ليالى مصرية 6

ليالي مصرية

الليله السادسه

بقلم : هوبتي

بعد دخول ياسر لمكتب الاستاذ شعبان ويشوف ميار واقفه وفي ايديها ملف الشركه ...يطلب منها بكل حديه انها تسيب الملف ولاول مره في حياة ميار تتوتر بسبب موقف زاي دا ...موقف اضعفها ولو لدقائق ...يبص استاذ شعبان لياسر وبكل اهتمام يسأله خير يا ياسر مالك ياخى شكلك تعبان النهارده كده ليه؟ ...

ياسر ...اصلي ما نمتش كويس من امبارح والدتي كانت تعبانه شويه ويقطع حديث ياسر واستاذ شعبان دخول رؤساء الاقسام التانين عشان يبتدوا الاجتماع...

بعد نهاية الاجتماع ,يرجع ياسر المكتب وملامح الغيره والغضب ماليه وشه وبدون ما يحس يهجم علي ميار بسؤال واضح قوي فيه المشاعر الي بيكنها ليها

"كنتي بتعملي ايه عنده كل دا؟ انا جيت من نص ساعه وسالت سلمي قالت انك عنده من بدري وكل دا كنتي بتعملي ايه ؟ انتي وظفتك تسلمي الملف وخلاص"

تبص له والابتسامه الهاديه مرسومه " كنت بودي ملف الشركه وقالي استني لما تخديه "

بكل عصبيه يقولها وبدون ما يحس يمسكها من ذراعها "هو كان بيقولك ايه؟ كل دا مش معقول كل دا بتستني الملف زاي ما هو طلب اكيد كان بيقولك حاجه ؟ هو عايز منك ايه الراجل دا؟"

تبصله بصه فيها معني الانتصار علي سلمي من ناحيه ومن ناحيه تانيه المكتب كده بقي في ايديها خلاص ...

وتقوله بكل حديه وجديه "أبعد ايدك عني انت نسيت نفسك ولا ايه يا استاذ ياسر!!؟"

يبعد عنها وهو متوتر جدا ...يبص لسلمي الي كان واضح قوي عليها الغيره والغضب يبص حواليه يلاقي بعض من الزملاء ملمومين عند المكتب

يوجه كلامه لميار وعينه في عينها " انا هاغيب يومين عن المكتب والشركة لان والدتي مريضه شويه ومحتجالي اليومين دول جنبها"

يخرج بره المكتب وفي بعض الهمهمه من الزملاء "هو في ايه ؟....وأيه الي حصل لكل دا؟"

بعد ما يفضي المكتب علي البنتين ...تثور سلمي: "انتي السبب ...انتي عايزه ايه منه؟ ماتسيبيه في حاله بقي ....حسبي الله ونعمه الوكيل"

تفجر ميار القنبله في وجه سلمي: "انتي فاكره انه مهتم بيكي او حتي شايفك ...دا لو كان معجب بيكي كان بان من زمان...بصي لنفسك كويس انتي بتشتغلي هنا معاه من قبلي ...عمل عشانك كده ؟ قبل كده؟!...

وبعدين انا مش فهمه ازاي تعجبي بواحد انتي اصلا مش عجباه ولا جايه علي هواه ...

اقولك علي حاجه يا سلمي ...شوفي حد تاني شماعه ليكي ترمي عليها غضبك"

وتعد ميار علي مكتبها كالحمل الوديع كأنها ما عملتش حاجه ابداً ...اما سلمي يعتليها السكون وتبقي في حاله من السكوت طول اليوم لان كلام ميار اسر فيها قوي وكان واضح عليها...

بعد يوم عمل طويل عدي زي الهوا...جيه وقت المرواح وحصل نفس الموقف بتاع امبارح ...

لما نزلت ميار تدور علي المواصلات كالعاده ...لاقيت استاذ شعبان مستنيها بعربية وبيعرض عليها انه يوصلها للمره التانيه ...

