اهتز عرش ملك الكيف 1

اهتز عرش ملك الكيف 1

الحشيش هوه ملك الكيف... ماعرفش ليه سموه كده ؟ ...

عمرى ماجربت ملك الكيف .. برضه ماعرفش ليه ؟ ... يمكن ادب ... يمكن دين ... عقل ... خوف ... مش مهم ... المهم النى مجربتوش ...  مع انى حضرت قعدات كتير فيها ناس بتشد وتلعلع .... بينى وبينكوا اليومين دول بأقاوم بشراسة احساس انى عايز اشرب حشيش ياسعاد ؟؟ وبرضة ما اعرفش الاحساس ده جالى منين ؟ ... يمكن علشان ده الوقت المناسب لشرب الحشيش ؟... ماهولو ماشربناش حشيش فى اليومين السود دول ... حنشربه امتى ؟ ... لما الاخوان يرجعوا السجون  مثلا ؟؟!! .... القصد.

تاجر المخدرات عموما ....حشيش بودرة .. بانجو.. ترامادول .. تاجر ذو حيثية فى المجتمع ... فلوس وعزوه وسلطه ... وسطوه وصبيان وسلاح ... حاجة كده اشى خيال ياناس ... لكن رغم كل الهيلمان ده .... بيصعب عليه  .... عايش ياعينى فى قلق ورعب وخوف ... مش عرف يلاقيها منين ولا منين ... حرس الحدود وشرطة المسطحات من ناحية ... ومباحث مكافحة المخدرات وخيانة الصبيان وكيد النسوان من الناحية التانية ... ومتنساش ندالة التجار مع بعضيها ... دا طبعا غير نظرة المجتمع .. وان كان نظرة المجتمع دى حلها بسيط ... كل الحكاية .. عجلين يندبحوا اول كل شهر للغلابة ... والدبح يكون قدام الجامع اللى بناه الحاج بعد مارجع من عند النبى وعمل فيه مستوصف ودار تحفيظ قران ... عادى ...الناس دايما بتسامح الغنى وتنسى له اى حاجة وحشة وتغنى له وتدعيله ... حتى لو كان تاجر مخدرات .... برضه مادخلناش فى الموضوع ...

صلى على النبى ...لأن تاجر المخدرات مكون رئيسى فى اى مجتمع استبدادى ظالم مش عارف يعلم ولا يشغل شبابه وبالتالى مش عارف يجوزهم ... ولا قادر يوفر حد الكفاف للغالبية العظمى منه .... يبقى تاجر المخدرات لازم يطور نفسه علشان يكبر ويكبر تجارته ... فوجب عليه ان يواكب العصر والعولمه وثورة المعلومات والانتر نت ... ولان المخدرات مش حشيش وبودرة وبانجوبس ولان فيه انواع جديدة بقالها سوق ومريدين وزباين ... فبدأ التطوير ....مخدرات جديدة ... مميزاتها فاقت التصورات .... مافيهاش حرمانيه ولا يعاقب عليها القانون .. وتجارها  قيمة كده وسيما ونجوم مجتمع ... مش كده وبس ... دول كمان بقوا مثل يحتذى به ... حلوة يحتذى دى ... بتفكرنى بالشعر العباسى اللى كنا بناخده فى ثانوى ...

نكمل المرة الجاية علشان ماتزهقوش منى ..... يالا باى   

مشاهد من مصر7 حمو الاوفيس بوى

مشاهد من مصر7

حمو الاوفيس بوى

حمو عنده 29 سنه ... معاه دبلوم صنايع قسم خراطة ... حمو ساكن فى كمبوند ابو خروف ... مداخل مجارى ... حمامات مشتركة ... سقف بلاستيك ... بلطجية للحراسة ... حمو اشتغل كل الشغلانات اللى ممكن تخطر على بالك ...انتهى بيه المطاف فى شركة مقاولات ... اوفيس بوى ... او بالبلدى فراش ... بالحقيقى بقى مرمطون ...  روح ياحمو هات عيش .. حاضر ... تعالى ياحمو اعملى قهوه ... حاضر ... روح ياحموا صلح لى الجزمة الايطالى ... حاضر .... تعالى ياحمو امسح المية اللى وقعت على المكتب  حاضر ... حاضر .. حاضر ...

انت اتأخرت ليه مواعيد الشركة 8 بالدقيقة ... معلش ... انت غيبت فى الحمام ليه ... معلش ... انت مش سامع الجرس يابنى ادم ... معلش ... انت لسه حتاكل ... معلش ...وبعدين حد ياكل طعمية فى الحر ده ... معلش ... كلمنى من بعيد ريحتك وحشه ... معلش ... طول النهار يا حاضر يا معلش .... كلمتين وبس .

مرتب حمو 400 جنية شامل  بدل الاهانه والذل وكسرة النفس .... حمو بيدفع 5 جنية فى اليوم مواصلات رايح وزيهم جاى ....

البهوات اللى فى الشركة كل واحد فيهم عنده عربية ... البهوات اللى فى الشركة بيدوا حمو مفاتيح العربية علشان يغسلهالهم ... عموا كان فرحان ... سبوبة تجيب المواصلات ويطلع بال400 جنيه خالص مخلص ... حمو كل امله انه يطلع بال400 جنيه خالص مخلص .

فى يوم اسود غطيس ... صاحب الشركة الغنى المحترم  شاف حمو وهوه بيغسل عربية واحد من البهوات ...صاحب الشركة الغنى المحترم قرر يخصم يومين لحمو .... عنده وجهة نظر ... بيقول الوقت اللى بيضيعه حمو فى غسيل العربيات ده وقت الشركة ... من حق الشركة ... من فلوس الشركة ...

ولغاية هذة اللحظة محدش عارف حمو بيعمل ايه بال100 جنية ... ماهو بيصرف 300 مواصلات ..

 ولغاية هذة اللحظة محدش عارف لغاية امتى حمو حيقدر يقاوم ومايتحولش لبلطجى .

ولغاية هذه اللحظة محدش عارف حمو عايش ازاى ... او بمعنى اصح ... عايش ليه ؟

مشاهد من مصر1

مشاهد من مصر1

الحاجة نعمات الباز فرج

الحاجة نعمات الباز فرج.... نايمة على سرير فى مستشفى مستنية الدكتور يعملها عمليه المرارة .... الحاجة نعمات الباز فرج عندها 77 سنه شقى و اربع عيال..العمليه فى السن ده خطيرة ...ولاد الحاجة نعمات قاعدين حواليها بيضحكوها وهما بيموتوا من جوه ... الواد الكبير بيصلى صلاة الحاجة ورا الستارة ... والتانى مشغل قران على الموبيل ... التالت بقى نزل يصلى فى الجامع اللى جنب المستشفى ...الرابع بقى قاعد يدعى ويقرقض فى صوابعة.... عادى ما احنا مابنفتكرش ربنا غير وقت الزنقة ... وعلشان ربنا كريم ... بيفك زنقتنا ... القصد الدكتور اللى حيعمل العمليه ... اخوان ... وبتاع البنج ... مع شفيق ... الممرضة بعد ماركبت المحلول بتتلكع علشان الاكرامية ... والتمرجية كل ربع ساعة تدخول وتسأل عايزين حاجة ... ربنا يقومهالكوا بالسلامة ...ابن الحاجة نعمات راح يتطمن من الدكاترة عن العمليه ... لقاهم بيتناقشوا فى مين احسن مرسى ولا شفيق ... والنقاش اتحول لجدال ... والصوت على ... ابن الحاجة نعمات قالهم والنبى طمنونى على الحاجة ... الدكتور الاخوان سأله انت مع د مرسى ولا مع شفيق ؟ ...

ابن الحاجة نعمات قال: امى عندها 77 سنه بتساهم معايا فى الايجار المؤقت ...وبتدى اخويا متين جنية مساعدة فى مصاريف البيت ... وبتدفع قسط التاكسى لاخويا التالت ... الرابع بقى بتدفع له قسط العفش علشان يلحق يدوق الجواز قبل مايطلع على المعاش ..الست دى لو جرالها حاجة اربع بيوت حيخربوا ... خلوا بالكوا من امى .

