الجمعة، 24 سبتمبر 2010

مش عايز اتجوز 7

العروسة السادسة

مش مهم مين اللى جاب لى العروسة ... ماهى ماعادتش تفرق ... ما خلاص ... بقيت اكره يوم الخميس ... ويوم الاربع علشان بعدة الخميس ... ويوم الجمعة علشان قبله الخميس .... الخميس ده قررت انى اروح فاضى وماخدتش جاتوه ولا بسبوسة ولا شيكولاته ... رجعت من الشغل ... دخلت نمت ... اختى صحتنى وقالت : قوم يا خالد حنتأخر على الناس ... قومت لبست واحنا نازلين امى صرخت : نسينا الجاتوه .... قولت: لا مش جايب وحنروح لهم كدة ... قالت لى الجاتوه فوق على السفرة ... قولت : جاتوه ايه اللى على السفرة ؟ ... قالت لى: ماهو الراجل صاحب محل الحلويات بعت علبة جاتوة مع الولد اللى بيشتغل عندة ... وقال انه خاف الا تكون رجعت متأخر من الشغل ومقدرتش تعدى عليه ... طلعت خدت علبة الجاتوه ... ورحنا للعروسه ... كالعادة ام العروسه خدت امى واختى وطلعوا برة... ابو العروسه قالى : بعدئذنك يابنى .... قاطعته : اتفضل ياحاج صلى العشا .... .. العروسه المرة دى ما كانتش حلوه ... ولا وحشه ... عاديه يعنى ... بس كانت لابسه فستان ماشى مع الطرحة والجزمه والاكسسوار ... اى نعم هوه عملى شويه مش بتاع مناسبه .. بس يدل على ان ذوقها حلو فى اللبس ... واتكلمنا ... اتكلمنا فى كل حاجه ... فى السياسة ... فى الاقتصاد ... والفن ... والثقافه ... طلعت بنت مثقفه وواعيه ومريحة فى نفس الوقت ... وفجأة وبدون سابق انذار قالت : انا موافقة من حيث المبدأ ... بس ليه شويه شروط لازم توافق عليها ... ... قولت مندهشا : اسمع ... قالت بس مش تقول ايوة .. وموافق... . قولت : امال اعمل ايه ؟ ... قالت الشروط دى لازم تتكتب فى عقد ويتسجل فى الشهر العقارى ... قولت باستغراب : طاب ليه كدة؟ .... قالت : علشان الرجاله مالهومش امان .... بنت خالتى جوزها اتجوز عليها بعد عشر سنين جواز واتجوز واحدة من دور عياله .... قولت : بس صوابعك مش زى بعضها .. فيه رجاله محترمين وبيعرفوا ربنا .... قالت : وانا ايه ضمنى انك تطلع واحد منهم ... ضحكت وقولت : سمعينى يا ستى شروطك ... قالت لى واحد ... تدفع لى 100الف جنيه اذا طلقتنى ..قولت : ياستى ربنا مايجيب طلاق ثم احنا لسه اتجوزنا ....وبعدين عقد ليه مش فاهم مش دة بيتكتب فى القسيمه ... قالت لى : لا ده مالوش دعوه بالمؤخر ... المؤخر لوحدة ... ده عقد مدنى غير الحقوق الشرعية ... اتنين ماتتجوزش عليه ولو اتجوزت عليه تدفع لى 50 الف جنيه وتطلقنى ... قبل ما افتح بقى كملت بسرعة وقالت : تلاته شغل البيت بالنص ... قولت طاب والنص ده حنحدده ازاى ... قالت : نتفق ... انا عليه الطبيخ وانت عليك غسيل المواعين ... انا انضف البيت اسبوع وانت تنضف البيت اسبوع ... انا عليه الغسيل وانت عليك التنشير ... صرخت : لااااااااا كدة ظلم ... انت يا دوب بتحطى الغسيل فى الغساله وتدوسى على الزرار ... لكن انا حيطلع عينى فى التنشير وينكسر ضهرى ... دا غير الحتت الصغيرة اللى تزهق فى تنشيرها ... ولا المشابك اللى بتقع منى ... لا ..والف لا .. قالت لى : خلاص انت عليك الغسيل وانت التنشير ... قولت اه .. كده ماشى ... فيه حاجة تانى ؟ ... قالت لى اه .. اخر حاجة ... العيال .... قولت بسخريه : انا مش حأعرف ارضع ... قالت لى : لا مش حترضع ... انت حتغيرلهم .... قولت لها ... انا موافق ... بس انا كمان ليه شروط ... قالت لى : حقك ... قول ... قولت : وبرضه فى عقد ويتسجل فى الشهر العقارى ...قالت لى : قول شروطك .... قولت : انا اصرف على البيت شهر وانت تصرفى على البيت شهر ...مصاريف مدارس العيال ... انت عليكى واحد وانا عليه واحد ... والشقه اللى حنسكن فيها تدفعى لى نص تمنها بسعر النهارده ... وتشيلى نص الشبكة ونص المهر ... وتكتبى انك متنازله عن حقك فى الخلع ... وانك اذا ما نفذتيش اى بند من البنود دى.... تدفعى لى 150الف جنيه ... قالت لى : انت بتهزر مش كدة ... قولت لها ايوة طبعا بهزر ... وقلدت اسماعيل ياسين وهوه بيقول سلاموووو عليييكو... صحيح... مافيش علاقة بين العلام والثقافة وبين الصحة النفسية.

