الخميس، 4 نوفمبر 2010

ديك أم المدير

ديك أم المدير

خلى عندكوا ثبات انفعالى .... ومتتخضوش وكملوا قراية الموضوع وماتركزوش فى العنوان حتفهموا قصدى.... انا الدكتور بطاطا... اسمى الحقيقى او الناس هما اللى مطلعينه عليا .. مش مهم .... اتخرجت من كلية الطب البيطرى .... وماتعينتش فى الحكومة .. مش بمذاجى ... مافيش تعيين فى الحكومة ... عموما انا ماكنتش مستنى تعين الحكومة ... اشتغلت فى مزرعة دواجن على الصحراوى ... وخدت خبرة كبيرة قوى ... وبعد ما اتجوزت ... قولت اشتغل لنفسى بقى ... اجرت مزرعة وبدات اشتغل ... مرة فوق مرة تحت ... الدنيا كانت ماشية ... وفجأة ... ظهرت انفلوانزا الطيور .. والدنيا اتقلبت ... وخسرت شوية فلوس حلوه كدة ... يعنى من الاخر بدأت من الصفر ...ويادوب لسه بأقف على رجلى ... ولقيت مدير مكتب المحافظ على رأس لجنه من خمستاشر واحد ... ضابط ومندوب من البيئة وعسكرى امن مركزى وموظف من الصحة ودكتور بيطرى ... وقرروا ان المسافة بين المزرعة والكتله السكنيه غير مطابقة للمواصفات ... وان المزرعة لازم تتقفل لانها بؤرة عدوى ... حاولت اتفاهم مع مدير مكتب المحافظ ... ابدا ...قالى: صحة الناس اهم من اى حاجة .. وقرر مدير مكتب المحافظ انه يشمع المزرعة بالشمع الاحمر ... واتشمعت المزرعة بالشمع الاحمر ... وبدأت تانى ... بس المرة دى من تحت الصفر ... لكن ربنا كريم ... الحكومة طلبت دكاترة بيطريين تعينهم علشان الانفلوانزا ... واتعينت ... ورغم ان اللى فى المدرية عارفين انى خبرة جامدة فى الدواجن ... الا انهم عينونى فى قسم الحيوانات الكبيرة .. بقر وجاموس وكدة ... والدنيا مشت ... وفى يوم من الايام بعد الشغل... روحت ... عملت التليفون على الصامت ... ودخلت اصلى على ما مراتى تحضر الغدا ... فراخ ومحشى ... وفجأة لقيت الباب بيخبط زى الخبط بتاع البوليس اللى بنشوفه فى الافلام ... فتحت ... لقيت اخويا بيقولى .. الحق ... فيه عربية من المحافظة فيها راجل كبير كدة وشكله ظابط ... بيسألوا عليك على اول الشارع ... قولت : محافظة يا ساتر يارب .. انا ماليش دعوة بالبرادعى ..ولا بحبه اصلا ... دخلت البس هدومى علشان لو مسكونى ولا حاجة مايبقاش الدكتور بطاطا اسمه اتاخد بالبيجاما .. .. لبست وخدت الموبيل ...لقيت عليه خمسة وتلاتين ميسد كول من المدير بتاعى .. كلمته ... زعق فيه قالى انت فين يا افندى وكيل الوزارة بنفسة عايزك ... اقفل حيكلمك دلوقت ... ويادوب قفلت ولقيت وكيل الوزارة بيتصل بيه.. .. وقال : فيه عربيه من المحافظة حتجيلك ومعاها مدير عام المديرية .. حتروح معاه لبيت مدير مكتب سيادة المحافظ ... اعمل اللازم ... وقفل السكه ... مدير مكتب المحافظ هوه الراجل دة موراهوش غيرى .. استر يارب ...فتحت الباب لقيت مدير عام المديرية بنفسه ... بيقولى ياللى بسرعة ...ركبت العربية والناس فى الشارع بتتكلم وتقول اللى يجى فى بالها ...اللى يقول بطاطا اختلس ... واللى يقول بطاطا هوه اللى دخل انفلوانزا الخنازير مصر ... واللى يقول مسكوا بطاطا علشان هوه السبب فى غلو اللحمة ..... المهم ... وصلنا لبيت مدير مكتب المحافظ ... قابلنا وهوه لابس جلابية بيضا وطاقية شبيكة .. .. وقال اتفضلوا ... طبعا كان نفسى امسك فى زمارة رقبته ... ماهوه اللى قفل لى المزرعة ... قولت : خير يا باشا ... قالى نشرب الشاى الاول ... وبعدين اجيب لك الحاجة تقولك ... شربنا الشاى وجات الحاجة ام مدير مكتب المحافظ ... قالت : شوف يابنى ... الفراخ اللى مربياها تعبانى قوى ... عايزاك تشوفهم وتعمل لهم اللازم ... قولت انا تحت امرك ... قالت : الاهم بقى من الفراخ ... الديك... قولت: ماله ... قالت : ماعدش زى الاول يابنى ... مش عارف يكسر الفراخ ...مش عارفة ايه اللى صابه .... ده بقى بالذات لازم تشوف له حل .... قولت عنيه يا حاجة ... مدير مكتب المحافظ قلنا اتفضلوا ... طلعنا معاه الشقة اللى قى الدور التالت ... هه ... الشقة اللى فى التالت ... يعنى المسافة بين الفراخ وبين الكتله السكنيه فيها مشكله ... وطبعااتكتمت فى قلبى ... الشقة ياسيدى فيها تلت اود ... اودة فيها بط ... واودة فيها ديوك رومى ... واودة فيها يجى خمسميت فرخة .... مزرعة مزرعة يعنى ... عملت اللازم وقعدت اعصر مخى والخبرة اللى عندى حتى محاضرات الكليه قعدت افتكر فيها علشان اعرف سبب اللى يخلى الديك مش عارف يكسر ... مش لاقى ... ماهو حرام برضة ... ديك واحد مطلوب منه يكسر خمسميت فرخة ... والله حرام ... المهم جات فى دماغى فكرة .... رحت كاتب له نص قرص فياجرا على مية الشرب لمدة تلت ايام ... ومشينا .. العربية وصلتنى لباب البيت ... الدكتور مدير عام المديرية ...نزل بنفسة وشكرنى قدام الشارع ... والناس قعدت تقول اللى يجى على بالها ... د. بطاطا ده طول عمرة راجل محترم ...الدكتور بطاطا دة واصل ... منور يا دكتور بطاطا ... اتفضل اشرب قهوتك معانا ... طلعت بيتنا لقيت مراتى والعيال نايمين ... وسايبين لى طبق فيه صوبعين محشى وحتة فرخى ....

