الراقصة والسياسى ......والاخوانى المنشق

الراقصة والسياسى والاخوانى المنشق

السياسى المخضرم ينوى كتابة مذكراته ... الراقصة اللولبية تفكر فى كتابة مذكراتها ... الاخوانى المنشق ينشر مذكراته... على طول يا معلم ...الطبعة الخامسه نازله بكرة ؟؟؟ بيتكلم فى ايه ده ؟ ...

القصد ..تفتح مذكرات الواحد من دول وتلاقى سسبينس يامعلم ..اثارة وغموض وعبقريات وفرسان ومحررين ... ولعب عالى قوى على منطقة السفالة اللى موجوده بداخل كل انسان ...فتلاقى حبة فضايح .. على شوية شماتة على تتبع لعورات الناس والخوض فيها ...على شوية فوازير من عينة .. م م الذى كان يعمل فراشا وكانوا بيبعتوة يصور ورق لما المكنة تعطل ... وازاى هذا الفراش دارت به الدوائر واصبح يشغل اهم منصب فى الدولة ...ويديك بقى ح م...ج م... هـ هـ .. يعنى هلس فى هلس على راى فاروق الفيشاوى فى الفيلم .

طاب ايه طا ...؟ جاى دلوقتى تقول وتكتب ... امال كنت فين من زمان يا أمور ؟ ماقولتش ليه اياميها اللى بتقوله دلوقت ؟ ... كنت خايف ليأذوك ولا السبوبة كانت كاسرة عينك ؟... ولا عم عشم كان واكلك فى ترقيه ؟ولا جاى تتوب على ادينا وتعترف وتتناول على رأى اخوانا المسيحين ...؟ ولا يكونش جاى تسيح للى ماعطوكش حقك ومقامك او اللى انت شايف انه حقك ومقامك ؟ .

الثلاثة يشتغلوننا يا جماعة ... بعد ماكلوا وشربوا وناموا وباسو وحضنوا و... جايين يكملوا علينا ويقلبونا ويبيعولنا مذكراتهم فى كتب او على الفضائيات .. علشان يوصلوا السبوبة اللى انقطعت ... حيجيلكوا تخمة ياولاد الجعانة ... اييييه مابتشبعوش ياكفرة

.. مش كفاية فلوسنا اللى قلبتوها ... كمان حتجيبولنا اكتئاب ... وتكسرونا قدام نفسنا وتورونا اد ايه احنا كنا مضروبين على قفانا ...احنا بقينا ماشيين فى الشارع رافعين حواجبنا ومبرقين عنينا وناسينا حتى نقفل بقنا بعد ماقولنا : ياااااه  كل ده كان بيحصل ؟؟!!!

عبوكوا على ابو زمن الماركيتنج والام بى ايه اللى بقى بيتباع فية كل حاجة علشان يشتريها الهطل امثالى   

البوس فى زمن مابعد الحداثة

البوس فى زمن مابعد الحداثة

انت بتقول ايه يا باشا ؟! ... هوه فيه سيما من غير بوس ..؟ ... السيما من غير بوس ماتبقاش سيما !.... ثم ان السيما اصلا اخترعوها علشان البوس .... بوس جوه وبوس بره ... يعنى البطل يبوس البطلة جوه الفيلم ... والواد بيبوس البت بره فى الصاله ... أو اللوج أو البنوار ... كل واحد وفلوسه بقى ... ولو ان دلوقت كله بقى صالة ... مافيش حد احسن من حد ... ثورة بقى ... عموما البوس الحاجة الوحيدة اللى مابيفرقش فيها الفلوس ... ممكن الفلوس تفرق فى الاكل فى الشرب فى اللبس .. لكن البوس ..لأ مابتفرقش البوس كله واحد ... الفقير زى الغنى ... كله بيبوس .

لا طبعا ياباشا ... فرق كبير طبعا ... البوسة زمان كانت بوسه ... ليها معنى ووطعم وتحس كده  انها طالعة من القلب .. بوسه كده مشتاقة .. خجلانه .. قلقانه ... حيرانه ... بترتعش ... بتهز الكيان كله ... كنت تعدى فى الصاله تحس ان السيما فيها زلزال ...لكن دلوقت ... هيييييه ... مافيش حاجة عادت زى زمان ... كله اتغير ياباشا ... ماعدتش فيه بوس زى زمان ... كله دلوقت مسك ... وحتى شوية البوس اللى فاضلين ...مابقوش بوس من اللى كنا بنعرفه ... بقى كده اشبة بالعض ... وبرضه العض بقى جوه وبرة ... البطل بيعض البطله جوه الفيلم ... والواد بيعض البت بره فى الصاله .... ماهو ياباشا محدش عايز يفهم ان طول ماجوه حلو بره حلو ... وطول ماجوه وحش بره وحش ... ما هو اصل الناس بتاخد خبراتها من السيما ياباشا .

هأهأ ... لا ... زمان كنت باتفرج على البوس لايف وانا معدى بين الكراسى ...لكن دلوقت بحكم السن والتكنولوجيا ... باقعد قدام الشاشة ... ماهما دلوقتى حاطين كاميرات علشان يكشفوا البوس اللى بيحصل فى الصاله ... هما بيقولوا كده ... بس الحقيقة هما حاطين الكاميرات علشان يتفرجوا ...... مش بقولك ياباشا ماعدتش حاجة تلذ زى الاول ... كله دلوقت بقى افتراضى .

هأهأهأ ... اكيد ياباشا ... دا طباخ السم بيدوقه ... وانا بقالى 30 سنه فى السينما دى ... لكن انا بقى حظى حلو ... جربت البوس بتاع زمان ... والعض بتاع دلوقت ... حق الله ... الاتنين حلوين ياباشا ... ماهو البنى ادم لازم ينوع برضك.

نورتنا ياباشا ... ماتغيبش علينا ياباشا ... الله يكرمك ياباشا .... الباشا ده راجل عسليه ... مابيجيش مره السيما الا ويدينى علبتين فياجرا من الاصلى بتاع فايزر ... الغريب انه عمرة ماجه معاه حد ... كل مرة بيجى لوحده ... الباشا ده باينه مالوش فى البوس ولا ايه ؟؟؟؟

المتأملكين

المتأملكين

كل حاجة بتتطور وتتغير .. يعنى عندك مثلا مفهوم الرجولة قبل البيريل حاجة وبعد البيريل حاجة تانية خالص ... وعندك مفهوم الستات قبل صافيناز حاجة وبعد صافيناز حاجة تانية خالص ...... اما مفهوم الوطنية قبل الارتجاع المعروف اعلاميا بالثورة حاجة ... وبعد الارتجاع حاجة تانية خااااالص .

ونتيجة للتطور وتغيير المفاهيم ... ظهرت فى المحروسة بعد الارتجاع ...ظاهرة جديدة خالص ..ظاهرة المتأملكين ... اى الشياطين اللى لابسين توب الملايكة ... وهذه الظاهرة افرزت الى جانب الطوائف الانالوج القديمة من المنافقين والراكعيين والديوثيين ... افرزت طوائف جديدة من النوع الديجيتال زى الاعلاميين والنخبويين والحقوقيين والاخوان المسلمين والباسميين وغيرهم من المتاجرين بالعرض والدم والوطن والدين ... ورغم ان هؤلاء المتأملكين جاهلين وواطيين وولاد ستين فى سبعين ...الا انهم بكل بجاحة يا أخى تلاقيهم ليل نهار على الفضائيات متنطعين .. وقدام الكاميرا على غير العادة قاعدين مستحميين ومتبرفنين وللبدل والكرافتات السينيه لابسين ...وبفنون الكلام مهلفطين ..وبالمنطق والفلسفة منظريين ... وللحقايق قالبين وعلى كل حاجة واى حاجة معترضين ... المهم ... المهم انهم يطلعوا كاسبانين وللجيوب مالين ..وللقصور شارين والمرسيدس راكبين .... وحتى القبور ... بالبورسلين مبلطين ... ومش مهم ابدا على حساب مين ... على حساب الغلبانين ولا المساكين ... على حساب المغيبيين ولا المشتاقين ... مش مهم...

