الكلمة فيها لمن غلب (2)
طلعت فى دماغ اهلى انى ادرس علم نفس ...فيها حاجة دى .....واحد عايز يطور نفسة ويتفكر فى خلق الرحمن ...فيها حاجة دى ...سألت ...قالو لى اقدم انتساب فى كلية الاداب ...وقفت قدام الموظفة بتاعة شئون الطلبة ...كان قدامها جرجير وفجل وبصل اخضر وكرات... وبتفطر ....سألتها على الاوراق المطلوبة علشان التقديم ....قالت لى : تقدم طلب... وتجيب شهادة الميلاد وشهادة الجيش .....وشهادة الثانوية العامة بالدرجات ....قولت لها : قصد حضرتك شهادة البكالوريوس ...قالت لى : لأ شهادة الثانوية العامة بالدرجات ....بسذاجتى المعهودة قولت :حضرتك انا معايا ماجستير فى الطب البيطرى ....ومش ممكن اكون اخدت الماجستير من غير ما اكون خدت البكالوريوس ....والطبيعى انى ماخدش البكالوريوس الا لو كان معايا الثانوية العامة ... فانا اجيب لحضرتك شهادة البكالوريوس والماجستير ...لأنى صعب قوى الاقى شهادة الثانوية العامة ....دى من ايام الاتحاد الاشتراكى ......دخل علينا مدير شئون الطلبة ...سمعنا واحنا بنتكلم ...رمى الجاكتة ....مشيها الجاكتة .....ومد ايدة قدام الموظفة وخد حزمة فجل وضربها على بق واحد ...وقالى وهوا بيمضغ : يا أستاذ مش ممكن تكون مش جايب مجموع فى الثابوية العامة ....رديت برضة بنفس السذاجة : طول عمر الطب البيطرى بياخد مجموع اكتر من اللى بتاخدة كلية الاداب ....قالى وهوة لسة بيمضغ : هوة كدة ان كان عاجبك ...ياشهادة الثانوية العامة يا بلاش ....طلعت من عندهم على اول جزماتى خليتة يحط لى حديد فى كعب الجزمة ...واشتريت حزمة فجل وربطة جرجير وباتنين جنية بصل اخضر وبتلاتة جنية كرات علشان اتغدى حاكم انا كنت جعان قوى ...دخلت على مراتى رميت الجاكتة ....مشيها الجاكتة ..وقولتها والنبى يام جحيش والنبى املى لى الجردل علشان انا عطشان ...كدة احسن... كدة اسعد.... كدة اهدى ...بلا علم نفس بلا بنى ادمين بلا عقل بلا وجع قلب
ده موقف واحد من مواقف كتير تستحق إننا نرمي الجاكتة
ردحذفمشيها الجاكتة
والله انا خايفة عليك
فيه جملة سمعتها في فيلم لواحد من العلماء
بيقول بعد البحث المصني في هذه النقطة لمدة تسع سنوات أتمنى لو كنت لا أعقل
أنا كمان عاوزة الجردل وحزمتين الكرات الله يكرمك
الموظف ده هو اللى ينطبق عليه لقب عبده روتين
ردحذفجتهم القرف عالم تسد النفس
انه الرروتين والبيروقراطية التي تنخر في اداراتنا تكون واقف امام الموظف بشحمك ولحمك ويقولك أحضر لي شهادة الحياة وغير هذا كثير
ردحذفلكن مع ذلك لو كلنا قلنا بلا علم نفس بلا بني ادمين بلا عقل بلا وجع دماغ لتوقفت الحياة لابد من مواجهة هذا الواقع صحيح نحتاج صبر ايوب لكن خير من ان نستسلم لتجهيلنا
مساء الخير
ردحذفانت ليه مكبرها كده يادكتور
همه علموهم كده ماحدش بيدخل عندهم غير لما يقدم شهادة الثانويه العامه
انت عايز تغير النظام والقانون واللي حافظينه والا ايه
كويس انه ماطلبش شهادة ميلاد جدتك
احنا اطلب مننا شهادة ميلادة جدة والدتي علشان نثبت اننا مصريين ايه رايك؟؟؟؟؟؟؟؟؟
تخيل لما حد يقول لك اثبت انك مصري!!!!!!!!
فيعني ماجتش علي الثانويه العامه دي كده بسييييطه خالص
تحياتي
انت عارف انا فكرت اعمل زيك كده
ردحذفبس انا كنت كليةتجاره
كان عندنا ماده اسمها سلوكيه ففكرت انى ممكن بدل ما اروح اخد اداب وكده اعمل ماجيستير فى السلوكيه
بس برضه الكلام ده قدام شويه حاليا انا باذاكر اولى ابتدائي ورابعه ابتدائي
مليون حاجه فكرت فيها يا دوك وارجع برضه وارمي الجاكته ومعايا حزمة برسيم حتى اهو تليق علينا فى وضعنا الحالي
حسبي الله ونعم الوكيل
صباح الخير يا دكتور
ردحذفيعنى جت على دى يا دكتور ماهو كل حاجة يحكمها الغباء
انا عاوزه اعرف امتى الحاجات المتخلفة دى هاتتغير
ولا اشكال الموظفين وطريقة معاملتهم للناس
بس ممكن سؤال هى الموظفة دى مش بتاكل غير خضار بس
بجد الواحد زهق من العقول دى ومن القوانين الغبية دى
شكلنا كلنا هانرمى الجاكته وهانمشيها جاكته
أصبح تقدير العلم والعلماء وطلبة العلم .. في هذا العصر يضربون تحت الحزام بشدة.
ردحذف