الأربعاء، 26 مايو 2010

ليالى مصرية 1

ليالى مصرية

الليلة الاولى

بقلم حنعيش يعنى حنعيش

الجمال لوحدة ممكن يجيب عريس مريش .... يقع على بوزه ويجيب شقة حلوه ... ويدفع مهر جامد .. دا غير الشبكة الاماظ ... وممكن كمان عربية الف سى سى هديه ... لكن الجمال لو معاه ذكاء ... تبقى الشقه تيجى ...والفلوس تتستف فى البنك ....والدهب يملى الشكمجية ... والعربيه تبقى 4*4 ... كل ده من غير ماحد يدايقنا ولا يقرفنا ولايعمل علينا راجل ... ويقول البسى ده وماتلبسيش دة ...ولا يقول رايحة فين وجاية منين ....ده كان مبدأ ميار فى الدنيا من يوم مافهمت يعنى ايه دنيا ... ميار كانت ذكية ... كانت بتتعلم بسرعة .. اتعلمت فى ثانوى ان البنات مابتنفعش البنات ... بالعكس ... دول بيغيروا من بعض ...ومايحبوش الخير لبعض .... وقررت انها ماتصاحبش غير ولاد ...واتعلمت برضه ...ان الولاد اطيب ... اغبى ... اهبل ...اتعلمت انها تاخد من الولاد عنيهم ومن غير اى مقابل ....الا نظرة اعجاب وكلمتين يحسسوا الواد انه احسن واحد فى الدنيا وانه ماحصلش وما اتكررش ....واتعلمت كمان ازاى تشغل مكنه العشم مع ابو عين زايغه ...لغاية ماتغرقه فى العشم وينسى اصلا هوه كان عشمان فى ايه...

ميار كانت دايما تقول الذكاء هوه اللى بيحمى البنت ... مش حجاب ونقاب واخ صغير رزل ماسك فى ديلها منين ماتروح ...ايه الشغل القديم دة ..

ايام ثانوى المدرسين كانوا بيقعدوا مع ميار بعد الحصص علشان يشرحوا لها اللى مش فاهماه ... وفى الكليه المعيدين كانوا بيظبطوا لها امتحانات العملى والشفوى .... الاساتذة بقى فسؤال ولا اتنين من اللى حيجوا فى الامتحان دا اقل حاجة تقبل بيها... وطبعا النتيجة كانت بتتعرف قبل الهنا بسنة ....وبرضه كل دة من غير مقابل يذكر ....يعنى حاجات مابتكلفش كتير ....تسبيله ...نظرة اعجاب ... كلمتين يخلوا اللى قدامها يحس انه سلطان بروناى ... وسلام ...مع نفسك انت بقى لما تروح ...ميار ماكانتش معتمدة على مواهبها الجسدية والعقلية وبس ...لا دى كانت دايما بتطور نفسها ... بتدرس فى علم النفس.... وانواع الشخصيات ... وصفات الابراج ...لأن مبدأها ان الموهبة من غير دراسة ودراسة بجد .... تموت ...والمشوار طويل والاهداف كتير .........

والى القاء فى الليلة القادمة وستكون بقلم : ندى الياسمين

ملحوظة : الحلقات ترسل بالميل



هناك 10 تعليقات:

  1. حسنا بداية جيدة في انتظار ما ستكتبه ندى لنرى أي وجهة ستتخذ الامور

    ردحذف
  2. مساء التدبيس الجامد جدا

    طب ماشي هحاول والله اكتبها وابعتهالك يا دوك قبل مااسافر الصبح


    بس الاخت ميار دي ميه ميه والله

    وعلى فكره الى هى بتقوله ده صح وميه الميه وبيحصل فعلا

    بس لا اخلاقي بالمره
    هههههههههههههههههههه

    اما نشوووووووف بقى هانكمل ازاي

    ردحذف
  3. ندى التانيه .... والتالته خواطر شابه ....والرابعة سيكو هانم ... مين اللى حيكتب الحلقة الخامسة

    ردحذف
  4. حلو الاصرار
    تحياتى
    ===
    السعادة تتواجد فى عقل السعيد لا فى الواقع الجميل المجيد/

    فكم من سعيد لا يملك من مقومات السعادة من قديم او جديد/

    وعايش متهنى ولا يملك الا البساطة وكل شىء عنده مفيد/

    بالبشاشة والسماحة والرضا شايف كل يوم من ايامة عيد/

    ويرى ما ينقصه من ضروريات كتمرين من العاب الحديد/

    تزيده لياقة وصحة وعقل سليم فى جسم حليم وكل له رصيد/

    ومن يحمد الله ويشكره على القليل يبارك الله فيه وينمو ويزيد/

    فاسعد نفسك بنفسك وخليك كل يوم شخص متفائل بفكر فيه تجديد/

    ردحذف
  5. كلام على بلاطة
    كلام جميل ...والاجمل انك تشارك معانا ... لو موافق قول ايوة بس وسيب الباقى علينا ... قول وحتسستلم حلقة من بابها

    ردحذف
  6. مساء الفل
    اخلص بس امتحانات العيل المزعج بتاعي ربنا يخليه
    وانا ها اكتب حلقة ان شاء الله
    اول ما قرأت لقيت ابو ميار وامها ضربوا في نفوخي
    بس لسه مش عارفة اركز
    احنا نتشرف ياباشا

    ردحذف
  7. علي فكرة انت جيت علي نقطة الموضوع بتاعتي الايام دي
    فعلا انا نفسي اتعلم تنمية بشرية وعلم نفس جدا حاسس انه اكيد مفيد وبصراحة شايف نفسي ان انا اوصل افكارى بطريق احسن لو اتعلمت المجال دة
    قريت في البروفايل بتاعك انك موارد بشرية
    هل حضرتك اتعلمت فعلا وازاى لو انا عاوز ادخل المجال دة واكون مدرب معتمد اعمل ايه بالظبط ؟
    ياريت ترد عليا في الموضوع دة لانه شاغلني جدا جدا

    اما بأة عن موضوع البوست عاتابعك واستفيد ان شاء الله

    مدونتك علي فكرة متابعها من فترة بس كنت مبعلقش
    خالص علي المواضيع

    تحياتي الشديدة لك

    ردحذف
  8. ستيته
    فى انتظارك بعد الامتحانات ... بس ماتقوليش مستنية النتيجه ... ناجح باذن الله ومن الاوائل كمان

    ردحذف
  9. هيثم
    ايه رايك تدخل تكتب حلقة ويكون فيها بعد تاريخى ... حتكون حلوه ... قول اه ... وربنا معانا

    ردحذف
  10. بداية حلوة قوي ومهمه كمان

    ردحذف