براحتكوا ياحلوين ... حقكوا يا امامير ياصغنططين ... ماهو الحق مش عليكوا ... الحق على اللى بيتابعوكوا ويهزروا ويضحكوا ويألشوا وفى الاخر ـ بعون الله ـ فى الحيط لابسين   .... اما انتوا يا متأملكين ... حلال عليكوا الفيز الامريكانى والالمانى ... حلال عليكوا فلوس الغلابة ... ياللى سافروا درجة  فى اى بى  على طيران لوفتهانزا واقعدوا فى النمسا ... وكملوا تجارة ولموا كمان وكمان .

اوعى تصدق انى ملاك ومش متأملك انا كمان ... والدليل البوست المكتوب عن المتأملكين الوحشين اللى بشتم فيهم مع انى من الرعيل الاول لمدرسة الشيطان النموذجية لغات .... الفرق الوحيد انى أول واحد بيعترف ...

اللهم احسن ختامنا ودبر امرنا ووفقنا الى طريق التوبة اليك 

اوهام بت عم احلام

اوهام بت عم احلام

نرمين ومروه وريم ... احمد وعلاء وشريف ....3بنات و3اولاد موجودين فى كل مكان تقريبا ...فى الجامعة تلاقيهم ...فى الشغل تلاقيهم ...فى النادى تلاقيهم ...فى اى حته حتلاقيهم....وأغرب مافى قصتهم انها بتتكرر كل يوم بنفس مشاهد السيناريو وكلمات الحوار .. مافيش تجديد ولا ابداع ولا أى افتكاسات ... احكى الحكايه:

احمد بيحب نرمين ...و نرمين بتحب علاء... وعلاء بيحب مروه ... لكن مروه بتموت فى شريف... بس شريف بقى بيحب ريم ...اما ريم  فبتموت فى احمد.

5 years later

احمد اتجوز مروة... علاء اتجوز ريم ...شريف اتجوز نرمين ...ملخبطه صح ؟

عادى ماهى طول عمرها ملخبطة ومحدش فاهم هيه رايحة فين ولا هوه فين الصح ولا ايه اصل الحكاية بالظبط ... وطول عمرها برضة بتقفل نفس القفلة... مش بقولوكوا مافيش اى ابداع ولا اى افتكاسات .

10  years  later

احمد ناجح قوى فى شغله ... عنده عمرو ونرمين ...طبعا انت فاهم هوه ليه سمى بنته نرمين ؟... احمد علطول برة ... علطول مسافر ...علطول مشغول ... على طول حاطط صورة على الموبيل وعاملها كلمة سر ... هوه بيقول كل ده علشان العيال .... وأنا بقول : هأ

علاء بقى موظف ...يرجع يتغدى وينام ... يقوم ينزل يقعد على القهوة يلعب دومينو..فى الشغل .. فى درج المكتب  التحتانى فيه صورة تحت الملفات ... هوه بيقول مش كل حاجة الشغل ...المهم انك تكون وسط عيالك .... وأنا بقول : هأ

شريف بقى سافر الامارات ... وطبعا مش مضطر يعمل كلمة سر على الموبيل ولا يحط الصورة تحت الورق فى درج المكتب ... هوه مكبرها ومعلقها فى الصاله ... قادر ... اخر مرة نزل فيها شريف اجازة كان من حوالى اربع سنين ... هوه بيقول نستحمل الغربة علشان نعمل قرشين للعيال ... وانا بقول : هأ

10 years later

داخل احدى محلات بيع الهدايا ... تقف سيده تناهز الخمسين من عمرها .. ذات جسد ينبىء بفشل جميع محاولات الشفط والحميه ..اثر عمليات الشد تؤكد بما لايدع مجالا للشك انه لا عمليات بعد اليوم ...بعض من الصلع الوراثى الخفيف يظهر بين خصلات الشعر المصبوغ باللون الدهبى ... يقف احمد بجوار هذه السيدة لايعيرها انتباهه .. فجأة تشد السيده احمد من  يده قائله : مش معقول ... احمد عوض .. يرد احمد بذهول : ايوه يافندم .. السيده السمينه : انت مش فاكرنى يا احمد ... انا نرمين زميلتك فى الكليه ...شذا ... ياشذا ... تعالى سلمى على عمو احمد  ...شذا : اهلا ياعمو...نرمين : شذا بنتى الكبيرة ... علاء ابنى الصعير فى ثانوية عامة ...خلينا نشوفك ياللا سلام .. شذا : فرصة سعيدة يا عمو .

احمد يتحدث مع نفسه ... مش ممكن تكون دى نرمين ... البت بتقولى ياعمو ... مسمية الواد علاء .. مين دى ؟ انا مين ؟ انا فين ؟

الغريبة ان اللى حصل مع احمد حصل مع علاء حصل مع شريف حصل مع البنات برضة ...حتة دين نتفة وهم .. وهم انه لو كنا خدنا اللى بنحبه كنا زماننا اسعد واكثر ابتهاجا بالحياة ...

الخايبين لاخدوا اللى بيحبوهم ولا حبوا اللى خدوهم ...كل اللى عملوه كل واحد سمى ابنه ولا بته على اسم اللى كان بيحبه ...بيسموها فى البلد عندنا ... بيحنس نفسه ... أى بيصبر نفسه ... زى لما بتكون جعان كدهوه والحاجة لسه ماخلصتش الاكل تقوم تقولك خد لك تصبيرة ...يعنى لقمة بجبنه .. حتة كيكة ..شاندوتش مخلل ..(قاصدها يالشين ).. اما فى زمن الماركيتنج .. بتاخد لك واحدة مولتو...

اسكتوا اسكتوا ... مش نسيت اقولكوا عن اسماء وهانى ... دول بقى قطعوا بعض حب قبل الجواز .. وجابو بت... ابوها صمم انه يسميه اسماء على اسم امها ... اسماء بنت امورة قوى ... هيه عايشة  دلوقتى عند جدتها ام امها ... ماهى الحضانه لجدة الام لو الراجل كسب القضية واثبت ان الام غير امينه على تربية الطفل ... قانون بقى

التطور الطبيعى للرجل المصرى

التطور الطبيعى للرجل المصرى

فيه ناس شايفة دارون ... عالم صاحب نظرية ... وفيه ناس شيفاه كافر ابن كلب ... وفيه ناس ماتعرفوش اصلا ... وفيه ناس مش مصدقاه ... وفيه ناس مقتنعة جدا بيه ...كل ده مش مهم ... انا اللى يهمنى الفكرة ... فكرة النشوء والارتقاء واثر الظروف والبيئة فى تطور الكائن الحى ... ولو طبقنا فكرة الخواجة دارون على الراجل المصرى ... حتلاقى ان النظرية اتثبتت لوحدها ... فالراجل بيمر براحل تطور كتيرة فى حياته ...

اول مرحلة هيه ...مرحلة الفار .... بتلاقيه بيلف ويدور ويهجم ويهرب زى الفار اللى فى المتاهة ... بيحاول يفهم اللى بيحصل حواليه ويكون ادراكه ومفهومه عن الدنيا عن طريق افكار المحيطين وحكم وامثال الاولين ... لغاية ماربنا يكرمه ويلاقى حتة الجبنه اللى حيعيش عليها بقيت حياته ... وبعد ماياقى حتة الجبنه ويعدى من خرم الابرة ويبدأ يمارس حياته الطبيعية اللى هيه من حقةوالنعمة الشريفة من حقة .. ويبدأ يشتغل والفلوس تجرى فى ايديه ... يبدأ فى ..

مرحلة الطاووس ... بيشترى اللبس اللى نفسه فيه ويمسك الموبيل التاتش .. ويعلق اللاب توب على كتفه ...ويخرج ويتفسح ويمسك المارلبوروفى ايده ويشرب الكانز ...ويعيش مزوق ومروق .. وشويه ويبدأ يدور على انثاه ... بنت الحلال اللى حيبنى معاها المستقبل ... وبكده يبدأ ...

مرحلة الاسد اللى بيبى عرينه ويدافع عن حريمة ... وبعد ماتخلص الزفة وتعدى الصباحية ويرجع من شارم وتعدى التسع شهور وتبدأ الاولاد فى الظهور يدخل الرجل المرحلة الاخطر والاطول فى تاريخه ...

