جاى أهدى النفوس
شوفت انه كفايه بقى نكد.... وشويه كدة تهدية نفوس ...البوست دة جانى على الميل ....يعنى مش انا اللى كتبه .... بس بصراحة عجبنى وياريت اسمع رد علية من البنات ...
نصائح للمخطوبات
لو ربنا فك عقدتك.. واتخطبتي.. فإليك نصائحي حتى تأخذي بخطيبك من مركب الخطوبة إلِّي محدش عارف هاترسى على إيه.. إلى مثوااااه الأخير في قفص النسانيس.. قصدي قفص الزوجية السعيد
أجمل ما في الخطوبة العزومات الرومانسية.. على أحلى محلات أكل ف البلد.. واللي عمرك مانتي شايفاها بعد الجواز ... المهم نصائحي لك عند أي عزومة مع ختيبك .. قلنا رقَّه بقى ....
· الأول لازم تعرفي إن الشوكة والسكينة بيتمسكوا من إيديهم من الطرف يعني مش م الوسط ولا م البوز زي الخنجر ولا من فوق طبعًااا
· العيش أوعي تفضحينا وتقطعيه بسنانك.. ولا الرغيف نصين بأيدك وكل نص لقمة وتحشري ... أوعي .. العيش بيتقطع بالسكينة ف الطبق .. وبعدين تاخدي لقمة .. لقمة .. بالعافية .. قال يعني نفسك مسدودة .. اضغطي على أعصابك جدااا وبعدين لما تروَّحي .. إبقي حِفِّي زي مانتِ عايزه ... أهلك اهم عارفين انك طفسه ومش هيفضحوكى
· الشوووربة.. أبوس كعب رجلك .. بند الشوربة ده مهم جدًاااا.. الشوربة تتشرب من غير صوت خالص .. ومن غير ماتقعدي تنفخي فيها .. زي القهوجي اللي بينفخ ف الحجر للزبون .. وطبعًاااااا عايزك تنسى تمامًا ... السلطانية اللي بتقيميها على بقك ف البيت.. وتدلدقي على روحك ... بالمعلقه وبدون صوت .. سخنة ولعة برضه بدون صوت .. وتسيبي تلت الطبق ع الأقل .. مش تميليه.. عشان تلهطيها لآخر نقطة ......
· الرز طبعاً ... بيتاكل بالشوكة .. أوعي إيدك تتمد ع المعلقة .. وتغرفي من طبق الرز وتعبي .. إوعي ...... الرز بالشوكة .. وكأنك بتبوسيه مش بتاكليه ...
· المكرونة ... الاسباجيتي .. برضه بالشوكة .. تتلف على طرف الشوكة .. لحد ما تخلص وبعدين تحطيها ف بؤك من سكات .. مش تشفطي المكرونة عود عود وتبهدلى خلقتك ويبقى منظرك زبالة .... خلى دا بعدين لما الزبون ينطس ف نظره ويجوزك ... ويلاقى نفسه قدام الأمر الواقع ....
· السمك .. مشكلة ... شوفي .. بتفصلي اللحم عن الشوك .. إزاي ..؟ تقطعي اللحم من النص .. بالطول وبعدين تفردي اللحم ع الجانبين. ولما تخلصي ناحية .. متقلبيش السمكة .. بلاش فِلح .. شيلي السلسلة بالشوكة والسكينة وحطيها ف جنب الطبق وكملي أكل النص التاني ... وبدل الفيلم الهندي ده .. نصيحة .. ماتكليش السمك خالص .. قولي مابحبش السمك وخلصي نفسك
· الجمبري .. دا يعنى اذا كنتي عارفاه ... أول ماطبق الجمبري ينزل .. بصيله بقرف واحتقار شديدين .. آل يعني زهقانة من كتر أكل الجمبري الجامبو ف بيت بابّااااا.. وأتنهدي جامد وقولي .. برضه ..؟ وتروحي قاطعة راس الجمبريياية ... بالشوكة .. أنا ف عرضك إنسي المصمصة دلوقت .....
· البطاطس سواء مسلوقة أو محمرة .. أوعي تهرسيها وتدبيها ع الرز وتدي ... لا.. لآ... لآ... بالشوكة حتة حتة وإنتى زي ما تكوني هاتعيطي من كتر ما البطاطس صعبانة عليكي ....
