الأربعاء، 9 يونيو، 2010

ينفع والله ...... والله ينفع

ينفع والله ...... والله ينفع

تجربة ليالى مصرية .... اثبتت حاجات كتيير حلوه .... اثبتت ان فية شباب زى الورد يقدر يشتغل بروح الفريق ...يقدر يحط ايدة فى ايد بعض .... يقدر مايبقاش انانى .... ويقدر يعمل حاجة حلوه

اثبتت ليالى مصرية ان لسه جوانا قيم حلوة زى الوفاء لرموزنا ومفكرينا اللى بجد .

اثبتت ان احنا ممكن نبقى احسن واقوى واعلى ... لو حبينا ...لو قررنا ... لو عوزنا .... كل الحكاية ان احنا نلاقى هدف نمشى وراه.

اثبتت ان احنا مانقلش عن حد ولانفرق عن حد لا فى عقل ولا فكر ولا طاقة .

وحتثبت كمان اهم حاجة .... حتثبت ان احنا نقدر نتداول السلطة .... ونقدر نكمل ورا بعض ...وحتثبت كمان ان فية طرق كتييييير لتداول السلطة غير القضاء والقدر ....وعلية ... قررت مايلى :

قرار جمهورى الاول والاخير :

بسم الله ... باسم مصر.... باسم المدونين ...

قررت انا حنعيش يعنى حنعيش ... صاحب فكرة ليالى مصرية ومؤسسها ... اننى اتنحى عن قيادة الليالى .... ابتداء من نهاية الليلة العاشرة ... وان اسلم قيادة الليالى الى الرئيس الجديد ... ندى الياسمين .... على ان تبدأ ندى الياسمين ....مباشرة مهام الرئاسة ابتداء من الليلة الحادية عشر ...و يتم ارسال الليالى على الايميل الخاص بها لعرض الليالى على مدونتها ....

وان كان لى حق الاقتراح بعد التنحى .... فاننى ارشح خواطر شابة..... لرئاسة الليالى ابتداء من الليلة الواحد والعشرون ... ثم يتم بعد ذلك اختيار الرئيس عن طريق الانتخاب وليس عن طريق التعيين ....

اخر حاجة بقى استغل فيها سلطاتى قبل التنحى و قبل ما الم عزالى واروح اقعد فى المنتجع اللى جيبتة من السبوبة اللى طلعت بيها من فترة الرئاسة .... الحاجة دى انى ازود تقليد مهم وهوة

ان كل عشر حلقات .... حنعمل استفتاء لاختيار احسن ليلة ونعمل شهادة تقدير تتحط على مدونة الرئيس .... وانا عن نفسى حارشح الليلة العاشرة بقلم ابو ريان وانتوا فى التعليقات رشحوا اللى انتو عايزينة ونشوف مين اللى حيكسب .

والله كل شىء ممكن ... كل شىء ينفع .... بس نخلص النية ونحب بعض زى مابنحب نفسنا .... والاهم نحب مصرنا ......

هناك 26 تعليقًا:

  1. هههه ضحكتني بحكاية التنحي والله العظيم النهارده مع نفسي فكرت وقلت المشكلة اننا لن نقرأ بعد الان للدكتور اسلام مدونته اصبحت خاصة بالليالي لافاجئ بهذا القرار صراحة انا أشجعك عليه وان كنت انا عندما فكرت في الامر كنت سأقترح عليك اشاء مدونة خاصة بالليالي وتبقى انت المشرف عليها لكن غلبتني ما فكرت فيه أروع واجمل بس تعرف ااحنا منقدرش نمارس الديموقراطية الكاملة انت تنحيت لكن قبل ذلك صادرت حق من سيخلفك في اختيار خليفته وفرضت عليه اسما بعينه حتى ولو كان مجرد اقتراح لكنه ضمنيا مصادرة للحق هههه
    تحياتي لك وشكري الجزيل على مبادرتك الرائعة وعلى فكرتك المثمرة وان شاء الله تستمر وسنظل جميعا نذكر انك من له الفضل في هذا المشروع.
    انا أعرف ان شهادتي مجروحة في حلقة ابو ريان لانه أخي لكن صراحة فعلا حلقته مميزة
    دمت بكل ود دكتور

