لباس بفتة
وانا بتفرج على التليفزيون وقعت على برنامج بيناقش قضايا الشباب ومشاكلهم ... وهاتك يانقاش قصدى ياجدال اللى يقولك الدش واللى يقولك المدرسة واللى يقولك التعليم واللى يقولك نانسى عجرم ...المهم الموضوع سايح ومحدش عارف هوة الموضوع اللى بيتكلموا فية كان اية بالضبط ..قولت ياواد بلا.. وجع دماغ ورحت قافل التليفزيون .. ورحت أعمل فنجان قهوة .. يخفف شوية من الصداع اللى جانى من البرنامج .... يادوب خلصت فنجان القهوة ولقيت جرس الباب بيضرب ..كان واحد صاحبى... داخل علية زهقان وبينفخ ..قولت له مالك يابنى .. قالى بقولك اية انا قرفان وزهقان ومش عايز اتكلم فى مواضيع انا جاى افك معاك شوية.. وابعد عن البيت والقرف والواد ابن الكلب ابنى الكبير ....الواد ابن الكلب دة واد زى الفل فى اولى حقوق ...حافظ نص القران ملتزم فى دراستة ... ورياضى كمان بيلعب رأس حربة .. واد زى العسل لو كمل حيبقى ابو تريكة ..فسألتة باستغراب ابنك الكبير؟! دا واد كويس ؟... كويس اية دا ابن كلب..دا مطلع عينى.... دا انا مش مخلية عايز حاجة... كل اللى عايزة بأديهوله ..وبادية كورسات بالشئ الفلانى ...ورغم كدة بقالة فترة لا بيذاكر وبيعاند معايا ويرد الكلمة بالكلمة ...أكنى واحد صاحبة مش ابوة اللى مخلفة وبيصرف علية ..سألتة واية علاقتة بأمة قالى كانت كويسة قوى .. كان بيقعد معاها ويحكى لها كل حاجة بتحصل لة... ويحكى لها كمان اسرارة ...قولت :جميل.... قالى: لأمش جميل فجأة مبقاش يتكلم معاها وبرضة بدأ يعاندها وبطل يحكيلها دا بقى يبجح فيها كمان ... مش بقولك ..ابن كلب عايز يطلع من تحت ايدى ...بس دا بعدة ابن الكلب دة ....قولت براحة يا عم الحاج شوية .. انت من الصبح ابن الكلب.... ابن الكلب ... خلاص عرفنا انك كلب ... هية امة كانت بتحكيلك كل اللى بيحكيهولها ... قالى : ايوة طبعا مش ابنى ولازم اعرف عنة الصغيرة قبل الكبيرة قولت: وفى يوم نرفزك ودايقك رحت قايلة انت بتعمل كذا وكذا .....وحكيت لة كل اللى امة كانت بتحكيهولك عنة ... ايوة علشان يعرف انى عارف عنة كل حاجة ...ومايصعش عليا ابن الكلب دة ... فيها اية دى .. رديت علية وانا متغاظ وعايز اقوم الطشة بالقلم : لافيها ياعم الكلب .. الواد فقد ثقتة فى امه حس ان كل اسرارة بقت مكشوفة ومعروفة لكل الناس ..لية بس كدة ... قالى هوة اية اللى لية ..داواد ابن كلب .. لازم يعرف انى ابوة .. وانة ملكى وبتاعى ...قولت لة حيلك ....حيلك.... انت فاكرة قميص ولا بنطلون ؟!... دا بنى ادم له مشاعر واحاسيس له كرامه ..قولت اساله عن اخبارة فى الكورة ...قالى ماهى دى كمان بطلها .. اتفضل ياسيدى اللى بتدافع عنة من الصبح ...قال اية مش رايح النادى الا ببوكسر .... قال اية بتاع كدة ملون بيتلبس بدل اللباس البفتة بتاعنا .. لية هوة بت .. والله مانا جايبهولة ... قولت :يعنى انت ملبسة لباس بفتة زى حالاتك ..قالى ايوة طبعا ... والمفروض ان الواد يروح النادى ويغير قدام صحابة.... ويلبس الشورت واللباس يدلدل منة وهوة بيلعب .. وزمايلة يتريقوا علية ... مش كدة..ياراجل حرام عليك الواد زى الفل انت اللى وحش .. انت اللى عايز تفهم انت اللى عايز بوكسر مش هوة....ارحم ابنك وارحمنى ..على رأى اللمبى يابنى ادميين ياعالم ياهوه... عيالنا اتخلقوا لزمن غير زمنا ... زمن لة مفرداتة ....زمن له متطلباتة ... بلاش نعيشهم فى زمنا لمجرد احساسنا انهم ملكنا ... دا المفروض نعيش معاهم زمنهم... مش هما اللى يعيشوا معانا زمنا ....ياعالم اتقوا ربنا فى العيال ......