مرحلة الحمار ... نازل شايل كيس الزباله وورقة الطلبات ... طالع شايل البامبرز واللبن والزبادى واللحمة والخضار ... رايح يودى العيال الدرس جاى يشترى لبس العيد والصيف والشتا والخريف والربيع ...واقف يركب لمبة للنجفة بدل اللى اتحرقت ... قاعد يلمع جزم العيال اللى بيشوطوا بيها الطوب ...وشوية والعيال تكبر ويبقى لهم كيان وشان وشنشان ...ويعرفوا  يروحوا الدروس لوحدهم ... ويشتروا هدومهم بنفسهم ...ويبقى لهم حياتهم وصحابهم وعلاقتهم ودنيتهم الخاصة ... فيبدأ الرجل مرحلة جديدة ...

مرحلة الكلب ... طول النهار يهوهو .. ومحدش بيعبرة ولا يسمع كلامه ... ياواد ماتتأخرش عن الساعة اتناشر ... يابت انتى مش حتتحجبى بقى ... ياواد انت مش حتبطل قاعده على الهباب النت ده ... يابت الكلب مافيش كوباية شاى لابوكى ... هوهوهو ... ولاحياة لمن تنادى ...

مع السن والايام اللى هربت ... مع السكر والضغط وخشونة المفاصل وضيق النفس ... يدخل الرجل المصرى المرحلة الاخيرة..

مرحله الــــبومة.... ايوه البومة ... تلاقيه قاعد على كرسى فى الصالة ... يبص بس ... لابيهش ولا بينش ... الدنيا حواليه بتتقلب ... وهوه قاعد يبص بس .

هييييييييييه..... جاى رايح منه له ... جاى رايح منه له ...

شكر خاص للمتر علاء صاحب نظرية التطور الطبيعى للرجل المصرى

الجـــــلاد

الجـــــلاد

الجلاد فى اللغه هو الشخص المسئول عن تنفيذ عقوبة الجلد على المجرم المحكوم عليه..... ولما يحبوا يقولوا ان مافيش عداله والموضوع فيه ظلم وكدهوه يسألك بتهكم : انت حتبقى قاضى وجلاد ؟.

اما الجلاد فى اللغة العامية فهو كل مايستر جلدة الكراسات والكتب ويحميها من زيت الطعمية اللى فى ساندوتشات الغلابة ... وزيت البونفريت اللى بيقع من الدينر بوكس اللى مع الطلبه ولاد الناس .

ولأن كل حاجة بتتطور ... الجلاد هوه كمان اتطور ...زمان كنا بنجلد بورق الجرايد ..وبعدين بورق عمر افندى وهانو ... وبعدين ورق المجلات زى المصور واخر ساعة ...وبعدين ظهر نوع من الورق المقوى لونه ازرق غبى ... لون بدلة المساجين كده ...وشوية شوية ظهر الجلاد البلاستيك سهل التركيب ... وبعدين الجلاد ذاتى اللصق سهل التثبيت ... ومحدش عارف بكرة حيبقى فيه ايه تانى ... تطور بقى يامعلم .

كمان فيه نوع من الجلاد بيستخدموه فى لف الهدايا ... احنا كنا بنقول عليه سوليفان .... ماعرفش هما بيسموه ايه دلوقت ....بس  اكيد ليه اسم حلو كده يمشى مع الموضةوالبرستيج والكانز وحالة شبق الظهور فى صورة ولاد الناس اللى صايبة الشعب كله .

القصد ... ورق السوليفان او الهدايا بيستخدم فى لف الهدايا اللى محلاتها بقت اكتر من محلات الفول والطعمية ....والهدف من لف الهدايا هو اعطاء قيمة اكبر للهديه وشكل احسن ... وساعات كتير لفة الهدية بتبقى اغلى من الهديه ذاتها .... علشان لما نقدم الهديه نعمل جو ... جو .. الله ايه ده ؟ ... مرسى قوى ... ربنا يخليك ... يارب تعجبك ... اكيد حتعجبنى ... طول عمرك ذوقك يجنن .... طاب افتح وقولى رأيك ... وهنا يتم فتح الهدية وتمزيق السوليفان.... وتظهر علامات الانبهار والسعادة ... وايه ده .. مش معقولة ... دا انا كان نفسى فيها من زمان ...تسلم الايادى (بغيظ الاخوان )... صاحب الهدية بيبقى مبسوط ... واللى جايب الهدية بيبقى مبسوط ... والمعزومين برضة بيبقوا مبسوطين ... واحد بس هوه اللى مبيبقاش مبسوط فى القعدة دى ... عارفين مين .... الحاجة ... الحاجة بتبقى متضايقة قوى من تقطيع ورق السوليفان ... خسارة ياولاد ... الورق ده ينفع .... ينفع فى ايه ياحاجة؟ .. ياخايبين ينفع يتحط فى النيش تحت طقم الكوبايات .... ينفع يتلزق على ازاز الشباك علشان الجيران ماتكشفناش .... ينفع يتحط على الحيطة علشان يدارى الرطوبة اللى واكلة الجدار .... ينفع نلف بيه هديه لحد ونوفر الفلوس .

 ..... ينفع كمان فى حاجة مهمه جدا ... ودى بقى اللى حكلمكوا فيها المرة الجاية

لان حالة الاستطراد صابتنى ونسيت اتكلم فى الموضوع اللى كاتب عشانه المدونة اصلا ..... الى اللقاء.

ابن حرام .... بس شرعى

ابن حرام .... بس شرعى

زمان كان مفهوم ابن الحرام عند المجتمع ... هوه الواد اللى مايعرفلهوش اب ... اللى بيلاقوه على باب الجامع او على باب الملجأ او على سرير المستشفى بعد ماتهرب امه أول ماتفوق من البنج .

وزمان لما كنا بنسمع كلمة ابن الحرام كان بيجى فى دماغنا على طول ... الدنيا وهيه ضلمة كحل ... اوالشوارع فاضية والسما بترخ والبرق منور الدنيا والرعد صوته فى صدرنا والشباك بينفتح من الهوا والازاز بيتكسر ...وتلاقى شوية كلمات بتترعش على لساننا من عينة ... الشيطان ... الكبريت جنب البنزبن ... ربنا يستر على ولايانا ... استغفر الله العظيم ... ماهى كبيرة .. زنا والعياذ بالله .

القصد ... رغم ان ابن الحرام مالهوش اى ذنب فى ان ابوه وامه عاشوا لحظة ضعف كان الشيطان فيها شاطر نساهم ربنا فزنوا ... الا انه ياولداه بن الحرام ده هوه اللى بيشيل الزباله كلها ... وفى أى مكان عايش فيه ... فى الملجأ .. عند ابن الحلال اللى خده يربيه علشان يكسب فيه ثواب ... او فى مجتمع تحت الكوبرى والاشارات ... بيعيش ابن الحرام مطارد ... مكتوب على ضهرة : ابن الحرام مخلاش لابن الحلال حاجة ... طاب يعنى هوه ابن الحلال كان عطاله حاجة بنفس راضية ؟! ... مكتوب على ضهره: العشرة ماتهونش غير على ابن الحرام ... طاب هوه شاف منكوا ايه غير الذل والاهانه والمعايرة والنبذ والطرد على ذنب هوه ماعملهوش ... وعايزينه كمان يحافظ على العشرة ... دا ايه البجاحة دى ؟؟!! .. مكتوب على ضهره : ابن الحرام يا قواس يا مكاس ... يعنى ابن الحرام يا يطلع مخبر يا بيلم الضرايب ...ماهو من اللى شافه منكوا ياولاد ال ...

عموما انا شايف ان ابن الحرام اللى مالهوش اب ممكن يكون ليه عذر انه يخون وينصب ويغدر ويبيع ناسه ويبقى عدو للمجتمع اللى لفظة ... ماهو ملقاش اللى يحضنة ويربيه وياخد باله منه وماشافش من صغرة غير الذل والاهانه والمرمطة .

لكن ايه بقى عذر ابن الحرام الشرعى  اللى ابوه الشريف كتب على امه العفيفة بقسيمة عند مأذون واتنين شهود وفرح وتورته واسماء الله الحسنى ...وهاتى بوسه يابت ؟ ايه عذر ابن الحرام الشرعى اللى اتعمل له سبوع وطلع لقى له سرير ومكتب ومدرسة ونادى ولبس عيد ... اللى له تيتا وجدو وانكل وطنط بيجيبوله شيبسى وشيكولاته وكانز ...؟

حد يقدر يفهمنى عذرة ايه ابن الحرام الشرعى ده انه ينصب ويغدر ويخون ويبيع بلدة وناسه ؟  عذرة ايه علشان يقتل ويفجر ويقطع طريق ..؟

سؤال للتفكير :

هوه يعنى ايه حرام من اصله فى الايام الوسخة اللى احنا عايشينها دى ؟

مصر مين يا اهبل انت !

