الثلاثاء، 29 ديسمبر، 2009

اشكالا للحل

اشكالا للحل

المشكلة مش فى المشكلة ...المشكلة فى طريقة تعاملنا مع المشكلة ....لما بيحصل لنا مشكلة ....آخر حاجة بنفكر فيها أن احنا ندور على حل للمشكلة دى...اللى بيحصل ان اول حاجة بنعملها ...ان احنا بندور على حد ...اى حد نحملة سبب المشكلة ...وننزل فية لوم ونقد ...وبعدين نريح على الكنبة ونمسك التليفون ..ونشتكى ...نشتكى من اللى كان السبب ...نشتكى ان مافيش حد بيقف جنبنا ...ونشتكى من حظنا القليل وبختنا المايل ....وبعدين نبدأ فى المقارنة ..نقارن بينا وبين غيرنا اللى مابيحصلوش مشاكل ....ونقارن بينا وبين اللى حصل له نفس المشكلة بس حلها ...لكن حلها ازاى ...ماهى الواسطة والمعارف والفلوس هية اللى ساعدتة ...لكن احنا غلابة ملناش ضهر ...علشان كدة بننضرب على بطننا ...ونرجع نلوم الدنيا والظروف ونشتكى من قلة البخت والحظ الهباب

ونبدا بقى حلقة الزهق والنكد وان مافيش فايدة ..وانها باظط ...وندخل فى جالة اكتئاب ...مع ان من الطبيعى انه يحصل لنا مشاكل ...علشان هية دى الدنيا ... ولو الدنيا مافيهاش مشاكل تبقى جنة ...والجنة مش موجودة غير فى الاخرة ...لكن لو اول حاجة عملناها لما تحصل لنا مشكلة ...ان احنا نفكر فى حل المشكلة ...نفكر فى الحل وبس ...من غير مانطبطب على نفسنا ونواسيها ...حنحل المشكلة ....ومش حيشغلنا لا مين اللى كان السبب ولا مين اللى ضربنا العين ...ولا حنفضل فى حالة الاكتئاب المزمن اللى وصلنا له ومستمتعين بية

هناك 6 تعليقات:

  1. عندك حق في اللي قلته نحن أخر ما نبحث عنه حل المشكلة كنت حضرت برنامج تكلم فيه الضيف على ان مشكلتنا الكبرى اننا نحمل دائما مسؤولية ما يحصل لنا للاخر وأعطى امثلة قال مثلا التلميذ يتأخر ولو سألته لماذا يقول غلبني النوم بمعنى يحمل المسؤولية للنوم وليس له أو الموظف يجيبك غادرت الحافلةدوني بمعنى يحمل المسؤولية للحافلة وليس لتأخيره المثل باللهجة المغربية أكثر وضوحا
    نحن كما قلت نبحث عن شماعة ونتجاهل تفصيص المشكلة جديا لمعرفة اسبابها وايجاد الحل
    بمناسبة رأس السنة الميلادية اتمنى لك سنة سعيدة مليئة بالافراح ان شاء الله
    تحياتي لك

    ردحذف
  2. دكتور اسلام
    ازيك وعامل ايه
    كل سنة وانت واسرتك بالف خير
    تحياتى

    ردحذف
  3. طب والى مشكلته العكس ؟


    الى اي مشكله فى الدنيا يحب يشيلها على كتافه ويقعد يدور بمنكاش لحد ما يلاقي حاجه هو كان السبب فيها واديها تقريع نفس بقى للصبح ؟

    يعمل ايه فى نفسه ؟؟؟

    بس انا باشوف دي حاجه وان كانت قاسيه احيانا الا انها على الاقل بتعمل فيكس للشخص يعنى

    اما حل المشكلات فاحنا نحلها ليه ما نقعد نندب

    الواد من دول يقعد من غير شغل وياخد مصروفه من ابوه وهو اد الجدار ويعيط ويلعن ابو الظروف والبلد والحكومه

    ويرفض يشتغل ب400 جنيه اصل ما يكفهوش سجاير

    طب قوم يا ابن ال ....... وابقى كمل سجايرك من ابوك بدل ما بتاخدها كلها من ابوك

    لا نندب

    الندب اسهل

    دايما تنكشني كده يا دوك

    تحياتي على الموضوع

    ردحذف
  4. معظم اللى حواليا بيخنقوني بكدة
    بدل ما ندور على حل للمشكلة نقعد نلوم في بعضنا وندور على اي شماعة نعلق عليها الغلط

    حتى انا احيانا بقع فى نفس الغلطة بس بحاول اتمالك نفسي وافكر من برة الأزمة

    ردحذف
  5. كل سنة وحضرتك طيب يا دكتور

    سنة سعيدة عليك وعلى اسرتك يارب


    انا كنت يادكتور كدا بكتئب لما تحصل مشكلة

    لحد ما اتعلمت انى ادور على حل وعلى سبب لمشكلة اسهل كتير من الزعل والاكتئاب والشكوى

    ردحذف
  6. اكيد طريقة نظرتنا الى الامور

    هي نصف الطريق الى الحل

    ردحذف