ناس بتحب مصر2
بدأ سيادة اللواء فى الكلام وقال : فيه ناس بترشح نفسها علشان محتاجة منصب ... انا مش محتاج ... انا لواء ... وفيه ناس بترشح نفسها علشان الفلوس .... وانا الحمد لله ربنا كارمنى ... حتسألونى امال انت مرشح نفسك ليه ؟ اقولكوا .....علشان بحب مصر ... وعلشان لازم كلنا نحب مصر ... مصر ياجماعه مش حينصلح حالها غير لما نحبها ... واحد من اللى قاعدين قام وقال : ياسيادة اللواء ... انت ماتعرفنيش وحتى لو فكرتك مش حتفتكرنى ... لكن سيادتك من عشرين سنه وانت قائد المنطقة الشماليه ... خدمتنى ونقلتنى لوحدة جنب بيتى ... (من عشرين سنه يوم مايكون ربنا كارم سيادة اللواء قوى كان حيكون برتبة رائد ... يعنى مستحيل انه يكون قائد المنطقة الشمالية ) وبدأ الهتيف : عاش رجل الخدمات ....عاش رجل الخدمات ... كمل اللواء كلامه وقال : انا سعادتى بلاقيها فى خدمة الناس واللى ماعرفوش قبل اللى اعرفة ... لحظة صمت الواضح ان سيادة اللواء مش لاقى حاجة يقولها... وفجأة قال : اسألونى ... عايز اللى عندة سؤال يسألنى .. انا هنا علشان تسألونى .. ومرة لحظة صمت تانيه بس المرة دى طويله شويه ... اكتشفت ساعتها ان الناس مش عارفة تسأل فى ايه او تسأل ليه ؟ او ممكن يكونوا خايفين يسألوا ... ماعرفش .... سيادة اللواء قال : اسألوا ... اسألوا ... قام واد شاب حلو كدة من اللى متابعين الفضائيات وقال : هوه ايه برنامج سيادتك يا باشا ؟ ... وفجأه الناس هاجت فى الواد ياعينى ... برنامج ايه وكلام فاضى ايه... هوه سيادة اللواء محتاج برنامج انتخابى ؟!! دة شرف لينا انه يترشح عن ديرتنا ...وقام الهتيف : بطل اكتوبر يا بلاش ... غيرة فى الدايرة ماينفعناش...سيادة اللواء شاور للهتيف علشان يسكت وقال : ياجماعة سيبوا اللى عايز يسأل يسأل ... احنا فى بلد ديموقراطى ... احنا لازم نرسخ دعائم الديموقراطية ... شوف يا بنى ... انا برنامجى اشوف ايه اللى ناقصكوا واجيبهولكوا ..( طاب انا ناقصنى شرابين وفانله بكم علشان الشتا )... سيبك من الكلام بتاع الفضائيات والعالم المثقفين والبرنامج والمسلسل والحلقة والكلام اللى لايجيب والا يودى ... انا برنامجى انى اخدمكوا ... اثبتلكوا انى بحب مصر .... شاب تانى اتشجع وقال : التعليم يا باشا ... حنعمل ايه فى التعليم ؟؟ ... اللواء قال ده سؤال مهم يا جماعة لا ن التعليم هوه اللى حيطلع جيل يحب مصر ... جيل يستلم مننا الرايه ويطور البلد ... انا عندى تمانيه وخمسين سنه ... طول عمرى فى الجيش ... ولما طلعت مسكت رئاسة حى ... بنيت ستين مدرسة ( ستين مدرسة فى حى ... امال الناس اللى فى الحى ساكنه فين ... اكيد فى حى تانى ... ماسكه لواء برضة بس بيبنى فية بيوت بس ) ... المشكله يا جماعة مشكله ضمير ... فين ضمير المدرس ... فين حب المدرس لمصر ... ولو انى باعذره مالفصل فيه تمانين طالب ... لو كل طالب رفع صباعة ... الحصة حتخلص ... ههههههه ... واتدير وبص لواحد من القاعدين وشاور له وقاله : انت عندك حمام فى البيت ... الراجل استغرب من السؤال وقال وهوه خايف : ايوه يا سيادة اللواء ... اللواء سأ له تانى : الحمام ده فيه سيفون ؟... الراجل قال : ايوة ... اللواء قال : والسيفون ده بينقط ؟... الراجل قال : ايوه .... ضحك اللواء وقال : شوفتوا .. ده دليل ان احنا مش بنحب مصر ( فهمت ساعتها ان مصير التعليم فى مصر مربوط بحالة السيفون ... يعنى لو بطل خر ... التعليم حيتصلح حاله ) وكمل اللواء كلامه : اللى خلانا نكسب حرب اكتوبر المؤهلات ... المؤهلات كانوا معانا فى الدبابه واحنا بنعدى بارليف ( تانى ....