مصر مين يا اهبل انت !

أمها من المدافعين عن حقوق المرأة ... من الستات اللى اتربوا على مقالات نوال السعداوى ... يعنى لا عرفت تبقى راجل ولا فضلت ست زى ما هيه .... والنوعية دى من الستات بتبقى نهايتها دايما الطلاق ... طلاق مادى بقى طلاق معنوى مابتفرقش ... والاطلاق يعنى اثار نفسية على البنية حبيبة امها .... اقلها  كره الاب ... وكبرت البنية بلا هوية ولا حنية ... واتوحد الاب مع الرئيس .... ويسقط يسقط حسنى مبارك .

هوه بقى فيه عرق صعيدى ... فلوس وعيلة وتقاليد ... والعلام فى الغرب مع تربية الصعايدة الناشفة تعمل صراع ... بقى الواد لا عارف يبقى الواد الغربى المفتح ... ولا عارف يبقى الصعيدى القفل ... طلق الغربية وعلشان يبقى حر ومايشلش مسئولية ابن ضهرة .... قال انا بتاع الحرية ... الواد يعتقد(من العقيدة ) اللى هوه عايزة ... ولان تربية الصعايدة بتكتم على النفس ياولداة ... ماصدق تجيلة الفرصة وينطلق ويظهر ويبان ويبات فى مدينة الانتاج ... وكلمتين من عينة شوفونية وبرجماتية وشموليه ....على لوك سيريالى واديها يامعلم وقول وهلفط والعبط كتير واللى عايز يصدق اكتر خصوصا لما الكلام بيبقى جاى على الهوى .

واتوحد الاب الديكتاتور مع الرئيس... ويسقط يسقط حسنى مبارك .

فى الزحمة بقى ومع الصوت العالى وشحنات الكبت المتطايرة ... يتحرر الضعف ويختفى الاحساس بالدونية وعدم الكفاءة ... وحط همك على همى وعيطى ياللى مانتيش غرمانة ... وأتولد الحب ... أو هكذا توهما ... واجتمعا الشتيتان .

ولاننا فى زمن العاهات النفسية ..  اصبح المسخ قدوة وفكرة وموضة وتنظير ... والبنات الامامير بقى كل حلمها ان حد يكتب عنها مقال ويقول بحبك ... بحبك ..

والولاد افرازات مجانية التعليم بقى نفسهم يقعوا على واحده مشهورة ... والوصفة سهله ... كلمتين من عينة شوفونية على برجماتية على شموليه ...وقناة واعلانين ...

طاب ومصر .... مصر مين يا أهبل انت  ! الولادة كانت فى امريكا والجنسية بقت مضمونة وانت يا اهبل اللى حتدفع تمن التذكرة ... من تمن التذكرة بتاعة السيما وشرا اللى مانتش عايزة من تأثير الاعلانات .... وبكرة ولا بعده .. سعيد حيطلق سعيدة ... وحتفضل انت تدور على سبب الطلاق .

ملحوظة :

علشان ضميرك يبقى مستريح ... عايز تشوفنى ماعنديش اخلاق ... واطى ...  معقد ... او خيالى مريض ... او عامل ابو العريف ... او عندى حقد طبقى ... براحتك ... مش مهم ... المهم انى متأكد انى انسان ... بشر ... يعنى نص شيطان ونص ملاك ... والشيطان حب يغتال شخصية متعارضة معاه فكريا ... والملاك كتب الحكاية بدون ذكر اسماء .... عادى عادى .... ماتعرضهاش 

رسالة من الشعب المصرى للكلب اوردغان

رسالة من الشعب المصرى للكلب اوردغان

انتى ولد اوردغان عامله زيطة وزمبليطة ليه على اسيادك مصريين يا كلبة ؟... انتى ولد خنزئوره .. بدال ماتخرفى فى كلام فارغ ... روحى شوفى خيبتك ... انتى  عامله راجل على مصر سيدك ... وانتى شرابة خرج ... طرطورة ... امسحى جوخ ... وافتحى سوستة ورا فى شورت احمر للاتحاد الاوروبى  ....

انتى أدب سيس سايبة افلام سكس ومجلات بلاى بوى يتباع على رصيف قدام مدارس اولاد .

انتى اخلاق يوك سايبة خمرة بين ايدين ناس .. وعامله فيها بتدافعى عن دين اسلام .

انتى خرسيس اخلاق يوك ... حفيد سلطان تنبل ياكل زى حلوف ويلم نسوان حوالية وينام للعصر ... انتى حفيد حرامى كبير كان ينهب خير مصر ام الدنيا ويخطف عمال مهرة علشان يعملوه بنى ادم .

انتى ملعونه تربية شوارع كنتى نامى تحت كوبرى وماترضيش تقاومى تحرش ...كنتى  بتبقى مبسوطة كلبة ... جايه النهارده عاملة راجل على ام الدنيا .

يالا ملعونة تعالى لمى بدلك وفساتينك ... تعالى لمى مسلسلات مافيهاش احتشام ... مافيهاش غير فساد اخلاق ... يالا تعلى خدى اخوان زباله وامشوا سوا سوا .

يلعن ابوك اللى يدور عليك يلاقيك سنبل ياكلب يا وسخ .

بيان الشعب المصرى للكلب اوباما

بيان الشعب المصرى للكلب اوباما

احنا شعب مابيوطيش ياعم كونتا كنتى انت  ... والنجم الساطع ده تنور بيه لأمك وهيه داخلة الحمام ... والمعونه مش عايزنها ياروح امك .. والاخوان حيمشوا يعنى حيمشوا ... والسيسى رئيس مصر الى جاى ... ومصر مش حتتقسم ... وجيشها حيفضل شوكة فى ضهر امك ... وان كنت فاكر اننا مش حنجوع من غيرك تبقى اعبط اخواتك ... حناكل جبنه قريش من لبن الحاموسة اللى فى الزريبة بالعيش البتاو اللى من غلتنا .. وناكل ونشبع ونهيص ... والفراخ اللى على السطح ... حندبحها ونسلقها ونحمرها على الكانون اللى حنحمى ناره بالجله ... ونوديها للسيسى ايوه السيسى ماهوه راجلنا اللى حامينا  يا كلب السرايا ... ومواصلاتنا ... حتبقى الحنطور ... وننقل عفشنا على الكارو... ماهو ماعندناش اكتر من الحمير ... واتصالتنا بالتلغراف وعلاجنا لما نتعب حيبقى بالكراوية والينسون ... ماهو مش حيجيلنا الامراض اللى صدرتوهالنا من عيشيتكوا الوسخة ... وشوف بقى حتبيع ادوية الكولستيرول فين يابن العايبة ...

احنا شعب مابيوطيش ... وان ارضنا عطشت نرويها بدمنا ولو مش مصدق ... راجع التاريخ ...حتعرف ان أى كلب زيك حب يعمل فيها دكر ... كان بيموت على بوابة مصر المحروسة باهلها ... يلعن ابوك على ابو امك .. على ابو ابن الوسخة عميلك الخاين واكل ناسه اللى اسمه البرادعى .

رسالة الى الاخوان جمعاء ... جمعاء (3)

رسالة  الى الاخوان جمعاء ... جمعاء (3)

أخوانى الاخوان :

تحية طيبة وبعد

حاجى على نفسى واكدب عقلى واصدق انكوا بتدافعوا عن الاسلام ... وان اهم حاجة فى حياتكوا نصرة الدين الاسلامى ... واسلاميه اسلاميه ... والاسلام هو الحل وكدهوه ... وحصدق كمان انكوا عايزين تستشهدوا فى سبيل الله والاسلام... وحصدق كمان انك متوضى ومغتسل ومستعد للشهادة ... كل ده انا مصدقة ... كل ده جميل ... بس ليه مش بتسأل نفسك سؤال مهم .... هوه مش احسن اعيش علشان الاسلام بدل ما اموت علشان الاسلام ؟؟؟؟؟

نفنطها مع بعض ... لو رحت عند الحرس او المنصة وخدت رصاصة جابت اجلك ... بماذا نصرت الاسلام يا اخى العزيز ... بلاش دى ... هناك احتمالين ... بعد ماتموت ... الاحتمالين بأيد ربنا سبحانه وتعالى مش بأيد حد تانى مهما طالت دقنه أو على كادرة ...الاحتمال الاول انك تكون شهيد فعلا وتخش الجنه ... والاحتمال التانى ان ربنا يعتبرك منتحر ... او قاطع طريق .. او مروع لخلق الله ... ودى ربنا بيدخل فيها جهنم وبئس المصير...يعنى الجنه واحياء عند ربهم مش مضمونة يامعلم زى مابيحاولوا يقنعوك... كل الحكاية 50%.... وانت وبختك ياجميل ... السؤال هنا : هل حياتك مش مهمة للدرجة دى ... بلاش حياتك ... هل اخرتك وحياتك الابدية تستخمل مغامرة الفشل فيها نسبته 50%؟؟؟؟ ... جاوب بس بعد ماتفكر ...

