الثلاثاء، 1 ديسمبر، 2009

حطوا انتوا النهاية

حطوا انتوا النهاية

ندا بنت حلوة ... وعارفة انها حلوة ...ايوة هيه مش ملكة جمال ....بس حلوة من الحلاوة اللى ماتستغناش عنها ...نوع الحلاوة الكامل ....شقية ...ذكية .... رشيقة رقيقة ....انيقة شيقة ...نوع من الحلاوة اللى تخليك تحس ان الدنيا كلها بين ايديك وانت قاعد معاها ...لما بتتكلم مابتبقاش عايز تسمع غيرها ولا تبقى عايز تفتح بقك ......ماتقدرش تعمل حاجة غير انك تسكت وتسمعها ....وتتوة او تغرق او تغوص فى عينيها ...شباب كتير كان عايز يتجوزها ....وشباب اكتر اكتفى انه يحلم بيها ...واتجوزت جمال ...شاب من اللى مابنسمعش عنهم دلوقتى الا فى الحواديت ...بنى نفسة بنفسة ...بدأمن تحت الصفر ...كان بيشتغل ويدرس وياخد كورسات انجليزى علشان يعوض الفشل اللغوى بتاع مجانية التعليم ....وبدأ السلم من اوله ...من محاسب صغير تحت التمرين لغاية ما وصل لرئيس مجلس الادارة ...كان اصغر رئيس مجلس ادارة فى تاريخ الامة...كان اول مرة يشوف فيها ندا لما اشتغل فى الشركة ...مكتبة كان بيطل على شقة ندا ...اول ماشافها قرر انة يتجوزها ...حبها حب غريب قلب كيانة ...بقى كل حاجة بيعملها كانت علشان يتجوز ندا ....كان بيشتغل علشان يتجوز ندا ...بياكل علشان يتجوز ندا... بيلبس علشان يتجوز ندا ...بينام علشان يتجوز ندا ...حياته كلها بقت ندا ...واتجوز ندا ....حبه لندا كان بيزيد بطريقة سرطانية ...واحتفلوا بعيد جوازهم الخامس وكان بينهم احلى طفلين فى الدنيا ...يوسف وفرحة ...ولسه برضة حبه لندا بيتضخم ...ولسه الناس بتحسد ندا على جمال ....وبتحسد جمال على ندا .....عدت كمان سنه ...وفى عيد جوازهم السادس ....دخلت ندا الاودة لقت جمال بيرتب هدومة فى الشنطة الكبيرة ....قالتله : انت مسافر ولا اية ! دا النهاردة عيد جوازنا ....جمال راح على الدولاب وطلع علبة قطيفة زرقاء فيها عقد الماظ يجى اتناشر قيراط ...باسها فى جبينها وقالها كل سنة وانت طيبة ياحب عمرى ...دخل عليهم يوسف وفرحة ...خدهم بالحضن وباسهم وقالهم روحوا يا ولاد على اوديتكم ...ندا كانت واقفة مستغربة قوى من اللى بيحصل ...سألتة هوة فية اية ياجمال مالك؟!!...قرب جمال لندا مسك ايديها وبص فى عنيها وقالها: انت كنت حلم عمرى ...ماحبيتش ولا يمكن احب حد ادك ...بس سامحينى مش قادر استحمل اكتر من كدة ...انت ...انت ...انت طالق ياحب عمرى ...خد جمال الشنطة وخرج وقفل باب الشقة وراة ...انهارت ندا على اول كرسى قابلها مش قادرة تتحرك من الصدمة ومافيش غير سؤال واحد على لسانها هوة طلقنى لية ؟...هوة طلقنى لية ؟

تقدروا تقولوا لى يا جماعة هوة طلقها لية ؟؟!!!!

ملحوظة :

بلاش والنبى نهايات من نوع يا مامنة للرجال يامامنة للمية فى الغربال ...ولا الرجالة كدة اندال ...ولا برة وجوة فرشتلك وانت مايل واية يعدلك...والنبى والنبى

هناك 10 تعليقات:

  1. مساء الخير
    اكيد ماعملتلوش مكرونه
    هههه
    تحياتي

    ردحذف
  2. ايه ده هو انا اول تعليق طيب خير

    عارف لو ماكنش في عيال كنت قلت هو حر
    لكن مع وجود اولاد مش هقدر اقول اي سبب مقنع لأن اللي مش مؤمن بقضيه مابيقدرش يتكلم فيها
    انا مؤمنه ان طالما في اولاد يبقي من الانانيه هنا الطلاق وندفع الازلاد تمن شئ مالهمش ذنب فيه
    ناهيك ان الانسان لو حب حد يبقي من الظلم التخللي عنه فجأه كده
    او حتي التخلي عنه اصلا
    تحياتي

