الشياطين الثلاثة
منظر البنت وهية بتجرى وتلعب والفرحة ملياها .... والضفاير بترقص على راسها... وايديها وهيه بتحاول تمنع الهوا من انه يطير الفستان ....بيخلينى احس انها ملاك ....مع انى ماشوفتش ملاك قبل كدة بس اكيد مش حيكون لا اجمل ولا اكتر براءة من كدة ...بس يا خسارة مابتلحقش تكمل فرحتها ولا ضحكتها ...يادوب تشد حيلها ويتنطط حواليها شياطين الانس التلاتة ....ويفرموها ..اى والله يفرموها ....الاول شيطان المساواة ...ودة بقى بييقعد على الودن اليمين ...وهاتك يامعلم ...البنت زى الولد ماهيش كمالة عدد ...زيك زى الراجل.... ليكى نفس الحقوق...اشمعنى انت بتحملى وتولدى وهوة لأ....شوفتى اد ايه انت مظلومة...ماتسكتيش ...حقك ...راسك براسة ...يغسل زى مابتغسلى ...يكنس زى مابتكنسى ...يرضع زى مابترضعى ...ولية ماتبقيش قاضى ...ومأذون...اة وايه يعنى لما تبقى امام جامع ....هوة اجدع منك فى ايه ...ماتخافيش ...اقفى قصادة ...القانون معانا والامم المتحدة وامريكا ...وحقوق الانسان ...اوعى يتحكم فيكى ...ايه اشتراكى بالقرشين اللى دفعهم مهر ...اخلعى وارميهم له على الجزمة ...انت راجل ...انت راجل ...انت راجل ....وصدقت الغلبانة ...مابقتش ست وبرضة مابقتش راجل ....
شيطان النيو لوك ماسكتش ...نط على الودن الشمال ...اصحى يابت ادى اخرة مشيك ورا شيطان المساواة ...فوقى بقى الست اية غير جمالها ودلالها وجاذبيتها ....سيبى لى نفسك ...حننفخ الشفة اللى فوق من الاجناب ...الحكاية دى بتولع الرجالة ...ونشفط شوية من الحتتين اللى ورا علشان الجينز يبقى نار ...وشوية سيليكون نعلى بيهم حائط الصد ॥منها اغراء ومنها حماية ... ونقشر الوش ولا اقولك نخلية برونزى ...ونصبغ بلوند ...والعين تركواز ....و نشلح حتة من الرجل على حتة ستومك ...كدة الرجالة تتهبل عليكى ...صدقت الغلبانة وبقت صورة مثيرة على غلاف مجلة بورنو ...
شيطان السلف قال فى نفسة هوة انا حاسكت ...دة انا اللى على حق ... نط هوة كمان مش على الودان بقى ..لا على الدماغ عدل ...حتموتى.... حتموتى ...حتتحاسبى فى القبر قبل يوم القيامة ...نار ....لعنة ربنا ...جحيم ....ماتسيبيش البيت ....ماتتعلميش ...غطى وشك وسيبى حواجبك تتغلغل وتنتشر ...البسى النقاب والجونتى وياريت نضارة شمس بس تكون اسلامى ...ماتفكريش غير فى اخرتك ....النار ...النار ...وغضب الجبار ...ادعى يا أختى فى سبيل الله ....ربى ولادك على الجهاد ..احنا فى زمن الجاهلية ... واللى حوالينا كلهم ابو جهل وابو لهب .....انجى بنفسك واستشهدى فى سبيل الله ....وصدقت الغلبانة وماتت شهيدة وهية حية وبرضة مابقتش رابعة ....
وكانت النتيجة ....
........ باربى لابسة نقاب وطالع لها شنب ......
ضاعت الملامح ...ضاعت ملامح نص المجتمع ....النص اللى المفروض انه يربى النص التانى اللى حيحرر القدس وينصر الاسلام ....!!!!!!!!!!!!!!!!