نيجى بقى للاحتمال التانى ... انك تعيش فى سبيل الله والاسلام ...تخيل نفسك لو عشت فى سبيل الاسلام ... ودعيت للدين بالحكمة والموعظة الحسنة وبقيت قدوه كتير يتمنوا يبقوا زيك فى خلقك وشهامتك وامانتك وصدقك وايثارك ... شوف بقى حتاخد ثواب اد ايه من ورا اللى حيقلدوك ...اى نعم ماوعدكش ان مافيش نار ... بس اللى اقدر ااكد عليه ان نسبة الجنة حتكون اكتر بكتير من من 50% .

مش عيب انك تفكر ...العيب انك تسيب حد يفكرلك ... حتى لوكان طويل الدقن أو عالى الكادر .

الخلاصة : انا عارف ان احنا فى جاهلية ... وان حمزاوى وخالديوسف وايناس الدغيدى هما ابو جهل وابو لهب ومراته بتوع العصر ... بس صدقنى ماتجيش كده .. الرسول بنى الانسان والمجتمع الاول وبعدين بنى الدولة ... مش تقولى ان الرؤيه كانت انك تقفل النور الساعة 10 باليل علشان الشعب يقوم يصلى الفجر .... بصراحة انا شايل منكوا ياما ... وعلى رأى المثل ياقلبى يا كتاكت يا ما انت مليان وساكت ... بس فى الاخر رغم انهم بيقولوا عليه ليبرالى وعلمانى وشيوعى ...الا ان  النصيحة واجبة لاخوك فى الاسلام ... انا مسلم وموحد بالله ياجدع ... فوق الله يحرقك.

بالمناسبة ... مش الدين الاسلامى محتاج له جيش يحميه؟ ... ولا انت ناوى تحمية بالملتوف... حافظ على الجيش مش تهده يا اهبل 

رسالة الى اخى العنصر الاخوانى التابع(2)

رسالة  الى اخى العنصر الاخوانى التابع(2)

أخى العنصر الأخوانى :

تحية طيبة وبعد

التابع دى مش شتيمة ... لاننا كلنا تابع وقائد فى ذات نفس الوقت... هيه دى الدنيا وهوه ده قانونها .... انا مقدر انك فى صراع وانك بين نارين يامعلم ... لو اعترفت ان الاخوان غلطانين فى اللى بيعملوه ... اصدقائك الاخوه فى الله حيقولوا عليك خاين ويمكن يكفروك ويقولوا عليك بعت دينك ... ولو قولت ان الشعب فى 30 يونيو فوتوشوب ... الشعب حيشتمك ويجرى وراك فى الشارع ويحدفك بالطوب ..دا غير البلطجية الوطنيين حيقطعوك بالسيوف ....ولو استحملت كلمة خاين وكافر وبايع دينه من الاخوه الاخوان ... مش حتستحمل نظرة الشماته فى عيون الشعب ولا قولت ياعبيط ما قولنالك ... على الرايحة والجاية .... ولو استحملت نظرة الشماته وقولة ياعبيط من الشعب مش حتستحمل قطع الاخوان للسبوبة اللى معيشاك ... ماهو احنا برضة بنى ادمين وابأء (جمع فم بس بالبلدى )مفتوحة واكل العيش غير انه مر مبقاش بالساهل يامعلم .. مش بقولك حاسس بيك ومقدر اللى انت فيه وعاذرك ... بصراحة انا ماعنديش حل ليك ... ضهرك والحيطة يامعلم ... بس لو عايز رأيى ... خد قرارك واخلع .... ونار الشماتة وكلمة ياعبيط اللى حيتنسوا بعد فترة ... اهون من جنة الاخوان اللى حيضحوا بيك وفى الاخر برضة حينفض الاعتصام ... وقياداتك حتشرف فى السجن ... اه نسيت ... حيعيشوا فى السجن معززين مكرمين وبعد سنه ولا اتنين بالكتير عقبال ما الناس تهدى من ناحيتهم ... حياخدوا عفوا ويطلعوا على قصورهم ... اسمع كلام اخوك ... شاف ياما فى الدنيا الوسخة دى ... احنا التابعيين مش اكتر من كرات دم بيضا عايشة فى دم الكبار ... علشان تدافع عنهم وبعد ماتدافع وتموت علشانهم وتبقى صديد يطهرونا بالبيتادين ويبقوا قرفانين مننا ... ايه ده  ... يع ... خراج ... وياخدولنا مضاد حيوى 500

رسالة الى اخى القائد الاخوانى (1)

رسالة  الى اخى القائد الاخوانى (1)

أخى القائد الأخوانى :

تحية طيبة وبعد

والله العظيم انا حاسس بيك ومقدر مشاعرك وعارف اد ايه انت موجوع وتعبان ... وعارف معنى انك تتعب وتشقى وتتسجن وتتمرمط فى امن الدوله ويضيع شبابك على الاسفلت وماتشوفش ولادك ولامراتك بالسنين... عارف يعنى ايه تقعد 80 سنه تحارب فى سبيل قضيتك اللى انت مقتنع بيها وبعد ما خلاص توصل للى انت عايزة ... تلاقى فجأة بيقولولك شكرا ... شرفت وانست ... ياللا يامعلم حنرجعك السجن تانى ... احساس صعب .. قاتل ... مميت ...احساس يخليك مستعد انك تقتل وتضرب وتصرخ مش بس تعتصم فى رابعة سلمى ... والله حاسس ومقدر ... ومش عايز اقولك انى لو مكانك اعمل اكتر من كدة .. بس ماتيجى نتكلم بهدوء ... وتسمعنى واسمعك ... وتفهمنى وافهمك ... واكيد اكيد مش حتخسر اكتر من اللى خسرتة ...اسمع  الحدوتة دى وفكر فيها .

الملك ريتشارد قلب الاسد الذى يأكل خروفين على العشاء جة على رأس حملة من اوروبا علشان يستولى على بيت المقدس ويحمى المسيحيين من ظلم العرب ويحافظ على قبر المسيح من عبث صلاح الدين (على حسب معتقدة اللى هوه حر فيه ) ... ودخل حروب مع صلاح الدين الايوبى ... انتصر واتهزم زى اى قائد جيش ... وقى المعركة الاخيرة ... وعلى ايد الدمشقى اللى حضر السائل اللى حرق الابراج ... خسر نص جيشة وفرجينيا ماتت ... وكان ممكن  يكمل و يخسر نص جيشة التانى ...مش علشان الصليب وقبر المسيح والهرى ده ... لأ خالص ... الحكاية ومافيها انه حيبقى صعب عليه انه يرجع مهزوم بعد ماعشم شعبه بانه حيسوى الهوايل ... بس لأنه ملك بجد مش صاقط اعدادية ... قرر انه ينسحب ويحافظ على حياة بقية جنودة .... الخلاصة ... عادى جدا انك كقائد انك تدخل حرب وتتهزم ... بس الشطارة انك تتهزم بشرف ... والشطارة انك تحافظ على حياة اللى فاضل من جيوشك ... اه نسيت اقولك .. اوروبا بعد شوية رجعت وخدت بيت المقدس ....  يارب اكون عرفت اوصل وجهة نظرى ... اصلى ساعات كتير ببقى متخيل انى باتكلم كلام مفهوم   

الحمد لله وكل عام وانتم بخير

الحمد لله وكل عام وانتم بخير 

الحمد لله الذى عافانا من ابتلاء الاخوان 
الحمد لله الذى بلغنا رمضان بدون الاخوان 
كل سنه وانتم طيبين.... ورمضان جميل ... وفطار لذيذ ... وماء وعصير  ...وحسنات كتير 

مشاهد من مصر8 ( سيدة الحارة الأولى )

 مشاهد من مصر8

سيدة الحارة الأولى

هذا هوه لقب أم جهاد ذات الخمس والاربعون ربيعا ....أم جهاد طولها 160 سم ... ولابسة شبشب 7 سم ... ومخبية 120كجم نصهم على الاقل دهن تحت عباية سودا مطرزة من على الصدر والكمام ... وخصلتين شعر صفر بفعل مية الاكسجين مدلدلين من تحت بونيه كوروشية مظرز عاملاهولها البت جهاد اللى كبرت وبقى عندها 24 سنة ومستنية عدلها .. وش ام جهاد ابيض مدور زى البدر .. اوكان زى البدر ... ام رشا اللى بتشتغل فى الكوافير اللى فى الشارع اللى ورا بتحاول جاهدة باستخدام كل ادواتها من فتله واحمر واخضر وبودرة انها تحافظ على بقايا الجمال الربانى اللى لسه ماقدرش عليه الزمن فى وش ام جهاد .

