البقاء لله
كنت فى محافظة من المحافظات مصر المحروسة .... قولت ازور واحد صاحبى ماشفتهوش من زمان ... صاحبى دة دكتور بيطرى دفعتى ... اتصلت بية قالى عدى علية فى المديرية انا قاعد النهاردة اصل عندى نبطشية ... المهم وصلت لمديرية الطب البيطرى ... وشفت اللى عمرى ما شفتة ... مزبلة ... على فكرة حاولت كتير انى ادور على كلمة تانية اوصف بيها المديرية ... صدقونى مالقتش غير كلمة مزبلة ... زبالة .. دبان ... ناموس.... قش ... حيطان مكسرة ... كراسى من ايام حريق القاهرة ... المهم سألت على مكتب النبطشية ... ورحت استنى صاحبى الدكتور ... اودة اتنين فى تلاتة .. فيها مكتب ايديال من ايام ماكانت شركة ايديال تبع الحكومة ... علية جرايد ... قال يعنى مفرش ... ونص ازازة بيبسى لتر ... مليانة رمل ومرشوق فيها وردتين صناعى ... لونهم راح من التراب اللى عليهم ... ولقيت دفتر احوال وتليفون .... ومروحة سقف ... وورقة مكتوبة على الكمبيوتر وملزوقة على الحيطة ومكتوب فيها ... الرجاء عدم ترك النبطشية حتى فى حالة عطل التليفون ... قعدت ... وشوية جه صاحبى ... احضان وبوس وازيك وسلامات ... قالى : معلش اصلى كنت باشوف اساسى مرتبى كام ... اصل خلاص حيصرفوا لنا الكادر ... كان نفسى اسأله عن الاساسى ... بس بصراحة اتكسفت ... لكن هوة اللى قالى ... قالى : اساسية 173 جنية ... بس المرتب بيوصل ل400 جنية ... ماقدرتش اسكت ... صرخت : يانهار اسود ... خريج كلية من كليات القمة ... وبعد عشرين سنة شغل ... ومرتبك 400جنية ... قالى : مالسة فية الحوافز ... قولت له : ما الحوافز دى مش دايمة ... قالى : لا... احنا بناخد الحوافز كل شهر ... قولت ببله ماغولى : امال اسمها حوافز ازاى ... اذا كانت بتتاخد كل شهر ؟؟!!!
قالى : الحوافز بتبقى على نسبة الحضور ... يعنى لو حضرت 8 ايام تاخد 100%من الحوافز
سألت بسذاجتى المعهودة : هوه فية اوبشن انك ماتجيش الاتنين وعشرين يوم الباقيين فى الشهر ... قالى : دى حكومة يا بنى ... قولت له طاب انت بتعمل اية ؟ قالى : بأجى اقعد 8 ساعات على المكتب دة استقبل البلاغات عن انفلونزا الطيور والخنازير ... وتانى يوم اخد اجازة ... سألت : بتاخد اجازة لية ... قالى : مش نبطشية ... باخد يوم بالبدل ... قولت والبلاغات كتير على كدة ؟!! قالى : والله انا بقالى سنة على كدة ومافيش ولا بلاغ ... قولت : ليه ؟ قالى اصل التليفون عطلان ...... قولت : ومابلغتش لية ؟ ... قالى ما أنا قولت لمدير المديرية ... قالى برضة اقعد ... واكتب فى التقرير ان التليفون عطلان ... آخر اليوم اكتب انه لم ترد بلاغات وان التليفون لا يعمل ... واروح ...
هوة مين الغلطان ياجماعة ؟؟؟؟؟ الحكومة ولا الشركة المصرية للاتصالات ... ولا صاحبى اللى راضى بالعيشة السودا دى ... ولا الانفلونزا ولا الخنازير ... ولا مين بالظبط ..
عموما ... انا اول مرة اقولها ... البقية فى حياتكوا ... مصر ماتت يا رجالة
لاحول ولا قوه الا بالله
ردحذفدكتور
ردحذفوالله ما تزودش علينا الهم الواحد بجد وصل لمرحلة اخشى منها عدم العودة ...
انت كنت ممكن تقول ان نصر في غرفة الانعاش مثلا حتي تعطينا الامل ..
وبعدين ازاى مصر تموت وفيها امثلك من المحترمين الذي لم ينسى الصديق بعد هذا العمر وهذة الفترة من البعد ... طيب انت اديني مثل لبلد فيها ناس تفتكر الصديق بعد طول فراق مثل ويتحمل كل هذا التعب من اجل الصداقة ... مش هي دةمصر برضك والشهامة والرجولة و الاصالة..
ايوة صحيح كل ما قيل صحيح بس دة نصبنا بقة والحمد لله ان الناس راضية ولسة عايشة مع كل هذا السوء ..
