نداء من غلبان مصرى
الله يكرمكوا ياجماعة .... انا شايف انكوا شايلين همنا بزيادة اليومين دول ....... يعنى اللى عايز يرشح نفسة .... واللى مش عايز غيرة يترشح ... واللى عايز يعمل ارسين لوبين ... واللى جاى من برة مستغرب ان فية حاجة اسمها فقر .... يعنى من الاخر ... اللى ليه واللى مالوش ناعى همنا .... وبيطالب لنا بعيشة كويسة ... ياعم الباشا ياللى بتدافع عن حقوق الغلابة ... شوف لك سبوبة غير انك تتاجر بينا وبهمومنا ... علشان انت ماتعرفش حاجة عننا ولا عن عيشيتنا ... انت عمرك ما كلت الرغيف ابو شلن ولا تعبت فى مجايبة ... ماتعرفش عن البدنجان غير انه بيتعمل بابا غنوج ... ويتقدم مع اللى اسمة ايه ده الكباب .... ماتعرفش انه بيتقلى ويتحشى توم وساعات يتعمل له تخديعة علشان يبقى مسقعة .... والعيال تتغدى وتتعشى وتهيص ..... ماتعرفش يعنى ايه شعبطة فى الاتوبيس ... ولا يعنى ايه تسطح على القطر علشان توفر تمن التذكرة ... ماتعرفش يعنى ايه تجيب موس لورد وتقسمة اتنين ... علشان يكفى اربع حلقات ... مارحتش مستشفى حكومة .... وسبت نفسك تحت رحمة دكتور امتياز واخد علمة من نايب مابيعرفش يدى حقنة وريد ... ماتعرفش طعم السيجارة الكليوبترا الفرط مع كوباية شاى التموين ...... ماتعرفش مكان سوق الجمعة ولا وقفت مرة على فرش تنقى قميص وبنطلون ....علشان تعيد بيهم .... ماتعرفش يعنى اية جمعية تظبطها على اول تسعة .. علشان تدفع مصاريف ولبس المدارس ...ماتعرفش يعنى ايه ابنك يستنى عاشورا ولا نص شعبان .... علشان يحقق حلمه فى انه ياخد دبوس فرخة ... مابتستناش الفرح علشان تروح انت والعيال و تدوقهم الجاتوه والحاجة الساقعة .... ماشوفتش يعنى اية خرابة بيلعب فيها عيالك بجزمة كوتش دابت من كتر الخياطة ... ماتعرفش يعنى اية تحت الرجلين .... اعرفك انا بقى ... تحت الرجلين يعنى العيال يناموا خلف خلاف على السرير علشان يكفيهم ... ماتعرفش يعنى اية تدور على ضامن يبيع ويشترى فيك .... علشان تجيب تلاجة تمانية قدم باب واحد ... تسقع لك شوية مية وترحمك من النار اللى انت فيها ... ماجربتش تشوف مراتك وهية بتبلع ذل مرات جارك علشان خدتوا منهم وصله من الدش ببلاش ...
الله يخليك سيبنا فى حالنا ... دى الكرافتة اللى انت لابسها وانت قاعد فى التليفزيون تعيط على حالنا ... توكلنا اسبوع منه يومين لحمه ... والنبى ياشيخ سيبنا فى حالنا ... شوف حاجة تسترزق منها غير عيشتنا ... ياسيدى احنا راضيين بحالنا .... وعندنا امل فى ربنا ... ان يجى اليوم ونعيش زيك ... طبعا مش زيك قوى ... لا .. على قدنا برضة .... يعنى نلاقى سرير تانى للعيال ... وناكل لحمة مرتين فى الاسبوع ... واجيب معجون حلاقة ... بدل الصابون اللى هرى دقنى .... فبلاش تستفزونا اكتر من كدة ... علشان لو سخنتونا اكتر من كدة ... انتوا اول من حيزعل ..........
طب ما احنا بقالنا خمسين سنه يا دوك محكومين من الى يعرفوا
ردحذفمن الى جاعوا وداقوا الى الناس دايقاه
من جعاااانين
بس النتيجه انهم فتحوا كرشهم علينا
اكلونا احنا شخصيا بدل ما يأكلونا
شوف جاي من بره جاي من الهند جاي من السند
مش هاتنازل عن الضمير
افكرك بس ان المهاتما غاندي كان مغترب فى جنوب افرقيا سنين طويله
ورجع وقاد شعبه فعلا بكل نجاح
انت زعلان من كرفتته ؟؟
طب هو ياعم جايبها بفلوس قابضها من بره
ما تتشطر على لابسين كرفتات زيها واكتر وحياتك بس من دمي ودمك
ويطلع يقول انا مهموم بيكم انا باعمل عشااااانكم
لا ويقول عملنا وسوينا وصرفنا عليكم يا كلاب وكلام
كلاااااااام بس
من دقنه وافتله كله فى الاخر بيصب فى كروشهم
اي حد
هاتوا اي حد
يعمل حسابه انه يبطل يسرقنا يوم فى الاسبوع وهى تمشي فله
قرااااااط ضمير اهم كتير من فدان شطاره
واهم من كل حاجه فى الدنيا
شويه ضمير يا عااااااااااااالم شوية ضمير
الدكتور الجميل إسلام
ردحذفتعبير عن المأسى جميل بس الراجل اللي جاى من برة دة يا ترة هو اخطر علينا من اللي جايين من جوة ...