ياناس ياهوه ....شغلوا مخكوا لجل جاه النبى ...احنا بنتقلب ياعالم ....ماتسمعوش كلام حد ...خلى لكوا مرجعية ...ومش حتلاقوا احسن من كتاب الله وسنة رسوله ....سيبكوا بقى من شوية الصيع اللى بيطلعوا فى التليفزيون ويكتبوا فى الجرايد ...دى سبوبة ...والله العظيم سبوبة ...والدليل شوفوهم ساكنين فين ...وراكبين عربيات شكلها اية ...ورصيدهم كام فى البنك ...البنك اللى فى سويسرا طبعا مش دفتر توفير المدخر الصغير ولا البوستة اللى بتدى احداشر فى المية؟؟؟؟؟؟!!!!!!!!
اناعن نفسي الشيطان اللي ماسكني هو الاولاني الثانيين ملهمش دعوة بيا عشان أكون حقانية.
ردحذفبس انا الاولاني مبعتبروش شيطان لان كلامه مش كله غلط والبنت فعلا مش كمالة عدد والاسلام لم يعتبرها كذلك بل قدرها ودعا للرفق بها لكن للاسف ابتعدنا عن تعاليم ديننا فطالب الرجال النساء بمساعدتهم على تحمل اعباء الحياة مما جعل مبدأ القوامة يختل كل هذادون ان يتنازل الرجل من جانبه عن أي شئ مما يعتبره حقوقه
اما بخصوص شيوخ الفضائيات فيجب ان لانكون كالقطيع نساق .الله خلق لنا عقلا نزن به الامور والرسول صلى الله عليه وسلم يقول "لن يشاد احدكم الدين الا غلبه"
تحياتي لك
احيي واقدر واصفق وأذهل من متابعتك الحثيثة لقصص عمليات التجميل
ردحذفضحكتني الحدوتة دي قوي
الشياطين التلاتة اللي اتكلمت عليهم موجودين فعلا
الأول أغلب شغله بيتم في بيوت البنات فيها شايفين مرار التفرقة بين الولد والبنت .. قلة أدب التمييز العنصري .. بلاغة لغة المحاكم في التعامل مع المطلقات والمجالس الحسبية مع الأرامل
الثاني بيشتغل على بنات خارجة من بيوت تلقن الأنثى قيمة أنوثتها
وإن جسدها السلاح الوحيد اللي في ايدها .. وساعات السلاح الأغلى ثمنا في تقييم بورصة الرجال .. ولو اللي زي دول مكنوش فعلا بياخدوا تقييم "مبالغ فيه" عند فئة محترمة "عددا" من الرجال .. لبارت سلعة أطباء النفخ والشفط والكشط
الفئة التالتة دي اللي واجعة قلب المجتمع كله
دول بنات مكنش عندهم اساسا شيء وسطي في تربيتهم
ونتج عن هذا يا تطرف شمال قوي يا تطرف يمين قوي
تفكك اسري - انحراف مبكر - تلطيش في الدنيا - قنوات النعير والجعير والبكاء
عوامل متضافرة مع اندثار الثقافة وعدم وجود مثال يحتذى
تحياتي على المقال المتميز
بجد بوست هايل
ردحذفجامد جدا
وفعلا الشياطين دى منتشرة اوى
واللى مبينفعش مع واحدة تلاقى نافع مع التانية
ربنا يحفظنا
وميرسى على الموضوع
يا دكتور يسلم عقلك اللى بيفكر في الموضوعات المهمة دى
ردحذفرائع والله يادكتور
عارف انا كنت عند دكتور تجميل مع صاحبتى طبعا لان بنتها كانت وقعت ومجتاجة تجمبل مكان الجراحة بتاعتها وفوجئت بكمية البنات والسيدات اللى التجميل عامل لهم هوس بجد استغربت جدا
وطبعا شيطان السلف واضح جدا بمجرد ما تمشي في اى شارع هتلاحظ وجودة
والاولانى تقريبا بيجي لنا كلنا كسيدات وبنات
وبيزن على ودانا كتير اوى
متميز يادكتور كالعادة
مساء الخير
ردحذفالوسطيه
دينا هو كتالوج الحياة كتالوج الوسطيه
تصحيح صغير
الفايده 9في الميه
ههههه
تحياتي