بتاع شفيق قال : لو كان شفيق هوه اللى مسك ماكنش ده بقى الحال ...

بتاع مرسى قال : احنا لازم نستحمل شوية ... النهضة جايه جاية .

ابن الحاجة نعمات قال : والنبى خلوا بالكوا من امى .

بعد العمليه ... الدكتور الاخوان خد اجره على داير مليم ... الدكتور الشفيقى خد اجرة على داير مليم ... الممرضة والتمرجية خدوا الاكراميه وجلدتين المحلول اللى فضلوا ... وسرنجة فيها 6 سم نالوفين ... ماهواللى بيعملوا دماغ بيدفعوا كويس .

النهاية السعيدة بقى ...

 الحاجة نعمات الباز فرج قامت بالسلامة ... والاسبوع اللى فات بعد مافكت السلك عدت على بنك ناصر قبضت المعاش .

ملناش غيرك يارب..............................................................

من نخبة لاخوان ياقلبى لاتحزن

من نخبه لاخوان ياقلبى لاتحزن

أما الجهل المركب ....فمصابة ثقيل  ...فهو جهل أولئك الذين لا يظنون بنفوسهم جهلا .... اولئك القادرون المسيطرون المترفعون ... المتكبرون ... الذين يكسون انفسهم طلاء زائفا من الفهم والذكاء ... ويبهرون غيرهم بمظهرهم الكاذب الخادع فيتولون امر سواهم ويتحكمون فى مصاير غيرهم ... والجهل فى باطنهم متأصل متحكم . (يوسف السباعى)   

انتهى زمن القهر .... وبدأ زمن الهدر

                            انتهى زمن القهر .... وبدأ زمن الهدر

القهر ... هوه كسر نفس البنى ادم مننا واخضاعة وترويضة ... بس مع الكسر والاخضاع والترويض ... بيكون فيه اعتراف للمقهور بكيانه ... فالقهر بيكون خارجى ... فاللى بيقهر مابيقدرش يأثر على حرية المقهور الداخلية ولا على اعترافة بذاتة ... علشان كدة المقهور بيقدر يقاوم القهر عن طريق التمرد أو الثورة أو الرفض ... يعنى البنى ادم بيبقى مقهور بس لسه عنده شوية ادمية وذات وكيان يقدر يعيش بيهم ويحترم نفسه ويشوف احترام الناس ليه ... وده اللى كان بيحصل لنا قبل ثورة 25 يناير المجيدة وقبل الاحتلال الاخوانى لمصر.

كنا مقهورين من حسنى وامن الولة واحمد عز ... بس كان جوانا بقايا احساس بالادمية والتمرد وان احنا ممكن نثور ونشتم ونقول لأ ... وده اللى خلانا نقوم بالثورة .. او خلاهم...... علشان انا كنت بأتفرج على  الثورة فى التليفزيون .

وبقيام الثورة الميمونة انتهى زمن القهر .... وبدأ زمن الهدر ...

والهدر بقى ياسيدى وماسيدك الا المرشد ... معناه انعدام الاعتراف بانسانية البنى ادم من اصله ... فيبدأ الانسان يتزق واحدة واحدة الى العيشة تحت خط الفقر ... العيش بطابور وكوبون ... السولار بطابور وكوبون ... الرز والزيت بطابور وكوبون ... وشوية شوية يتحول الانسان الى كائن نباتى ... بطل حتى يحلم باللحمة .... وشوية شوية تبدأ التصفيات والحصار والتطفيش والتعزيب ...(بيصفى المؤسسات ويحاصر الثوار ويطفش ساويرس ويضرب ويسحل فى الجامع )

وينزل الانسان من تحت خط الفقر الى تحت خط البشر ... ويهدر الجسد وحرمتة وحدودة ويستباح ماديا ومعنويا ويتحول الانسان الى اله ( مكنه يعنى ...حاكم التلاكيك كتير والتكفير على ودنه) .... ويصبح محظوظا وسعيدا اذا قدر يوفر لقمة العيش ليه ولعياله ..وتبدأ حالة الانكسار والهوان ويتحول الانسان  الى شىء ... و تنهار حدود الاخلاق والحرمات ويصبح كل شىء مباح ... فالشىء يقبل أن يمارس عليه أى شىء ... كما انه يمارس أى شىء ...

وأنواع الهدر كتير ... عندك هدرالطاقات : روح انت للحاجة علشان عندنا بديل اخوانى ... هدر الوعى : يقولك انت مش عارف اللى انا عارفة ... انت مش شايف اللى انا شايفة ...انت مش حاسس بالصوابع اللى انا حاسس بيها ..

كمان فيه هدر فكر ...فمعدناش فاهمين اى احاجة ولا عارفين ايه اللى بيحصل ولا مين مع مين ... وبدأ الشعب المصرى المعاناة والصراع بين الاكتئاب والمرارة والتبلد وبين التمرد الداخلى والحرب على الذات المجروحة فى كيانها ...  المسحوله فى اعضائها .. وكل سنة وانت طيب ياشبه شعب .... والمجد للاخوان.

لمزيد من الدراسة يرجى مطالعة كتاب الانسان المهدور للدكتور مصطفى حجازى ...كل اللى حتعمله انك تكتب على جوجول ... الانسان المهدور + تحميل ... نزل وأقرأ واعرف بيتعمل فيك ايه واوعى تستسلم ...اللهم بلغت اللهم فاشهد .

تستاهل يا شعب وسخ

تستاهل يا شعب وسخ

شعب وسخ اخلاقيا ... بياكل حق اخوه وصاحبة وجارة .

شعب وسخ ماديا ... الرشوة عنده اكراميه ... والتظبيط شطارة .

شعب وسخ شخصيا .... يرمى زبالته من البلكونه ويدخل جرى ويقفل الشيش وراه علشان ماحدش يشوفه .

شعب وسخ انسانيا ... يحط ابنه تحت رجليه لما يجيله الطوفان ... ولو خرب بيت ابوه بياخد منه قالب .

شعب وسخ عاطفيا ... الحب عندة بقى بكام والمكسب اللى وراه ايه .

شعب وسخ دراميا ....مايحبش يشوف غير النسوان العريانه والبوس وقنوات الرقص .

شعب وسخ تعليميا ... العلام عنده تكرار علشان يتعلم الحمار .

شعب وسخ فكريا ... لما بيقرا بيقرا كتب الجنس والشذوذ ويقول على الاسوأيانى ..... عالمى .

شعب وسخ دينيا .... يربى دقنه ويقصر بنطلونه ويخوض فى الاعراض .

شعب وسخ زراعيا ... يبنى على الارض الطين ويصلح الصحرا ويروى بمية الصرف .

شعب وسخ صحيا ... مابيغسلش ايدة قبل الاكل ..... ولا  بعده .

شعب وسخ اعلاميا ... معاهم معاهم .. عليهم عليهم....المهم عنده الاعلانات .

شعب وسخ مزاجيا ... عايز حتة الحشيش وصاروخ البانجو وقرص الترامادول .

شعب وسخ جنسيا ... عايش على قرص الفياجرا وبخاخة الليدوكايين ومايعرفش يقدم لنفسه .

شعب وسخ عقليا .... يضحى باللى كان حينضفه ويجيب  اللى بيطينه .

شعب وسخ فى كل حاجة .... والوسخ ماينفعش يقودة غير واحد اوسخ منه ... واحد دلدول برياله ...كداب منافق مرائى ... خاين عويل .

تستاهل ياشعب وسخ ... تستاهل انك تعيش مقهور .... مهدور..... مكسور ... تستاهل تعيش خدام تلحس تراب الجزم .

وربنا ربنا مابيظلم حد ... الوسخ هوه اللى بيظلم نفسه .

ماتحاولش

ماتحاولش

·       ماتحاولش .. الاخوان مابتتغيرش .... بص فى كوبايتك علشان ( جبهة) الضمير انعدم خلاص .

·       لكل  زمن كلابه ... عادى جدا .. اللى مش عادى انك تلاقى كلاب لكل زمن ... تصدق برضة عادى جدا .

·       الشعب المصرى بقى بينادى بحاجة .... ويقول حاجة تانية ... ويعمل حاجة تالته خالص ... شعب مصر اتهبل يارجالة .