ام جهاد معندهاش غير جهاد ... ومحدش عارف هية ماجابش غيرها ليه؟ ... اهو كله تكهنات وكلام ... اللى يقولك اصل جالها القلب من الطخن ... واللى يقولك دهون على المبايض ... واللى مابيحبش ابو جهاد بقى .. بيلسن ويقول : اصل ابو جهاد من ساعة مارجع من الاردن وهوه ماعدش زى الاول .

ام جهاد مسئولة الجمعيات فى الحارة ... والجمعيه اللى بقصدها مش الجمعية المعروفة واللى بيقبضها الاول ... وبيتعارك اللى قرعته تطلعه الاخير ... لا ... انا بقصد الاختراع المصرى الحصرى لمواجهة خلعان الحكومة من مسئولينها ... واللى بيسموها فى بعض الثقافات المصرية الفرح الكداب .... يعنى ليلة ورقص وطبل وزمر ونبطشى ودفتر  بيتقيد فيها مين دفع كام علشان يبقى دين على صاحب الجمعية يرده لما يجى الاوان ... حاجة كده زى فيلم الفرح .... بس وش بقى ... يعنى مش مضطرين نجيب عروسة وعريس ... ولا ندفع تمن نقلة عفش مش شاريينه ... وش يامعلم فك زنقة ...ماهو زمان كان اللى مالوش اهل ... الحكومة اهله ... لكن دلوقت ... وفى زمن الاوساخ ... الحكومة بتتبرى من عيالها .

أم جهاد بقى هية اللى بتمسك الدفاتر وبتظبط الليلة وبتتعامل مع موردين البيرة والحشيش والفاكهة والعيش الفينو واللحمة المفرومة والشيشة والفحم ...

الجمعية فى حد ذاتها مش حاجة غريبة ... دى نظام اقتصادى مصرى حصرى زى ماقولت... ويمكن ده اللى مخلينا لسه واقفين على رجلينا بعد تآكل الاحتياطى النقدى والديون اللى بقت للركب ...

الغريب فى الموضوع ان الجمعية حريمى ... ايوة حريمى ...كلها نسوان ...مافيهاش رجالة خالص ... والاغرب ان كل النسوان اللى بتشارك فى الجمعية مابتشتغلش ... والاغرب والاغرب ان اقل واحدة بتدفع 500جنية ... والاكثر غرابة انهم بيقعدوا فى الجمعية يغنوا ويرقصوا ويشربوا حشيش وبيرة ولا اجدع رجاله .

وهنا بتطفوا اسئلة محدش عارف يجاوب عليها ولا الحاج جوجول ذاته :

هية النسوان دى بتجيب الفلوس دى منين ؟

هية النسوان دى بتشرب بيرة وحشيش بالكفاءة دى ازاى ؟

هيه الانوثة راحت فين ؟

هما رجالة النسوان دى ايه نظامها بالظبط ؟

مش مهم الاجابة ... المهم ان الاسئلة دى وبدون مانشعر جاوبت على السؤال اللى محير الحارة .... السؤال اللى بقاله اكتر من عشرين سنة .... هيه  ليه أم جهاد ماجبتش غيرجهاد ؟

القصة مش ان طلع عندها القلب ... ولا القصة قصة  دهون على المبايض .... ولا حتى ان ابوجهاد ماعدش زى الاول ...

القصة ان أم جهاد ونسوانها .... قرفوا من الرجاله .... وقرروا انهم حيعيشوا يعنى حيعيشوا ..... وبدون رجالة   

الوساخة بين النظرية والتطبيق

الوساخة بين النظرية والتطبيق

علشان احنا فى بلد بت وسخة... علشان احنا سمحنا لولاد الوسخة  انهم  يحكمونا ... وعلشان احنا شعب ابن وسخة مالوش لازمة وعالة على حكامة ... وعلشان ولاد الوسخة اللى زينا مالهومش حق ياكلو ولا يشربوا ولا يتعلموا زى ولاد الوسخة اللى فوق .. وعلشان  احنا شعب ابن وسخة اتعود يتاطى يتاطى ... وعلشان احنا شعب ابن وسخة مابيعملش حاجة غير انه يصبر على جار السو يمكن تيجى مصيبة تاخد أُمه..... يبقى الطبيعى ان ولاد الوسخة اللى يحكموا شعب اين وسخة بالشكل ده  ... لازم يعملوا فينا اى حاجة وسخة هما شايفينها .

عارف ان فيه ناس كتير حتعاتبنى وتقولى ليه كده .. انت طول 

عمرك راجل محترم ... ليه تنزل لمستوى ولاد الوسخة دول ؟.

حأقولهم : علشان اتصدمت ... او بمعنى أصح فوقت (من 

الافاقة يعنى صحيت ) .. فوقت متأخر بعد خمسين سنه من

الوهم ابن الوسخة بتاع بلدى وحبايبى والمجتمع والناس ..

.. فوقت من ماتقولش ايه اديتنا مصر قول حاندى ايه لمصر

 ...فوقت من فيلم بكرة احلى من النهارده ومصر اليوم فى عيد

 ...فوقت من الايدى الناعمة وطوبة فضة وطوبة دهب والبرنس 

شوكت اللى بقى يعرف الفراخ البدارى من الشامورط  ... فوقت

 من ان مصر ام الدنيا ...ومنارة الثقافة ... وشمعة الفن ... 

ونوارة الحضارة ... اكتشفت انى كنت عبيط مغيب ...مجرد 

دمية صنيعة مركز النيل للاعلام .....اكتشفت ان الفلوس 

والبلطجة والسرقة والرشوة وتجارة الدين هيه الاساس

 ... واللى ممعاهوش مايلزموش ... يروح يموت ويندفن ويولع 

بميت صفيحة جاز وسخ ... علشان يوسع مكان لولاد الوسخة

 اللى معاهم ...

بس مش انا ... ابدا ياولاد الوسخة مش حيحصل ... وحقى 

وحاخدة تالت ومتلت ...ونازل يوم تلاتين ولو لوحدى ... وعايز 

اى ابن وسخة اخوانى مستغنى عن عمرة يقف قصادى ...

 والعمر واحد والرب واحد ... وان كان على العيال فليهم رب

 اسمه الكريم ... وان كان على الحساب ... ربك رب قلوب 

وعالم ومتطلع ومبيرضاش بالظلم .

نازل الميدان ياولاد الوسخة ... وحنعيش يعنى حنعيش ياولاد 

المرة الوسخة .

مع شديد الاعتزار لكل من خُدش حياؤه

اهتز عرش ملك الكيف 2

اهتز عرش ملك الكيف 2

قبل ما نتكلم عن تجار المخدرات الجدد وانواع المخدرات الجديدة اللى بتكسب قوى ومابتدخلش السجن .... لازم نتكلم الاول عن زبون المخدرات ... واللى اسمه فى عالم الماركتنج : كاستمر .. وبعد ما الدنيا اتطورت وظهر وباء ال   ام بى ايه ... بقى بيسموه الكوليج .... القصد.

السؤال: ليه فين ناس بيتشرب مخدرات وناس لأ ؟

كتر فلوس مثلا ؟ .... ابدا ... فيه ناس بتقطع من قوتها وتشغل حريمها خدامات فى البيوت علشان تجيب تمن حتة الحشيش او سيجارتين البانجو .

