الأحد، 23 مايو، 2010

الزمن 3

الزمن 3

النوع التالت .. دا النوع الفخم قوى بقى ... عيبة انهم كان بيشتغل مع مقاول هدد قبل ما ربنا يفتحها علية ويبقى من الناس ذو الحيثية والاراء السياسية...النوع دة مايعرفش من مفردات اللغة غير كلمه... هــد يامعلم ...ده بقى زعلان من الماضى وقرفان من الحاضر ... لاطايق الخصخصه ...والابيقبل يشم ريحه القطاع العام ....مش مقتنع بالحزب الوطنى وبيتريق على الاسلام هو الحل .... بيكره الدوله الدينية ... وكفران من الدوله العلمانية ... كله وحش ...كله زباله ... كله مش فاهم ...كله مش بيحب مصر ...هوه بس اللى بيحب مصر ...وعلشان بيحب مصر يبقى لازم نهدها يابشر....ونبدأ على نضافة ... لو سألته وقولت له :ماشى ياباشا ... انا موافق نهدها ... سهله خالص .... بس بعد ما نهدها ايه الجديد اللى حتبدأ عليه ؟؟!!! تلاقيه يقولك ...هه... ازاى يعنى ... قصدك ايه يعنى ... بص انت مش فاهم ... هد بس وبعدين تفرج ... وبعدين اى حد يعنى ... اى حد ... اى حد ...عند مثلا البرادعى ... راجل متربى مع الاجانب وكان مدير وعندة سكرتيرة وسواق .. .. يعنى فاهم ادارة ... وشبعان ... مش حيبص للقمه اللى فى ايد الشعب الغلبان ...وبعدين احنا لازم نغير ماينفعش كدة ...وياسيدى لو مانفعش البرادعى ...اى حد ...المهم نغير ونتقدم ونحصل الامم اللى سبقتنا.... دا احنا مصر ياجدع ... مش اى حاجة ... دى ام الدنيا .... يعنى كل الدول دى تما .... راضعة من صدرها ... هوة فيه ايه ...اصحو يا أمم.... هيه دى مصر .

وهية دى مصر فعلا ... كل واحد شايف نفسه هوة اللى فاهم وهوه اللى عارف وهوه اللى حيحلها ... ماينفعش ... مافيش حد فاهم كل حاجه ... مافيش حد عارف كل حاجه ... وزمن التغيير بانك تقلع ملط وتسحب المعزة فى ايدك زى مالبرادعى عايز يعمل دة زمن خلص.... بح.....انتهى يابشر ....القصة اكبر من ان يبقى عندنا ديموقراطية ... وان الانتخابات ما تتزورش .... وان حسنى وعيلته يمشوا ... وان الامه فوق الحكومه .... القصه ببساطه انه لو حطيناش ايدينا فى ايد بعض ... مش حنلاقى لا ناكل ولانشرب ... .

والحل من وجهة نظرى ....عمله مهاتير محمد من 25 سنه .... مؤتمر ...بيضم الصفوة ... الصفوة فى كل حاجة ... ويرسموا خطه للبلد ... مؤتمر مافيهوش مجاملات ولا قرايب ولا نسايب ... مؤتمر للى بيفهم وبس للى بيعرف وبس ...ويحطوا خطه للبلد ويمشوا عليها .... كله يمشى عليها اللى موافق عليها واللى مش موافق ... اللى حابب واللى كاره ... كله ينفذ ....وصدقونى هيه 10سنين بس وشوفوا شكلنا بين الامم حيبقى ازاى .... آه يانى يا تيتا انت وجدو.

والله مانتوا عارفين قيمه مصر دى يا بشر

هناك 3 تعليقات:

  1. ندى
    يا باشا العفو ... سودانى ايه ومسكوفى ايه ...انا قصدى ان قليل من الطناش ... بيصلح الامور ... يعنى علشان نعرف نعيش من غير ضغط وسكر وهلاوس

    ردحذف
  2. ويحطوا خطه للبلد ويمشوا عليها

    انا كنت باكتب بوست عن القصة دي
    الثوابت التي تفتقدها مصر
    كل ما يجي لنا واحد يمشينا بسياسة أمه
    راح الواحد راحت سياسة امه
    فعلا احنا معندناش خطوط عريضة يندرج تحتها اي شيء واي حد
    معندناش قواعد تحتوي أحزاب أو تكتلات أو افراد
    انما العكس هو اللي بيحصل
    التكتلات والأفراد هم اللي بيحتوا البلد ويبلعوها في كرشهم ويأيفوها على مقاسهم
    صح الكلام ده

    ردحذف
  3. لا مسكوفي ايه انا قلت سوداني

    اه المسكوفي دول بط خنيق جدا بيكسل يقوم ياكل ههههههههههههههههههه

    السوداني تلاقي امور كده وتلاقي البطه حاطه روج ووشها مورد وماشيه تتهادى كده


    يا استاذنا الضغط موجود وحياتك من عشر سنين بيطلع كده وقت اللزوم والدكاتره قالولي جاي جاي ما تقلقيش

    بس عندي تشكيله تانيه بقى لزوم الهري فى نفسي هابقى اقولهالك بعدين
    ههههههههههههههههه

    والتعليقات اشتغلت اهوووووو
    على فكره المدونه بتاعتك مستقصداني
    وانا اموت اما حد يحط ايده على بؤي الحقيقه

    ردحذف