·       فى عهد عبد الناصر .... فى كل مؤسسة .... يوجد ظابط جيش

      فى عهد السادات ........ فى كل مؤسسة ..... يوجد مخبر         

      فى عهد حسنى مبارك .... فى كل مؤسسة .... يوجد مندوب امن دوله

      فى عهد البعيد ..... فى كل مؤسسة .... معتوه او سيكو او غبى ... او التلاته    

·       حوار على التربيزة اللى جنبى على قهوة بانجو :

الاول : انا مش عارف اخلص الورق .... ماحدش عايز يمضى لى

الثانى : اصل كله مستنى المدير الجديد

الاول : بس يجيى واحنا نظبطة

الثانى : خلى بالك بس ده اخوان

الاول : بسيطة خالص........ حنشوفله حد اخوان

مافيش حد فى الدنيا دى كلها مابيتظبطش .... اه .... حتى انا اللى عامل سبع رجاله فى بعض ...... ياسيدى ماتعرضهاش ... الحق عمره ماكان علينا ....

 طول عمر الحق ....................... على عبحق

عارفين كنت عايز شفيق ليه ؟

عارفين كنت عايز شفيق ليه ؟

احنا ناس الباطل بتاعها لازم يكون قانونى .....

جملة حوارية قالها عادل امام او فتحى نوفل للوزير جميل راتب فى فيلم طيور الظلام ... وعلشان الباطل قانونى .... كله طلع براءة .... سرور طلع براءة ... فاروق حسنى طلع براءة ...صفوت الشريف طلع براءة .... زكريا عزمى طلع براءة ...وابشركوا .... كله حيطلع براءة ... ومافيش فلوس حترجع من برة ... من الاخر كدة علشان نخلص من الفيلم الهندى الاهبل ده ...

وعلشان كده العياط وجماعته مش حيقدروا يقدموا حاجة للبلد دى غير الخراب ... لان اللى مش مدركينه او مش عايزين يدركوه ... ان الفساد القانونى والباطل الشرعى مش بس فى الصف الاول .... دا مادد للصف الرابع  ... مش بس فى رئيس مجلس الادارة ... دا فى المدير العام ومدير الادارة ورئيس القسم ... باطل والله العظيم باطل ... والختمة الشريفة باطل ... بس باطل قانونى .

اللى مايعرفهوش العياط وجماعته انهم مش حيعرفوا يسيطروا على الباطل والفساد .... وحتى البرادعى فلانتين وحمدين الكومبارس وابو الفتوح المطيباتى وعمرو سيجار ...ماكانوش حيعرفوا يسيطروا على الفساد والباطل اللى احنا غرقانين فيه ....عارفين ليه ؟ ... علشان كلهم اساتذة تنظير وخطب وتويتات ... اساتذة هلفطة ورطرطة وشقلطة .

الوحيد اللى كان يقدر يسيطر على الفساد هوه الفريق احمد شفيق ... عارفين ليه ؟ ... علشان اللى مربى قرد عارف لعبة ...وشفيق عايش طول عمرة بين القرود ... بيعرف يتعامل معاها ... بيعرف ازاى يسيطر عليها .

وعلشان افة حارتنا النسيان على رأى نجيب محفوظ ... وعلشان جيل الشباب الثورجى من 15 سنه كان لسه عيل صغير ... امه بتجرى وراه على السلم علشان تحمّية ... فميعرفش فهيم ريان يعنى ايه ؟

عموما فهيم ريان ده اللى كان ماسك مصر للطيران أو بمعنى اصح اللى كان خارب مصر للطيران ....  الجيل الثورى مايصحاش على قتال وحروب رجال الاعمال علشان يبنوا مطار جديد ويقلبوا السبوبة على حساب الشعب الاهطل ونخبتة العبيطة ...مايعرفوش ان احمد شفيق هوه اللى وقف قدام الفاسدين والحرامية علشان مايبنيش مطار جديد يكلف الدولة مليارات ... احمد شفيق اللى قال ليه نبنى مطار جديد لما ممكن اصلح القديم .... وصلحه ... ونافس بيه المطارات العالمية بعد ماكان خرابة ... مايعرفوش ازاى احمد شفيق حارب الفساد اللى فى مصر للطيران لغاية ماسيطر على طيور الباطل وعمل  معاهم الصح .

يا اخوانا ... السى فى  حاجة مهمة ... سابقة الاعمال حاجة مهمة ... الخبرة حاجة مهمة ..... والاهم انك تكون عارف القرود بتلعب ازاى .

على فكرة ... احمد شفيق مسلم والله ... وبيصلى ... وبيطلع الزكاة ...وحافظ ماتيسر من القران ...وفيه ميزة تانيه مش موجوده فى كل اللى على الساحة ... بيفهم ... وعنده رؤية وقدرة على الاصلاح .... وبيفكر .

# كل شوية يقولك العياط حافظ للقران ... اول رئيس حافظ للقران ... ومصدعينا .... حافظ .. حافظ ...حافظ ... هوه يعنى كان حد سمع له ؟

ولكم فى القذافى اسوة

ولكم فى القذافى اسوة

الواحد مننا لما يقابل مشكلة اكبر من امكانياته وقدراته ومايعرفش يحلها ... يقوم يحس بالعجز والفشل وقلة الحيلة ... والاحساس ده احساس مر ..علقم ..مافيش بنى ادم فى الدنيا يقدر يستحمله ... لان البنى ادم ... اى بنى ادم من يوم مايتولد لغاية ما ربنا يخده اخد عزيز مقتدر ... وهوه ليه هدف واحد بيلف ويدور علشان يحققه ..والهدف ده انه يحافظ على صورته وكيانه قدام نفسه وقدام البشر اللى حواليه بأى وسيله وبأى طريقة ... شرعية بقى غير شرعيه ...اخلاقية غير اخلاقيه... مش مهم ...ومن اشهر الطرق للمحافظة على الكيان ...الشماعة... فلما ابنى ادم يفشل فى ادارة مكان مثلا ... تلاقية يدور على شماعة يعلق عليها خيبة امله وعجزة ... فيقولك النظام القديم هوه السبب ياضنايا ... أو يقولك الفلول ... او الاجندات ... وان منفعش دا كله .... يقولك الغطاء السياسى بتاع جبهة عبده مشتاق .

وبدال مايقف البنى ادم ويواجه نفسه ويصلح غلطه ... ويستعين باللى بيفهم ... تلاقيه يقاوح ويقاوم ويعمل فيها اسد ويفتح الجاكته مع انه فى الحقيقة وزه ... وان تمامة خطبة وشوية سييطة يصقفوا له ويأيدوه بمليونيات ومليشيات .

وده السبب فى فشل الاخوان المتكلمين فى ادارة الدوله او اللى كانت دولة ... كانوا فاكرين ان ادارة الدولة سهله زى ادارة اجتماعات مكتب الارشاد ...ولا ادارة سوبر ماركت زاد ... ولا ادارة نقابة المهندسين ..

حق الله ان الفشل والعجز فى ادارة الدوله مش بسوء نيه .... بالعكس ... دول نيتهم حلوة ( عديها علشان نوصل الفكرة ) ... نيتهم سليمة ... بس النيه لوحدها مش كفايه ... لانهم زمان قالوا ان الطريق الى جهنم مفروش بالنوايا الطيبة ... النيه لازم يكون معاها ادراك للواقع ورؤيه للمستقبل علشان تنجح فى اللى انت عايزة ... طاب مالدبة اللى شافت دبانه على راس صاحبها ... كانت نيتها طيبة لما حدفته بالطوبه وكسرت دماغة وقتلته ... هيه كانت عايزة تنش الدبانه .... النية طيبة ... بس ماكانش عندها ادراك ولا رؤية ... مافهمتش ان الطوبة حتموت الدبانة ايوه ... بس كمان حتموت صاحبها .

