الجمعة، 21 مايو 2010

الزمن 2

الزمن 2

النوع التانى بقى من ناس مصر المحروسه ...هوه النوع اللى مش شايف غير الحاضر ...نوع بيحب الحاضر ... بيعشق الحاضر ... بيضحى بنفسه علشان الحاضر يفضل موجود للابد .... ( طبعا اسباب هذا الحب وهذه التضحيه لا تخفى على ذكاء القارئ العزيز )...القصد ... النوع ده بقى .. مايطيقش يسمع كلمة تغيير ... يتشنج ...ويحصل له كدة زى ماتقول نوبة صرع ...ويقعد ينادى ويتمتم ...هوه فيه احسن من اللى احنا فيه ...دا احنا فى نعيم ...ربنا يديمها ايام ويطول فى عمرها ....

النوع ده بيفكرنى بواحد قاعد قدام الدش وماسك الريموت بيتفرج على فيلم ....قامت جات لقطة عجبته ...راح مثبت الصورة ...وقعد يركز عليها ...( طبعا لسنا بصدد نوعيه اللقطة الان ).... المهم ...انه مش واخد باله ان الفيلم شغال ... وان فيه لقطات ممكن تكون احسن ...واحداث ممكن تكون اعمق ... ودنيا ممكن تكون بتتقلب ....لكن ابدا ...صاحبنا قاعد مبسوط وفاكر ان الصورة دى احسن حاجة فى الدنيا ....

وقف الصورة على البنيه التحتيه ومعدل نمو سبعه فى الميه وجذب استثمارات اجنبيه (معظمها غير مباشر )... وما عرفش ان الفيلم جرى ... وان المستثمرين الاجانب دخلوا البورصه وقلّبوا الشعب والحكومه وروّحوا يروّشوا بفلوس المحروسه واهلها ...

وقف الصورة على الافارقه اللى لابسين ريش الديوك ومعلقين حلقان فى مناخيرهم ويبيطبلوا ويرقصوا زى المهابيل ...وما عرفش ان الفيلم جرى وان الافارقة الطيبين الهبل دول بقى لهم مصالح وبيدوروا على المية بتاعتهم وبيعملوا اتفاقات احنا مش فيها ....ماهى الصورة واقفه عند معاهدات من ايام الهكسوس ...

وقف الصورة على ان المصرى كرامته مصانه وحقوقة محفوظه ...وبنى ادم قيمه وسيمه ...ومايعرفش ان الفيلم جرى وان المصرى ملهوش كرامه ولاغيرة ...ماهو قدامك اهوه بيتسحل .. واستثماراته بيتولع فيها ... ولايسعنا الا ان نشجب ونستنكر الاحداث الفرديه ... تحت بند احنا اللى غلطانين ... احنا اللى حاطين قفانا فى سكة اللب....

اللى يغيظ ويكيد ويجن ويعبط ويفرس ....انه مش موقف الصورة وبس ...دا كمان بيكبرها ويلونها ويبروزها ...والاهم مصمم يقنعنا بيها ...دا على اساس ان احنا مابينشوفش قنوات غير الاولى والتانيه والفضائيه المصريه .... ومابنقراش غير الاخبار والاهرام والجمهوريه ....اعذروهم يا جماعة ...ماهم موقفين الصورة على الاعلام الموجه ... ووزارة الاعلام ومراكز النيل الاعلاميه ...واللى مبقاش ليها وجود فى العالم كله غير عندنا .... طبعا لاننا اكبر متحف مفتوح فى العالم ....اآه يانى يامه ...