    ردحذف
  3. هو مفيش غير الاسباب اللي انت قلت منقولهاش لكن مادام انت قلت والنبي والنبي فحتخيل معاك نهايتين هما وحدهم اللي يخليني اعتبر تصرفه منطقي أو بمعنى أصح التمس له العذر فيه
    اولا ان يكون حاله حال هاني سلامة في فيلم انت عمري اي مريض بمرض خطير ويريد ان يجنبها الالم
    تانيا ان يكون ضارب في البورصة أو أفلس لاي سبب أخر وهنا ايضا ابتعاده هو لكي يجنبها الالم
    غير كده ملكش عندي غير يامأمنة للرجال يامأمنة للمية في الغربال
    تحياتي لك

    ردحذف
  4. طبعا هو يا السبب الأول بتاع خواطر شابة
    والسبب التاني مينفعش بأمارة الاتناشر قيراط

    طيب هل اصابه ملل جمعية رجال صامدون تحت الزواج؟
    والا يا مأمنه للرجال .. أمني براحتك طالما لما يرحل ها يكون فيه اتناشر قيراط ألماظ ؟

    حكاية انه سبها علشان حبها خنقه دي قديمة لأنها مش هي اللي بتحبه ده هو اللي بيحبها؟
    تفتكر مجنون ابن ستين تيت في بعض؟

    وبعدين مين قال ان كل تصرفات البشر قابلة للتفسيرات المنطقية؟
    واحد لادع ولاسع وراح لصاحب نصيبه
    تصدق ندى مش صعبانة علي قوي مجرد ما تاخد بالها انها كانت بتحب مجنوووووو ها تفوق وتروح تتجوز بالأتناشر قيراط
    صعبان علي العيال ولاده لما أطفال جاردن سيتي يزفوهم ويقولوا ولاد العبيط أهم
    ايه يا عم الدكتور القصة دي؟
    فسرها رضي الله عنك

    ردحذف
  5. انا ها اوجد له العذر لحد ما نعرف السبب الحقيقي..
    وها اقنع نفسي انه ورا التصرف ده سبب كبييير قد الحب الكبير اللي بينهم واللي ممكن ميكونش حد عارفة غير "جمال" وبس.
    بس مش عارف ليه حاسس انه الموضوع اكبر من جمال وندا.....(وش خبيث جداا) :)

    ردحذف
  6. صباح الخير يادكتور

    بصراحة هو مش سبب غير سبب خواطر شابة دا السبب الوحيد اللى ممكن يكون منطقي من وجهة نظره

    بس انا حاسه ان كلمته لندا لما قالها مش قادر استحمل اكتر من كدا دى الكلمة اللى فيها السر كله

    طيب معقول يكون حس ان كل حياته لندا وبس من اول ما شافها وحبها وانه مش بيفكر في نفسه زى ما بيفكر فيها معقول هو دا السبب ؟معقول حس ان كل احلامه اختزلت وتجمعت بس لارضائها؟ بس بردو طالما بيحبها ايه المشكلة ؟

    زى ما ستوتة قالت بليز تفسر لنا الحكاية احسن احنا كدا مش هنرتاح غير لما نعرف

    ردحذف
  7. بيتهيألى انه طلقها عشان اكتشف انه تعبان

    فقال بدل ما يعذبهم معاه
    وهيروح هو مصحة فى لندن لحد ما ربنا يفتكره

    احتمال

    ردحذف
  8. "بس سامحينى مش قادر استحمل اكتر من كدة"

    ياترى مش قادر يستحمل ايه ؟؟
    سبب النهاية كله واقف على تفسير الجملة دى
    مش عارفة .. استبعد المرض لان هو اللى مش قادر يستحمل
    ومش معقول مش قادر يستحمل حبه لها!!!
    أكيد فى حاجة هو عرفها و ممكن علشان بيحبها كان بيحاول انه يتخطاها لكن ماقدرش
    مش عارفة حاسه ان السبب هى مش هو "لانه بيقول مش قادر استحمل "
    عموما هنتظر التفسير لو انت ناوى تفسر

    ردحذف
  9. لا اكيد فى حاجه غلط

    حاجه مش شايفنها جايز

    وما باحبش الاسباب الخياليه بتاعة يجنبها الالم والحركات دي

    ده يبقى غبي بقى

    وبعدين معاك هاتحيرنا ليه طيب

    تعالى قول الباقي بقى بسرعه

    ردحذف
  10. اعترض واحتج
    ومتعصبه موت
    لانى عايزه اعرف السبب الحقيقى لبُعده عنها
    انا قريت كل التعليقات وكل ما اقتنع بنهايه منهم الاقى رد منطقى من حد تانى بينفيها

    انت مبسوط بالحيره دى؟؟؟؟!!!!
    عايزه تفسير القصه دى بسسسسسسرعه لو سمحت

    ردحذف