الخميس، 27 مايو، 2010

ليالى مصريه 2

ليالى مصريه

الليلة الثانيه

بقلم ندى الياسمين

ميار اتخرجت وبتقدير طبعا ...الدنيا اتغيرت كتير....البلد كلها واخده شكل جديد .....حتى الناس فكرها اتغير وشكلها اتغير ....بقى في حاجات غريبه كتير كانوا فوق وبقوا تحت وكتير كانوا تحت وبقوا فوق.....والى سايد دلوقتي لغة البزنس...والى بيتقال ان الى مش هايعمل فلوس بالهبل اليومين دول ويقب مش هايعرف يقب بعد كده .

ميار كان ابوها موظف محترم طول عمرهم مستورين.....اه يادوب مستورين .....بس فهمى افندي ابو ميار طول عمره عارف قيمة العلم والتعليم عشان كده علم ولاده كلهم فى الجامعه ..... ماعادا الواد احمد ابنه الصغير الى ما كانش غاوي مذاكره..... بالعافيه خد دبلوم صنايع السنه الى فاتت وكل ما ابوه يوديه شغله يشتغلها ما يعمرش فيها......

اصله متدلع....... زينب امه دلعته اوي اكمنه الصغير..... وكل ما فهمى افندي يقولها يا وليه بطلي دلع فى الواد بوظتيه تقوله يا اخويا لسه صغير بكره يكبر ويعقل ......انما ما شاء الله الواد محمد دخل كلية الطب وهايبقى دكتور ..... هو جد وفى حاله ودايما مالوش دعوه بالي حواليه وحاطط راسه فى الكتاب وبس.....ودعاء اخت ميار فى كلية اداب ونفسها تطلع صحفيه ومناكفه مش سايبه حد فى حاله لا فى البيت ولا فى الكليه هى اينعم حظها فى الجمال قليل شويه ..... انما روحها حلوه وكل الناس بتحبها .....

ميار بعد ما اتخرجت من كلية التجاره وبصت حواليها ولقت الدنيا بتتكلم بلغة المال والاموال قالت انا لازم اشتغل فى البزنس....ابوها قالها يا بنتى استنى التعيين واشتغلي فى الحكومه ده المثل بيقول ان فاتك الميرى اتمسح فى ترابه......لكن هى قالتله لا انا اخاف على هدومي من التراب وراحت اشتغلت فى شركه قطاع خاص بتاعة رجل اعمال كبير....رجل عصامي .... اصل البلد دلوقتي مفتوحه على العالم ويقدر كل واحد يبنى نفسه ويتحول فى كام سنه من صرماتي لصاحب المال والاعمال.....

اشتغلت هناك ميار بكل سهوله طبعا .... ميار لها طريقتها الخاصه ............

والى اللقاء فى الليله الثالثة بقلم خواطر شابه

هناك 13 تعليقًا:

  1. ندى الياسمين
    دى اول مرة ابقى اول تعليق ... مدونتى بقى وانا حر فيها
    شكلها كدة حتبقى الف ليله وليله ... دا فيها فهمى واحمد ودعاء وزينب ومحمد وعم العصامى .... والموضع حيكبر ... حضرى نفسك ...اوعى تفتكرى انك كده خلاص ... الدور حيجى تانى عليك وتكتب ياباشا

    ردحذف
  2. انا قريت التدوينه عندى ندى جيت اقراء قرات اول حاجه
    لدكتور اسلام بصراحه جميله والاحداث ابتدت تظهر
    وتانى ليله جميله والاحداث بتطلع تصاعديه

    ان شاء الله ممكن اكون معاكم بس الاختيار بيكون ازاى

    ياعنى مره وحده تكتب البوست وفى اخره اللى يجى فى دماغك تختاره وراك ولا فى اختيار بناء عن ترتيب معين

    ويشرفنى اكون معاكم صحيحى انا على قدى بس دا تحيه للكاتب الكبير اسامه انور عكاشه ربنا يشفى عنه ان شاء الله

    تحياتى وتقدرى وتسلم ايكم
    ندى ودكتور اسلام

    ردحذف
  3. ريتشارد
    شوف ياسيدى كله بالحجز عندنا ... يعنى الحلقة التالته حتكتبها خواطر شابه والرابعة سيكو هانم وسعادتك الخامسة واللى حيقول ايوة يبقى السادسة

    ردحذف
  4. حلوة لغاية دلوقتي وتشوقت للحلقات الجاية
    بس اعذرني منفعش اكتب معاكم لو دخلت التاريخ عتبوظ خليها في مسارها الطبيعي ...

    وبرده مجاوبتش علي السؤال اللي سألتهولك ؟

    تحياتي ومستني الحلقات الجاية ..

    ردحذف
  5. حلوة قوي قوي عجبتني بجد

    ردحذف
  6. حلوة حلوة
    شفتوا الإتحاد والجهاد والعمل بيعمل ايه؟
    مساء الفل عليكم جميعا

    ردحذف
  7. على رأي عادل امام دي احلوت أوي ياجدعان كنا امبارح في ميار النهارده احنا في ابوها وامها واخواتها واختها ربي يزيد ويبارك حاضر النهاردة حأكتب الحلقة الثالثة وابعثها لك بكره ان شاء الله

    ردحذف
  8. هوبتى
    الليلة السادسة بناعتك... انت حرة اختارى لها اللون اللى يعجبك
    هيييييه .... مين قال اخد الليله السابعة

    ردحذف
  9. بصراحة الليله حلوة والفكرة جميلة بس أنا للأسف لأيام دى مش متفرغ إنما بإذن الله أشترك عن قريب وأجى وأحجز لنفسى ليلة ويا رب تكون حلوة

    تحياتى دوما

    ردحذف
  10. الازهرى
    واحنا فى انتظارك ... قول بس انا جاهز ... وحتستلم ليله على طول

    ردحذف
  11. متشكره اوي يا جماعه على الاطراء

    وبعدين ايه يا خواطر طب انا وانا باكتب قلت يا بختتتتتتتك يا خواطر هاتلاقي ناس تتكلمي عنهم

    الدكتور اسلام كان زنقنى الصراحه فى ميار دي قلت لما اهرب بقى واجيب حبه كده نرغي عنهم


    دكتور اسلام انا سعيده بالتجربه دي اوي
    شكرا لك

    ردحذف
  12. الفكرة عجبانى
    وقريت التلت ليالى

    والموضوع شكله بدا يدخل فى احداث وصراع جامد من البداية

    معاكم ان شاء الله

    بس كده هكون رقم كام ؟

    وان شاء الله تطلع حلوة مبوظش الدنيا :D

    ردحذف
  13. ستار

    بتهيئلي الدكتور اسلام ما شافش مشاركتك هابقى انبهه

    هاتنوري يا جميل

    ردحذف