والى القاء مع النوع التالت من انواع بشر مصر المحروسه

هناك 6 تعليقات:

  1. اسمح لي ان اقول لك شئ مشكلة المصريين في اعلامهم الموجه والمضلل وفي انغلاقهم عليه رغم كل عيوبه وعدم انفتاحهم على افاق اخرى تجعلهم يرون الصورة كاملة لا كما يراد لهم أن يروها

    ردحذف
  2. السلام عليكم و رحمة الله وبركاته
    أخى الكريم
    النوع ده هو اللى على السطح دلوقتى
    راكب فقاقيع الهوا اللى ان شاء الله هتفرقع بيه أو هتطير بيه بعيد عن مصرنا الحبيبة..
    تحياتى

    ردحذف
  3. لا معلش بقى ده ع لى الحال ده حضرتك يبقى مش هو مثبت الصوره عشان عجباه وعشان مش عارف ان في غيرها

    لا ده مثبت الصوره وبيستهبل وعارف وشايف كل حاجه بس مثبت الصوره

    زي بالظبط الحرامي المحترف الى بثبت صورة كاميرا المراقبه على ما يسرق هو ويعمل ما بداله

    مش قصة موقف الصوره وبيوهم نفسه

    لا هو عارف ا لحقيقه كويس بس بيستهببببببببل

    بيستعمانا

    وشاف هو الفيلم كله واحنا انضربناعلى قفانا ولمؤاخذه يعنى

    تحياتي يا دوك
    فىانتظارا لتالت

    ردحذف
  4. ندى الياسمين
    انا قولت فى البوست الاول ...ان اللى بيعمل كدة ياعبيط يامتخلف عقليا ... وفيه احتمال ثالث انا عامل نفسى مش واخد بالى منه ... وهوه انه بيستعبط او بيستهبل ... ماتعملى ياندى انت كمان انك مش واخدة بالك .... وحياة البرادعى ياشيخه اعملى نفسك مش واخدة بالك

    ردحذف
  5. طب اعمل ايه يا دووووووك ربنا خالقنى واخده بااااااااالي
    اعمل ايه والله انا تعبت ونفسي ابقى مش واخده بالي

    طب اعتبرني بطه سوداني واكتبلي روشته تعالجنى من حالة اخدان البال وانا مش هاقولك لا
    هههههههههههههههههه

    ردحذف
  6. التعليقات راسه والف سيف ما تشتغلش معايا فى البوست الجديد

    مش عارفه ليه

    بس طبعا انا الكلمتين واقفين فى زوري لازما اقولهم

    بص يا دوك انا عندي مبدأ فى اختيار الدكتور الى بيعالجنى

    المبدأ ده مقتضاه فدان ذمه وضمير وقراط شطاره


    عارف ليه عشان من غير الذمه والضمير ولو كان اشطر دكتور فى العالم واكثرهم علما وعبقريه اول لما يلاقينى اساوي جنيه هايبعنى


    وعليه انا خدت هذا القرار

    تقولي بقى البرادعي تقولي زعبله القله

    اي حد يجى يا دوك غيره انا موافقه عليه بس على شرط
    اضعف الايمان يغير الدستور بحيث انا كشعب يا سيدي حمار ابن ستين تيت ما نستحقش الديموقراطيه ولا بنفهم فيها لو ما عجبناش البقره الضاحكه الى هايتحط نقدر بعد ست سنين نغيره

    وانا ضد الوصايا على الشعوب اطلااااااااااقا

    ما اقولش لا مش هايقدروا يختاروا

    يختاروا غلط ويتعلموا من غلطهم عادي زي اي حد بيتعلم

    انا معاك مليون الميه فى حكاية المؤتمر والصفوه

    بس انت قلت ايييييييييييييييييييه

    مين جمععععععععععععهم

    ها قوووووووووول مين

    شخص زعيم قائد حاكم رئيس اي حاجه سميه زي ما تحب

    انما انا لو جيت الصبح وقفت ازعق واقول يا صفوه تعالوا

    وجمممم وخططوا ودبروا طب وبعدين

    فين الاكشن ؟؟ مين هاينفذ الاوردرز ؟؟؟؟

    محتاجين اداااااااااااااااره

    محتاجين حد يمشي قدامنا يتكلم باسمنا مش باسم كرشه وفلوشه

    بافتكر دايما مشهد فى و اسلاماه لما احب اخاطب مصر اكلم مين

    لما احب انا اخاطب مصر اكلم مين ؟؟
    مين هنا بيعبر عن مصر ؟؟
    ميييييييييين ؟؟

    ما تنسانيش بقى فى العلاج والنبى الى قلتلك عليه

    تحياتي يا دوك

    ردحذف