الثلاثاء، 2 نوفمبر 2010

الحِدِق عمره ما يطق

الحِدِق عمره ما يطق

مشكلة تؤرق الشباب من الجنسين ... ومش بس الشباب ... دا كمان العواجيز من الجنسين ... ولو عايز الحق كل البنى ادمين من الجنسين .... فلان ذكى والمعى ...بس فلوسه قليله ... فلانه حلوه وامورة وبنت ناس ... بس المعفنه هيه اللى اتجوزت وجالها شبكة الماظ ... فلان بيطلع الاول وبامتياز ... وابو مقبول هوه اللى بيوصل .. فلانه عندها مشكله فى نطق الرة والسين والميم والنون والبه ...ومذيعة مشهورة ؟!!!! ...مشكله... تجيب احباط للبنى ادم اللى شايف نفسه كويس ... او هوه كويس فعلا ... ومن ناحية تانية ...مشكله للى نفسه يفهم ...ويلاقى جواب على السؤال اللى محيرة ... طاب ازاى يا عالم ؟؟؟؟!!!!...

ستى وشلتها قالوا : الحظ لما يواتى يخلى الاعمى سعاتى والمكسح عجلاتى ...والمثقفين بتوع الفلسفه والمنطق قالوا : الدنيا زى البحر ...فيها سمك اشكال والوان ... وشطارتك فى الصيد ماتغنيش عن الحظ ... وفى السوق البياعين بيقولوا : يدى الاهبل علشان الحدق يطق .... وربنا قال فى حديث قدسى : ان الله يعطى قليل الحيله ليعى ذوى الحيله ....

انا بقى وجهة نظرى .. اللى ممكن تطلع غلط وده مش عيب ... لقيت الحل للمشكله فى كلمة : ليعى ذوى الحيله اللى فى الحديث القدسى ... ايه بقى اللى يوعى له ذوى الحيله ( الذكى) ويتعلمه ويفهمه ؟.... يعرف ويعى ويتعلم ان القصة كلها ... توفيق ورزق من ربنا ... اولا: التوفيق ان محدش يقول انا اقدر اعمل ... ربنا بس هوه اللى يقدر يعمل لو اراد سبحانه ... احنا علينا الاخذ بالاسباب ... ولو ماوصلناش للى عايزينه نعرف ان اللى عايزينه ده مهواش خير لينا ... ثانيا : الرزق ... لازم نعرف ان الرزق مش فلوس ومنصب وسلطان وبس ... لا دا فيه حاجات تانيه مابناخدش بالنا منها ... العقل رزق .. الصحة رزق .. الاولاد رزق .. الزوجة الصالحة رزق ... وبدال ما طول النهار بنغنى ونرد على نفسنا ونردد لا حيلة فى الرزق ... لا حيلة فى الرزق ... واحنا بنغلى من جوانا ... ونبص على اللى جنبنا .. ونقارن نفسنا بيه ... ونلوم فى الحظ والبخت والعين ....نرضى عن نفسنا ونفرح باللى عندنا.... ونحمد ربنا على اللى احنا فية ... لاننا ببساطة ... لو رحنا مكان اللى احنا بنقارن نفسنا بيه ... وشايفينه مايستاهلش النعمه اللى هوه فيها ... مش حيننبسط ... لاننا حنشوف حاجات ماكناش شيفينها واحنا فى اماكنا ... وساعتها حنتمنى نرجع للى كنا فيه ... دا غير الجريمة الكبيرة اللى احنا بنرتكبها واحنا مش واخدين بالنا ... وهيه ان احنا بنحاسب ربنا ( حاشاه) فى اللى بيديه لغيرنا ...

نصيحة من واحد نفسه فى حد يديله النصيحه : ماتقارنش ... ماتلومش ... ولو لازم يعنى ومش قادر تمسك نفسك ... قارن بينك وبين نفسك ... وماتلومش غيرنفسك ... حتكتشف حاجتين ... الاولانيه انك فى نعمه لو خدت بالك منها ... حتحسد نفسك عليها ... والتانيه .. انك حتلاقى نفسك رغم انك مقصر فى حاجات كتييييير برضه واخد حاجات كتيير ماتستاهلهاش ...

اهدى كده الله يخليك ... وعيش وسيب غيرك يعيش .... دى الدنيا سهله وحلوه ........ بس للحدق

على فكرة انا نسيت اقول حاجه ...... انا نفسى ابقى حدق

هناك 5 تعليقات:

  1. كلام جميل اوى
    المشكلة ان الناس عارفة كلللللللل الكلام ده
    ومع ذلك محدش عاوز يفهم
    لو فهموا والله هنعيش فى جنة
    لو فهمنا كلنا اكيد هنعيش فى جنة

    ردحذف
  2. انا الحمد لله في غالب الاحيان بكون فاهمة وراضية ومتصالحة مع نفسي لابعد الحدود ومتأكدة ان مش حيحصل الا اللي ربنا كاتبه صح اوقات الشيطان بيوسوس لي لكن سرعان ما استعيذ بالله منه واعود لطبيعتي
    انا اللي اكيدة منه ان نصيب كل واد مننا في الحياة هو 24 قيراط بس متشكلة يعني النسب مختلفة لكن الحصيلة هي 24 قيراط لكل منا
    دمت بكل الود

    ردحذف
  3. كده هارد عليك ببوست بحاله

    بس هاقولك على حاجه ...يؤتي الحكمه من يشاء .. ومن اوتي الحكمه فقد أوتي خيرا كثيرا

    وده الرزق الوحيد الى ربنا قال عليه خيرا كثيرا

    فى ايات الرزق الموجه للانسان

    المهم لازم يكون عندنا جزء من الحكمه عشان نحس بالنعم الى عندنا

    المصيبه الاكبر فى الى كمان بيحس ان الناس كلها احسن منه عشان حظهم حلو مش عشان هما مجتهدين ولكل مجتهد نصيب
    هى اصلها متلازمه برضه مش فكرة حداقه ولا ذكا وحده ولا حظ وحده

    توفيق من ربنا واخذ بالاسباب وسعي الاثنين مع بعض

    تحياتي يا فندم وما قولتليش اعمل ايه فى الليالي

    ردحذف
  4. بسم الله ماشاء الله
    والله عندك حق
    بس

    ردحذف
  5. لو عرفتم الغيب لـخترتم الواقع .... الحمد لله ... لازم الواحد يدور على النعم اللي ربنا مدهاله قبل ميبص لغيرة وسعتها هيقول الحمد لله

    ردحذف