    ردحذف
  2. ايضا شئ اختيار حلقة ابو ريان الافضل فيه ظلم للاخرين لانهم من وضعوا الاساس الذي بنى عليه هو لذا في العشرية الاولى اقترح ان تكون الجائزة مشتركة بين الجميع وابتداء من العشرية التانية ننتخب اجمل حلقة عندما نصل للحلقة العشرين لان القصة الان توضحت معالمها وشخوصها بالتالي البناء عليها اصبح الحظوظ فيه متوازية للجميع

    ردحذف
  3. بصراحة انا فتحت المدونة النهاردة عشان اشترك معاكوا بس لاقيت فايتني عشر حلقات بحالهم لازم يتقروا كويس عشان أقدر أبني أحداث جديدة فوقيهم .. فياريت اللى يمسك رئيس بعد كدة يقولنا تسلسل الأحداث بإختصار وأسماء الشخصيات عشان اللى عايز يشترك ما يتوهش

    ودمتم
    :D

    ردحذف
  4. قشطه اوي

    انت تتنحى وتبدسني

    واجي كمان الاقي خواطر بتقولك مافيش ديموقراطيه يعنى سايبلي الحكم فى قلاقل
    هههههههههههههههه

    وايه
    انسانه داخله حاميه عليا وعايزاني اشتغل على طول


    اولا يا خواطر مافيش ديموقراطيه بتيجى فجأه فعلا
    بس طبعا الدكتور اسلام فاته حاجه مهمه يعملها قبل ما يتنحى
    الدستور
    فاته يحط الدستور دستور يضمن حقوق الناس بصحيح مش ا ستهبال

    وعموما انا يشرفني طبعا طبعا استضافة الحلقات
    بس الحقيقه مش عارفه انا هاقدر اعمل زي دكتور اسلام ولا لا

    وبالنسبه لموضوع الترشيحات مش عارفه احترت والله

    بس ممكن نهرب منكم ونقول زي ما خواطر قالت
    هههههههههههههههههه

    يا دوك تدبيسه لوووووووز يا فندم

    بس خد بالك مش هاقبل الا لما نعمل سوا الدستور اللائق
    اه ولا هاتسبنى احتاس لواحدي وتروح تقعد فى المنتجع يا اخويا
    الى اللقاء

    ردحذف
  5. ندى الياسمين
    الفكرة جيدة وتداولها ايضا جيد لانه يعطي فرصة لصاحب المدونة ان يستردها ليكتب ما يشاء هو ولا تبقى فقط حكرا على الليالي
    عزيزتي لما تقولين مش عارفه انا هاقدر اعمل زي دكتور اسلام ولا لا اكيد تقدري المسألة نعم فيها التزام وفيها انظباط وضبط مواعيد وترتيب جدول لكنها ليست مستحيلة وبقليل من الجهد مع رغبة وايمان بالموضوع ستستطيعين وستنجحين أكيد
    بالنسبة للحكم اللي فيه قلاقل انا حذرتك من البداية هو باع لك البيت بس ساب لك فيه مسمار جحا ههه
    حلو اننا اصبحنا اتنين الشهادة التقديرية الاولى ان ارى ان مجموع المشاركين يستحقونها ومن الان فصاعدا كلما انتهت عشر حلقات نختار بالانتخاب احسن حلقة لان الحظوظ الان اصبحت متساوية
    يالله ياست الريسة ورينا الهمة وحطي لنا ايميلك الخاص اللي حنبعث لك عليه الحلقات
    مع ودي

    ردحذف
  6. مادام هناك دستور واقتراحات فأنا أقترح تعميم الإسم إلى ليالي عربية.. سيكون ذلك أشمل وأقرب إلى هدفها بالإبداع العربي

    انسانة
    لا يمكن كتابة الحلقات دون قراءة االقصة كاملة م أجل الحبكة (دا الإ خوان بيقطعوا في التعليقات لو كانت هناك ثغرة)

    خواطر شابة
    يا خسارةانت أختي ولم تدعي د اسلام يرشحني . كنت سأشتري لك هدية بالمية الف جنيهالجائزة.. حرمت نفسك ههههههههه هههههههههههههه

    ردحذف
  7. شوف بقى ندى لما تعمل فيها ان الموضوع كبير عليها ... دا انتى قدها وقدود وبلاش التواضع دة...
    اما حكاية الدستور دى حلوة ونبدا نفكر فيها
    عرفتوا ليه انارشحت خواطر... علشان حقانية ... شوفتوا ... ضيعت على ابو ريان ... اخوها .. جايزة ميت الف جنية ,,,,
    انا مقتنع ان مافيش حاجة بتيجى مرة واحدة .... علشان كدة قولت الانتخابات بعد الرئيس التالت ... نكون اتعودنا على التداول .... بس مش نقعد نتعود على الديموقراطية العمر كلة يعنى

