده قاله لما شاف السياح الاجانب الى مستواهم متوسط واقل من المتوسط كمان وعادي طالعين يقضوا اجازه بره

    انما احنا بنفحت فى الصخر على مافيش كمان

    حقيقى احنا شعب غلبان بس قولي نعمل ايه ؟؟

    انا فى واحد قطع قلبي يومين قاعد قدام البيت عندنا والله بس هانعمل ايه الجزار اتاخر وما جاش الا بالليل الراجل زهق ومشي
    وتاني يوم جه هو ومراته وفضلوا قاعدين لحد لما بعتنالهم حاجتهم

    ناس اخر غلب ومش هو بس ولا دول بس كتير كتير اوي

    والنبى قول الكلام ده للي بيقولوا الدبح مش مهم ونفرق فلوس
    قول الكلام ده للي بيدبح ويعزم على الدبيحه البهوات الى عايز يتمنظر قدامهم

    قول الكلام ده للي بيدبح ويوزع لاي حد حتى لو كانوا من الى بيمشوا يلموا اللحمه ويبعوها

    قول الكلام لولاااد التييييييييييت الى مجوعين الشعب ده


    ما تقولش هانموت يعنى هانموت والنبى حرام عليك امال الشمعه الى انا عماله احاجي عليها ما تنطفيش دي نعمل فيها ايه

    خلينا نقول يارب زيح عنا

    هانعمل اييييييييييه

    ردحذف
  5. اه كل سنه وانت طيب يا راجل يا طيب

    باقولك ايه بطل سجاير الهي يصلح حالك ويخليك لولادك

    ردحذف
  6. لا تعرف تبطل حالة البندول
    ولا تقدر تبطل ترصد
    ولا مفروض تبطل
    امال مين يفتح عينين الناس غير اللي بيرصدوا
    لكن عاوز تحل؟
    طب بالله عليك ازاي؟
    يعني لو انت في غنى مسيو ساويرس ولا مسيو هش ولا مسيو علاء
    هل ده يعني انك تقدر تأكل غلابة البلد
    اعمل اللي عليك تجاه الفقراء
    وانصح ومتبطلش رصد ونصح
    وتأكد زي ما أنا متأكدة ان الغلبان والغني لهم رب عادل لا ينسى ولا تأخذه سنة ولا نوم وهو الرزاق ذو القوة المتين ارأف بالعياد من الأم الرؤوم

    ردحذف
  7. الدنيا هاتفضل دايما فيها الفقير وفيها الغني

    وهايفضل دايما الشبعان ما يحسش بالجعان

    الا من رحم ربي

    ربنا يرحمنا جميعا





    ممكن اطمع في زياره منك والجواب على استطلاع الراي فى اخر البوست المنشور

    ردحذف