مش عيبا انى اقول انا غلطان ... انا حسبتها غلط ... انا فشلت ... مش عيب انى اطلب المساعدة من اللى بيفهموا مش عيب انى اشيل اللى عايز يحل مشاكل مصر بغسيل صدر النسوان .... مش عيب انى اشيل حرامى الابحاث ... مش عيب انى اعترف ان الموضوع طلع اكبر منى ومن قدراتى ... اللى انا الوحيد اللى شايفها كويسة ... مع ان كل اللى حواليه شايفينى حمار ...مع الاعتزار للحمار ... لانه يعرف قدراته وامكانياته جيدا ... عموما براحتك يامعلم .

براحتك خالص مالص ... بس خلى بالك ... ايام نكسة 67 كنا عايشين ... وايام 73 كنا عايشين ... وايام ما كان الاحتياطى النقدى صفر ... كنا برضة عايشين ...بس علشان كنا حبين البلد ... حبين تراب البلد وكنا متعودين على البساطة والقناعة... كانت التلاجة ال8 قدم الايديال  اقصى امانينا ... لكن الدنيا اتغيرت يا باشمهندس ... والموبيل التاتش بقى من اساسيات الحياه ...فعقابك لما ترجعنا للفقر تانى حيكون عقاب شديد ...وخلى بالك برضة ان عقابك مش حيكون على ايد جبهة العار اللى عينها على الكرسى ... لا خالص ... عقابك حيكون على ايد العيال سن 17 ... العيال اللى ضاع منها الامل على ايد اللى قبلك ... وجيت بجهلك وكملت عليهم ..... ولكم فى القذافى اسوة يا اولى الالباب 

اسباب تحول الفرد الى خروف (10) والاخيرة

اسباب تحول الفرد الى خروف  (10)

 والاخيرة

بيئة قبليه ... اخلاق جاهليه ... افكار نمطية ... جهل .... قمع ... حرمان ... امتهان للادمية .... انعدام قدوه ... خرس السنه ... كبت حرية  ... بطاله ... احتياج داخلى مُلح لتأكيد الذات والحصول على هويه ...صراعات نفسية بين مانريد ومانستطيع ان نصل اليه ... غربة و اغتراب واحنا فى حضن الوطن ....يأس احباط ... سخط ... عدم الاحساس بالامان النفسى ... عدم الشعور بالانتماء ... الواحدة من دول... تخرب بلد بزيها ... لان اى واحدة من اللى فاتوا دول مابتدمرش غير فى الشباب ... والشباب يعنى مستقبل .... وشباب متدمر ... يعنى ببساطة ... مافيش مستقبل . واحنا فى المحروسة مصر ... عندنا كل دول ... وفى الاخر مش عايزين الاخوان يمسكوا البلد ... ؟؟؟ ومرسى يبقى رئيس ...وبديع يبقى مرشد ... ومهندس يقولك جبنة نستو يامعفنن ... وابو اسلام عايز ينقب باسم يوسف .. وخالد يوسف يعمل افلام شكس ...مش عايزين يبقى فيه فساد وسرقة ورشوة وعمارات تقع وعبارات تغرق وقطرات تخبط فى بعضها ....مش عايز دوللى شاهين تحييى حفلات الاخوان ... ويطلع الاخوان يقولوا دى مش دوللى والاعلام الفاسد هوه اللى عايز يبوظ سمعتنا ...

كلنا فاسدون ... اباء وامهات .... ابناء وبنات ... سياسيون وقادة ... دعاة  وفاسقون ... كلنا فاسدون ... جهله ... زباله .... كلنا خرفان... مش بس الاخوان كلنا مانستاهلش مصر ولا نستاهل نعيش على ترابها . كلنا عايزين تأهيل علمى ونفسى وعقلى .... كلنا عايزين نستحمى علشان ننضف ...

 واخيرا ... حنعيش يعنى حنعيش ... مش تفاؤل ولا علشان العيشة حلوه لاسمح الله... لا خالص ....

 حنعيش يعنى حنعيش علشان ننكد على كل خروف عيشته وننغص عليه ايامه ... ويانعيش عيشة فل ... يا النكد يبقى على الكل .

شكرا لحسن متابعتكم ... وشكر خاص لتعليقاتكم ..... ياساتر ياساتر ؟ 

اسباب تحول الفرد الى خروف (9)

اسباب تحول الفرد الى خروف (9)

النهاردة حنتكلم عن المصنع  اللى بيتم فيه تصنيع الخرفان ... مصنع الخرفان فيه كذا خط انتاج .... واحد بيسلم واحد لغاية مايطلع  الخروف منتج نهائى مغلف بتاريخ صلاحية .

اول خط انتاج هو الاب والام وبعدين المدرسة والمدرس ... وبعدين الشلة والصحاب ... دا غير انه فيه خطوط انتاج مساعدة ... زى الاقارب والجيران والفضائيات والمجلات .... دا غير خطوط الانتاج المستحدثة ... هيه صغيرة بس بتلسع وقصدى طبعا الفيس و التويتر .

الواحد فينا اول ما بيتولد بيبقى زى العجينة اللى بتعدى على سير المكنه ... اللى بتبططه وتفرده وتشكله وتنقشه وفى الاخر ترش على وشه سكر البودرة ...والتشكيل والعجن والنقش بيتم عن طريق التنشئة الاجتماعية بعدة طرق  ... اولها التعليم المباشر وده عادة مابيتم عن طريق الام والاب ... باسلوب افعل ولا تفعل ... والله ان فعلت تبقى حلو ماما تحبك وان مافعلتش تبقى وحش وبابا يزعل منك ... يعنى عندك مثلا ... ماتلعبش ما العيال اللى تحت علشان دول فقرا واحنا اغنيا  ... ماتلعبش مع عيال عمتك علشان عمتك مبتحبناش ... اسمع كلام امك ... ماتسمعش كلام ابوك ... كدة مطلقه ... حتى ولو كلام ابوك كان صح ... وكلام امك كله غلط ... تحيز وتعالى ورفض للاخر ...

وفيه طريقة تانية وهيه التعلم بالملاحظة ...ودى بتبقى عن طريق ان الواد بيشوف اللى حواليه بيعملوا  ايه ويعمل زيهم ... حتى من غير ما يفكر اذا كان اللى بيعملوه حلو ولا وحش ...بيعمل زيهم علشان يبقى زيهم ويرضوا عنه ويرضوا عنهم ... يعنى لو بيكذبوا يكذب ... لو بيبرروا يبرر ... لو بيسرقوا اصوات ويزوروا ... يسرق ابحاث اقتصاديه وينشر .

الطريقة التالته هيه طريقة التوحد .... بيتوحد مع القيادات اللى حواليه .. والاستيلات اللى بيشوفها فى الاعلام والافلام ..فاتلاقيه يلبس نفس اللبس ... يتكلم بنفس الاسلوب ويختار نفس المفردات ... يكدب نفس الكدب ... يهزر نفس الهزار .. ولنا فى ابن الامريكية وولده صابر مثل حى ..   عموما التوحد ده موضوع كبير عايز بوست لوحده ...

بيجى بعد التنشئة المرحلة الاهم ... وهى المدرسة والمدرس والمناهج ..وده اللى  بيتسمى ...مثلث التخريب  ..لان المدرسة بتختها واودة الموسيقى الملغية والحوش اللى مبنى فيه المعمل اللى مابيتفتحش .. بتحول الابنى ادمين الى ام بى ثرى ... تملى ذاكرته وتسيبه يشتغل .... والمدرس اللى يا اما نايم علشان يفوق للدروس باليل فى المركز يا اما بيشرب سجاير مع الولاد فتنهار القدوة ...اما المناهج  وما ادراك ما المناهج اللى بتتغير حسب الرئيس وخصوصا فى مادة الدراسات اللى كان اسمها تاريخ على ايامنا ... ولنا فى حرب اكتوبر عبرة لاولى الالباب .... مره .. انور السادات هوة القائد والمخطط وبطل الحرب والسلام .... ولما مات السادات اتحولت حرب اكتوبر من حرب شاملة فيها مدافع وصواريخ ودفاع جوى وتعينات وذخيرة وعبور .... انكمشت ... اتسخطت وبقت مش اكتر من ضربة جوية فى عهد حسنى مبارك ... وبقدرة قادر... بعد تنحى حسنى  ... حتلاقوا حرب اكتوبر كانت فى وصايا حسن البنا وانتصرنا بدعاء بديع واللى عدى القناة كانت الفرقة 95 اخوان .. مناهج غبية توجة الى التعصب ورفض الاخر وقولبه الفكر ...وتنميط العقل ......  واخيرا بتلاقى الاعلام ودوره فى انتاج الخرفان ...ومع الاعلام حدث ولا حرج ... ابو اسلام بيكفر ... وعمرو اديب بيذندق ... وعبد الله بدر بيشلح... ولميس بتشرشح ...وطبعا ماننساش النجم الاعلامى ... نجم قناة 25 ... خميس ... وهوه بيهلفط .

