ناس بتحب مصر 4
شوفنا مع بعض افرازات الحزب الوطنى ... ومنتجات الاخوان المسلمين ... فاضل المستقلين والوفد والتجمع ... الوقت ما اسعفنيش علشان اشوف حد من المستقلين ... وكل اللى اعرفة عن الوفديين .. ان مرشحهم سلم عليه وانا قاعد على القهوة وقالى: نفسك معانا ياباشا ... على فكرة القهوة اللى باقعد عليها فى اخر بلاد المسلمين .... فى شارع ساكت .. وكل زوارها مايكملوش عدد صوابع الايد الواحدة ... بعد ما مرشح الوفد مشى ... جه صبى القهوه وحط صينية الشاى وسألنى : هوه الراجل ده ايه اللى جابه من هنا ؟ دا الشارع فاضى ... قولت تلاقية مابيحبش الزحمة ... القصد امبارح بقى حضرت مؤتمر المهيطل ... قصدى مؤتمر حزب التجمع الوحدوى .... افقر مؤتمر شفته ... الغلبان حيفضل غلبان ياولداه ومالوش حظ فى البلد دى ... صوان... ومايزيدش عن عشرين كرسى ... والناس الغلابة ... الصنايعية .. والمهمشين ... والعشوائيين ... مترصصين على الرصيف وساندين على العمود ... والمهيطل اللى المفروض مرشح نفسة ... قاعد على كرسى ورا الصيوان ... بيرتعش مش عارف حيقول ايه لما يقدموة ويطلع يتكلم ... اللى قاعدين على المنصة بقى ... محامى مفوه ... وطبييب من بتوع المراكز الطبية والجوامع ... قام المحامى شتم أبو أم الى خلف جد جدود حسنى مبارك ... وسأل سؤال واحد بس مهم: هوه جمال مبارك العاطل ده ... بيصرف منين بروح والدته؟ .. وقدم الطبيب العبقرى اللى زى معظم اطباء مصر... المعلم فيهم معاه اعدادية... وانا معاشرهم من عشرين سنه ...يعنى انا عارف انا بقول ايه ... وبدأ الكلام : حاحكيلكوا سيناريوهات الرعب اللى بيقدمهالنا الحزب الوطنى ... اول سيناريو كان 2005 لما قالوا لنا فية انفلوانزا الطيور ... الفرة اللى طول عمرنا نسمع عليها ... طول عمرنا والفرة بتيجى للفراخ ... ايه اللى حصل يعنى ... خربوا بيت الناس ما عدا معارفهم وناسهم ... كانوا بيبلغوهم بميعاد حملات التفتيش ... ويقولولهم خبوا الفراخ فى اودة النوم ... ودة اللى خلى نسبة الاصابه تزيد فى الاطفال ..( دا على اساس ان مافيش حد بينام فى اود النوم غير العيال الصغيرة )... وجه السيناريو التانى ... انفلونزا الخنازير ... الخنزير اللى لولاه ماكناش عملنا الانسولين .. والناس اللى عندها سكر كانت ماتت ...( مايعرفش ان الانسولين دلوقتى بيتعمل بالهندسة الوراثيه ) ....الطخينة بقى ..... واتخلصوا من الخنزير المصرى الغلبان ... الخنزير المصرى اللى كان بيخلصنا من الزباله ... واديكوا شايقين الزباله شكلها ايه فى الشوارع ... السياح دلوقتى بتصور جبال الزباله بعد ما كانت بتصور الاهرامات .... مش قولتلكوا انا معاشرهم من عشرين سنه ....
وانهارت اخر قلاع المدافعين عن الغلابة ... اللى لسه ماحدش قالهم ان الاشتراكية خلصت من العالم ....
انا لسه عند على كلمتى ... حأرشح سبونج بوب (فئات) ... وجيمى نيترون (عمال وفلاحين ) اما مقعد المرأة..... هانا مونتانا ...
ملحوظة مهمة : الا هوه فين البرادعى ... خير اللهم اجعله خير ... حد يقوله ياجماعة يلحق موسم الشتا ... الاشغال فى فنادق شارم والاقصر واسوان بقت 100% وكدة مش حيلاقى جناح فاضى ... وحيروح منه الموسم ... وبعدين الاسرة الكريمة تزعل منه ... و يرجع يقول ان حسنى هوه السبب .. ماهى بقت موضة اليومين دول ... فاضل اللى يجيله امساك ... يقول ان حسنى اللى شار عليه ... ممكن يكون حسنى فية البدع ... بس زمان قالوا : اللى يقول لمراته يا عورة ... الناس تلعب بيها الكورة ... انا رافض اللى بيعمله حسنى ... وبرضة رافض اللى بيتعمل فى حسنى لان ببساطة شئنا ام ابينا الراجل ده رمز مصر ... واهانته اهانه لمصر ... وانا بحب مصر... والله بحب مصر بجد
تتظبط ازاى دى ؟؟!!!
البوست جميل اوي وميه ميه وانت لازما ولا بد تستفزنى فى الاخر عشان اقوم شاتماه
ردحذفطب ايه رايك مش هاشتمه النهارده بقى
اصارحك القول لو تم ذكر المخفي ده من حد مش مصري وقل ادبه ابقى هاضربه ليه
لانه بره مصر رمز لمصر مش بابقى بادافع عنه بادافع عن نفسي طبعا
انما جوه مصر ما هو الا واحد اجرنا كشعب عشان يدير البلد
سرقها ونهبها وخربها وقعد على تلها هو ومن معه
حرام عليك يا دوك والله بتحب مين
ده انت نفسك حلوه اوي
يلا النفس الحلوه لها الجنه
تيته كانت بتقول كده :)
الفرج من عندك يا رب
ردحذفندى
ردحذفانت فهمتينى غلط ... انا بحب مصر .. مصر البلد ... مش مصر الرمز
كلنا بنحبها
ردحذفبس عوذين اللي بيحبها بجد
مش لمصلحتو وبس