شوية يلعبوا بورقة الاخوان المسلمين ...شوية يلعبوا بورقة الاقباط واللي تكسب بة العب بة ليس عندهم ضمير زي ما اختنا ندى الياسمين قالت الضمير ..بس هو فين الضمير دة ...دى كلمة اصبحت شعار ونسمع عنه في الف ليلة وليلة ..
عزيزى انا كان لية وجهة نظر تانية هي ناشئة من الاحباط بس ممكن تكون وجهة معقولة..
وجهة نظرى انة لا امل في التغيير من العصبة الحاكمة ..طيب مين في الموجدين علي الساحة عندةالقدرة علي التغيير والمواجة .. لا أحد علي الاطلاق ... طيب اية الفرق ...الفرق كبير جدا ..لان الراجل دة وهو الدكتور البردعي وان كان عندى تخوف من سبب تحركة الحقيقي الا اننى ارى والله اعلم هو الوحيد القادر علي المواجة .. لانة وان كان مسنود من الغرب فمن الممكن ان نستغل هذا الدعم لة حتي يستطيع الوقوف ضد العصابة ..
هو قال وفعلا دة حقيقي انة يقابل من يريد في الوقت الذي يريد ولا يستطيع احد منعة ودة بيحصل ..لو كان اى واحد غيرة من الغلابة الوجودين علي الساحة كانوا سجنوة او لبسوة تهمة غسيل اموال في لحظة..
المهم انة الوحيد فعلا الذي لة حصانة ضد فسادهم ..طيب يعني اية.. يعني لة هو عاوز تغيير الدستور والمواد اللي تتحكم في الرئاسة والترشيح والله احنا نقف معاه ونساندة حتي لو هو فية وفية ...طيب هانستفاد اية ...اول شيئ نستفاد تغيير مواد الزل والعبودة في الدستور ولو حتي هو حكمنا بطريقة سيئة مثلهم هيكون المكسب اننا عرفنا انة يادوبك فترة او فترتين رئاسة ويغور ويكون في الاستطاعة ترشيح من يصلح ...المهم هايكون عندنا امل اننا ولو بعد فترتين حكم هاتعود لينا كرامتنا... لكن الان لا يستطيع احد التكهن متى وكيف يزول الطغاه..
المعني انة وسيلة اخف سوء من الوضع الحالي حتي اننا نكون قد ضمنا حياة افضل لاولادنا من بعدنا ..مش مهم احنا الان ..
هذا الرئي المتاح حالين وإلا فأني لا ارى اى بارقة امل في الوضع الحالى ولا حتى من اي من هم موجودون علي الساحة...
اعتذر للاطالة لكن الموضوع جد خطير ..
تقبل مني كل حب وتقدير
م/ عي يونس
ياجماعة الخير احنا كدة بنعمل بالمثل العربى اللى بيقول يهرب من الرمضاء بالنار .... ورب الكعبة : لادول ماشيين ولادول جايين ... ولا الشعب حيثور ... عارفين ليه ... علشان الشعب هوة كمان خايف على سبوبتة ... كله خايف على سبوبتة ...
ردحذفثانيا يا جماعة الخير ... انا ما قصدتش البرادعى بس ... انتوا ليه سيبتوا الباقى ومسكتوا فى البرادعى ...
مهندس على ... اوعى تصدق ان ممكن حد من برة حيخاف على مصلحتك ... والدليل ... قوانين حقوق الانسان والمرأة والكلاب والقطط اللى بيمضيك عليها غصب عنك كل يوم ...
كل اللى نفسى فية ان احنا نفكر فى المصلحة العامة مش نطلع غلنا من دة نقوم نكيدة ونجيب دة
الموضوع ذو شجون والكلام فية لا ينتهى
وجهة نظرك تحترم ولك كل الحق فى التعبير والدفاع عنها، ولنا حق الاختلاف معك ولنا حق أن نرى فيمن أتى من الخارج مالم تراه انت فيه وهذا ليس لعمق وجهة نظرنا أو لقصور فى وجهة نظرك لاسمح الله ولكنه حق الاختلاف المشروع.
ردحذفاييييييييييييييييييييييييييووووووووووووو
ردحذفعليك يا اسلام
قلب قطة
ردحذفانت اسكندرانى ولا اية؟
معايا يعنى ولا ضدى
د اسلام
ردحذفمش انا قلتلك قبل كده خليهم يجيبوا الى يجبوه بس يغير لنا بس الدستور انه كل خمس ست سنين اختار ريس على مزاجي
بسسسسسسسسسسسسسسس
اي قرد بصديري ياعم يعمل كده انا هانتخبه خلاص ؟
وانا فعلا مش عايزاهم كالمستجير من الرمضاء بالنار
بس برضه اوقات يا اخي الواحد يقول اوف بقى مافيش نار لون تاني يا جدعان اهو تغيير برررررررررضه
اهو ناخد شدة الغربال حتى
اما اروح اقرا الجدديد بقى