لكنها كسفته بالزوق واعتذرت له واتحججت بوالدها المتشدد الي لو شفها معاه ...هاتحصل مشكله ليه وليها ...وكمان لمحت له ان ممكن حد من الزملاء يفهمهم غلط ...

ومن هنا سألها " ايه دا يا ميار في حد مزعلك في الشغل؟"

بكل لؤم ونعومه ..."لا يا استاذ شعبان الطبيعي انا عندي منافسين وممكن نقول انهم حاقودين ...مش عارفه اسميهم ايه بجد يا استاذ شعبان!!"

ومن هنا عرض عليها مره تالته تركب معاه بس المره دي عشان يروحوا مكان هادي يتكلموا سوي فيه ويسمع منها مين الي مضايقها في الشغل ...لكنها رفضت وللمره التالته اتحججت بوالداها وسمعته وسمعتها ...

وقالت له " انا بكره هاجيلك المكتب واحكيلك عن الي مضايقني المهم ارجوك ماتكونش زعلان مني ارجوك انا مش هاقدر اسامح نفسي المره دي لو زعلت مني "

يبتسم ليها استاذ شعبان واستشفت هي من الابتسامه دي ان اعجابه بيها بقي اكبر ...

كل واحد فيهم مشي في طريقه وعقله مشغوله بحاجه ...

شعبان بيفكر فيها وبقي شايفها انها مش بس بنت حلوة وذكيه وشاطره في شغلها ...لا دي كمان متربيه ومن عائله محافظه لانها رفضت تركب معاه العربيه اكتر من مره دا حتي لما عرض عليها يقعد معاها في مكان هادي بعيد عن عيون الزملاء رفضت عشان سمعتها ...ومن هنا زاد اعجابه وبدا قلبه يتعلق بيها .

اما سلمي ...كانت بتفكر في كلام ميار عن ياسر وانه مش شايفها ولا واخد باله منها وانها لازم تفوق من وهمها وتلاقي حد تاني يحس بيها وبقلبها.

في اللحظه دي كانت ميار ماشيه بتفكر وبتحلم باليوم الي ربنا هايرحمها من زحمة المواصلات ويكون عندها عربية خاصه بيها في الوقت الي كان كل واحد فيهم بيغني علي ليلاه ...كان ياسر بيفكر في ميار واستاذ شعبان .....ويكسر تفكيره صوت الممرضه في المستشفي وهي بتنده علي اسمه عشان يستلم تحاليل والدته ...

يرجع ياسر البيت وتفكيره كله في ميار ...يا تري هي فعلا بنت ناس اثرياء زاي ما يبان عليها من ملابسها واسلوب كلامها ... ويسرح ويسأل نفسه "ياتري بتفكر فيا زاي ما انا بفكر فيها دلوقتي؟...ياتري حاسه بيا ؟...هو في حد في حياتها !!..مش باين لانه لو في اكيد كان حبسها في القفص الذهبي من زمان "

ويبدا يشوف بخياله ميار وهي قاعده بتتكلم معاه وبتضحك بصوت عالي وهي بتنوله فنجان الشاي ويقولها حطي صوابعك بدل السكر ...وهي بترقص معاه سلوو علي المزيكا الي بيحبها لعمر خيرت ...وهي في حضنه وهو بيقولها ...."بحبك يا ميار"

في اللحظه دي قرر ياسر انه اول ما يشوف ميار يقولها عن مشاعره والي في قلبه ...

نام ياسر والرومنسيه ماليه قلبه وعنيه ومشاعره ...

صحي ياسر من النوم وكله نشاط وقرر انه في معاد الانصراف يروح قدام الشركه ويكلم ميار...

وفعلا راح الشركة بعد ما اتطمن على امه فى المستشفى .... وهوة على باب الشركة .....شاف المشهد بتاع كل يوم بيتكرر بس المره دي ...

كان في حاجة مفاجأة بالنسبه لياسر...

والي اللقاء في الليلة السابعه مع نجمه في السماء.