تحياتي لك
مدونة مصر هى ...
http://ali-younes2.blogspot.com/
مدونة الحقيقية
http://ali-younes.blogspot.com/
م / علي يونس
هههههههههههه
ردحذفالبقاء لله
شكلك مش عايش معانا
^__________^
والنبي يا شيخ انت لسه واخد بالك انها ماتت؟ فكرتني بنفسي يوم سقوط بغداد.. كتبت ف ورقة: متى يعلنون وفاة العرب؟ وعلقتها فوق مكتبي.. دخل واحد زميلي قراها وابتسم بمرارة وقالي: انتي معرفتيش؟ دول اعلنوها من زمان بس الجنازة النهاردة.. يا دوب تلحقي تعزي
ردحذفعموما انا برضه ما زلت احمل بقايا امل ان اللي احنا فيه دا مش موت.. دا الم مخاض الولادة.. انما الولادة امتى؟ الله اعلم
يعنى اعمل فيك ايه
ردحذفانا مش قايلاك قبل كده بلاش انت
بلاش انت تاخد الخط ده
خليك حانعيش مش هانموت ولا متنا
وبعدين انا اتخضيت وقلبي وقع فى رجليا من العنوان لو شعري طقطق اعمل ايه دلوقتي
المهم انا شايفه ان كل الى انت قولت عليهم دول غلطانين يستاهلوا الضرب بالبراطيش وسوري يعنى
طبعا الحكومه انت عارف رايي هو اول واكبر واخر المسؤلين فى نظري
صاحبك يستااااااااهل بيتمرغ فى تراب الميري ليه ؟؟
عشان لما يبقى عنده ستين سنه يدوله متين جنيه كل شهر ومكافأه يوم لما تلالي تبقى خمسين الف جنيه
ياعم اعمل جمعيه واقبضها على المعاش
امن على نفسك وادفع قسط تأمين وانت تاخد معاش على الستين برضه
بلاش امن
افتح حساب فى البنك وحط فيه كل شهر مبلغ التامين وانت تبقى على المعاش معاك مبلغ حلو والله
طول ما احنا بنتمرغ فى تراااااااابه مش هانفلح والله
شوف انا اي واحد ما بياديش عمله كما يجب من الى شغالين فى الحكومه ويومه الاسود يوقعه فى ايدى ويتهبل فى عقله ويقولي على اد فلوسهم
ونهاره اسود وهباب لو كان طبيب او حاجه شكل كده
عموما باديله فين يوجعه
ايه الى مصبره وايه الى مقعده ما دام الفلوس مش عاجباه
بيتمرغ فى تراب الميري طب والناس ذنبها ايه
اسمحلي هو يستاااااااهل يشتغل فى المزبله
وما عدتش تقول كليات القمه الله يخليك اصل الكلمه دي مسؤله عن نص خراب التعليم الجامعي من وجهة نظري
انت كدهوا مقلب عليا المواجع على طول حتى وانا ريسه
د. اسلام
ردحذفانت مزيهل ليه كده
يمكن ما بتشوفش مبانى الحكومة فى المحافظات الاخرى غير العاصمة ومراكزها وقراها
حتشوف بلاوى
وحتضحك من المناظر
ااااااااااه
ماهو شر البلية ما يضحك
واغلب الاماكن والاعمال فى بلدنا بقت بلية
اضحك بقى
دايما بقول نفسى اطلع للمستقبل واقرا كتب التاريخ هناك ..ياترى هيقولوا ايه على الزمن بتاعنا اللى احنا عايشين فيه ؟
ردحذفكنا بندرس فى التاريخ الفرعونى عصور اسمها عصور الاضمحلال واللى هى بتكون فيها البلد حالها متدهور
اعتقد انهم ممكن يسموا عصرنا بعصر الاضمحلال بردو ،
بس المشكلة اصلا عيب ان احنا ننسب نفسنا للفراعنة حتى لو فى عصور اضمحلالهم ..
وحياتك الباقية
ردحذفلسة واخد بالك يادكتور ان مصر ماتت
وعاوز اللي يحيها من اول وجديد
تحياتي
ههههههههههههههههههههههههههههههه
ردحذفالعيب فى السميط ياسيدنا
البركه فيك دى بقت رفاااااااااااااات
وسلملى على اللى راح واللى فااااااااااان
يا دكتور انت ذكرت انك لقيت زبالة .. دبان ... ناموس.... قش ... حيطان مكسرة ... كراسى من ايام حريق القاهره ونسيت تذكر النمل ... والصراصير...
ردحذفدا انا مره من المرات على ما اتذكر كنت بزور زميله لى فى مستشفى عام من المفترض الاقى رعايه ونظافه علشان صحه المرضى
بامانه لقيت الصراصير بتتنطط على السراير والمريض نايم ولا الفئران اللى واخده المستشفى كوبرى بتتفسح عليه ولا دورات المياه يالهوووووى
صوتوا ياللى مش دارينين
اقول ايه ولا ايه
بالزمه البقيه فى حياتك الف مره
وعجبى
عايزين الولايات المتحدة الإسلامية تقوم لازم نودود لبعضنا عشان تقوم ..
ردحذفودود يا ودود .. وَدوِد .. ودوادا .. وَد (بفتح الواو).. وِد .. (بكسر الواو)
لازم تتودوادو بها (اشتغلوا وسبحوا الله بها .. صبح وليل .. ليل وصبح .. داخله خارجه .. خارجه داخله) وانشروها.
مصر مش هتموت
ردحذفمصر مش هتموت
مصر مش هتموت
حبيبتى مينفعش تموت
الامل اللى جواك هو اللى مات
هيجى اليوم اللى افكرك فيه بكلامك وانت هتندم
انت وجعتنى اوى بلما قولت(مصر ماتت يا رجالة)
احنا نموت ومصر وطننا تعيش
متخليش اللى بيحصل يكسرك ويقتل الامل فيك
مصر هتعيش رغم انف الحاقدين