· الفاكهة .. لو الفاكهة فيها بذر .. طلعيه من بؤك بالراحة وحطيه ف إيدك وهي مقفولة .. وبعدين فى طفاية السجاير اللي ع الترابيزه .. أوعي ياحبيبتي من نظام التفتفة للبذر .. إنسي .....
ولما تخلصي أكل تحطي إيدك على بطنك ... اللي عصافيرها بتصوصو من العينات اللي كلتيها ... وتقولي له مش ممكن .. أنا عمري ما اتفجعت كدة .. أنا أودامي أسبوع .. هابطل أكل فيه .....
وبعدين تمسكي الفوطة اللي دايمًا موجودة ع التربيزة من غير لازمة ... وتبوسيها... آل يعني بتمسحي بؤك ... وبعدين تستأذني منه لدخول التوليت لإصلاح ماكياجك ...
يا لهوي كل ده هو انا حأتجوز اوناسيس المفروض انه ختيبي شفت الرقة يا سلام علي وانا رقيقة حيكون بيعمل ألعن مني هو يعني جاي من كوالالمبور مهو حيكون متنيل على عينه من نفس البيئة والطبقة اللي انا منها وبالتالي حنكون وافق شن طبقة
ردحذفأحلى لوحة على باب مدونة
ردحذفهذه المدونة للآدميين فقط نرجو عدم دخول الكائنات الإسرائيلية
وذلك حفاظا على نظافة المكان
شكرا لتعاونكم
ربنا يوفقك
أرق تحياتي
هههههههههههههههههههههههههههههه
ردحذفانا ختيبي لما قال لي عاوزة نروح فين يا مزة قلت له عند زيزو النتن يا بيه
اللي هو بالفعل معرفني عليه سابقا
وقد كان
الراجل مقصرش
أكلني سحكوتشات عند زيزو يممممممممممممممم
وكل ما يقول لي ناكل ايه
تلاقيني اقول كشري يا حبيبي .. زيزو يا عمري .. طحمية يا حبي "رقيقة رقيقة"
جوعتني
مش تقول لي عيش بالشوكة والسكينة
انا سيبت السكينة علشان ادبح القط :)
وفسحتنا بقى مش ها اقول لك
فسحة خطوبتي القصيرة كانت في شارع محمد علي "متفهمنيش صح :)"
والرويعي
اوع تنسى الرويعي
لما اتشويت وطلعت زيت
ربنا يحظك يا بيه
ههههههههههههههههههههه
ردحذفوعلى ايه الذل ده؟
الخروجات هتكون من غير عزومات
رز بالشوكه؟؟؟!!!!!
مش واسعه دى شويه؟
(:
جميل البوست ربنا يسعد ايامك يادكتور
ههههههههههههههه
ردحذفحلو اوى البوست يا دكتور
بس هو في واحدة اصلا بتعمل في الشوربة كداحتى في بيتها وهى لوحدها؟
دى تبئا مش بنوتة خالص
وليه مش قالو حاجة على الخطيب اللى كتير هو كمان بيكون مفجوع وبياكل بصوت عالى ماهو لازم هو كمان يتعب علشان يعجبها
بصراحة اكتر حاجة بكرهها اللى بيعمل صوت وهو بياكل الموضوع دا بينرفزنى جدااااااااا
الحمد لله اننا اتجوزنا وبناكل براحتنا
يادكتور انا زعلانة خالص خالص
ردحذفكدا لسا مش حطيت اللينك الجديد بتاعى ؟
انا لسا دلوقتى بس خدت بالى
عموما اهو يادكتور يلا انا طيوبة اصلى ومش بعرف ازعل كتير
http://belabareed.blogspot.com/
السلام عليكم
ردحذفههههههه
ياسلام
حلوه حكايه الشربه والجمبرى دى
عمرى الحمد الله ما كنت مصتنعه وكنت باكل برحتى عشان لما نكون على طبعتنا مش هنواجه مشاكل كتير بعد الزواج.
وفقكم الله
ميرسي يا دكتور
ردحذفايوا كدا نورت المدونة بلينكها الجديد
صافي يا لبن طبعا
مع انى اصلا مش بعرف ازعل