    ايميل ندى الياسمين موجود فى اخر الجدول

    ردحذف
  8. لبو ريان اختلف معك في اقتراحك تغيير الاسم لثلاثة اسباب
    1 الاسم حق اصيل لدكتور اسلام هو صاحب الفكرة والاسم ونحن شاركنا على هذا الاساس ولا يحق لنا التدخل بالتغير في الاسم الذي هو اساس المشروع
    2 فكرة الليالي كانت بالاساس تكريما للمبدع الراحل اسامة انور عكاشة الذي نعرف كلنا ايمانه بالقومية العربية لكن في النهاية هو مصري والليالي مسماة بهذا الاسم لهذا الغرض
    3 ميار الشخصية المحورية وكل الشخوص مصريون والمكان الذي تجري فيه الاحداث مصري اذن التسمية مبررة وذات موضوع

    ردحذف
  9. هههههههههههههههههه
    هههههههههههههههههههههه
    ايه الشغل اللى حصل دا الله يعينك يارب يا ندى

    والله هى حركه ذكيه وجميله فى نفس الوقت يا دكتور اسلام
    والله ندى اخت غاليه لينا كلنا والمعاملخ معها هاتجيب خير زى مانت كنت فى نفس المكان بالظبط


    فكرتينى بجمال عبد الناصر

    لالا لاتتنحى خضتنى والله

    ان شاء الله نكمل على خير

    عجبتنى جدا افكار بخصوص التصويت لاحسن حلقه
    فكره جميله

    وانا احب اصوت ل لحلقه التاسعه 9


    ويارب تتهنى بمنتجع السبوبه يا دكتور
    ان شاء الله

    معلش بقى انا هاتف للريس الجديد الله واجب بردو


    ندى يا ندى والنبى ياندى ارحمنى ياندى يا يا يا يا ياندى

    ههههههههههههههههههه

    اما عن الدستور والنبى والنبى حددو فتره الرياسه

    والغو قانون الطوارق ربنا يخليكو احسن انا اتعقد




    ربنا معاكم ويوفقكم ويتتم سببوبتنا على خير

    تحياتى للجميع

    ردحذف
  10. ليالى مصرية متميزة وكمان ديموقراطية
    لا لا لا ده كتير علينا اوى فى الزمن ده بصراحة ههههههههههه
    بحييك د اسلام على فكرة تداول السلطة
    وان كنت كقارئة افضل ان اقرأ الليالى من مصدر واحد فلى اقتراح ان سمحتم لى
    انشاء مدونة خاصة تسمى رواية ليالى مصرية
    وتداول السلطة فيها يعنى تنقل فيها الحلقات اللى فاتت
    ومن الحلقة الجاية يكون لندى حق الاشراف عليها
    وبعديها خواطر شابة وهكذا زى ما تحددوا
    ده مش هيشتت القارئ بين المدونات وف نفس الوقت هيحمى مدوناتكم من التدبيس فى عرض الليالى فى حلة انكوا عايزين تنزلوا حاجات تانية ..
    لكن ده ممكن يظلم حد من المشاركين بالليالى وزمن عرض البوست بتاعه مياخدش وقته

    وكمان فيه قراء لسه ميعرفوش الليالى
    وعما يعرفوا هيضطروا يرجعوا للمدونات السابقة عشان يجيبوا الحكاية من الاول عشان يفهموها
    ده طبعا صعب .. وممكن يقلل القراء او على الاقل يشتتهم

    اما انشاء مدونة خاصة فهتبقى مشتركة فى كل البروفيلات بتاعتكم وكل قراء مدوناتكم هيزوروها

    زى تجربة مدونة الضاحكون كده

    اعتقد تبقى اسهل وسريعة الشهرة والانتشار

    لكم طبعا الراى الاخير

    خالص تقديرى وتحياتى للجميع

    ردحذف
  11. حاجات جوايا
    احنا بنفكر فى كدة ... بس قولنا ان الليالى تلف على المدونات شويه علشان تتعرف وبعدين نعمل لها المدونه الخاصة بيها ... وبعدين احنا متفقين على الديموقراطيه ... اطلبوا من ندى تعمل استفتاء وان القراء والمدونين وافقوا انا متأكد ان ندى حتنفذ على طول ...

