الأحد، 17 أكتوبر 2010

الطماطم بين النظرية والتطبيق

الطماطم بين النظرية والتطبيق

من يوم ما وعيت على الدنيا ... يعنى من اربعين سنه كدة ... وانا اعرف ان الاسم الحركى للطماطم هوه المجنونه ... اه عرفت بعد كده ان اسمها قوطة وبندورة وحاجات تانيه ... بس الاسم الكودى هوه المجنونه .... ولما سألت عرفت ان اسم المجنونه دة علشان يوم يبقى سعرها فى السما ويوم يبقى الاتنين كيلو ببلاش ونص ... طاب وده معناه ايه يعنى ... اقولكوا : ده معناه ايه ..

ثانيا : ان اللى حصل للطماطم اليومين اللى فاتوا دول مش حاجة جديدة ... ماهى الطماطم حالها كده من اربعين سنه ... يعنى المفروض ان احنا نكون اتعودنا على كدة ...ومانتفاجأش

اولا : لو الطماطم بتزيد فى سعرها شهرين فى السنه ... حاجة تقرف ... طاب ماهى بترخص عشر شهور فى السنه ... حاجة كويسة ... يبقى ليه بقى الازمة النفسية وحاله الاكتئاب اللى صابت الشعب الحبيب من زيادة سعر الطماطم

ثالثا : ماتيجى نتحمل نصيبنا من المسئوليه ... ازاى ... احكيلكوا الحكاية اللى خلتنى اكتب البوست ده ...وانتوا حتعرفوا

قوم ايه مراتى من اسبوعين كدة طلبت منى اشترى كيلو طماطم وشوية خضار ... وبعد مرور الاسبوعين وبعد ثورة الطماطم اللى على النت والمدونات ومن ضمنهم انا ...دا طبعا غير التوك شو والمصرى اليوم .. والدستور الالكترونى ... اكتشفت ان احنا كل يوم تقريبا بناكل طبيخ بدمعة ... قوم سألت : هوه يامراتى العزيزة كيلوا الطماطم اللى جبته من اسبوعين فيه بركه قوى كدة لدرجة ان احنا بقالنا اسبوعين بنطبخ منه ....ضحكت وقالت ربنا يبارك ..بس لا طبعا .... قولت : امال ايه الحكاية ... دى الناس بره بتاكل ملوخيه بقى لها شهر ...علشان مشكله الطماطم ... قالت : مشكلتهم .. يحلوها بمعرفتهم ... انا طبعا فاهم مراتى وعارف انها لما ببتكلم بالاسلوب دة يبقى هيه عامله حاجة محدش عاملها ... قولت: فهمنى يا عبقرى ..قالت : فاكر لما سألت اخوك على الميعاد اللى بتبقى فيه عروة الطماطم غاليه ...(اخويا دة مهندس زراعى ) قولت : ايوه .... قالت : انا بقى قبل ميعاد العروه دى ... الطماطم بتبقى رخيصة ... اقوم اشترى كميه واعصرها واغليها واحطها فى علبه كبيرة واحطها فى التلاجة ... تيجى العروه ...تغلى الطماطم ...تولع الطماطم .. تنقص الطماطم فى السوق.... ماليش فيه .... قولت : يابنت الايه ... يعنى احنا عندنا طماطم دلوقت ... قالت ايوة تكفينا اسبوعين كمان ... دا غير ان فاضل اربع طماطمات من اللى انت جايبهم سيباهم للسلطه .......ايه رأيكم ؟ّّّ!!!