علام وثقافة وكدهوة ؟... ابدا ...فيه دكتور جامعة بيشرب حشيش ... وزبال طالع من سته ابتدائى مابيشربش "مع احترامى الكامل للزبال اللى بيشيل زبالتنا ".

السن مثلا ؟ ... برضة ابدا ...فيه عواجيز رجليهم والقبر بتشرب المخدرات ... وشباب زى الورد فى عز تهورة وثورته مابيشربش .

الجنس ...؟ ...مافيش فايدة ... قصدى النوع مش السيكو سيكو .... برضة لا؟ فيه ستات بتكتم وتطلع من مناخيرها ورجالة بشنبات "ايام ماكان الشنب رمز الرجوله ... قديم انا معلش .." مابيحطوش السيجارة فى بقهم .

امال ايه ياعم الحاج ؟

من وجهة نظرى ان كلمة السر هيه..... الكرامة وتقدير الذات .

فيه كرامة وتقدير ذات ... مافيش مخدرات .... مافيش كرامة وتقدير ذات ... فيه مخدرات .... ببساطة كدة .

لان البنى ادم اللى عنده كرامة .....  وعزة نفس ......ومقدر نفسه ..... ومعترف بقيمتها .... وحاسس انه موجود ...وليه كيان .... وفيه معنى لوجوده .... وليه لازمة فى الدنيا .......عمره ماحيشرب مخدرات ... لكن لو مافيش شوية الحاجات اللى فاتت دى وكمان مافيش فرق بينة وبين الكائنات الاوليه وحيدة الخليه اللى بتتغذى بالضغط الاسموزى وتتكاثر ذاتيا ....يبقى ماقدامهوش غير ادينى الحقنة بسرعة ارجوك محتاجة الجرعة .... المسكن ... المهدىء ... المخدر... للصراع المزمن داخل النفس .

ياسيدى البيه ... اللى كتير مننا مايعرفهوش ان الانسان يقدر يعيش بلقيمات يقمن صلبة ... وبق ميه يبل ريقة ... ونومة تحت شجرة وايديه مخدته ...بس مايقدرش يعيش من غير مايحس بكرامته وتقديره لنفسه واعترافه بوجودة ... بالمناسبة .. مافيش فرق بين كبير وصغير ... متعلم وجاهل ... غنى وفقير ..مصرى و اخوانى ...كله واحد ... كله بنى ادم ... كله انسان .

وان حصل وبيحصل وحايحصل والانسان يعيش بدون ما يحس بكرامته وتقديره لنفسه واعترافه بوجودة.... فى الحالة دى يدخل البنى ادم بقدم ثابته الى طريق الموت حيا .... مرارة ..... عمليات دفاعية ... حرب على النفس .. اكتئاب ....  تبلد ..... واشارات المرور بقى على طول طريق الموت حيا... هيه المخدرات باشكالها القديمة والمستحدثة .... نوع من انواع العلاج ... بس علاج وهمى من بتاع قنوات الاخوه اللى بدقن ... علاج بياخدة العيان ويمشى عليه بانتظام ... وساعات كتير يزود الجرعة ... بس العيان مابيخفش ... ولا بيموت ... بس بيرتاح ... او بيتخيل انه بيرتاح.... راحة كده وكده ... زى ماكل حاجة حوالينا كده وكده ...

ونكمل المرة الجاية ياناس ياعسل.... مساااااء الخييييير . 

اهتز عرش ملك الكيف 1

اهتز عرش ملك الكيف 1

الحشيش هوه ملك الكيف... ماعرفش ليه سموه كده ؟ ...

عمرى ماجربت ملك الكيف .. برضه ماعرفش ليه ؟ ... يمكن ادب ... يمكن دين ... عقل ... خوف ... مش مهم ... المهم النى مجربتوش ...  مع انى حضرت قعدات كتير فيها ناس بتشد وتلعلع .... بينى وبينكوا اليومين دول بأقاوم بشراسة احساس انى عايز اشرب حشيش ياسعاد ؟؟ وبرضة ما اعرفش الاحساس ده جالى منين ؟ ... يمكن علشان ده الوقت المناسب لشرب الحشيش ؟... ماهولو ماشربناش حشيش فى اليومين السود دول ... حنشربه امتى ؟ ... لما الاخوان يرجعوا السجون  مثلا ؟؟!! .... القصد.

تاجر المخدرات عموما ....حشيش بودرة .. بانجو.. ترامادول .. تاجر ذو حيثية فى المجتمع ... فلوس وعزوه وسلطه ... وسطوه وصبيان وسلاح ... حاجة كده اشى خيال ياناس ... لكن رغم كل الهيلمان ده .... بيصعب عليه  .... عايش ياعينى فى قلق ورعب وخوف ... مش عرف يلاقيها منين ولا منين ... حرس الحدود وشرطة المسطحات من ناحية ... ومباحث مكافحة المخدرات وخيانة الصبيان وكيد النسوان من الناحية التانية ... ومتنساش ندالة التجار مع بعضيها ... دا طبعا غير نظرة المجتمع .. وان كان نظرة المجتمع دى حلها بسيط ... كل الحكاية .. عجلين يندبحوا اول كل شهر للغلابة ... والدبح يكون قدام الجامع اللى بناه الحاج بعد مارجع من عند النبى وعمل فيه مستوصف ودار تحفيظ قران ... عادى ...الناس دايما بتسامح الغنى وتنسى له اى حاجة وحشة وتغنى له وتدعيله ... حتى لو كان تاجر مخدرات .... برضه مادخلناش فى الموضوع ...

صلى على النبى ...لأن تاجر المخدرات مكون رئيسى فى اى مجتمع استبدادى ظالم مش عارف يعلم ولا يشغل شبابه وبالتالى مش عارف يجوزهم ... ولا قادر يوفر حد الكفاف للغالبية العظمى منه .... يبقى تاجر المخدرات لازم يطور نفسه علشان يكبر ويكبر تجارته ... فوجب عليه ان يواكب العصر والعولمه وثورة المعلومات والانتر نت ... ولان المخدرات مش حشيش وبودرة وبانجوبس ولان فيه انواع جديدة بقالها سوق ومريدين وزباين ... فبدأ التطوير ....مخدرات جديدة ... مميزاتها فاقت التصورات .... مافيهاش حرمانيه ولا يعاقب عليها القانون .. وتجارها  قيمة كده وسيما ونجوم مجتمع ... مش كده وبس ... دول كمان بقوا مثل يحتذى به ... حلوة يحتذى دى ... بتفكرنى بالشعر العباسى اللى كنا بناخده فى ثانوى ...

نكمل المرة الجاية علشان ماتزهقوش منى ..... يالا باى   

مشاهد من مصر7 حمو الاوفيس بوى

مشاهد من مصر7

حمو الاوفيس بوى

حمو عنده 29 سنه ... معاه دبلوم صنايع قسم خراطة ... حمو ساكن فى كمبوند ابو خروف ... مداخل مجارى ... حمامات مشتركة ... سقف بلاستيك ... بلطجية للحراسة ... حمو اشتغل كل الشغلانات اللى ممكن تخطر على بالك ...انتهى بيه المطاف فى شركة مقاولات ... اوفيس بوى ... او بالبلدى فراش ... بالحقيقى بقى مرمطون ...  روح ياحمو هات عيش .. حاضر ... تعالى ياحمو اعملى قهوه ... حاضر ... روح ياحموا صلح لى الجزمة الايطالى ... حاضر .... تعالى ياحمو امسح المية اللى وقعت على المكتب  حاضر ... حاضر .. حاضر ...

انت اتأخرت ليه مواعيد الشركة 8 بالدقيقة ... معلش ... انت غيبت فى الحمام ليه ... معلش ... انت مش سامع الجرس يابنى ادم ... معلش ... انت لسه حتاكل ... معلش ...وبعدين حد ياكل طعمية فى الحر ده ... معلش ... كلمنى من بعيد ريحتك وحشه ... معلش ... طول النهار يا حاضر يا معلش .... كلمتين وبس .

مرتب حمو 400 جنية شامل  بدل الاهانه والذل وكسرة النفس .... حمو بيدفع 5 جنية فى اليوم مواصلات رايح وزيهم جاى ....

البهوات اللى فى الشركة كل واحد فيهم عنده عربية ... البهوات اللى فى الشركة بيدوا حمو مفاتيح العربية علشان يغسلهالهم ... عموا كان فرحان ... سبوبة تجيب المواصلات ويطلع بال400 جنيه خالص مخلص ... حمو كل امله انه يطلع بال400 جنيه خالص مخلص .