ومع كل الهم اللى احنا فيه والخراب اللى بينخر فى عضم البلد ...  تلاقى كل اللى شاغل المسعورة ... ان جبهة العار مش راضية تشيل الغطاء السياسى من على الثوار او البلطجيه او الصبية اللى فى التحرير وناسيه ان جبهة العار لو شالت الغطا ...  حيجيلهم برد ويعطسوا فى وشنا ....

فاضل حلقة ونخلص البحث ... يا مسهل ... حاكم انا ذهقت من اللى رافضين يعترفوا ان الشمش فى كبد السماء ... مش لحاجة ... الا انهم مكسلين يرفعوا راسهم ويبصوا فى السما .

اسباب تحول لفرد الى خروف (8)

اسباب تحول لفرد الى خروف (8)

لما جماعة تلاقى نفسها محرومة من الهنا والبغدده والفخفخه والعز واكل الوز اللى عند الجماعة التانية اللى راكبه على الحكم ..... يحصل ايه ؟ ...اقولك ياسيدى البية : الجماعة المحرومة تحس بالغيرة والحسد والغل ... خصوصا لما جماعة العز واكل لوز تكون مزنقه عليهم ... يعنى حظراهم ... حبساهم .... فى السجون حطاهم .... فطبيعى جدا انك تلاقى الجماعة المحرومة تبدأ تطلع غلها وغيرتها وحسدها على جماعة اكلى الوز على شكل عنف وارهاب وحرب علنيه او خفيه ... لكن فيه حاجة مهمة ... لما الجماعة المحرومة من العز تلاقى نفسها اضعف من جماعة اكلى الوز... وان جماعة اكلى الوز مالكة القوة والمكانه والسيطرة وعندها من العيال اتنين .. عبد الرحمن والعادلى ... تبدأ ساعتها المحرومة فى استخدام اسلوب تانى خالص غير العنف والارهاب اللى بتسيبة لجماعة محرومة تانيه ... هيه مش تانيه قوى يعنى ... فتلجأ الى اسلوب مايسمى بالاستعطاف .. او المسكنه ... او السهوكة .. او السهننه ... وتبدا السير فى طريق اتمسكن لما تتمكن ....

ولان الايام دول ... ومافيش حاجة بتفضل على حالها ... ويوم ليك ويوم عليك ... وماطار طير وارتفع اللى كما طار وقع ... وكدهوه ... ولان ربنا قال وتلك الايام نداولها بين الناس ... فخلاص بقى ... خلص الكلام ... فلما تبدا جماعة اكلى الوز فى الضعف او الانهيار تبعا للسنه الكونيه (بضم السين ) اللى قال عليها رب العالمين  ...فيجى الدور و تركب الجماعة المحرومة وتتمكن وتلزق .... وعادييكى ياختى لما المحرومة تتمكن ... يالهوى يالهوى.. يالهوى ...تركب وتدلدل .. وتتأمر .. وتشمر وتوريك المستخبى ... وتبصلك من فوق لتحت وتمصمص شفايفها ... وتحسسك فى الرايحة والجاية انك ولا حاجة ... ويقولولك : انتوا اصلا اغبيا ... مش عارفين مصلحتكوا ... انتوا مش فاهمين حاجة ولا عارفين حاجة .... احنا اللى بنرصد ولنا احباء فى كل مكان ... احنا اللى عارفين ان فيه حد برة بيتكلم مع حد جوه ... احنا اللى عندنا كاميرات بتصور فى كل حته حتى الحارة المزنوقة وعند المواسير .....

وتبدأ الجماعة المحرومه او اللى كانت محرومة  فى التوحد مع جماعة اكلى الوز سابقا ... وتتبدل اللهجة المستكينة المستعطفه ... ويتغير الاسلوب المسهوك السهنى ويبدأ يقولك بكل بجاحة : مدام انت مش فاهم اللى انا فاهمه ولا عارف اللى انا عارفه ... ومدام انت مش عايز تشوف انجازاتى اللى زى الشمس وبتنكرها ياكداب ... يبقى انت اهبل وعبيط وحقى بقى انى استغلك واتسلط عليك واديك بالجزمة .....

وتبدأ الجماعة المحرومة او اللى كانت محرومة ... تغرس فى نفوس خرفانها ... الشعور بالتفوق والتميز ... وتقنعهم انهم فصيل الله المختار ... وان دمائهم زرقاء ... وان كل اللى بياخدوه من مكاسب ومزايا وتوكيلات ومناصب هى حق مكتسب لايملكون رفاهيه التنازل عنه .... وان الناس التانيه اتخلقوا بس علشان يخدموكوا ويخدموا مصالحكوا ... ويفرحوا قوى يوم ماينالوا رضاكوا .

وتفضل الحكايه هيه هيه .. ويفضل هما هما ... ونفضل احنا احنا  حشيش الارض لا ريح تهزنا ولا اعصار يكسرنا .. بس دايما فى ضريبة بتندفع ...... والضريبة اللى احنا بندفعها .. احنا حشيش الارض..... هيه انه بينداس علينا بالجزم ... عادى يعنى ... خدنا على كدة  .

الى اللقاء فى الحلقة القادمه .

اسباب تحول الفرد الى خروف (7)

اسباب تحول الفرد الى خروف (7)

النهاردة حنشوف الجماعة بتفكر ازاى ... وقصدى بالجماعة يا جماعة ... اى جماعة وليس جماعة الاخوان .... دول ليهم اسم تانى ... نرجع تانى ... الجماعة بتفكر ... يعنى ليها عقل ؟ ... ايوة وعقل الجماعة غير عقل الافراد اللى جواها ... لان الافراد لما بيقررورا يدخلو الجماعة او بمعنى صح لما بيتقرر لهم انهم يدخلوا الجماعة ... تلاقيهم وهما داخلين بيسيبوا عقولهم على الباب ... بيدخلوا حافيين يعنى .... نضافة .. نظام ... بيعملوا زى المسلسلات التركى ... القصد .. نبدأ بقى ...

لكل جماعة مصالحها واهدافها وسبابيبها " جمع سبوبه " واللى طبعا واكيد بتتعارض مع مصالح واهداف وسبابيب الجماعة المقابلة ...يعنى لو جماعة عندها هدف انها توصل للكرسى ... وفى نفس الوقت جماعة تانية برضة عايزة توصل لنفس الكرسى ... قوم ايه ... فكل جماعة من دول حتشوف الجماعة التانيه على انها مصدر قوى للتهديد بضياع الهدف اللى هوه الكرسى فى حالتنا ...قوم يحصل ايه ؟

 اولا : جوه الجماعة نفسها .... بيزيد التماسك والولاء والانتماء ويشدوا على ايد بعض ويبقوا ايد واحدة ....

ثانيا : تلاقى العداوه والبغضاء والحقد والغل بيزيد بمعدلات مطرده تجاه الجماعة المقابلة .

وده يفسر لك ليه المحلوله متماسكة وايد واحدة ... وتلاقيهم بيقولوا نفس الكلام وبنفس المفردات مهما غيرت المتحدث او غيرت القناة ...تلاقيهم بيبرروا لبعض هفواتهم وهلفطتهم وتهييسهم "ابحث عن خميس "... وكمان بيفسر حملات التشويه المنظمه والمتعمدة والممنهجة ورفع القضايا وتزييف الحقائق لكل رموز الجماعات المقابلة ...حديك امثله: سبعين مليار ...ابو حمالات ... واحد خمنا ...ارض الطياريين ...دستور تهانى .... الخ .

وبيفسر كمان ليه انصاف السياسيين ومدعى الثقافة ونخب العار حطوا ايديهم فى ايدين بعض علشان يقفوا فى وش المحلولة علشان ياخدوا الكرسى ...