هناك 12 تعليقًا:

  1. انا متابعه مدونتك من فتره طويله و من المعجبين بكتاباتك جدا
    بس بصراحه سلسلة العرايس دى استفزتنى انى اكتب و اقولك الراجل اللى شاف ده كله و لسه عاوز يتجوز المفروض يتحسب من ابطال اكتوبر
    و على فكره انا شايفه ان من منطلق المساواه مطالب العريس عادله جدا
    تحياتى

    ردحذف
  2. لازم تغير اسم المدونة هنتجوز يعني هنتجوز
    امزح
    لكن اللي بيدقق في كل صغيرة وكبيرة ماعمرة رح يتجوز
    لازم نترك بعض الأمور كذا على الله
    وبعدين انا متزوجه صارلي ......كم سنه ولا عمري صرفت عالبيت ولاعمر زوجي نظف البيت وعايشين بسلام كل واحد عارف دوره

    ردحذف
  3. السلام عليكم
    شفت مدونة حضرتك امبارح بس وقريت كتير من بوستاتها بس المبالغة فى مواضيع العرايس دى كبيرة اوى .. مش معقولة يبقوا بالشكل ده .. انت بتبالغ اوى .
    مدونة جميلة والاجمل هى مواضيع الفرق بين الرجل والمرأة
    تقبل تحياتى
    مشمشة

    ردحذف
  4. غير معروف
    اولا نورتى التعليقات
    ثانيا دا شرف ليه انك تتابعى الكتابات
    ثالثا ... ربنا يخليكى على مجاملنك الحلوه

    ردحذف
  5. نور
    طاب والله اسم حلو ... عموما الاصرار حلو فى كل حاجة
    نورتينىوشرفتينى

    ردحذف
  6. شيماء :
    جايز اكون بابالغ فى ردود الافعال اللى بتحصل فى الحدوته ... بس الحقيقة ان كل اللى حكيت عليهم موجودين وعايشيين معانا ... وبرضه بيتجوزوا ... ما على راى المثل .. كل فوله وليها كيال

    ردحذف
  7. لذيذة جدا عروسة النهاردة

    ردحذف
  8. صعبان علي قوى العريس ده...
    كل مرة يروح يخبط على البطيخه..ويلاقيها قرعة..
    وماينوبه غير حق الجاتوه...
    بصراحه مطالب العروسه مبالغ فيها شوية..كفايه تكتب الفلوس وبس..وتضيف شغاله مع العقد وخلاص..
    ولا تتعب نفسها ولا تتعب العريس...وممكن تحدد نوع الشغاله كمان..وكده عداها العيب الحقيقه..
    بصراحه شديدة ..كل الرجاله بتتغير بعد الجوااز والتغيرات دى بتكون نسبيه..فى تغيرات الست بتفوتها وبتاقلم نفسها عليها وخلاص..وفيه عيووب لايمكن حد يتحملها...
    واللى العريس طلبه ده من حقه برضه مادام الجواز بقى بيعة بتتسجل فى الشهر العقارى..والشاطر اللى يفاصل وياخدها بأأقل مبلغ...بس للأسف فى البيعة دى الاتنين خسرانين..
    قصصك جميلة فعلا..واسلوبك حاجه تانيه ...لذيذ جدا...
    شكلى هاكون متابعه دائمه لقلمك الجميل..
    تحياتى

    ردحذف
  9. يا لهوي هاموت من الضحك ههههههههههههههههههههههههههههههههه

    بص كله كوم والغسيل الى حتت صغيره ويفقع ده

    وهذا يدعوني للسؤال هو مين عليه النشير عندكم؟؟

    ههههههههههههههههه

    لعلمك الخاص يا دوك الرجاله اليومين دول عايزين حد يتشرط عليهم

    لا رجاله مين خليها العرسان اصل الرجاله مش لايقه اوي على الكل

    بس هما عشان يرجعوا الى رشدهم ثانية عايزين حد يتشرط ويتأمر عليهم عشان نسيوا نفسهم

    حلوه اوي بجد

    ردحذف
  10. بنت الغربه
    متابعتك للمدونه شىء يشرفنى .. زجزاك الله خيرا على مجاملتك

    ردحذف
  11. ندى ...
    ازيك ياندى ... اهلا اهلا ... على فكرة ... ولا كأنى شوفت السؤال خالص ...

    ردحذف
  12. بجد انت فظيع

    ههههههههههه

    البنت دي هبله ولا إيه

    معلشي بكرة تلاقي ست ستها

    ردحذف