فى يوم اسود غطيس ... صاحب الشركة الغنى المحترم  شاف حمو وهوه بيغسل عربية واحد من البهوات ...صاحب الشركة الغنى المحترم قرر يخصم يومين لحمو .... عنده وجهة نظر ... بيقول الوقت اللى بيضيعه حمو فى غسيل العربيات ده وقت الشركة ... من حق الشركة ... من فلوس الشركة ...

ولغاية هذة اللحظة محدش عارف حمو بيعمل ايه بال100 جنية ... ماهو بيصرف 300 مواصلات ..

 ولغاية هذة اللحظة محدش عارف لغاية امتى حمو حيقدر يقاوم ومايتحولش لبلطجى .

ولغاية هذه اللحظة محدش عارف حمو عايش ازاى ... او بمعنى اصح ... عايش ليه ؟

مشاهد من مصر1

مشاهد من مصر1

الحاجة نعمات الباز فرج

الحاجة نعمات الباز فرج.... نايمة على سرير فى مستشفى مستنية الدكتور يعملها عمليه المرارة .... الحاجة نعمات الباز فرج عندها 77 سنه شقى و اربع عيال..العمليه فى السن ده خطيرة ...ولاد الحاجة نعمات قاعدين حواليها بيضحكوها وهما بيموتوا من جوه ... الواد الكبير بيصلى صلاة الحاجة ورا الستارة ... والتانى مشغل قران على الموبيل ... التالت بقى نزل يصلى فى الجامع اللى جنب المستشفى ...الرابع بقى قاعد يدعى ويقرقض فى صوابعة.... عادى ما احنا مابنفتكرش ربنا غير وقت الزنقة ... وعلشان ربنا كريم ... بيفك زنقتنا ... القصد الدكتور اللى حيعمل العمليه ... اخوان ... وبتاع البنج ... مع شفيق ... الممرضة بعد ماركبت المحلول بتتلكع علشان الاكرامية ... والتمرجية كل ربع ساعة تدخول وتسأل عايزين حاجة ... ربنا يقومهالكوا بالسلامة ...ابن الحاجة نعمات راح يتطمن من الدكاترة عن العمليه ... لقاهم بيتناقشوا فى مين احسن مرسى ولا شفيق ... والنقاش اتحول لجدال ... والصوت على ... ابن الحاجة نعمات قالهم والنبى طمنونى على الحاجة ... الدكتور الاخوان سأله انت مع د مرسى ولا مع شفيق ؟ ...

ابن الحاجة نعمات قال: امى عندها 77 سنه بتساهم معايا فى الايجار المؤقت ...وبتدى اخويا متين جنية مساعدة فى مصاريف البيت ... وبتدفع قسط التاكسى لاخويا التالت ... الرابع بقى بتدفع له قسط العفش علشان يلحق يدوق الجواز قبل مايطلع على المعاش ..الست دى لو جرالها حاجة اربع بيوت حيخربوا ... خلوا بالكوا من امى .

بتاع شفيق قال : لو كان شفيق هوه اللى مسك ماكنش ده بقى الحال ...

بتاع مرسى قال : احنا لازم نستحمل شوية ... النهضة جايه جاية .

ابن الحاجة نعمات قال : والنبى خلوا بالكوا من امى .

بعد العمليه ... الدكتور الاخوان خد اجره على داير مليم ... الدكتور الشفيقى خد اجرة على داير مليم ... الممرضة والتمرجية خدوا الاكراميه وجلدتين المحلول اللى فضلوا ... وسرنجة فيها 6 سم نالوفين ... ماهواللى بيعملوا دماغ بيدفعوا كويس .

النهاية السعيدة بقى ...

 الحاجة نعمات الباز فرج قامت بالسلامة ... والاسبوع اللى فات بعد مافكت السلك عدت على بنك ناصر قبضت المعاش .

ملناش غيرك يارب..............................................................

من نخبة لاخوان ياقلبى لاتحزن

من نخبه لاخوان ياقلبى لاتحزن

أما الجهل المركب ....فمصابة ثقيل  ...فهو جهل أولئك الذين لا يظنون بنفوسهم جهلا .... اولئك القادرون المسيطرون المترفعون ... المتكبرون ... الذين يكسون انفسهم طلاء زائفا من الفهم والذكاء ... ويبهرون غيرهم بمظهرهم الكاذب الخادع فيتولون امر سواهم ويتحكمون فى مصاير غيرهم ... والجهل فى باطنهم متأصل متحكم . (يوسف السباعى)   

انتهى زمن القهر .... وبدأ زمن الهدر

                            انتهى زمن القهر .... وبدأ زمن الهدر

القهر ... هوه كسر نفس البنى ادم مننا واخضاعة وترويضة ... بس مع الكسر والاخضاع والترويض ... بيكون فيه اعتراف للمقهور بكيانه ... فالقهر بيكون خارجى ... فاللى بيقهر مابيقدرش يأثر على حرية المقهور الداخلية ولا على اعترافة بذاتة ... علشان كدة المقهور بيقدر يقاوم القهر عن طريق التمرد أو الثورة أو الرفض ... يعنى البنى ادم بيبقى مقهور بس لسه عنده شوية ادمية وذات وكيان يقدر يعيش بيهم ويحترم نفسه ويشوف احترام الناس ليه ... وده اللى كان بيحصل لنا قبل ثورة 25 يناير المجيدة وقبل الاحتلال الاخوانى لمصر.

كنا مقهورين من حسنى وامن الولة واحمد عز ... بس كان جوانا بقايا احساس بالادمية والتمرد وان احنا ممكن نثور ونشتم ونقول لأ ... وده اللى خلانا نقوم بالثورة .. او خلاهم...... علشان انا كنت بأتفرج على  الثورة فى التليفزيون .

وبقيام الثورة الميمونة انتهى زمن القهر .... وبدأ زمن الهدر ...

والهدر بقى ياسيدى وماسيدك الا المرشد ... معناه انعدام الاعتراف بانسانية البنى ادم من اصله ... فيبدأ الانسان يتزق واحدة واحدة الى العيشة تحت خط الفقر ... العيش بطابور وكوبون ... السولار بطابور وكوبون ... الرز والزيت بطابور وكوبون ... وشوية شوية يتحول الانسان الى كائن نباتى ... بطل حتى يحلم باللحمة .... وشوية شوية تبدأ التصفيات والحصار والتطفيش والتعزيب ...(بيصفى المؤسسات ويحاصر الثوار ويطفش ساويرس ويضرب ويسحل فى الجامع )

وينزل الانسان من تحت خط الفقر الى تحت خط البشر ... ويهدر الجسد وحرمتة وحدودة ويستباح ماديا ومعنويا ويتحول الانسان الى اله ( مكنه يعنى ...حاكم التلاكيك كتير والتكفير على ودنه) .... ويصبح محظوظا وسعيدا اذا قدر يوفر لقمة العيش ليه ولعياله ..وتبدأ حالة الانكسار والهوان ويتحول الانسان  الى شىء ... و تنهار حدود الاخلاق والحرمات ويصبح كل شىء مباح ... فالشىء يقبل أن يمارس عليه أى شىء ... كما انه يمارس أى شىء ...

وأنواع الهدر كتير ... عندك هدرالطاقات : روح انت للحاجة علشان عندنا بديل اخوانى ... هدر الوعى : يقولك انت مش عارف اللى انا عارفة ... انت مش شايف اللى انا شايفة ...انت مش حاسس بالصوابع اللى انا حاسس بيها ..

كمان فيه هدر فكر ...فمعدناش فاهمين اى احاجة ولا عارفين ايه اللى بيحصل ولا مين مع مين ... وبدأ الشعب المصرى المعاناة والصراع بين الاكتئاب والمرارة والتبلد وبين التمرد الداخلى والحرب على الذات المجروحة فى كيانها ...  المسحوله فى اعضائها .. وكل سنة وانت طيب ياشبه شعب .... والمجد للاخوان.

لمزيد من الدراسة يرجى مطالعة كتاب الانسان المهدور للدكتور مصطفى حجازى ...كل اللى حتعمله انك تكتب على جوجول ... الانسان المهدور + تحميل ... نزل وأقرأ واعرف بيتعمل فيك ايه واوعى تستسلم ...اللهم بلغت اللهم فاشهد .