الاثنين، 7 ديسمبر، 2009

سوء تفاهم

سوء تفاهم

محمد رجع من المحكمة بعد ما خلص موضوع اعلام الوراثة بتاع المرحوم ابوه ...قعد يتغدى مع سارة اللى قالت له : اسكت مش نرمين سابت الشغل ...رد بسرعة : ماهى لسه واخدة يجى مليون جنيه نصيبها فى الميراث ...تشتغل لية بقى !!....سارة ردت : لا الموضوع مش كدة ...دى الشركة بتاعتها قررت تقفل فرعها فى مصر ...فسرحت الموظفين ....محمد قال : شريف هوه كمان ساب شغله فى الامارات وراجع الاسبوع الجاى ....ردت سارة بسرعة :اكيد سرحوهم ماأنا سامعة عن المشاكل الاقتصادية اللى عندهم ...رد محمد :لأ الحكاية ان امه تعبانة قوى ...فقرر انه يجى يقعد معاها ...بيقول كفاية غربة الحق اقعد مع امى شوية ....

لو قرأنا الجزء اللى فات تانى ...حنلاقى محمد كان متأثر بموضوع اعلام الوراثة والورث اللى حياخدة من ابوة ....فمسابش سارة تكمل كلامها وتقول نرمين سابت الشغل لية ...وكمل على طول من عندة ...وحط السبب اللى على هواة ....ورثت .

برضة سارة كانت متأثرة باللى حصل لنرمين ...فكملت حكاية شريف من عندها ...ماصبرتش علشان تسمع السبب الحقيقى من محمد .

هيه دى المشكلة اللى بتخلينا ناخد قرارات ونقول آراء ممكن تعمل لنا مشاكل وتزعل الناس مننا ...المشكله ان احنا مابنصبرش علشان نسمع النص التانى من الحكاية ...وبنستقبل الرسالة بطريقة غير اللى يقصدها اللى قدامنا

- ممكن نفضفض ونقول اللى احنا عايزينة بالطريقة اللى احنا عايزينها فى الوقت اللى احنا عايزينة ...حقنا الشرعى والقانونى ....لكن اللى مش من حقنا ان احنا نتكلم بما لانعلم وخصوصا فى موضوع الدين والرسول والصحابة ....ممكن نسأل اهل الذكر لو مش فاهمين لكن بلاش نعمل فيها جمال البنا ...

- العزة فى طاعة الله مش حتلاقوها فى حاجة تانية

- الدين غالى والرسول غالى والصحابة غاليين ...فبلاش نتكلم فى المواضيع دى من غير مانكون مستعديين اوى اوى اوى ....ويارب احسن ختامنا

هناك تعليق واحد:

  1. يعني سأحاول ان أكون ذكية واربط هذه التدوينة بالتي قبلها.
    عموما انا في رأيي الاعتراف بالخطأ فضيلة لايقدم عليها الا الكبار الذين لاتأخذهم العزة بالاثم والاعتذار عن هذا الخطأ فضيلة أخرى لايقدم عليها الا قوي الشخصية الواثق من نفسه
    ارجع لموضوع هذه التدوينة نحن كشعوب عربية مشكلتنا اننا لانسمع بعضناونبني احكاما على اعتبار مافهمناه لاماسمعناه تابع اي برنامج في التلفزيون فيه اكثر من ضيف واحكم بنفسك هل يسمعون بعضهم ام أن كلا منهم لايسمع الانفسه
    تحياتي واحترامي لك

    ردحذف