هوه عندة58 سنه والحرب كانت من 37 سنه يعنى عمر سيادته ساعتها كان 21 سنه ... يعنى بكتيرة كان فى تالته الكليه الحربية ..ازاى بقى كان راكب الدبابة وبيعدى بارليف ) ... الخلاصة يا جماعة ان احنا عايزين نحب مصر ... ..انا متشكر ليكوا يا جماعة ... انا مش عايز اسيبكوا .. لكن واجب عليا انى امر على بقيت اهل الدايرة علشان اشوف طلباتهم وايه اللى ناقصهم ( طبعا على اساس انه شاف مطالب اهل القهوه ) ... قام واحد من اللى قاعدين جنب سيادته وقالى اسمح لى بكلمه يا سيادة اللواء ... واشتغل: قال رسول الله صلى الله عليه وسلم : الناس معادن كالذهب والفضة ... خيارهم فى الجاهليه خيارهم فى الاسلام ... ومعدن سيادة اللواء ... معدن اصيل ... اللى ماتعرفهوش يا جماعة ان سيادة اللواء منسب لاهل بيت رسول الله ... سيادة اللواء من الاشراف ... وضجت القهوة ... الله اكبر.... الله اكبر ... وكمل مولانا كلامه : قال رسول الله صلى الله عليه وسلم : تركت فيكم ما ان تمسكتم به لن تضلوا بعدى ابدا ... كتاب الله وسنتى واهل بيتى ... وانا ياسيادة اللواء بقول الكلام دة مش نفاق ولا رياء ... ورغم انى عارف ان سيادتك مخبى حكاية انك من الاشراف ومابتحبش تقولها ... لكن دا حق اهل دايرتك عليك ... انهم يعرفوا مين هوه سيادة اللواء ... سيادة اللواء سلم على اللى قاعدين واحد واحد ... ومشى وركب المرسيدس ... والهتيف شغال : بطل اكتوبر يا بلاش ... غيرة فى الدايرة ماينفعناش....
مسكت ميكى وفتحت على قصة عم دهب وهوه بيحارب عم بطوط علشان يخطف منه زيزى ويتجوزها ... وجه فى بالى خاطر غريب قوى ... اللى مايعرفوش سيادة اللواء ان احنا مش عايزين حد يقولنا حبوا مصر ... لاننا بنحبها زى سيادته مابيحبها واكتر ... بس الفرق ان سيادته بيحبها وعايز يجيب منها عيال ... لكن احنا بنحبها وكل املنا انها تاخدنا فى حضنها .... ايه قلة الادب دى ... فيه حد يقول كدة على مصر ...
فزورة : سيادة اللواء مش مستقل ... ولا اخوان ... ولا وفد ... يبقى ايه يا حلوييييييييين ؟؟؟؟؟؟؟
ياااااه دا سيادة اللواء بيحب مصر بجد اوي اوي
ردحذفانا كنت هاموت من الضحك يا دكتور على الستين مدرسة اللى بناهم في الحي وعلى اللواء التاني اللى بيبني بيوت بس
طيب فكرة حلوة يا دكتور تبقى الاحياء مقسمة
حى مدارس وحي بيوت
للاسف يا دكتور اللى بيحبوا مصر بجد مش بيرشحوا نفسم ولا بيفكروا والا هايفكروا يعملوا كدا
صحيح هو اللواء طلع اييييييه ؟؟؟؟؟
فاكر أغنية وطنى الاكبر
ردحذفالاجابة :-
بسم الله الرحمن الرحيم
الكلمة الاولى من الاغنية دى :))
متميز يا دكتور
اممممممممممم يطلع ايه يا عبد الرحيم يطلع ايه يا عبد الرحيم
ردحذفيطلع حزب نا الله ونعم الوكيل طبعا
بس فظيع الخطاب بتاعه بجد
لعلمك الخااااااااص انا ممكن جدا كواحده رخمه اوي اقوله وانت كانت رتبتك ايه ايام الحرب
واقوله برضه المدارس دي كلها فى حي واحد ليه
مسخرررررررررررره الانتخابات
ماشاء الله ستين مدرسة فى حى واحد
ردحذفيعنى تكفى للحى والاحياء اللى جنبه
هو حل الفزورة كان ايه بقى؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