بطلى مياصة ياحكومة وانشفى
فية شوية حاجات غريبة بتحصل فى مصر اليومين دول .... مش عارف حتوصلنا لفين ولا حتنتهى بينا على اية ...
انا شايف خير اللهم اجعله خير .... ان كل شله فى البلد دى عايزة تعمل قانون على مزاجها .... مش علشان يحميها من اى حد يتعرض لها لا سمح الله ... لا طبعا ...دول عايزين قانون يحميهم ويديهم الامان علشان يعملوا اللى هما عايزينة ويتعرضوا لخلق الله براحتهم ....
عم الصحفى عايز قانون مايحبسهوش .. لما يخوض فى اعراض الناس وذمتهم المالية بدون دليل ولا سند ... عايز قانون يحمية لو عاز يشتم رأس الدول و رمزها ويقل ادبة...
عم المحامى عايز قانون يحمية لما يضرب وكيل النيابة ولا القاضى علشان كلامة مش عاجبة .... عايز قانون يديله الحق انه يفتح القفص وياخد المتهم يروحة ... علشان الحكم مش عاجبة...
عم العامل .... مش عايز يشتغل وعايز الحوافز تزيد ... وعايز قانون يحمية ويخلية ياخد حوافز وهوة قاعد فى البيت
عمنا الكبير بقى اللى طلع على المعاش ... وحب يتفسح ويعوض اللى فاته .... وقرر انه يزور معالم مصر السياحية ... ويزور الجوامع والكنايس ... ويشرب الشاى اللى معمول على الراكية .... فلما الناس اتلمت حوالية زى مابتتلم على اى سايح ... طلب ان الدستور يتغير ... والشوارع تترش ... والبلد تنضف ... وساعتها حيتنازل ويتكرم ويحكمنا
حتى كلام ربنا واوامرة ماعادتش عجبانه ... لا مسلمين ولا مسيحيين .... المسلمين عايزين قانون يمنع الجواز التانى ... والمسيحيين عايزين قانون يسمح بالجواز التانى
هوه فية اية ... عبط دة ولا استهبال ... جرى اية ياحكومة .... ماتنشفى شوية.... ماتسترجلى واشربى بريل .... ولمى العالم دى .... انتوا ياللى فوق ... امسكوا ايد اللى تحت ... الا لوخرموا السفينة كلنا حنغرق .... الا لما نغرق حتحسب شهادة ولا لسه فيها كلام ....
ايه والنبى الحكومة المايصة دى
معك حق الحراك موجود لكن ليس من اجل مصلحة الجميع ومصلحة البلد وانما فعلا كل يبحث على مصلحته الخاصة بنظرة ضيقة وفئوية
ردحذفملحوظة على جنب اشهار بيريل لم استطع يوما تقبله اشهار استفزازي الى اقصى الحدود وايضا تعبير صادق على حالتنا اليوم عندما اصبحت الرجولة تنحصر في شرب بيريل
تحياتي
نسيت أقول لك عود أحمد وكفارة من سجن الليالي الذي احتل المدونة لايام بحيث لم نعد نقرأ لك عقبال ندى ان شاء الله ففكرة التداول هي اسلم حل فعلا
ردحذفليه كده يا اسلام
ردحذفالراجل لازم يطلع عينه ويتخنق بس لما يتخنق مايقولش اف
ثم انت قولتها استرجلى بقى يحكومه
فوضى ثم فوضي ثم فوضي
ردحذفوربنا يستر
تحياتي
يادكتور كله بيبص لمصلحته القريبة بس
ردحذفمع انهم لو عندهم بعد نظر شويه هايعرفو ان صلاح الوضع العام
هايترتب عليه صلاح الوضع الخاص للكل
تفتكر يا دكتور اللى احنا فيه دا ممكن يتصلح ؟؟
ما تحاولش ما فيش حاجه حتتصلح أو تتغير إلا لما الناس تتغير.لا يغير الله ما بقوم حتى يغيروا ما بأنفسهم.
ردحذفريم
ردحذفممكن وممكن قوى ... وفى خمس سنين بس ... بس بشرط نلاقى رجاله بجد... ونخلص النية بجد ... ونحب مصر اكتر مابنحب نفسنا .... سهله خالص اهيه
كنا بناخد فى التاريخ دايما يا استاذنا فى نهاية كل عهد منيل
ردحذفيقولك ايه مثلا
وقد فرض الحاكم الفلاني الضرائب مما اثار غضب الشعب وبدأ الحكم يضعف نتيجه للنزاع بين فلان وفلان داخل نظام الحكم وبدأ ظهور متمردين
وهوووووووب كرسي فى الكلوب
الحكومه ضعيفه
الشعب مخنوووووووق
الحقوق ضايعه
كل فئه بتلجأ للبلطجه عشان تاخد حقها
الله وطالاما بلطجه
وطالاما تقدر
طب ما تاخد ازيد من حقها بحته
الله مش بلطجه بقى
عارف الحكومه مش مايصه
الحكومه يا دوك ممسوك عليها ذله زي ما بيقولوا
بتسد بؤ اي حد يعمل دوشه
هسسسسسسسسسسسس اسكتوا لحد ما نكت بالنهيبه من سكات
اشمعن المياصه والمياعه مش موجوده مع الناس الى بيعتقلوا والى بيتعذبوا والى بيتقتلوا كمان وما حدش يعرف عنهم حاجه
وانا معاك فى كلامك لريم ان الاصلاح ممكن
وممكن اوي اوي اوي
عارف كل الى انت قلته ده حلو وتمام
بس عارف اهم من كل ده ايه ؟؟؟
الضمير
لو واحد عنده ضمير وما بيسرقش وما بيشغلش حراميه معاه
بسسسسسسسسسسسس من غير اي مهارات تانيه البلد دي هاتتصلح بنسبة 60 %
والباقي طبعا ينصلح لو بقى فيه بس قراط مهاره اداريه واحد بس والله
تحياتي وسوري على الرغي
هيه خربانه خربانه بقى
ردحذفجرى اية ياحكومة .... ماتنشفى شوية.... ماتسترجلى واشربى بريل ....جرى ايه يا شعب ...انت كمان ما تسترجل وتشرب بريل !
ردحذفد. اسلام
ردحذفبجد انت رائع بتصيغ الكلام الجد بخفة دم مصرية جميلة
وبجد انا معاك
كله عاوز قانون يريحه من غير تعب
طيب اشمعنى الكبار والسمان والحيتان
ههو ده اللى شجع كل واحد يطلب واذا لم ينفذ نعمل اضراب
انا كمان عايزة قانون يمنع المدارس من تعيين اى حد مش تربوى
ومش مهم اتعب مع الولد وافهمه واربيه
واذا لم ينفذ حاروح اعتصم امام مجلس الشعب
حد عايز يجى معايا؟؟؟؟؟؟؟؟؟؟؟؟؟؟؟؟؟؟؟؟
وحياتك يا بني لو شربت فودكا حتي..ماهو اذا كان رب البيت بالدف ضاربا فشيمه اهل البيت الهشك بشك..
ردحذف