    ردحذف
  12. حاجات جوايا
    انا معك هذه الفكرة عملية اكثر وانا ايضا فكرت فيها وكانت اقتراحي في تعليقي الاول ولكن لاننا نحاول تبني فكر ديموقراطي انا قبلت اقتراح دكتور اسلام لكن الان بما اننا اصبحنا اتنثين اي صوتين ضد صوت واحد فالموضوع مطروح للنقاش والاصلح نأخذ به
    دكتور اسلام ارجو ابداء رأيك في الموضوع

    ردحذف
  13. بالنسبه لى ياجماعة الخير ماعنديش اى مانع
    بس الرأى الاول والاخير للريس ... اسألوا ندى ... ولا عايزينها مظاهرات من قبل البنية حتى ماتبتدى
    ....دة عيب الديموقراطية ... الراجل كدة باين عندة حق ولا اية؟

    ردحذف
  14. طيب عزيزتي ندى مارأيك بالموضوع سأطرح لك الشكلين معا واختاري
    1 تستمر الليالي في مدونتك ولاننا نحسب حلقة جديدة كل 48 ساعة يعني كل يومين يعني مدونتك محجوزة لليالي مدة عشرين يوم تتوقفين فيها عن الكتابة
    من جاء ليقرأحلقة جديدة عندك عليه ان يرجع لمدونة الدكتور اسلام ليقرأ الحلقات الاولى وتخيلي الامر في الفترة الرئاسية الخامسة او السادسة كم مدونة عليه أ، يقرأ ويدور بينها
    2 أن تخصص مدونة تسمى ليالي مصرية تنقل فيها الحلقات كلها في ارشيفها وتستلمين ادارتها مدة توليك الاشراف ومن بعد تسلمينها لمن بعدك وهكذا تبقى مدونتك الخاصة لك كنافذة تعبرين من خلالها عن ما تشائين
    عزيزتي هاهو الامر معروض امامك فاختاري

    ردحذف
  15. دكتور اسلام بجد انت رجل ديموقراطي
    ونعم الاختيار حقيقي لما اخترت ندى الياسمين
    وخواطر شابة

    وبجد كلامك عن الفكرة اللى حضرتك بعد ربنا كنت صاحب الفضل فيها فعلا صحيح

    وحلوة فعلا فكرة انشاء مدونة خاصة بالليالى بعد طبعا ما تتعرف عن الناس زى ما حضرتك قلت

    ردحذف
  16. قشطات جدا يا جماعه
    انا معاكم فى الكلام ده

    وانا سبق وقلت للدكتور اسلام على فكرة متابعة السابق ه اتبقى صعبه
    وهو فعلا اقترح اننا نعمل مدونه منفصله

    انا توصلت لخيارين عليكم ان تختاروا منهم

    اما اننا نعمل مدونه بحساب منفصل ونسميها ليالي مصريه وهايكون الادمن فيها الدكتور اسلام

    يدخل معاه فى وضع التاليف الى عليه الدور فى الاداره ولما يخلص يطلع بره ويجى غيره

    اما فكرة الاداره المشتركه يا سالي زي الضاحكون انا كنت من فريق الضاحكون وهى حلوه بس مش هاتنفع معانا احنا عددنا هايكون كبير وهايبقى صعب السيطره

    الاقتراح التاني
    ان المدونه تكون تحت لواء الدكتور اسلام بالاكونت بتاعه
    وبنفس الطريقه هانشتغل

    وفى الحالتين يا جماعه
    انا معجبه جدا جدا بفكرة تنقل الليالي بين المدونات لان ده هاوسع الجمهور بتاعها جدا

    خلينا نجرب التداول الاول ونشوف مشاكله ايه

    وطبعا يكون فى مدونه لليالي تنشر فيها الحلقات القديمه
    يعنى فى نهاية كل عشر بوستات ينشروا جميعا فى الليالي
    وده ممكن يبقى بشكل مؤقت لحد ما نقرر هانكمل فى التداول بين المدونات ولا هانستقر فى مدونة واحده


    اذا علت الاصوات بالحقوق فلتعلوا بالمشاركه وابداء الاراء الفعاله

    يلا يا حلوين كل واحد يقول رايه

    وبعد اذن الجميع هانعتبر فترة حكمي وحكم خواطر فتره انتقاليه لحد ما نستقر على وضع معين ونرسي قواعد الدستوووووور