رابعا : مش حل مراتى احسن من اننا ندفن نفسنا فى المشكله ..ونسخن بعض ... وننفعل ... ومانصدق نلاقى جنازة ونشبع فيها لطم .. ونحمل رئيس الجمهموريه مسؤلية اختفاء الطماطم ... اقول لكوا اخر نكته تحزن اكتر ماتضحك ... واحد من عباقرة الافرازات المصرية ...قال ياجماعة ابراهيم عيسى اترفد مش علشان الضرايب ولا علشان مقالة البرادعى زى مانتوا عارفين ... دا اترفد لان مباحث امن الدوله عرفت انه بيكتب مقال عن الطماطم بيهاجم فيها حسنى مبارك ...وبيقول فيه ان الرئيس فى اى دوله محترمه لو الطماطم غلت عندة يقدم استقالته على طول

خامسا : اقول لكوا حاجه .....وانا عارف انها مش حتعجبكوا .... ساعات كتير بيصعب عليه حسنى مبارك قوى ........ قوى والله

هناك 4 تعليقات:

  1. ربنا يبارك لك في تفكير مرات حضرتك.. ويارييييييت الكل يكون posative و يفكر بالطريقة دي
    معاك حق كل الناس عارفةان الطماطم اسمها مجنووووونة علشان كل يوم بسعر خلاص كفاية متاجرة بآلام الشعب ونعمل ابراهيم عيسى مناضل وطني وهو..........
    انا مع حضرتك كل حاجة وحشة لازم نلبسها للريس حرااااام كل واحد يبص على نفسة الاول

    ردحذف
  2. ههههههههههههههههههه
    فعلا
    مبنصدق جناذا ويشبع فيها لطم
    وفعلا كتيييييييير بيصعب علينا

    ردحذف
  3. السلام عليكم

    هذه هي زيارتي الأولى.. وقطعا لن تكون الأخيرة..

    عجبني البوست جدا...
    تحياتي أولا لزوجة حضرتك..
    وثانيا لحضرتك على نقل المعلومة واعترافك بالجميل لزوجتك

    على فكرة أنا أمي الله يحفظها طول عمرها بتعمل كده مع كل أنواع الفواكه والخضراوات... وعمرنا ما شعرنا بمثل هذه الأزمات...!!!

    وبالنسبة لحسني ما يصعبش عليك غالي... يا عزيزي هو صحيح مش محاسب على حدوث الأزمة.. لكن على الأقل محاسب على طريقة التعامل مع الأزمة!!! وقبل كده على اختياره لرجاله الذين يديرون الأزمة (إن كانوا يديرونها أصلا)... كفاية كده!!

    يشرفني زيارتك ويسعدني تعليقك... واضح إنك قلم مميز (رغم إني بافضل استخدام الفصحى)..

    تحياتي أخي الكريم.

    ردحذف
  4. انا باعمل كده طبعا ومش فى الطماطم بس فى كل حاجه ينفع تتحفظ فى الفريزر

    مش ده موضوعنا بيصعب عليك ؟؟ طيب انا ما باصعبش عليك طيب ؟؟؟ الشعب الغلبان ما بيصعبش عليك
    هو بس الى غلطان ما خزنش الطماطم زي مراتك ؟؟


    يا دوك بكل بساطه

    كام فى الميه من الشعب عنده قوت يومه عشان يعرف يخزن عشره كيلو طماطم ببساطه

    كام فى الميه من الشعب ما عندوش تلاجه اصلا ولو عنده مافيهاش مكان اصلا انه يخزن ده يادوب حاطط فيها فرخه ونص كيلو لحمه وكيسين قلقاس وكيسين بسله

    يا دوك الازمه مش ازمتي ولا زمتك الى نقدر نخزن طماطم
    عشان احنا اساسا مش هايوجعنا لما نشرتي الطماطم بعشره جنيه

    والفكره مش طماطم بس الخضار كله فى السوق بضعف التمن

    ومش الخضار بس كله كله بيعلا فوق


    الفكره فى الغلبان الى بيروح كل يوم يشتري اكل بيته على اد ما ربنا اداله

    فى الى اساسا ما عندوش اكل النهارده مش الى مخزن اكل شهر

    ما بيصعبش عليا
    وما باسامحوش ومش هاسامحه وهناخد حقنا يوم الحق فى دار الحق بيد الحق

    كل راع مسؤل عن رعيته والى مش قادر يطلع بره

    ردحذف