افتكاسة شخصية :

جبهة الانقاذ قبل مايمسكوا ايد بعض ... حطوا ايديهم فى برميل زيت تموين ... علشان كدة مش حيقدروا يقفوا قدام المحلوله ولا ياخدوا منها الكرسى ... ولو بعون الله المحلوله اتحلت وراحت فى داهيه .... وده طبعا حيبقى عن طريق بقايا شعب مصر ... او عن طريق الجيش المصرى الوطنى"عديها ... عديها والنبى " ... او عن طريق صاعقة قادر رب كريم عالم منتقم جبار  ينزلها عليهم من السما ... حتلاقى الجبهة فرفطت زى الحلاوة السمسمية ... واتحولت لجبهات صغننة ... وده طبعا لان الموضوع مافيهوش مصر ... لانه .. راحت عليكى يامصر ... والدليل ان مصر بتغرق قدامنا واحنا ........ ولا اى اندهاش ..

والى اللقاء فى الحلقة القادمة 

اسباب تحول الفرد الى خروف (6)

اسباب تحول الفرد الى خروف (6)

السبب التامن هوه السن ... فكل ما الواد كان صغير فى السن ... كل ماكانت فرصة تحوله الى خروف بتبقى اكبر  ....ويمكن دة بيرجع لان الانسان كل ماكبر كل ما كبرت معاه المعرفه والعلاقات والادراكات فيعرف عدوه من حبيبه فبيبقى صعب انه يتحول الى خروف ... وعلشان كدة تلاقى التيوس الكبيرة بتسرح تلم العيال سن 15-17 سنه ... لان الواد فى السن دى بيبقى عندة ازمة هويه ...طول الوقت بيسأل انا مين ؟ انا ليه ؟ انا ايه؟ ومين يناسبنى اكتر ... الليبراليه  ولا الشتراكية ولا المهلبيه ... وفى وسط ليلة  البحث عن الذات والدوخة ... يجى البابا فى البيت يعامله على انه عيل صغير مابيفهمش حاجة ....وعلى الرايحة والجاية الماما بتقولة: يافاشل ... يافاشل ... ساعتها الواد مابيصدق يلاقى حد يديله قيمته ويحسسه باهميته ... ويوجهه لاختيار ايديولوجيه وفكر يبنى بيه شخصيته اللى حيعيش بيها بقيت عمره ...

السبب التاسع وهوه المنطقة الجغرافية اللى عايش فيها الفرد ... يعنى عايش فى الارياف ولا فى المدينة ؟ عموما تلاقى الفلاحين اكثر تعصبا وانضماما للجماعة ...عن اهل البندر ... بدليل ان الجماعة ... اى جماعة .. لما بتحب تعمل منظر ... تقوم تبعت اسطول اتوبيسات يحمل الخرفان من الاقاليم كنوع من المدد لاهل القاهرة ...ودة لان اللمة كلها فى الاقاليم وفى ارياف الاقاليم كمان ... لكن القاهريين  او بتوع البندرعموما ناس متفتحة مابتركبش اتوبيسات حد ... عموما الموضوع ده فيه كلام كتير ... لان الفلاحين مبقوش فلاحين ... بقى عندهم دش (بكسر الدال وضمها )عندهم نت ... بنوالفيلا على الارض الزراعية ... وباعوا الجاموسة وجابوا الدبابة ... فماعدتش الدين الملجأ الوحيد للأحساس بالامان والقيمة ... وان كان لسه فيه شوية ملامح باهته من الدين والعرف والتقاليد والاخلاق فى طريقها الى الزوال ان شاء الله.

السبب العاشر والاخير وهوه كثرة التنقل والسفر والترحال ... فمع السفر الكتير بيقل التعصب لان الفرد من كتر مابيسافر بيشوف ناس وحضارات وايدولوجيات وافكار بتوسع مداركة ... بس خلى بالك يامعلم مش كل اللى بيسافر بيبقى متفتح ... لان من الاعراض الجانبية للغربة ... تحطيم الشخصية  خصوصا لما يكون البنى ادم طالع على شغلانه مش هيه ... لان مافيش شغلانه فى بلدة لا هيه ولا مش هيه  ... ولا يكون ربنا واعدة بكفيل واطى ابن واطى  يبيع ويشترى فيه ... ساعتها بتعكس وبتبقى الفرصة  اكبر لتحول هؤلاء الى خرفان ... لانه هنا بقى لا بيبقى شايف لا حضارة ولا ايديولوجيا ولا افكار ولا بطيخ ... مابيبقاش شايف غير الذل والمهانه اللى بيبقى عايز يتخلص منها قدام نفسه قبل قدام الناس... خصوصا ان سكة التنطيط على خلق الله الغلابة باللبس والفلوس والعربية التربتيك لما يرجع اجازة ... مابتشفيش غليل احساس الذل ولا بتبرد نار احساس الوحده والغربة .

اوعو تفتكروا ان كده خلصت .... لسه بااااااادرى.

والى اللقاء فى الحلقة القادمة . 

اسباب تحول الفرد الى خروف (5)

اسباب تحول الفرد الى خروف (5)

السبب الخامس وهوه قلة الذكاء والمعرفة والخبرات ... وكل ماقلة الحاجات دى فى البنى ادم زاد التعصب والبحث عن جماعة  والدفاع المستميت عنها .. وماتقوليش دول معهم دكتوراه ... لان الدكتوراه مش دليل على الذكاء والمعرفة ... وانما هى دليل على الاصرار والمثابرة وقوة الاحتمال للدكتور الواطى اللى بيشرف على الرساله وعلى مشاويرة العائلية ومجايب الخضار ... ولو مش مصدقنى اسأل اى حد ... اى حد.... خد دكتوراه قريب ... مع الوضع فى الاعتبار  ان الانسان ساعات كتيير... بينكر حاجات كتييير ....حفاظا على البرستيج خصوصا  لو بيتقاله يادكتور .

السبب السادس وهوه المكانه الاجتماعية والمستوى الاقتصادى ... فكل ما الفلوس قلت.... وشغل بابا مش قد كدة .. وبهرب دايما من سؤال انت ساكن فين . واربع سنين الكليه بنفس القميص والبنطلون ... وبننقل المحاضرات علشان ماعييش تمن التصوير ... تلاقى على طول النداء المشهور : اين جماعتى ؟

السبب السابع وهوه التوجه الدينى .... وهنا بييجى سؤال مهم طحن ... او اخرحاجة ... او حشد ... السؤال هو: لما الاديان السماوية بتشجعنا على التسامح وقبول الاخر وحسن الخلق والدين المعامله وكدهوه ...امال ليه الجماعات بتكره بعض . وبتعادى اللى مش منها ... وبتشوه اللى قصادها ؟؟؟؟؟ سؤال منطقى جدا ولكنه سؤال غير واقعى بالمرة .... والاجابة على السؤال دة واللى احنا بنستعبط علشان مانقولهاش هيه ان فيه نوعين من التوجة الدينى ...

التوجه الدينى الجوهرى : وده بيكون الشخص متعمق فى الدين والعقيده .. لوجه الله ولنصرة دين الله ... وده تلاقيه بيعمل ليل نهار فى خدمة الدين مش بيسخر الدين لخدمته .

النوع التانى هوه التوجه الدينى الظاهرى : وده اللى بيشوف الدين عبارة عن نمط اوشكل او اكسسوار لخدمة الذات وحمايتها وتحقيق المنافع الشخصية من ورائها وتحقيق المكانة والسلطة والشهرة وعلشان كدة مابيشوفش من الدين غير مجموعة من المظاهر ... يعنى جلابية قصيرة ... دقن طويلة ... زبيبة صلاه وسبحة ... يعوج لسانه ويقول كلمات باللغة العربية من ايام الشعر الجاهلى .......

ايه يا اخوانا انا بقالى خمس حلقات بأجمع فى ابحاث وباكتب على الكمبيوتر ولا حد معبر ... الا تشكرووووووون .....