    لوز يا معلمين ؟
    يلا جو اون

    ردحذف
  17. والنبى يا دكتور تعمل تبويب مخصوص لحلقات الليالي عندك عشان اخدها على رابط عندي عشان القراء الجدد

    انا حاطه رابط المدونه بتاعتك

    بس لما تعمل تبويب هاغيره

    هاقوم انام ساعه بقى ولا الريس ما بينامش فى ليلتكم دي ولا ايه
    هههههههههههههههههه

    على الله تقول معذور زفت

    هو بينام زي البقره الضاحكه مش على باله حاجه غير الكروش بس

    ردحذف
  18. تبدو فكرة إنشاء مدونة مستقلة تنقل لها كل عشر حلقات فكرة مناسبة ..
    على فكرة نايس مووف من أ إسلام يتوهنا في الدستور والسياسة عشان يربح وقت يفكر على راحته في الحلقة الجاية...
    هشتكنا وبشتكنا يا ريس... دا انت رئيس والنعمة كويس

    ردحذف
  19. لا لا لا

    شهادة حق يا ابو ريان

    الراجل مسلمنى الحلقه من امبارح

    شوفتوا الظلم بتاع الشعب بقى

    وحلقه ايه
    ضرب نار الحقيقه

    بالغيظه فيكم قريتها انا الاول
    هع هع

    ردحذف
  20. ندى الياسمين
    عزيزتي go on فكرتك جيدة وجمعت فوائد الطريقتين اولا بالتداول نضمن توسيع دائرة القراء والمشاركين وايضا بأرشفة الحلقات نضمن جمعها في مكان واحد وسهولة احالة كل من يطلب عليها
    تستحقين التحية على هذه التخريجة المتميزة
    تحياتي وودي

    ردحذف
  21. والله يا ابو ريان الليلة مكتوبة بعد ما قريت حلقتك بساعة ... وعموما ياسيدى انا لسة معايا ال48ساعة بتوعى ...
    والله ما انا عارف ارضيكوا ازاى
    ديكتاتورية مش عاجب ... ديموقراطية مش عاجب ... كويس انى سيبت الحكم ...

    ردحذف
  22. ندى الياسمين
    أرجو أن تكوني قرأت ردي على تعليقك في الحلقة 10

    ردحذف
  23. حنعيش يعنى حنعيش
    يا سيدي خد راحتك عالآخر..
    أنا في الحقيقة قلت هكذا لأن الفضول يقتلني لمعرفة مآل القصة..
    لكنك قلت إنك كتبت بعدي بساعة بسس..
    لداهية لتكون فجرت بيهم الشقة وريحت نفسك هههههه...

    ردحذف
  24. د اسلام
    اردت من جديد ان احييك على هذه الفكرة التي حمست الجميع وايقضت فينا اشياء كنا نظنها صارت دفينة ايضا جعلتنا نحس ونعيش حلاوة العمل الجماعي ولذة ان تتابع موضوعا منذ ان كان فكرة وليدة الى ان بدأ ينموا وبدأت ملامحه تظهر
    تحياتي وتقديري لك ومهما انتقلت الرئاسات ومهما كانت انجازات من سيلونك فان الفضل ينبغي دوما ان يعود لاهله لانك مقترح الفكرة ومتبنيها وايضا مقترح فكرة التداول التي ارى ان فوائدها ستظهر على المدى القريب ان شاء الله
    تحياتي وتقديري لك دكتور

    ردحذف
  25. 100 100 يا شباب
    حلوة فكرتك يا ندى بنقل كل 10 حلقات للمدونة الخاصة
    والحلقات بقى تبقى تتنقل import
    عشان تحتفظ بتعليقاتها
    وكل حد فيكم يعمل رابط واحد للعشر حلقات اللى عنده ويدرجهم مع باقى الفصول السابقة فى مدونته لسهولة الرجوع ليها
    يعنى الفصل الاول
    الفصل التانى
    الفصل الثالث
    كده
    ربنا يوفقكم يا شباب ويفتح عليكم ويرزقكم بوحى طيب ابن حلال هههههههه
    وانا ان شاء الله اول ما اسخن هنزل معاكم الملعب
    ويارب اجيب جوووووووون
    ههههههههههههه

    تحياتى وتقديرى للجميع
    سالى

    ردحذف