بعد اسبوع ... وانا قاعد على مكتبى فى الشغل مابعملش حاجة كالعادة ... دخل عليه رئيس القسم ومعاه ورقة بيهزها فى الهوا .... وقال : ماشى يا سيدى ... يابخت من كان النقيب خاله ... قرار ادارى من وكيل الوزارة بتعيينك رئيس قسم الدواجن فى المديرية ياسيدى ... قولت فى نفسى ... اكيد ديك ام مدير مكتب المحافظ ربنا نفخ فى صورته والفياجرا عملت شغل ..... اه يابلد مابتمشيش الا بالفياجرا ............. على فكرة القصة دى من الحياه وحصلت فعلا مش خيال ..... مش بقولكوا .... يابلدنا ان الاوان

هناك 12 تعليقًا:

  1. هاهاهااااااااااااااا
    بصراحة مش قاااااااااادر
    حرام عليهم الديك... يعنى يموت نفسه علشان خاطرهم؟

    تحياتى يا دكتور إسلام على إسلوبك الرائع

    ردحذف
  2. هههههههههههههههههههههههههههههههههههههههه
    طبعا حصلت
    واقعية جدا
    ياعيني .. يا بطاطا

    ردحذف
  3. هههههههههه

    لا بجد دمها خفيف...أسلوبك جميل
    بس هو فعلا الديك ممكن ياخد فياجرا

    ردحذف
  4. Hu-man
    لا طبعا بس دة لزوم الدراما
    تحياتى

    ردحذف
  5. هخاهاهاهاهاهاههاهاهاه

    ردحذف
  6. ههههههههههههههه كل دة من نص قرص طب لو كان كتب علبة كان بقى اة ؟؟؟؟؟؟؟؟
    فعلا دكتور بتحصل كتير وما خفى كان اعظم
    N.B
    Viagra can use in vet. field

    ردحذف
  7. الحقيقه انا لو من الدكتور ده كنت موتلهم الفراخ اساسا

    ايه يا اخويا وجع القلب ده مسخره بجد

    عموما هو ان الاوان اه

    بس مين وفين وازاي

    ردحذف
  8. شقة فى عمارة معمولة مزرعة
    ونفس الراجل هو اللى بيقفل مزارع الناس
    وسلام بقى لصحة الشعب

    ردحذف
  9. مدونتك دمها خفيف اوى وكلامك انا اصدق انه يحصل فى الواقع عشان انت اكيد اكيد فى مصر

    ردحذف
  10. السلامو عليكم

    بجد بجد
    انته حكايه
    يخبر ابيض تدى الديك فياجرا
    ههههههههههههههههه
    طيب افرض بقى علشان حظك النحس ان الديك مستحملش الفياجرا وجابت اجله وراح فتيظ
    كنت زمانك مسجون
    هههههههههههههه

    بعد الشر
    بجد بجد قصه جميله جدا ولو فعلا حقيقيه تبق عمار يامصر بالفياجرا

    اول زياره لمدونتك الجميله
    تحياتنى لأسلوبك الرائع يادوك

    محمـــد التركــى

    ردحذف
  11. فافى ... محمد التركى ... نورتونى ...نورتونى...نورتونى

    ردحذف
  12. هههههههههههههه تحياتى للدكاتره البيطريين بجد انتوا بتتعبوا بتتعبوا مانتوا مش ملاحقين يعنى زمان كان جنون البقر ومره انفلونزا الطيور ومره الخنازير وماشيه معاكم زى الفل

    ردحذف