الأربعاء، 19 مايو، 2010

الزمن 1

الزمن 1

الزمن اللى الدنيا كلها تعرفه ...عبارة عن ماضى وحاضر ومستقبل.

ماضى نستفيد منه ...وحاضر نعيشه... ومستقبل نفكر له ونعمل له ...ده الزمن عند البنى ادم الطبيعى اللى ماعندوش اى عاهات نفسية أو اى نسبة من نسب التخلف ....لكن لما البنى ادم يعيش حياته كلها فى الماضى أو فى الحاضر أوفى المستقبل ... يبقى البنى ادم دة يا اما عبيط او متخلف عقليا ... وفيه احتمال تالت حأعمل نفسى مش واخد بالى منه...وهوه ان البنى ادم ده بيسطعبط او بيستهبل..

لوبصيت معايا كدة على الناس اللى فى مصرنا الحبيبة – ربنا يبشبش الطوبة اللى تحت راسها – حتلاقى الناس 3 انواع ... النوع الاولانى

.. ليل نهار بيصرخ ويزعق وينادى ...عايزين نرجع زى زمان .... ده طبعا على اساس ان زمان كان حاجة جميلة ... يعنى لا كان فيه حروب ولا اسرائيل كان بينها وبين القاهرة ساعة زمن بالاتوبيس ... والطرق كانت زى الفل والتليفونات بتتركب فى ساعتها ..مش بعد عشرين سنه من تقديم الطلب ... ولما كانت بتتركب ...ماكانتش الخطوط تدخل على بعضها ...كمان ماكنش فيه كوبونات بتتوزع على الناس علشان يجيبوا بيها الجاز علشان يولعوا البابور - وفى بعض اللهجات الباجور- واللى مايعرفش الوابور ودة اسم تالت لنفس الجهاز يسأل عليه سته ربنا يديها الصحة ... كمان ماكنش فيه قانون طوارئ ..ولاكان فيه زوار فجر ولا كان حد بيتاخد من وسط عياله ومراته ... والدبان الازرق كان بيعرف مكانه بسرعة لو اتاخد يعنى... وساعات الدبان العادى كمان كان بيعرف هما ودوا الغلبان ده فين .... ماكنش فيه عاطل كله كان بيتوظف ... الاداب كل بيشتغل فى وزارة الصحة ... والدكتور كان بيمسك فى مصنع الحديد والصلب ... اما المهندس بقى فكان بيتعين امين مكتبه ....كله كان تمام....كله كان عايش وبيقبض ومابيعملش حاجه .... والنبى فيه عز كدة .

لوحكايه عايزين نرجع زى زمان دى بيقولها الناس العواجيز ...اللى قضوا شبابهم مع الملك وكبروا فى حضن الاتحاد الاشتراكى ...ماشى عديها ياسيدى ....اهم ناس متشعلقين باخر خيط ماسكهم بالدنيا ...لكن لما ينادى بالكلام ده الجيل الجديد ... تبقى مصيبه ...ومصيبه كبيرة كمان .... علشان هما مش عارفين حاجة مهمه ... مش عارفين انهم لو عايزين يرجعوا زى زمان ....لازم يقولوا للزمان ارجع يازمان........... آه ... يانى يابا .

والى اللقاء فى النوع التانى من انواع شعب مصر الغلبانه

هناك 5 تعليقات:

  1. زمان إيه بس؟
    قول للزمان ارجع يا زمااااان


    يمكن قصدهم زمان أوي
    لما كان فيه إسلام بجد
    ولما كان فيه أمة بتطبق شرع ربها بجد
    ولما كنا متقدمين علمياً واقتصادياً وعسكرياً
    وكنا أسياد العالم بالعلم والعمل

    ردحذف
  2. انا عن نفسي مش عايزه ارجع زمان

    اكتر حاجه باكررها فى زمان الحرب طبعا

    ما جربتش اولع الوبور بصراحه بس اكيد كان رخم يعنى
    ده انا مضايقه عشان الاشعال بتاعي باظ يا راجل
    هههههههههههههههه

    فى مثل بيقول ايه يا دوك

    خايب بلاده خايب بلاد الناس

    ممكن نخليه خايب زمانه خايب ايام زمان وبكره كمان

    بس انا عايزه فى زمان روح الشعب الى كان فعلا مهتم بالمجتمع السياسي وبينتخب وبيفكر وبيهتف بحياة الى يقوده

    عايزه من زمان قلوب الناس الى بقت سوده من كتر الغبار والدخان الى حط عليها

    عايزه من زمان الدنيا من غير مواد مشعه ولا خضار متهرمن ولا مايه بتجيب فشل كلوي ولا كل القرف الى احنا عايشينه

    عايزه من زمان احط دماغي على المخده ما اسمعش زنننننننننننن المروحه وا لمكيف والتلاجه وغيره وغيره الى بقى لازم بعد ما الجو بقى زفت من الى احنا عملناه فى الدنيا

    تحياتي لحضرتك يا فندم وايوه كده اموت فى السلاسل انا
    هههههههههههههه

    ردحذف
  3. سلامو عليكو يااسلام..
    كلامك مظبوط عشان كدة انا شايفة ان لكل زمن محاسنه وعيوبه يعنى زى لكل مقام مقال زمان:الحرب
    الحاضر:ذل ومهانة منجوة ومن برة
    المستقبل:ربنا يلطف بينا
    برجاء قبولى صديقة للمدونة

    ردحذف
  4. ماضى نستفيد منه ...وحاضر نعيشه... ومستقبل نفكر له ونعمل له هذه هي الخلاصة والوصفة السحرية لحياة سعيدة سواء على مستوى الافراد او المجتمع
    الماضي ليس كله مساوئ ولا كله محاسن علينا ان نقرأ دروسه ونستخلص منه العبر كي لانكرر اخطاء الماضي وانما نستفيد منها ونبني عليها
    الحاضر نعيشه كما يجب نعمل بجد نحافظ على حاضرنا ليبقى لنا المستقبل فحاضرنا هو اساس مستقبلنا
    المستقبل نفكر له ونعمل له ونخطط له لا العيش بمبدأ الذي يؤمن به الكثيرون احييني النهاردة وموتني بكره
    تحياتي دكتور

    ردحذف
  5. ست الحسن
    تشرفى وتنورى وتفرحى المدونه وصاحب المدونه وصحاب صاحب المدونة ... اهلا بيكى

    ردحذف