علشان محدش يفهمنى غلط ... تشكرووون اللى فاتت دى مش بتاعة انشراح ... حاكم باسم يوسف ده بوظ عقول البشر .. تشكرون اللى قصدى عليها .. ثانك يو ... ميرسيى ... كتر خيرك ... انشالله  حتى تقولوا زى الاخوان : جزاك الله خيرا يا اخى  

ياساتر ياساتر ....... والى اللقاء فى الحلقة القادمة .

اسباب تحول الفرد الى خروف (4)

اسباب تحول الفرد الى خروف (4)

تانى عامل من عوامل التحول الى خروف هوه انخفاض الامان النفسى ... وده معناه ان الوحد من دول دايما حاسس بتهديد وخطر ... وعلطول قلقان ونفسة يحس بالامان ... وهذا الفرد عاده ما يكون متربى فى اسرة الاب والام فيها على طول بيتعاركوا ...فدايما تلاقية خايف لاحسن ابوه يطلق امه او امه تسيب البيت وتهج ...فيتشرد ...كمان تلاقيها فى اللى عايش فى العشوائيات ... واللى مابيبقاش فيها خصوصية ... يعنى كله شايف كله وكله عارف عن كله ... وتلاقى الجار يقف فى البلكونة ويمد ايدة يطفى التليفزيون اللى فى صاله جاره ... وكمان تلاقيها فى اللى عايشين فى عشش صفيح والحمام مشترك فى اخر الحارة المزنوقة ... اوتلاقيها فى اللى بيشتغل من غير عقد اوماضى على استمارة سته قبل مايستلم الشغل ... النوع ده بيدور على جماعة والجماعة هيه كمان بتدور علية ... هوه عايز يدخل الجماعة ويحس بالدفا والامان ... والجماعة يتدفيه بالزيت والسكر والقيمة والعزوة وحلم الشهادة ..فلما يلاقى الامان جوة الجماعة ويشوف ان التهديد برة الجماعة ... يبقى ليه مايدافعش عن الجماعة ... والدفاع عنها هنا بيبقى دفاع عن امنه وامانه .

تالت عامل ... انه يكون ذو شخصية تسلطية ... بالبلدى دماغه جزمة قديمة ... تلاقيه دايما يسمع كلام اللى اقوى منه ... ويعاقب ويعتدى على الاضعف منه ... ماشى على الصراط المستقيم .. مابيغلطش ... بيعمل حساب الصغيرة قبل الكبيرة ...بيؤمن بالخرافات والاعمال والسحر ... المواضيع عنده يا ابيض يا اسود ... مافيش وسط مافيش مرونه ...والنوع دة بيبقى كدة عادة لظروف تربيته فتلاقى الاب ذو سلطة ... او الام مابتعرفش تسمع غير كلمة حاضر ... وفى الجماعة بيلاقى نفسه بيسمع كلام الكبير وبيتمريس على الصغير.

رابع عامل بقى انه يكون عنده مرض عصبى او عقلى زى البارانويا كده وده بتلاقيه دايما عايش فى اوهام وشكوك ضد الغير ... زى الفلول عايزة تعيد انتاج النظام القديم ... او المجلس العسكرى عايز ينط على الحكم ... اوتهانى حتفرش لنا الملاية ... وعلطول خايف لا يرجع السجن ... وكمان تلاقيه  حاسس بالعجز ...ودايما كلامة كتير ... مابيفصلش وعنده استعداد يتكلم طول اليوم .... على طول متشائم وده اللى لما بتشوفه بتقوله فى سرك  يا كئيب يابن الكئيبة .... طبعا انا عذرك لانك ماتعرفش انه مريض ومحتاج علاج ... وحتى لو عارف انه مريض حقك تتخنق من اهله لو طلع عبطة عليك .

اسباب تحول الفرد الى خروف (3)

اسباب تحول الفرد الى خروف (3)

الناس مختلفة عضويا ... يعنى فية الطويل والقصير ... الطخين والرفيع .. الابيض والاسمر .. تلاقى مثلا الطخين عادة عنده سكر ... والطويل عنده غضروف ...لكن مش معنى كدة ان كل طخين لازم يبقى عنده سكر او كل طويل بيجيله غضروف ... ولامعنى كدة برضة... ان كل رفيع مايجيلوش سكر ولا كل قصير بعيد  عن عمليه الغضروف ...لكن الاختلافات دى بتبقى عوامل مساعدة ... وزى الناس ماهى مختلفة عضويا ... برضه مختلفة نفسيا ...فتلاقى فيه ناس مهيئة انها تتحول لخرفان نتيجة عوامل نفسية معينة ...وبأكد تانى ... ممكن العوامل النفسية دى تكون موجودة بس الفرد بيبقى عادى يعنى ... بيفكر ويقول رايه ومايبوسش ايد حد وميبقاش متعصب ولا ينزل يأيد من غير مايعرف هوه بيأيد ايه ....واول عامل من العوامل النفسية اللى بتحول الفرد الى خروف .... الاحباط .

والاحباط بالبلدى كدة حالة من النكد والهم بتصيب البنى ادم لما يعوز حاجة ومايعرفش ياخدها ...او يحلم بهدف ومايقدرش يوصل له ...والاحباط ده حاله بتفضل ملازمانا من يوم ما بنتولد لغاية مابنموت ...لان من صفات الدنيا الكمد والتعب والعشم والبمب والندالة ...واول احباط بيقابلنا ... الفطام ... بتبقى عايز ترضع ويقولك لا ... خلاص يا جميل... اعتمد على نفسك .... وشوية وتقول لماما نامى جنبى ... تقولك لأ ... انا حنام جنب بابا علشان تعبان قوى ومحدش يعرف يريحوا غيرى .... وتكبر وتبقى عايز تشترى بنطلون جينز جديد وبابا مايرضاش وطبعا مابتقدرش تنتقم و تمنع ماما انها تنام جنبه ... لان ماما اصلا بتبيعك ....وعدى بقى على البنت الى بتحبها وبتموت فيها وعندك استعداد تعادى الدنيا كلها علشانها وطبعا ... وعادى ... انه ياخدها منك ابن الغنية ...علشان معاه فلوس ... فتقوم مكسر مكنه غزل البنات اللى كنت واقف بيها على ناصية الشارع علشان تلم مهر الامورة ... دا غير ان حلم المعيد اللى راح علشان حظك الدكر ان ابن الاستاذ الدكتور معاك فى الدفعة ....وغيرة وغيرة ...واحباط ورا احباط ... وغل ورا غل ... ورغم ان ده عادى فى الدنيا وده ناموس كونى ... الا ان فيه ناس بتقدر تتكيف وتعييش حياتها ... وتتصالح مع نفسها ... وايه يعنى لما ماما تظبّط بابا ... اتفرج انا على سبيس تون  وروق نفسى ...وياسيدى بلاها جينز جديد ... ارفى القديم او اصبغة ... ولو بايظ خالص اشرطة من عند الركب واقول موضة ... وكله ماشى ... اما عن الامورة ... فطظ ... هيه اللى خسرانه وبكرة اخد ست ستها .... دى البنات على قفا مين يشيل ....ثم جامعة ايه وهباب ايه ... ماهو فى الاخر موظف حكومة بيعمل مظاهرات علشان الكادر ... هوه  فيه احسن من العمل الحر .... وكله ماشى.. وكله بيعدى ...المهم مايعلمش ... والشطارة انك تكون الاول فى فئتك وماتبصش على فئة غيرك ... دى حكمة ربنا ... الناس طبقات ...

لكن فيه ناس بقى ... نار على زيت حار .... العملية بتكبر معاها وتسخن نفسها ... ويدوها اشمعنى ويابخت ...داغير حظنا وحش وياسلام لوكنا مكانه ... وحيجى اليوم اللى حناخد حقى منك يادنيا ... وكتاب حياتى ياعين كله جراح ...والنوعيه دى اللى ماعندهاش القدرة على التكيف والرضا ... اسهل ناس تتحول الى خرفان ... لان الجماعة ... اى جماعة علشان ماتفهمنيش صح ....بتلقطه .... ومذكراتك ببلاش يامعلم ... جينزاتك من قسم الملابس فى زاد ....علينا ولا يهمك ... واختك فى الله مسئوله معاك على اعداد الندوه وكله بما يرضى الله...ثم سهله خالص ... مش   لازم تتعين ... حضر من برة وخد الدكتوراة ومتنعاش هم الفلوس....احساس بالقيمة واشباع احتياجات والعود اخضر والامال كبيرة .... ماروحش معاهم  ليه ..؟ مادافعش عنهم ليه ..؟ ما اطلعش الغل والاحباط من اللى بيعارضهم ليه ؟ ماهم اللى بيعارضوهم هما اللى احبطونى ونكدوا عليه عشتى ... لكن جماعتى ... سونه اجدع ناس

والى اللقاء فى الحلقة القادمة ..... على فكرة ماتزهقوش الموضوع طويل ... طول المسلسلات التركى.