جاتكم نيلة ياعلم يا عبك (خسارة فيكوا البفتة)
هههههههههههه
ردحذفالله ينور دكتور اسلام والله
فعلا الزمن متغير بس مش عارفه هل احنا فعلا صح وماشيين لقدام
ولا بنرجع بضهرنا ورا ومحتاجين نسمع الكلام
افتكر اننا محتاجين نسمع الكلام
عندك حق والله
ردحذففي اباء وامهات كتيييييير وقف بيهم الزمن عند يوم ماجابونا للدنيا
الزمن اتغير وهم لا
وبيرجعوا يسألوا هم ولادنا ليه مش قريبين مننا
ماهو علشن هم في زمن واحنا في زمن وفي النص فجوه كبيره
ياريت الناس تتعلم ازاي تعامل ولادها قبل مايلوموا عليهم
لابد انا بتعلم الاباء والامهات فن تربية الاولاد قبل انا يفكروا فى الانجاب
ردحذفعندك حق وبجد بوست جميل جدا ولذيذ وفكرة وصلت
ردحذفدمت بالف خير ومبروووووووووووووووووووك ع المدونة
اولا الف مبروك على المدونه
ردحذفثانيا موضوع حلو قوى
فعلا ناس كتير بتعانى من الفجوة اللى بين الاباء والابناء
فى الاول أحب أهنيك على أنشاء المدونه. وبوست جميل وبيناقش قضيه فى كل بيت الاب وأبنه بس بجد أوقات الاباء بيكون غندهم حق وأحنا اللى غلط :
ردحذفخالص تحياتى
والله كلام مظبوط جداااااااا
ردحذفوبيحصل فعلا
وشوف بقى لما حصل مع ولد انما البنات تقريبا كده ده الطبيعى معاهم على طول
فعلا الاهالى فاكرين انهم عشان خلفونا يبقوا خلاص ملكونا
لازم يعرفوا اننا لو بنحبهم وبنسمع كلامهم ده بس عشان مش عايزنهم يزعلوا
يعنى بنيجى على نفسنا كتير عشانهم بس
ولما الحكايه دى بتزيد اوى للاسف احنا بنتغير معاهم عشان يفهموا اننا لينا كيان مستقل وساعتها بقى بنبقى ولاد ..... زى صاحبك كده
مبروك المدونه وان شاء الله متابعين على طول
بس مين يسمع ومين يشوووف
ردحذفبس نعمل ايه بقى بهباهاتنا ومهماهاتنا ولازم نسمع كلامهم وخلاص
يا نهار الوان
ردحذفلباس بفتة لغاية دلوقتي؟؟؟
ده صاحبك ده قديم مووووت
طب و لسه بيلاقي حد يبيعله بفتة اساسا و لا محوشله توبين لزوم نقص الخامات؟؟
و الترزي اللي بيفصلهمله عادي كده ما بيسمعوش بقين حلوين؟
صاحبك ده للاسف يا دكتور محتاج يتعمله فورمات و ينزل سيستم جديد
لانه كده خلاص
expired
مبروك مبروك مبروك
ردحذفده اولا
كمان ايه ده حرام عليك مت من الضحك
بفته
هو ايه البفته دي عشان انا مش فاهمه الحته دي بس لما يجى انيس عبيد مسؤل الترجمه بتاعي هسأله اكيد هايبقى عارف هو قديم شويه عني ههههههههههههههههههههه
طيب يعنى امال لو شاف البوكسرات بتاعة العيال دي الى عليها شفايف حمرا وورد ودباديب
طيب اقوله على ماركه بوكسرات بتجيب الوان رجالي طيب ؟؟
هههههههههههههههههههههه
لا بس بجد بجد حكاية انه بوظ علاقة الواد بامه دي انا متغاظه منه اوووووووي
حد يعمل كده بررررررضه
للاسف يا استاذنا احنا ما عندناش حد عاد بيعرف يربي
الاوبشن ده عطلان عند الناس مش عارفه ليه
تحياتي لحضرتك والبلوج نوووووور
وكويس برضه عشان نبقى نيجى نشتكليك من البت لماضه دي معذبانا
على فكره يا فندم
ردحذفقرينا البوستات كلها والله
ومتنا من الضحك
ههههههههههههههههههه
تحياتي لحضرتك