اسباب تحول االفرد الى خروف (2) مفهوم التعصب

اسباب تحول االفرد الى خروف (2)

مفهوم التعصب

غالبا ماتنتهى اى مناقشة بين اتنين بخناقة ...واحيانا شتيمة ... وساعات ضرب .... وغالبا خصام وعداوة .... لو دققت شوية حتلاقى ان السبب فى معظم الاحيان ناتج عن اختلاف المفهوم  عن الموضوع او الفكرة او الايديولوجية او المصطلح اللى بيتناقشوا فيه  ....ومثال حى احنا عايشينة بقالنا سنتين وهوه مصطلح الليبرالية ....فتلاقى واحد شايف مصطلح الليبرالية انه حرية مسؤلة وتقدم وابداع ...وواحد شايفة ان امك تقلع الحجاب والناس تمشى بلابيص فى الشارع...وواحد شايفة حقوق مواطنة وعدم تفرقة بين عرق او جنس او دين ...واللى شايفة انفلات واللى شايفة كفر  واللى شايفة حظاظة وشعر سيريالى الفورمة .....فلما يقعد خروف ليبرالى مع خروف مش ليبرالى يتناقشوافى مستقبل البلد تلاقيهم ينطحوا فى بعض ويقطعوا فى  بعض وتبقى ليلة يا عمدة ... الليبرالى ياخد حتة ... واللى مش ليبرالى ياخد حتة ...والشعب فتفوته ....والباقى للأخوان ....وطبعا ماننساش نقول للاعلامى اللى قاعد بينهم : خد مصمص دى  ... قوم علشان نفهم بعض لازم نتفق على تعريف لمفهوم التعصب .

فى اللغة العربية التعصب مصدر مشتق من عصب الشىء عصبا ...يعنى طواة ولواة وشدة ..وفى اللغة العاميه يستخدم لفظ العصبة (اسألوا عليها الجدة ) وهى لف راس المرأة بالمنديل لمنع الشعر من الانسدال ...اذن فالتعصب هو :التصاق جامد بالاصل ...سواء كان هذا الاصل ايديولوجى (ليبرالى – اشتراكى ) او دينى (سلفى – صوفى )او انتهازى ( اخوانجى ) او غير ذلك زى العيلة ... القبيلة ... النسب ... وبجانب هذا الالتصاق يتكون اعتقاد بالقيمة المطلقة يعنى احنا احسن ناس تفكر .. احنا اللى نملك الحقيقة ... احنا اللى عارفين مصلحتكوا ...احنا اللى عندنا الحل ...بالاضافة الى ذلك ان اللى مش معانا يبقى ضدنا وبيكرهنا ومش عايز مصلحة البلد ولازم يتعاقب ... يعنى يترفع علية قضايا ... يطلع من الدستورية ... نعزل امه سياسيا .

اجمالا فالتعصب هو : اتجاه يهيىء الفرد لتكوين احكام مسبقة موجبة او سالبة بصدد جماعات او اشياء او مفاهيم بدون تقييم موضوعى ...كما يتميز التعصب بسلوك تميزى (ضد او مع )لافراد هذة الجماعة حيث يقوم هذا السلوك على اساس عضوية الجماعة وليس على مميزات او عيوب افرادها .

بمعنى يطلع واحد يقولك جبنه نستو يا معفنين ... ده سلوك ضد جماعة لمجرد انهم مش جماعته ... او ليهم فكر مغاير ... يطلع مثلا يقولك ياشراطيط يا انجاس "ضد" ..... يعمل اعتصام ومظاهرات تأييد لقرارات حتى قبل مايعرف ايه هية القرارات "مع " .

عموما دىمقدمة مختصرة جدا عن مفهوه التعصب والمتعصبين المعروفين اعلاميا بالخرفان ....على فكرة ... كلنا خرفان بس بدرجات ... يعنى انا مثلا خروف صغير ... تقدر تقول اوزى ... بافرح واهيص لما الاهلى يغلب حتى لو متأكد ان الجون اللى جابه اوفسايد ... علطول باشتم فى الاخوان حتى لو .... لو .... مش لاقى حاجة حلوة بيعملوها .... بدافع دايما عن شفيق حتى لو غلط .... بس الفرق انى ماليش جماعة منتمى ليها وبدافع عنها ... لان انتمائى وحبى لمصر الله يرحمها وشعب مصر اللى باتمناله ان ربنا يشفية ويعافية .... ويفهم

اسباب تحول الفرد الى خروف (1) "دراسات فى اسباب التعصب "

اسباب تحول الفرد الى خروف (1)

"دراسات فى اسباب التعصب "

كتير مننا بيضرب كف على كف ويفتح بقة ويرفع حواجبة من الاندهاش .... وطبع الاندهاش اللى بقصده مش بيكون من فريسكا ولا حتى من زوزوا اللى راحت عليها ...الاندهاش اللى اقصدة بيكون من تصريحات الخرفان وردود افعالهم وتصرفاتهم المثيرة للجدل ...واللى بتكون غريبة ومش طبيعية وضد االمنطق وبدائيات التفكير السليم ....والاغرب بقى انك تلاقى الخرفان مقتنعيين بكل اللى بيقولوه ...ومفكرين انهم بيقولوا الصدق وانهم فاهمين اخر حاجة فى الدنيا والدين ولا حسن البصرى مؤلف كتاب ادب الدنيا والدين ...على فكرة انصح بقراءة هذا الكتاب وهوه منشور ب 3 جنية ... فى مكتبة الاسرة بتاعة سوزان مرات المخلوع ... ما احنا دايما كدة لما بنكرة حد بنطلعة زباله فى كل حاجة حتى لو كان عمل حاجات حلوة ... مابنعترفش انا احنا بنى ادمين وخطائين وخير الخطائين المعترفين بخطأهم ... دا طبعا ما عدا الخرفان اللى مابيغلطوش لانهم زى مانتوا عارفين مؤيدين من السماء  .... القصد علشان ماطولش عليكوا :دورت وبحثت عن ليه الخرفان بيعملوا كدة ؟.. وليه من اصله فيه ناس بتتحول لخرفان وناس لأ ؟ ..وياترى فيه انواع تانية غير خرفان الجماعة وخرفان حازق ؟ ....الاجابة على الاسئلة دى حتكون فى حلقات ... والكلام اللى حقوله مش من بنات افكارى .... ولا بلاش بنات دى لان البنات اصلا حرام ... الكلام اللى حقوله من دراسات اجتماعية ونفسية عالمية ومصرية وعربية ... بس الحكاية انى حقدمها  باسلوب سهل بعيد عن مصطلحات علم النفس والاجتماع المكلكعة ... وكمان باسلوب لغوى عصرى يعنى مش لجلج وابلج وقيد انملة والحاجات دى ..... عموما الموضوع شيق خصوصا انى بعد ماخلصت عذرت الخرفان وعرفت انهم مش هما بس اللى غلطانين ... انا وانت والمجتمع المدنى والحكومات من ايام فاروق والهجانه ومحمد ابو سويلم فى فيلم الارض وابو العلا فى فيلم الزوجة التانية ...مرورا بعبد الناصر والسادات وحسنى ... كلنا غلطانين كلنا ساعدنا فى تربية قرون الخرفان لغاية ماكبرت ....وجة اليوم اللى تنطحنا كلنا ....وعلى رأى احمد ذكى  فى فيلم ضد الحكومة :.... كلنا فاسدون .... كلنا فاسدون .... كلنا فاسدون ....

والى اللقاء فى الحلقة القادمة